4 Ye yi, bo kpɔn osɔkɛtɛvi ɖe le okan mɛ le omɔ ji le agbo ɖe we aha. Ye bo tun-i. 5 Ɛmɛ xeye ni le blɛ laye we ɖeye lɔ na ye tun mɔ: «Ɛlɛ nyi e mɛ na mi wasi nɔ? Ɛlɛ jɔ mi do tun osɔkɛtɛvi mɛ la nɔ?» 6 Ye bo ɖo e wu ɖi lena Yesu lɔ-ɛ ɖo ha. Ɛmɛ laye bo jo ye do, ye bo sɔn. 7 Ye hɛn osɔkɛtɛvi la va na Yesu, bo fɔ awu yetɔnye do e ji, Yesu bo xɛ e ji. 8 Ɛmɛ susu tɛ awu yetɔnye do omɔ la ji nɔ, ɛmɛ ɖeye bo tɛ ama xeye na ye gbo le nugyoye do omɔ la ji. 9 Ɛmɛ xeye ni le ŋukɔn kpodo ɛmɛ xeye ni le godo na Yesu ye, bo do axwa nɔ tun mɔ: «Gigo na Mawu! Mawu ni do na ɛmɛ xeni gbɔn nɔ le Xwetɔ la we nyikɔ mɛ! 10 Mawu ni do na Xɔluɖuɖu xeni gbɔn nɔ la, Davidi mía dagbwa we Xɔluɖuɖu la! Gigo na Mawu le jiŋukunsin!» 11 Yesu ɖyɛ Mawu we oxwe la gbe le Jeluzalɛmu. Xena e sa ŋukunsin bo kpɔn onu zɛtɛye vɔ, e sɔn yi Betani, emyɔ kpodo onukplanvi weve laye, ɖo, ozan o lo do nɔ.

12 Onyihinhɔngbe etɔn, hwexenu na ye lo tɔn le Betani we otota mɛ nɔ, xovɛ ci Yesu. 13 E kpɔn figitin ɖe ɖodan, amaye bo le e ji, e bo zɔn yi e kɔn nɔ, a do kpɔn tun sinsyɛn ɖe na le e ji jaa. Xena e tɛkpɔ-ɛ, amaye kɛɖɛ jan wɛ e kpɔn, ɖo, e ɔn nyi figi we hwenu. 14 Mi wɛ Yesu lɔ na figitin la tun mɔ: «Ɛmɛ ti ɔn na mɔ ɖu sinsyɛn tɔweye kpɔn gbeɖe o!» Onukplanvi etɔnye bo se oxo mɛ la.

15 Ye va Jeluzalɛmu. Xena Yesu ɖyɛ Mawu we oxwe la gbe, e jɛ ɛmɛ xeye ni sa onu nɔ ye kpodo ɛmɛ xeye ni xɔ onu nɔ ye nyinya ji; e fli ɛmɛ xeye ni nɔ cɛ oho nɔ ye we tavoye, kpodo hɔnnɛ satɔye we okpoye, 16 e ko jo ɛmɛ ti do na e gbɔn oxwe la gbe va yi kpodo agban ɖe. 17 Mi wɛ e kplan onuye nɔ, bo lɔ na ye tun mɔ: «Ye ɔn wlan tun “oxwe tɛye na nyi ɛɖɛxoxwe na otogun zɛtɛye wɛɛ”? Vɔ, miye mi sɔ do ɖo jagudaye we okplityɔn.» 18 Ovɔsantɔ ɖaxoye kpodo osɛnkplan-ɛmɛtɔye se oxo mɛ la, bo kan ayixa nɔ a do hu-i. Vɔ, ye bo vɔ-ɛ nɔ, ɖo, onukpinkplan etɔn nɔ jɛŋu na ɛmɛ zɛtɛye. 19 Xena hwedo do, Yesu kpodo onukplanvi etɔnye tɔn le toxo la mɛ.

