¹ Mendadi, kaliˈ pektaluˈ si Isus, “Pektalentenay niu ki kektamuy niu tu Megbebayaˈ, adun ndiˈ niu pektemuyen su Megbebayaˈ dia laak gedapan nu melaun getaw, adun mekpaitaˈitaˈ laak di samataw niu. Puˈ saˈ maˈniai kektamuy niu diniin, ndaˈi sugda dun diniu nu Gamaˈ niu ditu gekbus langit.

² “Kaas saladuaˈ diniu, saˈ meglegamuta tu nga pubri, ndiˈ mu pegangyaˈ ki kegamut mu, maaˈ nu nga tautau mekesuun. Puˈ dia ilan pegbegay gamut gedapan nu melaun getaw, dia simbaan mukaˈ dia nga selengayan, adun penalan ilan nu getaw. Taman taluˈu diniu, saˈ penalan ilan nu getaw, daal daitui sugda dinilan. ³ Yaˈa dagid, saˈ meglegamuta tu pubri, ndiˈ mu pesuun di getaw, pia di putulpused mu. ⁴ Laak dagid pia egluden tu getaw ki kektamuy mu, mesuunan da nu Gamaˈ mu, puˈ su tibaˈan mitebunan, maitaˈen. Iin dayuni sumugda diniˈa.”

⁵ Kaliˈ pektaluˈ si Isus, “Mendadi saladuaˈ diniu, ndiˈ mu penunggilingay su kenenabi nu nga tautau mekesuun! Puˈ megindeg ilan menenabi diag dialem simbaan atawaka dia nga selengayan, adun maitaˈ ilan nu tibaˈan getaw. Taman taluˈu diniu, su sugda dinilan, migelaˈ na nilan malap. ⁶ Yaˈa dagid, saˈ menenabia, angaya dia sugud mu, takep mu, diaan ka dayun penenabi tu Gamaˈ mu, sala mu da. Puˈ su Gamaˈ mu, maitaˈen su kelaun mitebunan, kaas iin dademai sumugda diniˈa di kenenabi mu.

^7-8 “Mukaˈ pagid ndiˈ niu penunggilingay ki kenenabi nu nga kanaˈ mekpetuud tu Megbebayaˈ, paibenen nilan gupia su kenenabi nilan, asa ndaˈiduni maˈananen. Puˈ laung nilan dun, duaten nug diwata su kenenabi nilan sabaˈ maiben metubus. Laak dagid adin su kulang di sukat niu, daan na misuunan nu Gamaˈ niu, pia ndaˈ pa niu mpenenebiay.

⁹ “Mendadi,” laung padun ni Isus, “kiniig bian nu kenenabi niu. Iini taluˈ niu,

‘Uu Amaˈ nami tu gekbus langit,

¹⁴ Diksuˈ ni Isus su taluˈen, “Puˈ saˈ pedesunen niu su salaˈ nu nga samataw niu, pedesunen damu dema nu Gamaˈ niu ditu gekbus langit. ¹⁵ Laak dagid saˈ ndiˈ niu pedesunen su salaˈ nu nga samataw niu, ndiˈ dema pedesunen nu Gamaˈ niu su salaˈ niu.”

¹⁶ Kaliˈ pelum pektaluˈ si Isus, “Mendadi saˈ mekpuasa amu, ndiˈ amu pegdemeng, maaˈ nu nga tautau mekesuun. Penlikusengen nilan su muluˈ nilan, adun mailala nu nga getaw puˈ mikpuasa ilan. Taman taluˈu diniu, migelaˈ na nilan malap su sugda dinilan. ¹⁷ Dagid yamu pelum, saladuaˈ diniu saˈ mekpuasaa, pengulamusa mukaˈ penundaya, ¹⁸ adun ndiˈ mesuunan nu getaw puˈ mikpuasaa, puˈ misuunan da nu Gamaˈ mu, su maitaˈen su kelaun mitebunan. Iin demai sumugda diniˈa.”

¹⁹ Kaliˈ pektaluˈ si Isus, “Naa ki gimu dinig dibabaw lumbang, kanaˈ iini penteguˈen niu, su melemu aanen guled atawaka gaangen, melemu dadema pegdaun nu getaw. ²⁰ Segaga iini taguˈ niu, ki gimu ditu gekbus langit, ndiˈ mesuˈat aanen guled atawaka gaang, sampay ndiˈ dadema mesuˈat pegdaun. ²¹ Puˈ adin mibetang su gimu niu, ditu dademaig delendeman niu.”

