¹ Naa benaˈ minayani genem gebii, tumiwad si Isus di metaas bentud. Pidunuten si Pedro mukaˈ duaˈ tawan mekpated, si Santiago mukaˈ si Juan, ilanilan da laak. ² Mendadi, benaˈ ditu nailan dibabaw nug bentud, saanan nu nga sakupen megbantay diniin, masiˈ mitekaw mpalin su palas ni Isus, tumiagi muluˈen, maaˈ nu tiag nu gendaw. Sampay su nga penepetenen, miputiˈ tantu, maaˈ nug delag. ³ Mukaˈ padun minitaˈ nilanig duaˈ tawan dengantu pimuunan nu Megbebayaˈ, masiˈ si Moises mukaˈ si Elias, pegabitabit ilan ni Isus. ⁴ Si Pedro, kaliˈ pektaluˈ dini Isus, “Aa Kaunutan, melengas puˈ dini dami! Naa saˈ meliaga da, megbaalu dini bebelayan telu buuk, salabuuk daniˈa, salabuuk dani Moises, mukaˈ salabuuk dani Elias.”

⁵ Benaˈ ndaˈ medeksuˈ mektaluˈ si Pedro, duuni gabun mituaˈ, tumiag gupia, mikeleklem dinilan. Duuni miktaluˈ dig dialem gabun kia, laungen, “Kini na tuˈu sug Bataˈu, ki petailen ku, leliagenu dun gupia. Pekineegay niu iin!”

⁶ Naa benaˈ midengeg nu nga sakup ni Isus ki taluˈ kia, mipatiˈ ilan mendek, mikeglaub ilan diag lupaˈ. ⁷ Dagid mikpesempel dinilan si Isus, dipenanen ilan, laungen, “Naa, pegbuat amu. Ndiˈ amu mendek!” ⁸ Kaliˈ ilan tingag, ndaˈidun nai getaw minitaˈ nilan dia, sala da dun ni Isus.

⁹ Mendadi duminiksun ilan genat diag bentud. Saanan nilan dumiksun, inungub ni Isus su nga sakupen, laungen, “Ki pinitaˈ diniu kia, ndaˈiduni ukitan niu dun, pia sala tawan, sampay da dun petubuˈen puliˈ kig Bataˈ nu Kilawan genat matay.”

¹⁰ Sinaak nu nga sakupen dini Isus, “Sir, saˈ maˈnia, su nga mekpetuˈun di Misulat Palinta nu Megbebayaˈ, taˈ mai ketaluˈ nilan dun puˈ subay lumusad pa si Elias, dekag pa ki Tinduˈ nu Megbebayaˈ Meglekaunutan?”

¹¹ Kaliˈ sembag si Isus, “Naa metuud, si Elias, mauna daan metuaˈ, puˈ adun pengusainen pa sug launan. ¹² Dagid taman taluˈu diniu, si Elias, daan na mituaˈ, dagid iin, ndaˈ mailala nu getaw, dayun linaksap nilan peglegetay. Mendadi naan kini, kig Bataˈ nu Kilawan, maˈantu dadema, pelegetan dau dema nu getaw.”

¹³ Iin pa mesabut nu nga sakup ni Isus puˈ ki tinaluˈen kia mekatag dini Elias, iini pisugaten dun si Juan su Memunag Tubig.

¹⁴ Mendadi benaˈ minateng puliˈ si nga Isus dia tandaˈ nu melaun getaw kia, duuni sala tawan mikpesempel dini Isus, minginlulud di gedapanen, ¹⁵ kaliˈ pektaluˈ, “Sir, lelaatay mu kig bataˈu kini! Puˈ binabuy patiˈ, tatap melabuˈ di gapuy atawaka di tubig. ¹⁶ Naa, iwitu dini nga sakup mu kini, laak ndaˈ nilan megaga pauliˈay.”

¹⁷ Kaliˈ pektaluˈ si Isus tu nga getaw dia, “Ay, yamu pa di nga getaw nemun, ndaˈi salig niu dinaan, mipenulay amu! Pinlukas nau dumuma diniu. Santaˈ pai kaibenen, ki ketigelu diniu? Uit niu dini naani gembataˈ kiin!” ¹⁸ Mendadi pimaag dayun ni Isus ki menulay kia. Migawaˈ dayun su menulay, mitekaw mauliˈay su gembataˈ.

¹⁹ Naa benaˈ ndaˈidunig lain getaw duma nilan, minadap dini Isus su nga sakupen, sinaak nilan diniin, “Sir, alanduni puunanen, ndaˈ nami mautiday dun su menulay kitu?”

²⁰ Simbag ni Isus dinilan, “Sabaˈ kulangi kesalig niu! Puˈ taman taluˈu diniu, ki kesalig niu, pia laak sia maˈniin bagel salabuuk lisu mustasa, naa megaga niu suguˈayig bentud kinuˈ, laung niu, ‘Awaˈa diin, galin ka ditu!’ dayun gumalin dema tuˈu kig bentud. Kaas ndaˈiduni ndiˈ niu megaga! [ ²¹ Dagid ki maˈniin palas, ndiˈ mautidan, subay pebianen laak di kenenabi mukaˈ di kekpuasa.]”

²² Naa benaˈ mikpungun dini Isus ditu Galilea su nga sakupen, kaliˈ pektaluˈ si Isus dinilan, “Mendadi naan kini, kig Bataˈ nu Kilawan, duuni gendaw mateng, pegwakilu tu pegbayaˈ nu getaw. ²³ Deksuˈanen, petainu nilan. Laak dagid di ketelu endawen genat di kepatayu, petubuˈenu puliˈ.”

Milegenan dayun gupia su nga sakupen ditu tinaluˈ kia ni Isus.

²⁴ Naa minundas si Isus tu Capernaum, ilan nu nga sakupen. Mendadi duuni nga getaw mendawat buis tug Balay Pengedapan tu Megbebayaˈ, luminabet ilan dini Pedro, sinaak nilan diniin, “Naa ki mekpetuˈun diniu kia, megbayad ma buis tu Pengedapan tu Megbebayaˈ?”

²⁵ “Baa, mauma ndiˈ?” simbag ni Pedro.

Minundas dayun si Pedro ditug balay. Sikna na mitulan si Pedro, miguna mektaluˈ si Isus, sinaaken, “Naa, Simon, alandunig delendeman mu? Saˈ su nga gadiˈ dinig dibabaw lumbang, taˈ taway duni megbayad buis dinilan? Su nga sakup nilan, saˈ kig lain getaw?”

²⁶ Kaliˈ sembag si Pedro, “Baa, ki ngag lain getaw da laak.”

“Naa saˈ maˈantu,” laung ni Isus, “su sakup nu nga gadiˈ, ndiˈ ilan kambat megbayad buis dinilan. ²⁷ Dagid ki mendawat buis kia, tekaw mbuus melaati ginaa nilan dinita. Saˈ maˈnia, alapa benggwit, angaya dayun diag linaw, tikpuˈ mu dia sug benggwit mu. Siknaa mekelaam, pegbentayay muig dialem babaˈ ni sedaˈ kia, duun dayuni maitaˈ mu kwarta, sukal dig buis ta duaˈ tu Pengedapan. Iin dayunig buis mu dinilan.”