¹ Kaliˈ pektaluˈ si Isus, “Mendadi, ndiˈ niu pegdenaˈay su nga samataw niu, adun ndiˈ amu ukumen nu Megbebayaˈ. ² Puˈ su kegdenaˈ niu dig duma niu, iin dademai kengukum diniu nu Megbebayaˈ, mukaˈ adini tepengan niu dig begay niu, iin dademai tepengan nu Megbebayaˈ tug begayen pelum diniu. ³ Naa saˈ maˈnia, mauma dema saladuaˈ diniu, maitaˈ mu ki maikaˈ puling di mata nug duma mu, laak yaˈa, ndaˈ mu metukaway puˈ duun dademai puling mu, gembagel? ⁴ Mukaˈ pagid mauma dema teluˈen mu pelum tug duma mu, ‘Uy, uaˈen ku pa deliˈ ki puling mu kiin,’ asa yaˈa dema, mipulinga dadema gembagel puling? ⁵ Baa, yaˈa kiin, tautau mekesuun ka! Kaas unaay mu uaˈay ki gembagel puling di mata mu kiin, adun mpalas mu su maikaˈ puling nug duma mu, adun mawaˈ mu.”

⁶ Laung pagid ni Isus, “Ki nga gituˈ, ndiˈ niu paan dun su ginilak ditu Megbebayaˈ, puˈ mbuus lumingay diniui gituˈ kia, penupasen amu nilan. Mesama da ki ngag babuy, ndiˈ niu piglakay dyamanti, puˈ ndiˈ nilan aanen, laak maindegan nilan.”

⁷ Laung ni Isus, “Mendadi penamal amu menenabi tu Megbebayaˈ, begayan amu niin. Penamal amu menengaw, puˈ mekebaang amu. Peksabi amu namal diag bisuangan, puˈ pukaˈan amu tuˈu. ⁸ Puˈ adini menamal menenabi, begayan tuˈu. Adini menamal menengaw, mekebaang, mukaˈ adini meksabi diag bisuangan, mpukaˈan. ⁹ Puˈ yamu ngag duunig bataˈen, duun bai sala tawan diniu, saˈ pinenggiˈ menengi panig bataˈen, begayen sungkin diniin batu? ¹⁰ Atawaka saˈ meksaak sedaˈ, begayen pelum diniin mamak? ¹¹ Mendadi yamu, saˈ metau amu megbegay kepianan tu gembataˈ niu, asa melaat getaw amu, naa labi na su Gamaˈ niu ditu gekbus langit, begayen dema tuˈu kepianan tu nga meksaak dun diniin!

¹² “Mendadi pia taˈ alanduni melabuˈ dig delendeman niu melengas sia gabang nug duma niu diniu, iini baal niu dinilan. Puˈ maˈniai tantu gulugan nu tibuuk Palinta nu Megbebayaˈ pisulaten dini Moises mukaˈ tu ngag duma pimuunanen dengantu.”

¹³ Laung ni Isus, “Mendadi iini bianay niu, ki mesikut gengaˈan. Puˈ ki sala gengaˈan pangay tug linaw gapuy, meliwag, dayun sug dalan pangay ditu, melemu dadema unuten, melaun getaw mayan dun. ¹⁴ Ki pelum gengaˈan pangay tu ketubuˈ ndaˈi tamanen, mesikut, dayun sug dalan pangay ditu, melegen unuten, meliangi getaw mekebaang dun.

¹⁵ “Mendadi ki nga mekpetuˈun dig balus, peglengilamay niu. Puˈ saˈ metuaˈ ilan diniu, pitanggiˈu ilan di nga malig metetubuˈ mendapaˈ di karniru, laak miglanguban dadema di karniru. ¹⁶ Naa, kiniig bian niu mengilala dun saˈ metuud mai piktuˈun, saˈ balus ma. Kimanay niu su penggulaulaan nu mekpetuˈun. Puˈ sug bunga gubas, maupuˈ ba dig dugi? Maupuˈ ba dig dugi sug bunga igera? ¹⁷ Adini gempia gayu, megbunga dadema melengas. Dagid adini melaat gayu, megbunga dadema melaat. ¹⁸ Puˈ ndaˈiduni gempia gayu megbunga melaaten. Mesama di melaat gayu, ndaˈiduni megbunga melengas. ¹⁹ Mukaˈ pagid adini gayu ndiˈ megbunga gempia, penegaˈen nu Megbebayaˈ, dayun piglakay tu gapuy. ²⁰ Kaas ki nga mekpetuˈun dig balus, mailala niu tu penggulaulaan nilan.”

²¹ Laung ni Isus, “Mendadi kanaˈ iini mekesakup tu Keglekaunutan nu Megbebayaˈ, ki kelaun getaw gelalenu nilan Kaunutan. Iin laaki mekesakup dun, ki menggulaula tu mauyaˈan nu Gamaˈu ditu gekbus langit. ²² Kaas saˈ mateng ki Gendaw nu Kengukum nu Megbebayaˈ di tibaˈan getaw, melaun getaw mektaluˈ dinaan, ‘Uu Kaunutan nami, migwali ami Taluˈ nu Megbebayaˈ pibian di pegbayaˈ mu, mukaˈ pingutidan namii menenulay, dakus melaun mekesalebuˈ pinggulaula nami pibian di pegbayaˈ mu!’ ²³ Dayun ku sembagay, ‘Baa, yamu kiin, ndiˈu amu mailala. Pelayuˈ amu dinaan, yamu nu nga meglimbung!’”

²⁴ Laung ni Isus, “Mendadi adin su getaw mekineeg di teluˈen ku kini dayun megdunut dun, penenggiˈan duni telisebuten getaw migbaal balay, gintuden di telektap sug balayen. ²⁵ Naa benaˈ mitubus sug balay, migdupiˈ gempales, migbaaˈ, mukaˈ dinulukan medekdes genus sug balay. Laak ndaˈ megebaˈ, sabaˈ gintud dig batu.

²⁶ “Laak dagid adini getaw medengegen ki taluˈu kini laak ndiˈen dunutan, iini maaˈ nug benguˈbenguˈen getaw, migbaal balayen dia pentad. ²⁷ Migdupiˈ dadema gempales, migbaaˈ pa pagid. Dayun kig balayen kia, dinulukan metikteg genus, migebaˈ gupia. Pia sebulus tu pataˈen, ndaˈiduni mibilin dun.”

²⁸ Naa benaˈ mideksuˈ ni Isus su pidengegen tu melaun getaw, misebuˈan ilan dun su tituluˈen kia. ²⁹ Puˈ su tituluˈanen, duuni pegbayaˈen. Saˈ iini mektituluˈ dinilan su nga mekpetuˈun di Misulat Palinta nu Megbebayaˈ, naa mamaˈ ndaˈi pegbayaˈ nilan.