3 Yesu le Betani we otota mɛ, le Simɔ xeni jɛ okpodɔn saa we oxwegbe. Mi wɛ hwexenu na e yi tɛnxo a do ɖu onu, nyɔnu ɖe va tɔn, bo hɛn ogo xena ye sɔ ɛkpɛn owee do wasi, do asi, celu ohovivɛtɔn xena ye sɔ nalu adodwe do wasi bo gɔ-ɛ. Nyɔnu la fo ogo la we nutwi, bo ɖɔli celu la do ota na Yesu. 4 E ɔn jɛ e ji na ɛmɛ xeye ni le blɛ we ɖeye, ye bo lɔ na yenɔniɔye nɔ tun mɔ: «Ɛlɛ jɔ na celu mɛ na do la ɛmɛ ɖo mɔsinha? 5 Ye hɛn, ye na sa celu mɛ, a bo yi oho hugan ohogan^a sandi atɔn (300), ye ba sɔ ma na ayanɔye!» Ye bo gbɛ onu na nyɔnu la kpodo ŋukunsin bibya. 6 Vɔ, Yesu lɔ tun mɔ: «Mi jo-e do xwii. Ɛlɛ jɔ mi do do hannu ni-i nɔ. Onu nywɛ wɛ e wasi na-a. 7 Ɖo, ayanɔye le mia kɔn tɛgbɛ, hwexenu na mi jlo, mi na wasi onywɛ na ye, vɔ mɔ, ko ɔn nɔ mia kɔn nɔ tɛgbɛ o. 8 E wasi onu xe wu na e kpe, e hu celu na agbaza tɛye, a do jla-a ɖo ɖo onyi na ɖiɖi zangbe. 9 Le oxojɔxo mɛ, ko lo lɔ na mi nɔ, ofi ɖekpekpe xena ye na jla Ɛwɛn Nywɛ la le le ɛgbɛ la mɛ seŋu, ye na lɔ onu xena e wasi can, a bo do ɖoŋudo nahwe xe la wu.»

10 Yuda Isikalyɔtu, xeni nyi ɛmɛ ɖokpo le onukplanvi weve laye mɛ, va yi kpɔn ovɔsantɔ ɖaxo Mawutɔnye, a do sɔ Yesu sɔ do alɔ mɛ na ye. 11 Ye se oxo etɔn kpodo jijwɛ, ye bo xo ogbe ni-i tun heye bo na tu oho ni-i. Yuda bo jɛ ayixa kinkan ji, a do kpɔn omɔ, a bo do sɔ Yesu la sɔ jo na ye.

12 Kpɔnnɔ ma ɖo tinkɛn we oxwe la we azan tantyan gbe, azan xe gbe na ye ɖo na hu lɛngbɔviye na Vivayi we oxwe we onuɖuɖu la, Yesu we onukplanviye kan-ɛ se tun mɔ: «Bɔ lɛ o jlo tun mí a va yi ɖa Vivayi we oxwe we onuɖuɖu la na we le?» 13 Yesu dɔn onukplanvi etɔn owe ɖodan, bo lɔ na ye tun mɔ: «Mi yi toxo la mɛ, dahwe ɖe na va kpe mi, e bo hɛn ɛsinzɛn do ota. Mi kplɔ-ɛ do, 14 mi wɛ ofi xena e na ɖyɛ, mi lɔ na ɛmɛ xeni kpa ɛcɛ na oxwe la tun mɔ: “Onukplan-ɛmɛtɔ la kan we se nɔ tun bɔ lɛ oxɔ xe mɛ na he na ɖu Vivayi we oxwe we onuɖuɖu la kpodo onukplanvi hetɛyee le jaa?” 15 E bo na sɔ oxɔ ɖaxo ɖe xena ye o jla ɖo sɔ xlɛ mi le sanŋu ji, ye bo o to onu xeni hyan zɛtɛye do e mɛ. Blɛ la wɛ mi na ɖa onuɖuɖu la le na mí.» 16 Onukplanvi laye yi, bo ɖyɛ toxo la mɛ, bo kpɔn onu zɛtɛye ɖi lena Yesu lɔ na ye ɖo ha, ye bo ɖa Vivayi we oxwe we onuɖuɖu la.

