¹ Nagsulat kami sa indo parti sa iya nga ginatawag ang Hambay^a, nga ginahalinan ng kabuhì nga wayà katapusan. Bago pa nagtunà ang tanan, ini nga Hambay hay yarà na, pero niyan nagpakità siya bilang tawo. Nakità ng amon mga mata kag nabatian namon siya nang nagatudlò. Bukon lang naobserbahan kundì nahawiran pa ng amon mga kamot. ² Matuod gid, nagpakità siya bilang tawo kag siya ang nagatao ning kabuhì. Nakità namon siya kag ginapamatuuran namon sa indo. Kag ginapasayod sa indo ang parti sa iya nga nagakabuhì nga wayà katapusan. Bago nagtunà ang tanan, kaibahan na siya ng Dios nga Amay pero niyan nagpakità bilang tawo sa amon. ³ Nganì ginapasayod namon sa indo ang parti kay Hesus nga amon nakità kag nabatian para magpakig-isa kamo sa amon, imaw ini ang pakig-isa naton sa Dios nga Amay kag sa iya Ongà nga si Hesu-Kristo. ⁴ Ginasulat namon ini nga mga bagay agud ang aton kalipay hay makumplito.

⁵ Imaw ini nga mensahe nga amon nabatian kay Hesus kag ginapasayod namon sa indo nga ang Dios hay kahayag kag wayà gid ning kaduyom sa iya. ⁶ Nganì kung maghambay kita nga nagapakig-isa kita sa Dios pero nagakabuhì gihapon kita sa kaduyom, nagapinusong kita kay nagapadayon kita sa kasal-anan. Kag wayà kita nagakabuhì sunò sa kamatuuran. ⁷ Pero kung nagakabuhì kita ning maayo kag malimpyo hay nagapanaw kita sa kahayag, pareho ng Dios nga yarà sa kahayag, kita hay nagapakig-isa kag ang dugò ni Hesus nga Ongà ng Dios ang nagalimpyo sa aton sa kada kasal-anan.

⁸ Kung maghambay kita nga wayà kita ning kasal-anan, ginadayà naton ang aton kaugalingon kag wayà gid naton naiintindihi ang kamatuuran parti sa kasal-anan nga ginapasayod ng Dios. ⁹ Pero kung mag-akò kita sa aton mga kasal-anan, patawaron niya ang aton mga salà. Kay siya hay masaligan sa iya gingpromisa kag tamà ang iya ginahuman, nganì limpyuhon niya kita sa tanan nga nahuman nga bukon matarong. ¹⁰ Kung kita naghambay nga wayà kita nagakasalà, ginahuman naton nga pusong ang Dios. Pag tiyad ini, wayà gid naton ginabatuna ang iya hambay.