¹ Mukaˈ tinaluˈ pa pagid ni Isus tu nga sakupen, “Taman taluˈu diniu, yamu nga getaw pegindeg dini nandaw, duun diniui ndiˈ matengi gumulen, meduaˈ matanen ki Keglekaunutan na tuˈu nu Megbebayaˈ, medayag na tuˈui ginuungen.”

² Naa, benaˈ minayani genem gebii, tumiwad si Isus di metaas bentud. Pidunuten si nga Pedro, si Santiago mukaˈ si Juan, ilanilan da laak. Mendadi, benaˈ ditu nailan dibabaw nug bentud, saanan nu nga sakupen megbantay diniin, masiˈ mitekaw mpalin su palas ni Isus. ³ Sampay su nga penepetenen, metinggas gupia sabaˈ keputiˈen, ndaˈiduni megaga nu mengekdak dig dibabaw benwa melepeng di keputiˈen. ⁴ Mukaˈ padun minitaˈ nilanig duaˈ tawan dengantu pimuunan nu Megbebayaˈ, masiˈ si Elias mukaˈ si Moises, pegabitabit ilan ni Isus. ⁵ Naa benaˈ minitaˈ ni Pedro, kaliˈ pektaluˈ dini Isus, “Aa Sir, melengas puˈ dini dami! Naa, megbaal ami bebelayan telu buuk, salabuuk daniˈa, salabuuk dani Moises, mukaˈ salabuuk dani Elias.” ⁶ Kaas mitaluˈ dun ni Pedro, puˈ ndaˈen mesuunayi gempia sia teluˈenen, sabaˈ mindek gupia, ilan nu ngag dumanen.

⁷ Benaˈ ndaˈ medeksuˈ mektaluˈ si Pedro, duuni gabun mituaˈ mikeleklem dinilan. Duuni miktaluˈ dig dialem gabun, laungen, “Kini na tuˈu sug Bataˈu, ki petailen ku! Pekineegay niu iin!” ⁸ Kaliˈ ilan peglingaylingay, tekaw ndaˈidun nai getaw minitaˈ nilan dia, sala da dun ni Isus.

⁹ Mendadi, duminiksun ilan genat diag bentud. Saanan nilan dumiksun, inungub ni Isus su nga sakupen, laungen, “Ki minitaˈ niu kia, ndaˈiduni ukitan niu dun pia sala tawan, sampay da dun metubuˈ puliˈ kig Bataˈ nu Kilawan genat matay.”

¹⁰ Naa saˈ maˈantu, ndaˈ nilan tuˈu pesuun tug lain getaw. Pegyegayegaan laak nilan, laung nilan, “Alandun saani maˈananen, ki tinaluˈen kiin puˈ metubuˈ daw puliˈ iin saˈ genat matay?” ¹¹ Sinaak nilan dini Isus, “Sir, saˈ maˈnia, su nga mekpetuˈun di Misulat Palinta nu Megbebayaˈ, taˈ mai ketaluˈ nilan dun puˈ subay lumusad pa si Elias, dekag pa ki Tinduˈ nu Megbebayaˈ Meglekaunutan?”

¹² Kaliˈ sembag si Isus, “Naa metuud, si Elias, mauna daan metuaˈ, puˈ adun pengusainen pa sug launan. Dagid mekatag pelum dinaan, kig Bataˈ nu Kilawan, taˈ mai misulat dun ditu Taluˈ nu Megbebayaˈ puˈ gembageli kekpeleget dinaan, mukaˈ peksudiˈan pau padun? ¹³ Dagid taman taluˈu diniu, si Elias, daan na mituaˈ, dayun linaksap peglegetay nu getaw, maaˈ dadema nu daan na misulat mekatag diniin ditu Taluˈ nu Megbebayaˈ.”

¹⁴ Naa benaˈ mipuliˈ si nga Isus ditug duma sakupen, melaun gupia getaw minitaˈ nilan, pegapuluˈ ilan dia nga sakupen. Dakus duuni nga mekpetuˈun di Misulat Palinta nu Megbebayaˈ, siwal nilan su nga sakup ni Isus. ¹⁵ Benaˈ minitaˈ nu nga melaun getaw si Isus, mitekawan ilan gupia diniin, minggebek ilan dayun sumungkak diniin, didialan nilan gupia iin. ¹⁶ Mendadi, kaliˈ saak si Isus dinilan, “Naa, taˈi piksualan niu kiin?”