17 Xena hwedo do, Yesu kpodo onukplanvi weve laye va. 18 Hwexenu na ye yi tɛnxo bo lo ɖu onu nɔ, Yesu lɔ tun mɔ: «Le oxojɔxo mɛ ko lo lɔ na mi nɔ, mia domɛtɔ ɖokpo, xeni lo ɖu onu kpo-o nɔ, na sɔ-ɔ sɔ sa.» 19 Ye jɛ onulilo ji, bo kan-ɛ se nɔ ɖe kplɔ ɖe do tun mɔ: «Mɔ wɛɛ?» 20 E lɔ na ye tun mɔ: «Ɛmɛ ɖokpo wɛ le mi ɛmɛ weve laye mɛ, e bo lo do alɔ onuɖuka ɖokpo mɛ kpo-o nɔ. 21 Oxojɔxo wɛ, Ɛgbɛtɔ we Ovi la na ku ɖi lena ye wlan do e wu ɖo ha, vɔ, babaa na ɛmɛ xe we alɔ mɛ na Ɛgbɛtɔ we Ovi la, na nyi sisa gbɔn! Ɛmɛ mɛ la, ye do dokpo ma ji wɛ, e na nyɔ ni-i hugan.»

22 Hwexenu na ye lo ɖu onu nɔ, Yesu sɔ kpɔnnɔ, xena e do ɛkpɛ na Mawu do e ji vɔ, e ma-ɛ, bo sɔ na onukplanvi etɔnye, bo lɔ tun mɔ: «Mi yi, xe la wɛ nyi agbaza tɛye.» 23 E mɛ godo, e sɔ kɔkpo xe mɛ na vɛn le, bo do ɛkpɛ na Mawu do e ji, bo sɔ na ye, ye ɛmɛ zɛtɛye seŋu bo nu-i. 24 Mi wɛ e lɔ na ye tun mɔ: «Xe la wɛ nyi ɛhun tɛye, mi wɛ Mawu do wasi okancica. Ɛhun la wɛ ye na kɔn ɖo onyi do ota na ɛmɛ susu. 25 Le oxojɔxo mɛ, ko lo lɔ na mi nɔ, ko ɔn mɔ nu vɛn ɖe nɔ kpɔn gbeɖe gbɔɔn do yi hwexenu na ko na mɔ va nu vɛn yɔyɔ le Mawu we Xɔluɖuɖu mɛ.» 26 Xena ye ji Vivayi we oxwe we ohanye vɔ, ye sɔn yi okpó xe ji na olivutinye le.

27 Yesu lɔ na onukplanvi etɔnye tun mɔ: «Mi ɛmɛ zɛtɛye na gbɛ-ɔ, ɖo ye wlan le Mawu we oxo la mɛ tun mɔ: “Ko na hu ogbɔkplɔtɔ la, lɛngbɔ laye bo na gbado.” 28 Vɔ, na ko fɔn sɔn oku vɔ, ko na va tre kpɔn mi le Galile we kansin mɛ.» 29 Piyɛ bo lɔ ni-i tun mɔ: «Ɛmɛ zɛtɛye na mɔ do gbɛ we can, mɔ ko ɔn gbɛ we nɔ o.» 30 Yesu lɔ ni-i tun mɔ: «Le oxojɔxo mɛ, ko lo lɔ na we nɔ, egbe, le ozan xe mɛ ŋutɔ can, gbɔxwe goklo na do atan zɔn owe, o na lɔ zɔn atɔn kpetyo tun he bo ɔn nyɔ mɔ.» 31 Vɔ, Piyɛ mɔ tɛ ɛɖɛ e ji vivɛɖe tun mɔ: «Ko na mɔ do ku kpo we can, ko ɔn lɔ nɔ gbeɖe tun ko bo ɔn nyɔ we o.» Onukplanvi gbokpweye can bo lɔ mɔsinha.

32 Ye va yi jɛ ofi xena ye nɔ yɔ tun Jɛtisemanɛ, e bo lɔ na onukplanvi etɔnye tun mɔ: «Mi xlɔn onyi le bwɛ, na ma va yi xo ɛɖɛ.» 33 E kplɔ Piyɛ, Jaki kpodo Jan do sɔn. Vivɔfun bo nyi-i, ota bo bla ahwan ni-i, 34 e bo lɔ na ye tun mɔ: «Ko le onulilo mɛ gbɔɔn bo ka ku nɔ. Mi nɔ bwɛ, a bo nɔ ŋuzɔn.» 35 Mi wɛ, e dun yi ŋukɔn viɖe, bo cɔn ŋumɛ onyi, bo xo ɛɖɛ nɔ, e mɛ, na e na do kpewu jɛ e ji wɛ, e ko mɔ gbɔn vivɛsise we oganxixo mɛ la mɛ nɔ. 36 E bo lɔ nɔ tun mɔ: «Aba^b, Didaye vivɛna, o kpe onu zɛtɛye wu, dɔn vivɛsise we kɔkpo xe la tɛ le wu ye. Ganke, ká wasi onu xena ko jlo, vɔ, wasi ojlo tɔwe.» 37 E trɔ va, bo kpɔn onukplanvi atɔn laye le awlɔn mɛ. E bo lɔ na Piyɛ tun mɔ: «Simɔ, o dɔ awlɔn nɔ wɛɛ? O ɔn kpewu nɔ ŋuzɔn na oganxixo ɖokpo can! 38 Mi nɔ ŋuzɔn, a bo xo ɛɖɛ, na mi ko mɔ do jɛ onyi nɔ le hwexenu na tintɛnkpɔn na va. Ɛgbɛtɔ we ayixa nɔ ɖo ojlo nywɛ, vɔ, agbaza la bo gbɔjɔ.»

