¹ Naa saˈ duminiksun si Isus genat dig bentud kia, melaun gupia getaw migdunut diniin. ² Mendadi duuni pegladu mekesalebuˈ nuka mikpesempel dini Isus, minginlulud dayun di gedapanen, laungen diniin, “Sir, saˈ mauyaˈan mu da, misuunan ku megaga mau pauliˈay.”

³ Tinggal ni Isusi kemeten, dipenaneni getaw kia, kaliˈ pektaluˈ, “Naa, mauyaˈan ku lai. Mauliˈan ka dadema tuˈu!” Seduˈunduˈun miawaˈ dayun su mekesalebuˈ nukanen. ⁴ Laak laung ni Isus, “Petuud mu gupiai taluˈu kini diniˈa! Pia sala tawan, ndaˈiduni ukitan mu di mipenggulaula kini. Segaga angaya ditug belian, pekpebantaya diniin, dayun ilak mu sug betang pinalinta ni Moises dengantu, puˈ adun metakesiˈan ka nu getaw miawaˈ na su kelemuˈay mu.”

⁵ Mendadi benaˈ midepet si Isus tug lunsud Capernaum, duuni kaunutan di sundalu nu getaw Roma luminabet diniin, mikpaingabang diniin, ⁶ laungen, “Sir, kelelaat diniˈa, duuni sesuguˈen ku ditug balayu migladu gupia, mipilung. Milegenan gupia dun.”

⁷ Kaliˈ sembag si Isus, “Naa, medituunu, pauliˈan ku.”

⁸ Dagid sumimbag su kaunutan di sundalu, “Naa naan, Sir, kanaˈ mbantang seledan muig balayu. Pektaluˈa laak diin, naa misuunan ku puˈ mauliˈan tuˈui sesuguˈen ku kia. ⁹ Puˈ maaˈ dinaan kini, duuni metaas pa dinaan sumuguˈ dinaan, duun pa pagidi sundalu suguˈen ku. Teluˈan kui sala tawan, ‘Dituun ka angay,’ meditu dayun. Teluˈan ku pelumi sala tawan, ‘Diniin ka angay,’ medini dadema. Saˈ teluˈan ku su gulipen ku, ‘Maˈniniˈi baalen mu,’ naa baalenen dayun.”

¹⁰ Benaˈ midengeg ni Isusi tinaluˈ kia nu sundalu, misebuˈan dun gupia. Kaliˈ pektaluˈ dia nga tumindug diniin, “Taman taluˈu diniu, ki kaunutan kini, ndaˈu mainsan mbianayi kesalig mesama di kesaligen, pia pa dini nita nga getaw Israel! ¹¹ Kaas taman taluˈu diniu, saˈ meglekaunutan na tuˈu su Megbebayaˈ, melaun tuˈu getaw dig lain bansa metuaˈ, genat ilan tu silangan sampay tu sindepan, sumaup ilan tu keglekebibu ditu Keglekaunutanen, puˈ dungan ami maan dini nga Abraham, si Isaac, mukaˈ si Jacob. ¹² Dagid ki nga duma getaw gasal nilan sia mpeduma ilan tu Keglekaunutan nu Megbebayaˈ puˈ getaw Israel ilan, naa piglaken laak ilan ditug liu, tu medelem. Ditu ilan dayun mengaduy, lamug mengkiget ilan di ngisi nilan.” ¹³ Laung dayun ni Isus tu kaunutan di sundalu, “Uliˈa na, puˈ su pituud mu, menuud tuˈu.”

Iin dayun tuˈui kauliˈay nu sesuguˈenen kia, mitaang gupia ditu ketaluˈ dun ni Isus.

¹⁴ Naa minundas si Isus ditug balay ni Pedro. Mendadi benaˈ mitulan dia si Isus, minitaˈen pegladu ki penugangan ni Pedro libun, mipanas, ndiˈ mekegbuat. ¹⁵ Dipenan dayun ni Isus su kemet nug libun. Lemen laak midepenan ni Isus, migwanan dayuni panasen. Migbuat sug libun mukaˈ mikpelutuˈ, migilak dayun dini nga Isus.

