¹ Mendadi mitaang dun, duuni getaw migukit dini Isus puˈ duuni nga getaw Galilea pipatay ni Gubirnadur Pilato, selian nilan mekanu. ² Kaliˈ sembag si Isus, “Naa kagina maˈantui mibianan nu nga getaw kia, laung ba niu dun, gembagel pai salaˈ nilan sabayaˈ nug duma getaw Galilea? ³ Kanaˈ lai! Mendadi taluˈu tuˈu diniu, yamu pagid, saˈ ndiˈ amu meksikesuun, iini petayan niu, maaˈ dadema dinilan. ⁴ Dayun ki sepuluˈ buˈ walu tawan kiin minatay dadema, puˈ miulakan ilan nu metaas balay mibuksak ditu Siloe. Laung ba niu dun, gembagel pai salaˈ nilan di ngag duma getaw dia Jerusalem? ⁵ Kanaˈ dema! Taluˈu tuˈu diniu, yamu pagid, saˈ ndiˈ amu daan meksikesuun, iin daani petayan niu, launan niu, maaˈ dadema dinilan.”

⁶ Miksambingay si Isus, laungen, “Duuni getaw mimula sala puun gayu igera tu pegimulananen. Naa piglaawlaawanen su gayunen kini, adun upuˈenen siaig bunganen, laak ndaˈidun gusayig bunganen. ⁷ Mendadi benaˈ minibeniben, kaliˈ pektaluˈ su gapuˈ lupaˈ di tinindananen, ‘Naa, bentayay mu pa daan, ki gayu igera kini, telu taun nau megangayangay dini mengupuˈ sia bunganen, laak ndaˈidun tanani maitaˈu. Kaas penagaˈ mu! Tumuˈ lain nai pemula ta dinig lupaˈ kini.’ ⁸ Dagid kaliˈ sembag su tinindanan kia, ‘Naa Sir, ndiˈ pa sia penegaˈen di taun kini. Subay ilemunan ku pa deliˈ mukaˈ abunuan. ⁹ Gelatan ta laaki taun kini, kalukalu megbunga, naa melengas. Dagid saˈ ndiˈ gusay megbunga, naa dekag mu pa pepenagaˈ tuˈu dinaan.’”

¹⁰ Naa duuni Gendaw Pelali, mikpetuˈun si Isus di simbaan nu getaw Judea. ¹¹ Naa mitaang duunig libun dia, sepuluˈ buˈ walu taun na megladu, sabaˈ piglegetan menulay. Mibektut, ndiˈ tanan metandengi gindegen. ¹² Mendadi, benaˈ minitaˈ ni Isus sug libun kia, sinabinen dayun, laungen diniin, “Dadaˈ, miuliˈan ka na di mesait mu kiin!” ¹³ Dipenan ni Isus sug libun kia. Lemen laak midepenen, mitandeng nai gindegen. Inal dayun nug libun su Megbebayaˈ.

¹⁴ Laak su kaunutan tu simbaan, miangit, sabaˈ duunig binaal daw ni Isus di Gendaw Pelali, piuliˈaneni getaw kia. Kaliˈ pektaluˈ ki kaunutan di nga getaw dia, “Ki sala simana, duuni genem endaw biwang dinita pengimbaalan ta. Kaas angay amu dini mekpepeneguliˈ di genem endaw kia, ndiˈ niu taangay di Gendaw Pelali!”

¹⁵ “Paa,” simbag nu Kaunutan si Isus. “Yamu pa di nga tautau mekesuun! Pia metaang di Gendaw Pelali, duun bai sala tawan diniu, ndiˈen ubadan sug bakanen atawaka sug asnonen tu giniketan dun, dayunen uitay tu tubig puˈ painumenen? ¹⁶ Naa kig libun kini samasapuˈ ta dini Abraham, dayun sepuluˈ buˈ walu taun na di gengkeman ni Satanas, ndiˈ ba mbantang beluyen dun metaang di Gendaw Pelali?” ¹⁷ Naa ki nga kelaun kuntra kia ni Isus, benaˈ midengeg nilani tinaluˈen kia, mipiid ilan. Laak su ngag duma getaw, liliag ilan gupia dig launan gulaula ni Isus, melengas gupia.

¹⁸ Kaliˈ pektaluˈ si Isus, “Mendadi ki Keglekaunutan nu Megbebayaˈ, alanduni pesemaan ku dun? Alandun mai petanggiˈu dun? ¹⁹ Kinii samanen, ki salabuuk lisu, sangay nu mustasa su ngalanen. Genat pemulanay, saˈ mentubuˈ mukaˈ tumulin, maˈniin na bagel gayu. Su nga manukmanuk, megbaal ilan salag nilan dia nga panganen, sabaˈ kebagelen.”

