¹ Isipon nindo kung mauno kadakò ang paghigugmà sa aton ng Dios nga Amay! Ginabaton niya kita nga mga ongà niya kag imaw gid inà ang matuod. Pero wayà kita ginakilay-a ng mga tawo nga wayà relasyon sa Dios, kay wayà ninda nakilaya kung sin-o ang Dios. ² Mga pinalanggà ko, niyan hay mga ongà na kita ng Dios, pero wayà pa gingpasayod sa aton kung maging ano kita sa ulihi. Pero sayod naton sa pagbalik liwat ni Kristo, kita hay maging kapareho niya kay makikità naton kung mauno gid siya nga kahimayà. ³ Nganì ang abir sin-o nga may paglaom nga maging kapareho kay Kristo hay nagapadayon nga limpyo paagi sa pagpalayò sa salà, pareho ni Kristo nga malimpyo.

⁴ Ang bisan sin-o nga nagapinakasalà hay nagarebeldi sa Dios, kay ang pagpinakasalà hay pagkabuhì sa pagrebeldi sa Dios. ⁵ Pero nasayuran nindo nagkari si Hesus sa kalibutan agud buy-on ang aton mga salà kay siya wayà gid salà. ⁶ Nganì ang bisan sin-o nga nagapabilin sa pakig-isa sa iya, dapat indì magpinakasalà. Ang abir sin-o nga nagapinakasalà hay wayà makaintindi kung sin-o si Hesus o wayà ning madayom nga relasyon sa iya.

⁷ Mga ongà ko sa pagtuo, indì kamo magpaluko abir kanin-o! Kay ang abir sin-o nga nagahuman ning tamà hay ginabilang ng Dios nga matarong, pareho ni Kristo nga matarong. ⁸ Pero ang abir sin-o nga nagapakasalà hay sa Diyablo^a kay tunà pa nang una, nagpakasalà na siya. Kag nagkari sa kalibutan ang Ongà ng Dios para mawayà na ang mga himò ng Diyablo. ⁹ Ang abir sin-o nga gingtaw-an ning bag-o nga kabuhì halin sa Dios hay wayà nagapadayon sa salà, kay igwa siya ning kinaugalì nga pareho sa Dios. Imposibli nga magapadayon pa siya sa salà, kay gingtaw-an siya ning bag-o nga kabuhì halin sa Dios. ¹⁰ Diri naton makikilaya kung sin-o ang mga ongà ng Dios kag kung sin-o ang mga ongà ng Diyablo: ang abir sin-o nga wayà nagahuman ning matarong kag wayà nagahigugmà sa iya utod kay Kristo hay bukon ongà ng Dios.

¹¹ Imaw ini ang sugò nga nabatian nindo tunà pa nang nagtuo kamo: maghigugmaanan kita. ¹² Indì naton dapat patuyaran si Kain nga ging-ulipon ni Satanas. Ang resulta gingpatay niya ang iya manghod. Kag basì niya gingpatay? Kay puro malain ang iya mga nahuman pero matarong ang mga nahuman ni Abel.^{b 13} Nganì mga kauturan ko kay Kristo, indì kamo matingaya kung nagatanom da ning kahangit sa indo ang mga tawo nga wayà relasyon sa Dios. ¹⁴ Nasayuran naton nga gingsaylo na kita halin sa kamatayon^c pakadto sa bag-o nga kabuhì halin sa Dios, kay ginahigugmà naton ang mga kauturan. Ang wayà nagahigugmà hay nagapabilin sa kamatayon. ¹⁵ Ang abir sin-o nga nagatanom ning kahangit sa iya utod kay Kristo hay ginabilang ng Dios nga nagapangpatay. Kag nasayuran nindo nga ang bag-o nga kabuhì nga wayà katapusan nga halin sa Dios hay wayà sa nagapangpatay.

¹⁶ Diri naton makikilaya ang matuod nga paghigugmà: gingsakripisyo ni Hesus ang iya kabuhì para sa aton. Nganì indì da kita maglikaw sa kahugaan abir pa isakripisyo naton ang aton kabuhì para magbulig sa mga kauturan. ¹⁷ Halimbawà, ang abir sin-o nga may kaya sa kabuhì diri sa kalibutan kag nakità niya ang iya utod kay Kristo nga nagakahinangyan, pero wayà niya ini kaluy-i para buligan, pauno niya mahambay nga nagahigugmà siya sa Dios?

¹⁸ Mga ongà ko sa pagtuo, indì lang kita maghigugmà paagi sa hambay o sa babà, kundì ipakità naton ang matuod nga paghigugmà paagi sa himò. ¹⁹ Paghumanon naton ini, makikilaya nga nagasunod kita sa kamatuuran nga halin sa Dios. Tapos matawhay ang aton konsinsya pag magpalapit kita sa Dios. ²⁰ Pero abir husgahan man kita ng aton konsinsya kay bukon matuod ang aton paghigugmà, dapat naton dumdumon nga mas sayod ng Dios kaysa sa aton nasayuran sa aton konsinsya kay sayod niya ang tanan.

²¹ Mga pinalanggà ko, kung wayà kita ginakonsinsya, indì kita mahadlok nga makapalapit sa Dios. ²² Mababaton naton ang bisan ano nga ginapangayò naton sa iya, kay ginatuman naton ang iya mga sugò kag ginahuman ang makapalipay sa iya. ²³ Ini ang iya mga sugò: dapat magtuo kita sa iya Ongà nga si Hesu-Kristo^d kag maghigugmaanan kita, pareho ng ginasugò ni Hesus sa aton. ²⁴ Ang abir sin-o nga nagasunod sa mga sugò ng Dios hay nagapabilin sa pakig-isa sa Dios kag imaw da ang Dios sa iya. Kay gingtao niya sa aton ang Espiritu Santo, nasayuran naton nga nagapabilin sa pakig-isa ang Dios sa aton.