¹ Naa duuni gendaw, minangay na pelum si Isus di simbaan nu getaw Judea. Naa mitaang duuni getaw dia, mingupesi sedibaluy kemeten. ² Naa ki ngag duma getaw dia, mauyaˈan nilan, duun siai gempia dangat nilan dini Isus. Saˈ maˈantu, piktuliktulikan nilan gupia si Isus, saˈ meneguliˈ di getaw kia metaang di Gendaw Pelali, saˈ ndiˈ. ³ Mendadi, kaliˈ pektaluˈ si Isus di getaw kia mingupesi kemeten, “Naa, pediniin ka. Pegindega dini gedapan nug launan.” Minangay dayun dia niin. ⁴ Laung dayun ni Isus dia nga getaw menengaw dangat nilan diniin, “Taˈ alandun mai biwang dinita ditu Misulat Palinta nu Megbebayaˈ, baalen ta metaang di Gendaw Pelali? Pepianan ta bai samataw ta di Gendaw Pelali, atawaka pelaatan ta? Guunen ta su ginaanen, atawaka petain ta ba?”

Laak ndaˈiduni mesembag nilan dun. ⁵ Pingenlengan ilan dayun ni Isus, milaati ginaanen dinilan. Laak pia maˈantu, milelaat dadema dinilan si Isus, sabaˈ nu ketegas gulu nilan. Laungen dayun di getaw kia mingupesi kemeten, “Naa, tenggal mui kemet mu.” Tinggalen dayun, mukaˈ miuliˈan. ⁶ Naa ki nga Pariseo kini, benaˈ minitaˈ nilan, mingguaˈ ilan dayun dia simbaan. Linaawan nilan dayuni nga sakup ni Herodes, migyagayaga ilan dayun, puˈ genat itu, minengaw ilan bian nilan mekpatay dini Isus.

⁷ Naa saˈ maˈantu, migawaˈ si Isus dia, ilan nu nga sakupen, minundas ilan ditu geksid Linaw Galilea. Melaun gupia getaw miglendug dini Isus. Kanaˈ laak genat dia Galilea su getaw, puˈ su ngag duma, genat ilan ditu Judea ⁸ mukaˈ ditu Jerusalem. Saˈ midengeg nu nga getaw su pinggulaula ni Isus, melaun pa pagidi getaw mituaˈ genat tug Edumea, mukaˈ tug dipag Jordan, sampay tug benwa lumibut dig lunsud Tiro mukaˈ Sidon. ⁹ Mendadi, sinuguˈ ni Isus su nga sakupen mangay sekayan, puˈ galiˈen adun gingkudanen saˈ mbuus maisel nu melaun getaw. ¹⁰ Kagina melaun na getaw pineguliˈanen, mikagawagaw mekpesempel diniin su ngag launan pegladu, adun medeluˈ nilan si Isus. ¹¹ Mukaˈ pa pagid, adini getaw piglegetan menulay, kaliˈ nilan mpekitaˈ si Isus, miglaub ilan di gedapanen, dunut migbeksay ilan, laung nilan, “Yaˈa tuˈuig Bataˈ nu Megbebayaˈ!”

¹² Laak pimeek gupia ni Isus su menenulay, adun ndiˈ nilan pesuun ki gasalen.

¹³ Naa, duuni gendaw tumiwad si Isus dig bentud. Adin su pimiliˈen dumunut diniin, sinabinen. Minangay ilan dayun ditu niin. ¹⁴ Mendadi, tinduˈ ni Isus ki sepuluˈ buˈ duaˈ tawan peneliganen. Kaliˈ pektaluˈ si Isus, “Yamui pimiliˈu dumunut dinaan. Mukaˈ suguˈen ku amu mpanaw, adun megukit amu tu Gempia Petenday. ¹⁵ Mukaˈ pagid begayan ku amu pegbayaˈ mengutid di menenulay.”