20 Hwexenu na ye va yi nɔ le kɛklɛnu, ye kpɔn figitin la xu gbɔɔn do yi ogun nu. 21 Piyɛ ɖoŋudo onu xeni jɔ la wu, bo lɔ na Yesu tun mɔ: «Hlabi, kpɔn, figitin xena o do onu la, e xu.» 22 Yesu ɖo e wu na ye tun mɔ: «Mi kan do Mawu ji. 23 Le oxojɔxo mɛ ko lo lɔ na mi nɔ, na ɛmɛ ɖe lɔ na okpó xe tun mɔ: “Kɔ ɖiwe tɛ le blɛ a bo va yi jɛ ɛxu mɛ”, ɛmɛ la ko xo kpɔn le oji etɔn mɛ, vɔ, bo kan do e ji tun oxo xena e lo lɔ nɔ bo na jɔ, e na jɔ ɖo mɔsinha ni-i. 24 Mi wɛ dɔn ko lo lɔ na mi nɔ tun mɔ: onu ɖekpekpe xena mi na byɔ le ɛɖɛxixo mɛ, mi kan do e ji tun miye bo yi-i, e bo na nyi sisɔ na mi. 25 Hwexenu na mi le ote bo lo xo ɛɖɛ nɔ, na mi ɖo onu ɖe do kpan ŋukɔn ɛmɛ ɖe, mi sɔ kɛ-ɛ, e mɛ, miatɔ xeni le jiŋukunsin ba sɔ ɛhwɛ miatɔnye can sɔ kɛ mi. [ 26 Vɔ, na mi ɔn sɔ ɛhwɛ sɔ kɛ ɛmɛ gbokpweye, miatɔ xeni le jiŋukunsin ɔn sɔ ɛhwɛ miatɔnye can sɔ kɛ mi nɔ o.]^a»

27 Ye trɔ va Jeluzalɛmu we toxo mɛ. Yesu lo yi nɔ bo gbɔn nɔ le Mawu we oxwe la gbe, ovɔsantɔ ɖaxo Mawutɔnye, osɛnkplan-ɛmɛtɔye kpodo otomɛhyɔnye, bo tɛkpɔ-ɛ. 28 Ye kan-ɛ se tun mɔ: «Ɛcɛ ŋukɔ lɛ o nɔ do wasi onu mɛ ye, alo onu lɛ na we ɛcɛ mɛ la?» 29 Yesu ɖo e wu na ye tun mɔ: «Ma kan oxo ɖokpo gee mi se, mi ba ɖo e wu na-a, e mɛ, ko na lɔ ɛcɛ xena ko do wasi onu mɛ laye nɔ na mi. 30 Onu lɛ dɔn Jan ɖodan tun ni boo va yi lɛ Mawu we ɛsin na ɛmɛye? Mawu wɛ loo alo ɛgbɛtɔye wɛɛ? Mi ɖo e wu na-a.» 31 Vɔ, ye bo jɛ lilɔ na yenɔniɔye ji tun mɔ: «Na mí lɔ tun Mawu wɛ, e na kan mí se tun mɔ, ɛlɛ jɔ na mí ɔn do kan do e ji jaa? 32 Vɔ ɖe, ɛgbɛtɔye kɔn wɛ mí na lɔ tun e bo sɔn?...» Ye vɔ ɛmɛye nɔ, ɖo, ɛmɛ zɛtɛye susu-i ganji tun Jan bo nyi Mawu we oxolɔɖonyitɔ oxojɔxo. 33 Mi wɛ ye gbɔjwɛ ɖo e wu na Yesu tun mɔ: «Mí ɔn nyɔ». Yesu bo lɔ na ye tun mɔ: «Mɔ can, ko ɔn lɔ ɛmɛ xeni na-a ɛcɛ, na ko do wasi onu mɛ laye na mi nɔ.»