39 E mɔ dun yi ke, bo lɔ oxo ɖokpo ŋumyɔ laye, le ɛɖɛxixo etɔn mɛ. 40 E mɛ godo, e mɔ trɔ va onukplanvi laye kɔn, bo kpɔn ye le awlɔn mɛ, ɖo, ŋukunsin kpɛn na ye. Ye ko nyɔ oxo xena ye na lɔ ni-i. 41 Xena e trɔ va zɔn atɔngɔ, e lɔ na ye tun mɔ: «Mi mɔ gbɛ dɔ awlɔn nɔ, bo mɔ gbɛ kpɔtɔ lo gbɔjwɛ nɔ? E vɔ. Ogan la xo, mi kpɔn, ye sɔ Ɛgbɛtɔ we Ovi la sɔ sa na onu nyanylawatɔye. 42 Mi site na mí a sɔn, ɛmɛ xeni lo sa-a nɔ la o tɛkpɔ.»

43 Zɔnɖokpo, hwexenu na e mɔ gbɛ lo lɔ oxo nɔ, Yuda xeni nyi ɛmɛ ɖokpo le onukplanvi weve laye mɛ, va tɔn, ɛmɛ susu bo le ɛtɛ ni-i, bo hɛn dɛnkpweye kpodo okpoye. Mawu we ovɔsantɔ ɖaxoye, osɛnkplan-ɛmɛtɔye kpodo otomɛhyɔnye wɛ dɔn ye ɖodan. 44 Yuda xeni lo sa-ɛ nɔ la bo o lɔ josi xena e na wasi na ye, a do ɖe Yesu la xlɛ ye. E lɔ tun mɔ: «Ɛmɛ xena ko na kisi na, emyɔ wɛ, mi wle-e, a bo dɔn-ɛ do sɔn, a bo hɛn e wu ganji.» 45 Zɔnɖokpo, xena Yuda va, e tɛkpɔ Yesu, bo lɔ ni-i tun mɔ: «Hlabi.» E bo kisi ni-i. 46 Ɛmɛ gbokpweye bo ɖo alɔ Yesu wu, bo wle-e. 47 Vɔ, le ɛmɛ xeye ni le kpo Yesu ye mɛ, ɛmɛ ɖokpo lyɔ dɛnkpwe etɔn, bo xu ovɔsantɔ ɖaxo Mawutɔn we odansɔvi, bo kpa oto ni-i. 48 Yesu yi oxo bo lɔ na ye tun mɔ: «Mi hɛn dɛnkpweye kpodo okpoye, a do va wle-o, ɖi tun jaguda wɛ mi ka va wle nɔ ha. 49 Ko le kpo mi tɛgbɛ le Mawu we oxwe la gbe bo nɔ kplan onu ɛmɛye nɔ, mi ko wle-o. Vɔ, na Winwlan Kinkwɛn laye a do cɛ wɛ dɔn.» 50 Mi wɛ onukplanvi laye seŋu jo Yesu do, bo si sɔn. 51 Hwanjavi ɖe kplɔ-ɛ do, avɔ jan bɛ e sin do okɔ. Ye wle-e, 52 vɔ, e jo avɔ la do, bo si sɔn govɛ-govɛ.

53 Ye kplɔ Yesu do yi Mawu we ovɔsantɔ ɖaxo la kɔn, ovɔsantɔ ɖaxo buye, otomɛhyɔnye kpodo osɛnkplan-ɛmɛtɔye bo kpli le blɛ la. 54 Piyɛ bo le dindyɔnnu daan bo do kplɔ ye do nɔ gbɔɔn bo ɖyɛ ovɔsantɔ ɖaxo la we oxwegbe. E bo xlɔn onyi le ɛmɛcɔtɔye mɛ, bo xu ozo nɔ.