¹⁶ Naa benaˈ lelabung na, melaun getaw piglegetan menenulay pinguit nu nga getaw ditu ni Isus. Pingutidanen dayun dinilan su menenulay, sektaang laaki tinaluˈen, minawaˈ ilan dayun. Mukaˈ pineguliˈanen pa pagid su kelaun pegladu. ¹⁷ Kaas maˈniai mipenggulaula, adun menuud su sinulat dengantu ditu Misulat Taluˈ nu Megbebayaˈ nu pimuunanen si Isaias, laungen, “Inawaˈen su mesait ta, pineguliˈanen su ngag leduun ta.”

¹⁸ Naa benaˈ lain endaw, benaˈ minitaˈ ni Isusi melaun gupia getaw mikpungun diniin, kaliˈ pektaluˈ tu nga sakupen, “Naa, dumipag ita dinig linaw.” ¹⁹ Laak saˈ ndaˈ pailan pekepanaw, duuni getaw mekpetuˈun di Misulat Palinta nu Megbebayaˈ luminabet dini Isus, kaliˈ pektaluˈ diniin, “Sir, pia adin ka angay, megdunutu diniˈa.”

²⁰ Kaliˈ sembag si Isus, “Laak naan, kig Bataˈ nu Kilawan, ndaˈidun tanani pektulugan ku. Tumuˈ pa su nga teleksuy, duuni gateb nilan, mukaˈ su nga manukmanuk, duuni salag nilan.”

²¹ Naa duun pelumig lain getaw, sakup ni Isus, kaliˈ pektaluˈ diniin, “Sir, muliˈ pau deliˈ, puˈ unaan ku pa lebengay su gamaˈu.”

²² Kaliˈ pelum sembag si Isus, “Baa, dunuta dinaan. Su nga pangay tu kepatay ndaˈi tamanen, melengas ilan nai meglebeng tu nga matay dinilan.”

²³ Naa duminangan si Isus di sekayan, ilan nu nga sakupen. ²⁴ Mendadi benaˈ ditu nailan laud nug linaw, tekaw miksalindapak, misipukan dayun tubig ki sekayan nilan kia. Dagid si Isus, pektulug. ²⁵ Mikpesempel dayun diniin su nga sakupen, tinanud nilan dayun, laung nilan, “Ii, Kaunutan, gawen mu ami! Megbayaˈbayaˈ ita dun ini!”

²⁶ Kaliˈ sembag si Isus, “Mauma mendek mamu? Maikaˈ da ki kesalig niu dinaan!” Migbuat si Isus, pimaagen dayun su genus mukaˈ su nabek. Miksilengen gupia tuˈu sug linaw.

²⁷ Su kelaun duma ni Isus, misebuˈan ilan dun. Laung nilan, “Taˈ gasal dun saan ini, pia su genus mukaˈ nabek, mekpetuud diniin?”

²⁸ Naa, midengguˈ si nga Isus tug dipag nug linaw, ditug benwa piningalan dun Gadara. Benaˈ mikelusad ilan, duunig duaˈ tawan suminungkak dini Isus, betad nilan dia nailan pegbenwa nga sangyab kelebengan, puˈ ki getaw kini, silunuˈan ilan menenulay. Mekendekendek ilan gupia, kaas kanaˈ bianan nu getawig dalan mekebian di kelebengan kia. ²⁹ Mendadi, benaˈ minitaˈ nu nga silunuˈan kia si Isus, minekeg ilan megbeksay, laung nilan, “Ii, yaˈa, Bataˈa nu Megbebayaˈ, taˈ maig labet mu dinami? Peglegetan mu ami, asa kanaˈ pa timpu nu Kengukum?”

³⁰ Naa duuni sala kauluan babuy meglunang dia mesempel, melaun gupia babuy. ³¹ Pinengi nu menenulay dini Isus, laung nilan, “Naa saˈ utidan mu ami, peselunuˈ mu ami ditu ngag babuy kia.”

³² Kaliˈ sembag si Isus, “Naa, mesuˈat.” Dayun memegawaˈ dia getaw kia su menenulay, sumilunuˈ ilan pelum ditu ngag babuy. Benaˈ su sala kauluan babuy, migelaˈ ilan menggebek dumiksun ditug delipasan, migelaˈ ilan dayun melemes diag linaw.

³³ Mendadi su nga megingat tu ngag babuy, minggebek ilan ditug lunsud, pigukit nilan dayun dia ki kelaun mipenggulaula kia nu nga getaw silunuˈan menenulay. ³⁴ Saˈ maˈnia, su kelaun getaw ditug lunsud, linaawan nilan si Isus. Benaˈ midepet ilan diniin, inubug nilan diniin, megawaˈ diag benwa nilan.