²⁰ Kaliˈ gusay pektaluˈ si Isus, “Mendadi ki Keglekaunutan nu Megbebayaˈ, taˈ alandun pai petanggiˈu dun? ²¹ Sala pa penenggiˈan dun, petulin di pan, lemugen nug libun tu pitu gantang garina. Mendadi genat lemugay dun, mpakayaw tumulin su tibuuk baalen pan.”

²² Saˈ maˈantu, minundas si Isus mpanaw pangay tu Jerusalem, biananeni ngag lunsud gembagel saˈ maikaˈ, puˈ mekpetuˈun dia. ²³ Mendadi, duuni getaw suminaak dini Isus, laungen, “Sir, meliang laaki getaw guunen nu Megbebayaˈ?”

Kaliˈ sembag si Isus, ²⁴ “Penugaling amu bian ditu mesikut gengaˈan. Puˈ taluˈu tuˈu diniu, melaun getaw suled sia, laak ndiˈ na mekeseled. ²⁵ Puˈ duuni gendaw megbuat su gapuˈ balay, tekepenen na su gengaˈan. Tekaw mbuus diaan amu liu pegindeg, meksabi amu, laung niu, ‘Uu Sir, kelelaat pukaˈay mu ami!’ Laak meksembag su gapuˈ balay, ‘Baa, yamu kiin, ndaˈu mesuunay adin amu getaw!’ ²⁶ Mektaluˈ amu dayun, ‘Miksalu maita maan mukaˈ minum, mikpetuˈun ka pa padun tu tebuˈan nami!’ ²⁷ Laak dagid mektaluˈ diniu su gapuˈ balay, ‘Ndaˈu daan mesuunay adin amu getaw. Pelayuˈ amu dinaan, launan niu nu nga mikesalaˈ getaw!’ ²⁸ Kaas saˈ maitaˈ niu si Abraham, si Isaac, si Jacob sampay su kelaun pimuunan nu Megbebayaˈ dengantu, ditu ilan seled nu Keglekaunutan nu Megbebayaˈ, naa mengaduy amu, lamug mengkiget amu di ngisi niu. Puˈ yamu, piglaken laak amu tug liu! ²⁹ Asa duun pa pagidi getaw metuaˈ ditu genat tu silangan mukaˈ sindepan sampay tu gilidan gendaw, sumaup ilan tu keglekebibu dia Keglekaunutan nu Megbebayaˈ. ³⁰ Mukaˈ taluˈu tuˈu diniu, duuni getaw mbinayaˈ nemun, iini mauna saˈ matengi gendaw kiin ditug binayaˈ gebii buˈ gendaw. Duun dademai getaw mauna nemun, iin na sungkini mbaluy mbinayaˈ saˈ matengi gendaw kiin.”

³¹ Naa mendadi mitaang ia, duuni nga Pariseo minateng. Minadap ilan dini Isus, kaliˈ ilan pektaluˈ diniin, “Awaˈa dini, puˈ si Herodes, pekpetain ka niin sia.”

³² Kaliˈ sembag si Isus, “Naa, angay amu ditu niin, ki metawakal getaw kia, iini petenday niu diniin, laung niu, ‘Pengutidan ku pai menenulay, peneguliˈan ku pa gusayi nga getaw nandaw mukaˈ lemaˈ. Dayun gitunganen denlag, tubusen ku ki penggulaulaan ku.’ ³³ Dagid pia maˈantu, subay mundasu tuˈu nandaw mukaˈ lemaˈ, sampay denlag. Puˈ ki pimuunan nu Megbebayaˈ, ndiˈ mesuˈat binesaan, subay ditu laak Jerusalem.”

³⁴ Kaliˈ gusay pektaluˈ si Isus, “Uy, yamu nga getaw Jerusalem, yamu nga mekpatay di nga pimuunan nu Megbebayaˈ, betuun pa pagid niu su nga sinuguˈ diniu nu Megbebayaˈ! Tatapu amu sia ekupay, maaˈ nu nga pesuy pegleeman nu ginaˈen! Dagid mpauk amu dun! ³⁵ Kaas belengan tuˈu nu Megbebayaˈ kig lunsud niu. Mukaˈ taluˈu dema tuˈu diniu, genat nandaw, ndiˈ na niau puliˈ maitaˈ, sampay mateng su gendaw metaluˈ niu, ‘Aa naa, kiin na, minateng na ki pigwekilan nu Kaunutan Megbebayaˈ. Melengas pepianan iin nu Megbebayaˈ!’”