¹⁷ Kaliˈ sembagi sala tawan, “Sir, kig bataˈu kini, iwitu sia dini niˈa, puˈ peglegetan menulay, kaas beed. ¹⁸ Saˈ matengi kegleget dun, mbuksak tug lupaˈ, dayun megbulaˈig babaˈen dunut mengkiget di ngisinen, dayun mengekilig lawasen. Naa, inubugu di nga sakup mu kini, utidan nilan sia ki menulay, laak ndaˈ nilan megaga.”

¹⁹ Kaliˈ pektaluˈ si Isus tu nga getaw dia, “Ay, yamu pa di nga getaw nemun, ndaˈi salig niu! Pinlukas nau dumuma diniu. Santaˈ pai kaibenen ki ketigelu diniu? Uit niu dini naani gembataˈ kiin.” ²⁰ Iwit tuˈu dia ni Isus su gembataˈ.

Naa ki menulay kia, lemen laak minitaˈen si Isus, silunuˈanen pelum su gembataˈ, binabuy dayun. Mibuksak diag lupaˈ, migenselenselig lawasen mukaˈ migbulaˈig babaˈen. ²¹ Sinaak ni Isus tu gamaˈ nu gembataˈ, “Minibenen na betikayi maˈnini kini?”

Kaliˈ sembag su gamaˈen, “Genat pa kaikaˈayen. ²² Tatap lebuˈen nu menulay di gapuy atawaka di tubig, petainen sia. Kaas kalukalu megaga mu da sia, lelaatay mu dema tuˈu ami, ebangay mu ami!”

²³ Kaliˈ pektaluˈ si Isus, “Ditu pa taluˈ mu saˈ megaga mau, naa iin pasiˈi gempia teluˈen, saˈ yaˈa pelumi mekegaga dun! Saˈ sumaligi getaw, ndaˈiduni ndiˈen megaga.”

²⁴ Minekeg dayun mektaluˈ su gamaˈ nu gembataˈ, laungen, “Duun siai kesaligu Sir, laak kulang. Kaas dugangay mu ki kesaligu!”

²⁵ Misimaˈ ni Isus puˈ pegisel dinilan su melaun getaw. Mendadi pimaag dayun ni Isus ki menulay kia, laungen, “Yaˈa menulaya, bengelen mukaˈ beed nga ginuung, gawaˈa, mukaˈ ndiˈa na gusay puliˈ selunuˈ di gembataˈ kiin!”

²⁶ Migbeksay su menulay, mukaˈ pisedilen patiˈ su gembataˈ. Dayun megawaˈ diniin su menulay. Naa su gembataˈ, maˈniin palas minatay, kaas mitaluˈ nu nga getaw dia, “Minatay na!” ²⁷ Laak dagid si Isus, piguidanen su kemet nu gembataˈ, biwaten. Migindeg dayun su gembataˈ.

²⁸ Naa saˈ minuliˈ si nga Isus tug balay nilan, benaˈ ndaˈidunig lain getaw duma nilan, sinaak nu nga sakupen, “Sir, alanduni puunanen, ndaˈ nami mautiday dun su menulay kitu?”

²⁹ Simbag ni Isus dinilan, “Ki maˈniin palas, ndiˈ mautidan, subay pebianen laak di kenenabi.”

³⁰ Naa minundas pelum si nga Isus genat dig benwa kia, minian ilan ditu Galilea. Laak pigbuni ni Isus su kepanaw nilan, ³¹ puˈ pektuˈunanen pa su nga sakupen. Kaliˈ pektaluˈ si Isus, “Mendadi naan kini, kig Bataˈ nu Kilawan, duuni gendaw mateng, pegwakilu tu pegbayaˈ nu getaw. Deksuˈanen, petainu nilan. Laak dagid di ketelu endawen genat di kepatayu, metubuˈu puliˈ.”

³² Dagid ki tinaluˈ kia ni Isus, ndaˈ metekad nu nga sakupen, mukaˈ mekalangalang ilan dema sumaak dun diniin.

³³ Maˈantu, minateng ditu Capernaum si nga Isus. Benaˈ mikauliˈ nailan tug balay, sinaak ni Isus tu nga sakupen, “Taˈ alanduni pigyagayaga niu kiin, su diin paita dalan?”