²² Kaliˈ pektaluˈ si Isus, “Naa su mata nu getaw, iini suluˈ nug lawasen. Kaas saladuaˈ diniu saˈ gempiai mata mu, naa medelagan na su tibuuk lawas mu. ²³ Laak dagid saˈ duuni mesait di mata mu, naa medeleman dademai tibuuk lawas mu. Su laung mu dun tiag mu, masiˈ medelem!”^a

²⁴ Laung ni Isus, “Naa su peneligan, ndiˈ mesuˈat pegdenganen tindanay nug duaˈ tawan gegalen. Puˈ saˈ maˈantu, mesengayen sug bekna gegalenen, laak petailenen su keduaˈ gegalenen. Atawaka iini petuudenen sug bekna gegalenen, dagid teliudanen laak su keduaˈen. Kaas su Megbebayaˈ mukaˈ su gaˈus, ndiˈ mesuˈat pegdenganen pebegelay di ginaa niu.

²⁵ “Kaas taluˈu diniu, ndiˈ niu libulengayi ketubuˈ niu, saˈ taˈ ma saani aanen niu mukaˈ inumen niu, saˈ taˈi kenapet niu. Puˈ su ketubuˈ nu getaw, kanaˈ ba gembageli pantagen sabayaˈ nu kaˈaanen? Sug lawas nu getaw, kanaˈ ba gembagel dademai pantagen, sabayaˈ nu kenapeten? ²⁶ Mukaˈ pegbentayay niu pagid su nga manukmanuk. Su manukmanuk, ndiˈ memula, ndiˈ dadema meglegani, ndaˈidun dademai timuden nilan. Laak pia maˈantu, paanen da nu Gamaˈ niu ditu gekbus langit su manukmanuk! Naa kanaˈ ba labi pamu paanen, ki metaas paig lagaˈ niu, sabayaˈ nu nga manukmanuk? ²⁷ Keduaˈen, duun bai sala tawan diniu, megaganen petaasayi gumulen sendaw pebian di kelibulengen dun?”

²⁸ Laung ni Isus, “Kiin pelum penepeten niu, alandun bai malap niu saˈ melibuleng amu dun? Pegdelendem niu pagid sug bulak nu sigbet. Ndiˈ mengimbaal su sigbet, ndiˈ dadema megabel. ²⁹ Laak taluˈu diniu, pia si Adiˈ Salomon, saˈ migimakay gupia, ndaˈi salabuuk bulak sigbet, kanaˈ melengas pa di kenapet ni Salomon kitu. ³⁰ Naa su sigbet, maitaˈ nandaw, lemaˈ mbaluy laak tagun. Laak pia maˈantu, begayan nu Megbebayaˈ pekayan su sigbet, saˈitada sug bulaken. Saˈ maˈantu, kanaˈ bamu labi na begayan nu Megbebayaˈ penepeten niu? Kaas mauma dema maikaˈ da ki kesalig niu tu Megbebayaˈ?”

³¹ Diksuˈ ni Isus su taluˈen, “Kaas ndiˈ amu melibuleng, dig dialem ginaa niu, ‘Adin ta ma sukatay ki kaˈaan ta? Mukaˈ kainum ta? Mukaˈ penepeten ta?’ ³² (Puˈ su nga kanaˈ mekpetuud, gembagelig delendeman nilan dun.) Yamu pelum, misuunan na nu Gamaˈ niu ditu gekbus langit su kelaun kulang di sukat niu. ³³ Segaga iini pebagel niu dig delendeman niu, ki kesakup niu tu Keglekaunutan nu Megbebayaˈ, mukaˈ ki kekesuun niu. Saˈ maˈantu, su kelaun gininisan sukat, begay dadema nu Megbebayaˈ diniu. ³⁴ Kaas su kelegenay ndaˈ pa niu mbianay, ndiˈ amu melibuleng dun. Puˈ gendawgendaw duuni kelegenay nu getaw. Sukal pegdelendemen saˈ mateng na tuˈu.”