¹ Nganì ikaw, Timoteo nga akon ongà sa pagtuo, magpadayon ka nga matibay sa pagtuo paagi sa bulig ni Kristo Hesus. ² Nabatian mo ang mga gingtudlò ko kag madamò ang makapamatuod nga ang gingtudlò ko hay matuod. Itudlò mo da ini sa mga tawo nga masaligan, nga puydi naman magtudlò sa iban.

³ Maging preparado nga magpakig-isa sa kahugaan tungod sa pagtuo kay Kristo Hesus, pareho ng maayo nga sundalo nga alisto nga nagatiis sa kahugaan. ⁴ Wayà nagalakot ang masaligan nga sundalo sa mga bagay nga ginahuman ng sebilyan, agud mapalipay gid niya ang iya pinunò kay wayà ning abirya sa iya pagserbisyo. ⁵ Ang miyugkanam nga nagalakot sa palumbaan, indì makabaton ning premyo kung indì siya magsunod sa mga patakaran ng pakanam. ⁶ Ang miyugpanguma nga mahugod nga nagatrabaho, siya ang una nga makabaton ng kaparte sa ani. ⁷ Kung hunahuna-on mo ning maayo ang akon ginahambay sa imo, taw-an ka ng Ginoo ning kamayad agud maintindihan mo ang tanan nga akon ginahambay.

⁸ Dumduma si Hesu-Kristo nga nabuhì liwat halin sa mga patay kag siya ang halin sa inapo ni Haring David. Imaw ini ang Maayo nga Balità nga akon ginapasayod. ⁹ Kag tungod sa akon pagwali, nakaagi ako ning kahugaan hasta nga nagapos ako sa prisuhan pareho ng kriminal. Pero ang mensahe ng Dios hay indì magapos. ¹⁰ Nganì ginatiis ko ang tanan para sa kaayuhan ng mga tawo nga gingpilì ng Dios agud makabaton da ning kaluwasan kag maayo nga kabuhì sa langit nga wayà katapusan paagi sa inda pakig-isa kay Kristo Hesus. ¹¹ Ini nga hambayanon hay matuod:

¹⁴ Nganì Timoteo, ipadumdom mo sa mga nagatuo dirà ang akon mga ginghambay, kag paandaman mo sinda sa atubangan ng Dios nga indì magpinangdibati parti sa paggamit ng mga hambay nga wayà ning puyos. Bukon ini maayo, kundì magapatayang lang ng pagtuo ng mga nagapamatì. ¹⁵ Tinguhai gid ang tanan nga imo mahuman agud malipay sa imo ang Dios, bilang miyugserbisyo nga wayà ning ginakahuyà kay ginatudlò mo ning tamà ang mensahe parti sa kamatuuran. ¹⁶ Likawi ang mga pagtinabil nga wayà ning puyos parti sa kalibutanon nga mga bagay kay mas labi nga mapapalayò ang mga tawo sa kagustuhan ng Dios. ¹⁷ Ining pagtinabil ninda, hay pareho ng guyos nga bakukang nga nagasirà ng unod. Kaibahan sa pagpanudlò ng tiyad ini, sina Hemeniyo kag Pileto. ¹⁸ Nagtalikod na sinda sa kamatuuran, kag ginahambay ninda nga natabò na ang pagkabuhì liwat ng mga patay^b kag ginagulo ninda ang pagtuo ng iban.

¹⁹ Pero ang pundasyon^c nga gingbutang ng Dios hay matibay. Sa ini nga pundasyon gingsulat^d ng Dios ini nga hambayanon: “Kilaya ng Ginoo ang mga tawo nga para sa iya” kag “Sa mga nagahambay nga sinda hay nagatuo sa Ginoo, dapat magtalikod sa malain nga mga ginahuman.”

²⁰ Sa mabahoy nga bayay ng manggaranon, igwa ning iba-iba nga klasi nga butangan: ang iban hay himò sa bulawan kag tansò nga ginagamit para sa espisyal nga ukasyon; ang iban hay himò sa kahoy kag mapuya nga dutà nga ginagamit sa pang-adlaw-adlaw. ²¹ Nganì ang abir sin-o nga ginapalayò ang sarili sa mga malain nga ginahuman, imaw ang ginglain para kagamit-gamit sa espisyal nga mga ukasyon kag mapupuslan ng Amo. Siya hay preparado sa paghuman ng abir ano nga maayo. ²² Nganì likawi ang mga malain nga hilig ng mga sultirito. Kag tinguhai ang paghuman ning matarong, ang makusog nga pagtuo sa Dios kag ang paghigugmà sa isigkatawo. Tinguhai da nga may maayo nga relasyon sa mga nagatuo, nga nagasamba sa Ginoo nga malimpyo ang tagipusuon.

²³ Ayaw magpanginanuha ang wayà puyos kag binuang nga diskusyon, kay sayod mo nga ang kadtuan lang ini hay grabi nga pag-inaway. ²⁴ Kay ang miyugserbisyo ng Ginoo^e indì dapat magpakig-away, kundì siya hay dapat mabuot sa tanan, maabilidad sa pagpanudlò kag mapinasinsyahon. ²⁵ Kahinangyan madahan niya nga ginalaygayan ang mga nagakuntra sa iya, basì pa nga tugutan ng Dios nga sinda hay magtalikod sa kasal-anan kag makasayod sa kamatuuran. ²⁶ Kung tiyad ini ang matabò, magahayag ang inda kaisipan kag makahalin sinda sa siod ni Satanas nga nagbihag sa inda para humanon ang iya gusto.