¹ Klaro ang ginghambay ng Espiritu Santo nga sa ulihi nga mga adlaw ang iban magatalikod sa inda pagtuo sa Dios. Maluluko sinda ng mga tawo nga nagatudlò ning salà nga pagpanudlò nga halin sa mga demonyo nga nagapinusong. ² Ini nga mga tawo hay magapakuno-kuno nga tamà ang inda ginatudlò abir sayod sinda nga salà. Patay na ang inda konsinsya pareho ng napasò sa panit ng plantsa. ³ Magatudlò sinda nga bawal ang mag-asawa, kag may pila nga mga pagkaon da nga ginabawal. Pero ini nga mga pagkaon ginghuman ng Dios para kaunon nga may pagpasalamat ng mga nagatuo kag nakasayod gid ng kamatuuran. ⁴ Kay ang tanan nga ginghuman ng Dios hay maayo, nganì wayà ning bagay nga dapat ginapaindian kundì ginabaton ini nga may pagpasalamat. ⁵ Tungod sa ginahambay ng Dios^a kag sa pangamuyò nga may pagpasalamat, nganì ang tanan nga pagkaon hay puydi na kaunon.

⁶ Kung itudlò mo sa aton mga kauturan dirà ini nga mga bagay nga gingbilin ko sa imo, maayo ka nga miyugserbisyo ni Kristo Hesus. Mintras nagatudlò ka sa inda, napapakusog mo da ang imo pagtuo paagi sa maayo nga mga pagpanudlò parti kay Hesus nga imo ginasunod. ⁷ Likawi ang mga isto-istorya nga wayà puyos nga indì makabulig sa mga tawo sa inda pagsunod sa Dios kag humanhuman lang ng mga tawo. Sanaya ang imo kaugalingon nga magkabuhì sa pagsunod sa kabubut-on ng Dios. ⁸ May puyos ang pagsanay ng aton lawas para mapakusog, pero mas may puyos pa gid kung mapatibay naton ang pagsunod sa kabubut-on ng Dios. Kay kung ini hay aton humanon, sigurado gid nga mapuslan naton ang promisa sa kabuhì niyan kag ang kabuhì sa paabuton. ⁹ Matuod ini kag dapat gid ang tanan hay batunon kag tuuhan. ¹⁰ Nganì nagatiis kag nagatinguhà gid kita nga magpangabuhì sa pagsunod sa kabubut-on ng Dios kay may sigurado kita nga paglaom sa Dios nga buhì nga imaw ang Manluluwas ng tanan nga tawo, kag labi na gid ng mga nagatuo. ¹¹ Itudlò mo kag isugò ini nga mga bagay:

¹² Ayaw magpadaog-daog abir kay sin-o kay batà ka pa, kundì maging maayo ka nga halimbawà sa mga nagatuo kay Kristo: sa paghambay, sa pamatasan, sa paghigugmà, sa pagtuo kag sa malimpyo nga kabuhì. ¹³ Mintras wayà pa ako dirà, gamita ang imo tiyempo sa pagbasa ng Kasulatan sa mga tawo, sa pagwali, kag sa pagpanudlò. ¹⁴ Indì pagpabay-i ang regalo^b nga gingtao sa imo ng Espiritu Santo nang gingtungtong ng mga miyugdumaya ng iglesya ang inda mga kamot kag gingpasayod ng Espiritu Santo kung ano ang imo abilidad. ¹⁵ Hunahuna-a permi ning maayo kag magtinguhà nga humanon ini nga mga bagay agud makità ng tanan ang imo pag-asenso sa pagserbisyo sa Dios. ¹⁶ Bantayan mo ang imo kaugalingon kag ang imo ginatudlò. Kung ipadayon mo ang paghuman ini nga mga bagay, maluwas mo ang imo kaugalingon patì ang mga nagapamatì sa imo.