¹ Mga ongà ko sa pagtuo, ginasulat ko ini nga mga bagay sa indo agud indì kamo magkasalà. Pero kung magkasalà ang abir sin-o, may nagaapin sa aton sa atubangan ng Dios nga Amay. Ini hay si Hesu-Kristo nga imaw lang ang matarong. ² Kay siya ang sakripisyo para sa kapatawaran ng aton mga kasal-anan kag imaw da sa salà ng tanan nga tawo.

³ Kag paagi diri, sigurado gid kita nga may madayom nga relasyon kita sa Dios, kung ginatuman naton ang iya mga sugò. ⁴ Ang nagahambay nga siya hay may madayom nga relasyon sa Dios pero wayà naman nagatuman sa iya mga sugò, hay bakakon kag wayà gid niya naiintindihi ang kamatuuran nga ginapasayod ng Dios. ⁵ Pero ang abir sin-o nga nagatuman sa hambay ng Dios, matuod gid nga perpikto ang iya paghigugmà sa Dios. Diri naton masasayuran nga nagapakig-isa kita sa Dios: ⁶ ang abir sin-o nga nagahambay nga siya hay nagapadayon nga nagapakig-isa sa Dios, dapat magkabuhì pareho da sa pagkabuhì ni Hesu-Kristo.

⁷ Mga pinalanggà ko, gingsulat ko sa indo ang parti sa sugò ni Kristo. Ini hay bukon bag-o, kundì ang dati nga sugò nga yarà na sa indo tunà pa nang nagtuo kamo kay Kristo. Ining dati nga sugò nga indo nabatian hay ang maghigugmaanan. ⁸ Pero mahahambay ko nga bag-o da ini kay nakità ang paghigugmà sa kabuhì ni Kristo sa kauna-unahan kag niyan nakikità patì sa indo kung sa diin naduduyà na ang mga kalainan kag nagahayag na ang maayo nga kabuhì sa indo.

⁹ Ang nagasiling nga siya hay nagakabuhì sa kahayag, pero nagatanom ning kahangit sa iya utod kay Kristo, siya hay nagapadayon gihapon sa kasal-anan pareho ng nagakabuhì sa kaduyom. ¹⁰ Ang permi nagahigugmà sa iya utod kay Kristo, siya hay nagapadayon sa pagkabuhì sa kahayag kag wayà ning bisan ano nga maging kabangdanan nga siya makasalà. ¹¹ Pero ang nagatanom ning kahangit sa iya utod kay Kristo, siya hay nagakabuhì sa kasal-anan. Ini hay pareho ng tawo nga nagapanaw sa kaduyom kag wayà kasayod kung sa diin siya makadto kay ang iya mata indì makakità sa kaduyom.

¹⁵ Ayaw nindo pagpalabiha ang mga paagi nga kuntra sa kagustuhan ng Dios kag ang mga bagay nga yari sa kalibutan. Kay kung ang abir sin-o ang nagahigugmà diri hay wayà nagahigugmà sa Dios nga Amay. ¹⁶ Kay ang tanan nga malain nga mga paagi nga yari diri hay bukon halin sa Dios nga Amay, kundì sa kalibutan lang. Ini hay ang malaw-ay nga ginahandom ng lawas, ang ginahingabot nga maging inda pagmakità ng inda mata kag ang ginapahambog nga mga manggad sa kabuhì ng mga tawo. ¹⁷ Matatapos ang kalibutan kag ang tanan nga malain nga handom nga ginakawilihan diri, pero ang nagasunod sa kagustuhan ng Dios hay mabubuhì sa wayà katapusan.

¹⁸ Mga ongà ko sa pagtuo, gingtudluan kamo nga kung mag-abot ang Nagakuntra kay Kristo, malapit na ang katapusan ng kalibutan. Abir arinyan hay madamò na ang aton nakikità nga mga nagakuntra kay Kristo, nganì sayod naton nga malapit na ang katapusan. ¹⁹ Abir sinda dati naton nga kaibahan, bukon naton sinda matuod nga kaisa kay kung matuod naton nga kaisa sinda, kaibahan kuntà gihapon naton sinda. Pero naghalin sinda kag ini hay nagapamatuod nga tanan sinda bukon naton kaisa. ²⁰ Pero kamo gid hay gingtaw-an ng Dios nga banal ning Espiritu Santo, nganì kamo tanan hay nakakaintindi ng kamatuuran nga gingtudlò sa indo. ²¹ Nagasulat ako sa indo indì mahambay nga wayà kamo nakakasayod ng kamatuuran nga gingtudlò sa indo. Sayod gid nindo ini kag sayod da nindo nga wayà ning pinusong nga nagahalin sa kamatuuran. ²² Sin-o ang nagapinusong? Wayà ning iban kundì ang abir sin-o nga wayà nagakilaya kay Hesus nga gingpromisa nga Kristo^b. Imaw ini ang nagakuntra kay Kristo, ang wayà nagakilaya sa Dios nga Amay kag sa iya Ongà nga si Hesus. ²³ Ang abir sin-o nga wayà nagakilaya sa Ongà ng Dios hay wayà da madayom nga relasyon sa Dios nga Amay. Ang abir sin-o nga nagabaton sa Ongà ng Dios sa atubangan ng mga tawo hay may madayom da nga relasyon sa Dios nga Amay. ²⁴ Nganì kamo, itanom gid sa isip ang mga gingtudlò sa indo tunà pa nang nagtuo kamo. Kung tiyad ini, magapabilin kamo sa pakig-isa sa Ongà ng Dios kag sa iya Amay. ²⁵ Kag ang kabuhì nga wayà katapusan, imaw gid ang gingpangakò ng Dios sa aton.

²⁶ Ginasulat ko ini sa indo para paandaman kamo parti sa mga gusto mangtayang sa indo. ²⁷ Pero kamo gid hay gingtaw-an ning Espiritu Santo halin sa Dios kag mintras magapabilin siya sa pakig-isa sa indo, indì na kahinangyan ang iba pa nga magtudlò sa indo ning tamà kuno nga pagpanudlò. Kay ang Espiritu Santo imaw ang nagatudlò sa indo ng tanan nga kamatuuran nga kahinangyan nindo masayuran kag ang iya ginatudlò hay matuod bukon pinusong. Nganì pareho ng iya ginatudlò, magpabilin kamo sa pakig-isa kay Kristo.

²⁸ Niyan mga ongà ko sa pagtuo, magpabilin kamo sa pakig-isa kay Kristo agud indì kita mahadlok kag mahuyà kung siya magbalik sa kalibutan. ²⁹ Kung sayod nindo nga siya hay matarong, dapat da nindo masayuran nga ang abir sin-o nga nagahuman ning matarong hay gingtaw-an ning bag-o nga kabuhì halin sa Dios.