³⁴ Naa mpauk ilan meksembag, puˈ iin masiˈi pigyagayaga nilan diag dalan, saˈ taway dun dinilani tampusan metaasi tindegen. ³⁵ Mendadi, migingkud si Isus, sinabinen su nga sepuluˈ buˈ duaˈ tawan sakupen, pisempelen ilan diniin. Kaliˈ taluˈ si Isus, “Su getaw mauyaˈanen sia iini tampusan metaasi tindegen, subay iin sungkini mbaal tampusan gembabaˈi tindegen diniu, sampay mbaal sesuguˈen nu kelaun samasakupen.” ³⁶ Dayun suminabi si Isus sala tawan gembataˈ, piˈindegen di gedapan nilan. Sinipiten dayun su gembataˈ, kaliˈ pektaluˈ, ³⁷ “Adin su menembaˈ di sala tawan gembataˈ maaˈ ni gembataˈ kini sabaˈ nu kesakupen dinaan, naa gitunganen, naani mipenembaˈen. Pidag pa tanan, kagina pinembaˈu niin, mipenembaˈen dadema su suminuguˈ dinaan.”

³⁸ Laak dagid si Juan, kaliˈ pektaluˈ dini Isus, “Sir, duuni minitaˈ nami getaw megutid di menenulay, sembayanen su ngalan mu. Laak pimaag nami, puˈ kanaˈ tain samasakup di pikumpungan ta.”

³⁹ Laak kaliˈ sembag si Isus, “Naa, ndiˈ niu dema pemaagay. Puˈ ki getaw menggulaula mekesalebuˈ, sembayanen su ngalan ku, kanaˈ dayun meglibak dinaan. ⁴⁰ Adini getaw kanaˈ kuntra ta, iini sugut ta. ⁴¹ Taman taluˈu diniu, pinenggiˈ duuni getaw megbegay diniu sala tasai tubig sabaˈ sakup amu dinaan kini, si Kristu, naa su getaw mekpainum dun diniu, sugdaan tuˈu nu Megbebayaˈ.”

⁴² Kaliˈ pektaluˈ si Isus, “Mendadi, adin su getaw mekegdaang di sala tawan gembataˈ kini, ki mikpetuud na dinaan, naa ki mekegdaang dun kia, saˈ pinenggiˈ palintangan gembagel galingan dayun lebuˈay tug laud, tumuˈ megaan daitu, sabayaˈ nu ginukuman nu Megbebayaˈ tu getaw mekegdaang di gembataˈ kini. ⁴³ Kaas saladuaˈ diniu, saˈ pegdaangan ka, ki kemet mui mekesabaˈ dun, naa putuk mui kemet mu kiin! Puˈ tumuˈ pa mpedumaa di ketubuˈ ndaˈi tamanen, pungkula, sabayaˈ mesangkapi kemet mu, laak mekauliˈa tug linaw gapuy ndaˈ nai kepalengen. [ ⁴⁴ Mukaˈ misulat ditu Taluˈ nu Megbebayaˈ puˈ tug linaw gapuy, ‘Su guled mengaan dig bangkay nilan, ndiˈ na matay. Mukaˈ su gapuy ditu mektutung dinilan, ndaˈ nai kepalengen.’]”^{a 45} Mukaˈ miktaluˈ pagid si Isus, “Mesama da saˈ pegdaangan ka, ki geksud mu pelumi mekesabaˈ dun, naa putuk mui geksud mu kiin! Puˈ melengas pa diniˈa saˈ mpedumaa ditu ketubuˈ ndaˈi tamanen, sedibaluyi geksud mu, sabayaˈ mesangkapi geksud mu, laak lebuˈen ka tug linaw gapuy. [ ⁴⁶ ‘Su nga guled ditu, ndaˈ daani kepatayen. Su gapuy ditu, ndaˈ nai kepalengen.’] ⁴⁷ Mukaˈ pagid, saˈ pegdaangan ka, ki mata mu pelumi mekesabaˈ dun, naa asak mui mata mu kiin! Puˈ melengas pa diniˈa saˈ mpedumaa tu Keglekaunutan nu Megbebayaˈ, salabuuk daig lisu mata mu, sabayaˈ mesangkapi mata mu, laak lebuˈen ka tug linaw gapuy. ⁴⁸ ‘Su nga guled ditu, ndaˈi kepatayen. Su gapuy ditu, ndaˈ nai kepalengen.’”^b

⁴⁹ Laung pa ni Isus, “Menukid di nga getaw, esinan gapuy.

⁵⁰ “Naa ki masin, gembageli gatagen. Laak dagid saˈ meksitebang su masin, kendutaˈen ma dun pekpepuliˈ tu kepaiten?

“Peksalabuuk amu di ginaa, puˈ adun sug betad niu, melengas, maaˈ nu kelengas nu masin.”