¹ Niyan, kamo nga mga babayi, dapat magpasakop kamo sa indo mga asawa, agud abir ang indo mga asawa wayà nagatuo sa hambay ng Dios, madaya nindo sinda para magtuo sa Ginoo paagi sa indo maayo nga pamatasan bisan indì na kamo maghambay nga dapat sinda magtuo. ² Kay nakikità ninda ang indo pagtahod kag pagsunod sa Dios kag ang indo pamatasan nga wayà ning kasawayan. ³ Indì kamo magpagwapa sa pangluwas lang pareho sa subra nga pagpakaayo ng buhok, pagbutang ning mga alahas nga bulawan, o pagsuksok ning kamahay-mahay nga mga barò, ⁴ kundì pagwapahon nindo ang suyod ng indo pagkatawo, ang maayo nga pamatasan nga wayà gid nagabag-o. Maging mapainubuson kamo kag maging mabuot, imaw ini ang kaayo-ayo kag importante sa panirò ng Dios. ⁵ Kag imaw ini ang ginghuman ng diosnanon nga mga babayi nga nagasalig sa Dios nang una. Nagpagwapa sinda paagi sa inda pagpasakop sa inda mga asawa. ⁶ Pareho ni Sara, gingtuman niya si Abraham kag ginatawag niya nga ‘amo’. Kamo hay maging pareho ni Sara, kung maayo ang indo ginahuman kag indì kamo magkahadlok sa bisan ano.

⁷ Kamo naman nga mga lyaki, tahura nindo ang indo mga asawa. Dapat tratuhon nindo sunò sa indo maayo nga pang-intindi. Ingati sinda bilang mga babayi nga mas maluya kaysa sa indo. Kay gingtaw-an da sinda ng Dios sunò sa iya kaatag ning kabuhì nga wayà katapusan pareho sa indo. Himua nindo ini agud sabaton ng Dios ang indo mga pangamuyò.

⁸ Niyan, igwa pa ako ning bilin sa indo tanan: dapat magkaisa kamo sa indo hunahunà kag nababatyagan sa isa kag isa. Maghigugmaanan kamo bilang mag-utod. Maging mabuot kamo kag maging mapainubuson sa isa kag isa. ⁹ Indì nindo pagbayusan ning malain ang nagahuman ning malain sa indo, kag indì da nindo pagbayusan ning insulto ang nagainsulto sa indo. Kundì dapat pakamaayuhon nindo sinda, tungod nga gingpilì kamo ng Dios sa paghuman ini, kag agud pakamaayuhon da niya kamo. ¹⁰ Kay nakasulat sa Kasulatan,

¹³ Sin-o ba ang magahuman sa indo ning malain kung kamo hay nagatinguhà permi sa paghuman ning maayo? ¹⁴ Pero kung pasakitan kamo tungod sa indo ginahuman nga maayo, pakamaayuhon gid kamo. Ayaw kamo magkahadlok o magkalibog kung ano ang inda humanon sa indo. ¹⁵ Kundì sa indo tagipusuon, si Kristo ang dapat gid nindo tahuron kag sundon bilang indo amo. Dapat preparado kamo permi nga mag-isplikar sa abir sin-o nga nagapangutana sa indo parti sa indo paglaom. ¹⁶ Sabata nindo sinda sa madahan nga paagi kag may pagtahod. Siguraduhon nindo nga permi malimpyo ang indo konsinsya, agud mapahuyà ang mga tawo nga nagapang-insulto sa maayo nindo nga pamatasan bilang mga tagasunod ni Kristo. ¹⁷ Mas maayo pa nga magtiis kamo sa pasakit tungod sa indo ginahuman nga maayo, kung imaw gida inà ang kabubut-on ng Dios, kaysa magtiis kamo sa pasakit tungod sa paghuman ning malain. ¹⁸ Kay si Kristo nganì gingpatay bisan wayà siya nakahuman ning malain. Kag kaisa lang gid siya namatay agud mapatawad ang aton mga salà. Siya nga wayà ning salà hay gingpatay para sa aton nga makasasalà agud madaya niya kita sa Dios. Gingpatay siya sa lawas, pero gingbuhì siya sa espiritu. ¹⁹ Sa bag-o nga lawas, nagkadto si Kristo kag may gingbalità siya^a sa mga espiritu nga nakakulong^b. ²⁰ Inà ang mga espiritu nga dati hay wayà nagsunod sa Dios. Nagahuyat ang Dios sa tiyempo ni Noe, mintras ginahuman niya ang arka, kung sa diin pila lang ka tawo -- wayo lang ang nakaluwas sa tubì. ²¹ Ang tubì ang halimbawà ng pagbawtismo sa aton niyan. Kag ini nga bawtismo imaw ang nakaluwas sa aton paagi sa pagkabuhì liwat ni Hesu-Kristo. Bukon ini paghugas ng higkò sa aton lawas, kundì nagapromisa kita sa Dios nga indì na kita maghuman ning mga butang nga nasayuran ta nga indì niya gusto. ²² Si Hesu-Kristo yadto na niyan sa langit, sa tuo hampig ng Dios^c kag gingpasakop sa iya ang tanan nga anghel kag ang tanan nga espiritu nga may otoridad kag gahom.