¹⁶ Naa, kinii sepuluˈ buˈ duaˈ tawan tinduˈ ni Isus peneliganen. Sug beknanen, si Simon (piningalan dun ni Isus si Pedro), ¹⁷ dayun si Santiago mukaˈ su pateden si Juan, gamaˈ nilan duaˈ si Sebedeo, (piningalan dun ni Isus si Boanerges, guluganen “Nga Getaw Maaˈ Dedalak”), ¹⁸ dayun si Andres, si Felipe, si Bartolome, si Mateo, si Tomas, si Santiago gamaˈen si Alfeo, si Tadeo, dayun si Simon, sakup nu nga mengatu di gubirnu. ¹⁹ Mendadi su kesepuluˈ buˈ duaˈen, iin si Judas Iscariote, su tumipu pa dini Isus.

²⁰ Mendadi, minuliˈ si Isus. Benaˈ minuliˈ, pikpungunan na pelum nga melaun getaw. Kaas si Isus mukaˈ su nga sakupen, ndaˈ naig lakay nilan, pia laak kaˈaan nilan. ²¹ Mendadi su ginaˈ ni Isus dakus su nga pateden, benaˈ midengeg nilan puˈ mitegelan iin sabaˈ nu kelaun getaw, linaawan nilan dayun, ulipiten nilan sia, puˈ laung nu nga getaw, miktalintalin dawi ginaa ni Isus.

²² Naa ki nga mekpetuˈun di Misulat Palinta nu Megbebayaˈ, genat ilan ditu Jerusalem, pekteluˈen nilan dadema mekatag dini Isus, “Aa, ki getaw kiin, pingepuˈan ni Beelsebul!^a Kaas iini megaganen dun utidayi menenulay, puˈ bigayan ginuung nu kaunutan nilan.”

²³ Mendadi, sinabi ni Isus su nga getaw miktaluˈ maˈnia. Migwali dayun dinilan si Isus pebian di penenggiˈan, laungen, “Naa saˈ sia metuud ia, naa si Satanas, kendutaˈenen ma dun pegutidig daniin lawas? ²⁴ Puˈ pinenggiˈ duuni nasud meksimawiˈ mukaˈ megunay megbunuˈ, ndiˈ maiben metulag. ²⁵ Samanen ki salapenan, saˈ meksimawiˈ mukaˈ meksual, metulag dadema. ²⁶ Maˈantu dadema si Satanas. Saˈ pinenggiˈ meksimawiˈ su peglegediˈanen, dayun megunay megbunuˈ, ndiˈ ba metulag, deksuˈanen, mbeleng?

²⁷ “Mendadi,” laung ni Isus, “ki getaw suled tug balay letaban getaw puˈ adun elapenen su pimetangen, ndiˈen malap su pimetangen, subay unaanen pa beluday kig letaban.^b Dayun saˈ megaganen beluday kig letaban kia, naa megaganen na tuˈu elapay ki pimetangen kia.

²⁸ “Taman taluˈu diniu, su nga kelaun salaˈ nu kilawan, pedesunen da, sampay su kelaun keksudiˈ nu getaw tu Megbebayaˈ. ²⁹ Dagid adin su getaw peksudiˈanen sug Balakat nu Megbebayaˈ, kiin, ndiˈ na pedesunen, puˈ mikesalaˈ dun sampay saumul.” ³⁰ (Kaas tinaluˈ ni Isusi maˈnia, puˈ laung nug duma getaw, “Pingepuˈan main menulay.”)

³¹ Naa su ginaˈ ni Isus mukaˈ su nga pateden, minateng nailan diag balay tinuunan ni Isus. Pegindeg ilan diag liu, pisabi nilan dayun si Isus. ³² Melaun getaw pegingkud dia, piglidungan nilan si Isus. Mendadi, pisuunan nilan dayun si Isus, laung nilan, “Sir, kia na liu su ginaˈ mu mukaˈ su nga pated mu, peksebiin ka nilan.”

³³ Sumimbag si Isus, “Naa, waˈa. Laak taway dun mai ginaˈu? Mukaˈ taway dun mai patedu?” ³⁴ Pingenlenganen su nga getaw pegingkud migalidung diniin, kaliˈ pektaluˈ dinilan, “Kini paduni ginaˈu mukaˈ nga patedu! ³⁵ Adini getaw megdunut tu mauyaˈan nu Megbebayaˈ, iin pa pagidi patedu, libun saˈ laki, sampay ginaˈu.”