55 Mi wɛ, ovɔsantɔ ɖaxo laye kpodo ɛhwɛɖɔtɔ ɖaxo zɛtɛye, kan kunuɖiɖe agɔ-agɔ ɖe nɔ xena ye na do gbo oku we ɛhwɛ na Yesu, vɔ ye ɔn kpɔn. 56 Ɖo, ɛmɛ susu lo ɖe kunu ojo kinkantɔnye do e wu nɔ, oxo laye ko sɔ ogbe do yenɔniɔye nu. 57 Ɛmɛ ɖeye site bo kan ojo xe do e nu tun mɔ: 58 «Mí se, e bo lɔ tun mɔ: “Ko na hɔ Mawu we oxwe la xena ɛgbɛtɔye gbá kpodo alɔ yetɔnye, a bo trɔ gbá bu le onyihinhɔn atɔn gblamɛ, e ko nyi ɛgbɛtɔye we alɔ hɛn na gbá-ɛ o.”» 59 Vɔ, kunuɖiɖe yetɔnye ɔn nyi ɖokpo ŋumyɔye do oxo mɛ la can wu. 60 Ovɔsantɔ ɖaxo la site le ɛmɛ xeye ni kpli laye mɛ, bo kan Yesu se tun mɔ: «Kunu xeye na ye ɖe do wu we nɔ ye mɛ, o ɔn ɖo oxo ɖe e wu nɔ wɛɛ?» 61 Vɔ, Yesu bɔ onu, e ko ɖo oxo ti e wu. Ovɔsantɔ ɖaxo la mɔ kan-ɛ se ke tun mɔ: «Myɔ wɛ nyi Klisu Mawu xena mí nɔ kanfu nɔ la vyɛ?» 62 Yesu bo lɔ tun: «Mi wɛ ko nyi. Mi na kpɔn Ɛgbɛtɔ we Ovi la, e ba xlɔn onyi le Mawu hɔnhlɔn zɛtɛyetɔ we aɖusi mɛ, mi na kpɔn-ɛ, e ba gbɔn nɔ le sunwɔ mɛ.» 63 Ovɔsantɔ ɖaxo la vun awu etɔn le okɔ, bo lɔ tun mɔ: «Mí ɔn mɔ hyan kunuɖetɔ ti o! 64 Mi se ozun xena e zun na Mawu. Susu ŋukɔ lɛ mi ɖo do e wu?» Mi wɛ, ye ɛmɛ zɛtɛye tun e bo hu ɛhwɛ, bo jɛ na oku. 65 Ɛmɛ ɖeye tun otan do ŋumɛ ni-i nɔ, ye cɔn onu ŋumɛ ni-i, bo xo-e nɔ, bo ko-e nɔ tun mɔ: «Xena e nyi tun Oxolɔɖonyitɔ wɛ o nyi, lɔ ɛmɛ ni xo we na mí» Ɛmɛcɔtɔye yi-i, bo xo oto mɛ ni-i.

66 Xena Piyɛ mɔ gbɛ le gaji le oxwe la gbe, le odo, Mawu we ovɔsantɔ ɖaxo la we odansɔvi nyɔnuvi ɖe va. 67 E kpɔn Piyɛ lo xu ozo nɔ, bo kpɔn-ɛ nɔ trululu, bo lɔ tun mɔ: «Myɔ can, o nɔ zɔn kpodo Yesu Nazalɛtitɔn la.» 68 Vɔ, Piyɛ mɔ́, bo lɔ tun mɔ: «Ko ɔn nyɔ, ko ko se oxo xena o lo lɔ nɔ gɔnmɛ o.» Mi wɛ e sɔn yi agbo ji. [Goklo bo do atan.]^c 69 Nyɔnuvi odansɔvi la kpɔn-ɛ, bo mɔ jɛ lilɔ ji ke na ɛmɛ xeye ni le blɛ laye tun mɔ: «Dahwe mɛ, emyɔ can le ye mɛ!» 70 Piyɛ mɔ mɔ́ ke. Zaanɖe, ɛmɛ xeye ni le blɛ laye, bo mɔ lɔ na Piyɛ ke tun mɔ: «Oxojɔxo wɛ, o le ye mɛ, ɖo, Galiletɔ wɛ o nyi.» 71 Mi wɛ Piyɛ lɔ nɔ tun mɔ: «Na e nyi tun ojo wɛ ko kan nɔ, Mawu ni dɔn oto na-a. Ko ta onu, ko ɔn nyɔ ɛmɛ xe we oxo na mi lo lɔ nɔ.» 72 Zɔnɖokpo kpoŋu, goklo do atan zɔn owegɔ. Piyɛ bo ɖoŋudo oxo xena Yesu o lɔ ni-i wu, tun mɔ: «Gbɔxwe goklo na do atan zɔn owe, o na lɔ zɔn atɔn kpetyo tun he bo ɔn nyɔ mɔ.» E bo jɛ avin finfan ji.