¹ Ako si Pablo nga naging apostol^a ni Kristo Hesus sunò sa kagustuhan ng Dios. Gingpilì ako para magwali parti sa kabuhì nga gingpromisa nga mababaton paagi sa aton pakig-isa kay Kristo Hesus. ² Nagapangamusta ako sa imo, Timoteo, ikaw nga akon ginahigugmà nga ongà sa pagtuo. Kabay pa nga mabaton mo ang grasya, kaluoy kag katawhayan halin sa Dios nga Amay kag kay Kristo Hesus nga aton Ginoo. ³ Nagapasalamat ako sa Dios nga ginaserbisyuhan ko nga may malimpyo nga konsinsya, pareho ng ginghuman ng akon mga kalulo-lulohan. Permi ko gid ikaw ginadumdom sa akon mga pangamuyò adlaw kag gab-i. ⁴ Nadudumduman ko ang imo pagtangis, nganì gusto ko na gid nga makità ka agud ang akon kalipay hay makumplito. ⁵ Indì ko makalimutan ang imo matutom nga pagtuo pareho ng pagtuo nga igwa una ang imo lula Loyda kag imo nanay Yunis, kag sigurado gid ako nga igwa da ikaw ning tiyad adto nga pagtuo.

⁶ Nganì ginapadumdom ko sa imo, tinguhaa gid nga magamit mo liwat ang abilidad^b nga gingtao ng Dios nga imo nabaton paagi sa pagtungtong ng akon mga kamot. ⁷ Timoteo, ayaw mahadlok kay ang kahadlok hay bukon halin sa Espiritu Santo nga gingtao ng Dios sa aton. Kay ang Espiritu Santo ang ginahalinan ng gahom sa aton pagserbisyo sa Dios kag ang nagabulig sa aton para higugmaon ang mga isigkatawo kag pugungon ang handom ng aton lawas.

⁸ Nganì ayaw mahuyà nga magpamatuod parti sa aton Ginoo o nga ako hay napriso tungod sa iya. Kundì, paagi sa gahom ng Dios nga magapakusog sa imo, magpakig-isa ka sa akon kahugaan tungod sa ginatudlò mo sa Maayo nga Balità:

⁹ Ang Dios ang nagluwas kag nag-agda sa aton kag ginglain kita agud magpalayò kita sa kasal-anan. Gingluwas niya kita bukon sa aton mga nahuman, kundì sunò sa iya plano kag subra nga kabuot. Bago nahuman ang kalibutan, gingplano na niya nga ipakità ini nga kabuot sa aton paagi sa humanon ni Kristo Hesus. ¹⁰ Pero niyan nasayuran ini nga kabuot nang nag-abot si Kristo Hesus nga aton Manluluwas. Gingbuoy niya ang gahom ng kamatayon kag gingpakità sa aton ang kabuhì nga wayà katapusan paagi sa Maayo nga Balità.

¹¹ Ang rason kung basì gingpilì kag gingbutang ako ng Dios nga maging apostol hay para iwali kag itudlò ko ining Maayo nga Balità. ¹² Kag imaw ini ang kabangdanan kung basì natatabò sa akon ang tiyad ini nga mga pagtiis. Pero wayà ko ini ginakahuyà, kay kilaya ko gid ang akon ginasaligan kag sigurado ako nga kaya gid niya mabantayan ang akon gingsalig sa iya^c hasta sa adlaw ng paghusga niya sa mga tawo.

¹³ Mintras nagatudlò ka, sundi ang tamà nga pagpanudlò nga imo nabatian sa akon bilang halimbawà nga may pagtuo sa Dios kag may paghigugmà sa imo isigkatawo, kay ging-isa na kita kay Kristo Hesus. ¹⁴ Paagi sa bulig ng Espiritu Santo nga nagaistar sa aton kabuhì, bantayi gid ang maayo nga ginatudlò nga gingsalig sa imo agud indì ini mailisan.

¹⁵ Sayod mo gid nga gingpabay-an ako ng hayos tanan nga taga-Asya^d, kaibahan sina Pigelo kag Hermoheno. ¹⁶ Kabay pa nga kaluy-an ng Ginoo ang panimayay ni Onesipuro, kay madamò nga beses niya ako gingpakusog. Kag wayà niya ako ginakahuyà maski ako hay napriso. ¹⁷ Pag-abot nganì ni Onesipuro sa Roma, gingpinangità gid niya ako hasta nga ako makità. ¹⁸ Sayod mo gid kung pauno niya ako gingserbisyuhan sa tanan nga paagi sa Efeso. Kabay pa nga taw-an siya ning kaluoy ng Ginoo sa adlaw ng paghusga niya sa mga tawo.