¹ Naa benaˈ mideksuˈ ni Isus su kektituluˈen kia, migawaˈ dia Galilea, duminipag tu Tubig Jordan, miditu prubinsya Judea pelum. ² Melaun gupia getaw migdunut diniin, pineguliˈaneni pegladu dinilan.

³ Mendadi, duuni nga Pariseo kuminitaˈ dini Isus, pengimanan nilan sia iin. Suminaak dini Isus su nga Pariseo, “Naa, biwang ba dinita ditu Misulat Palinta nu Megbebayaˈ, belengen nug laki su sawanen, pia alanduni puunanen?”

⁴ Suminuliˈ dayun si Isus sumaak dinilan, laungen, “Baa, ndaˈ ba niu mbasa su misulat ditu Taluˈ nu Megbebayaˈ puˈ ditu pikpuunan nug launan, biwat nu Megbebayaˈ su getaw laki mukaˈ libun? ⁵ Mukaˈ padun miktaluˈ su Megbebayaˈ, ‘Mendadi kagina maˈantu, sug laki, suay ditu ginaˈen buˈ gamaˈen, sumalabuuk na tu sawanen. Kaas su kamun duaˈ lawas pailan, meksala lawas nailan.’ ⁶ Naa saˈ maˈantui pisulat nu Megbebayaˈ, maˈananen, sug laki mukaˈ su sawanen, kanaˈ nailan duaˈ lawas, puˈ sala lawas nailan. Su piksalabuuk nu Megbebayaˈ, subay ndiˈ nu kilawan pepegbelengen.”

⁷ Sinaak pelum nu nga Pariseo, “Naa saˈ maˈantu, taˈ mai duuni palinta dun ni Moises puˈ sug laki, mekpebaal pa keligenan tuˈus dun, dayun megbeleng tug sawanen?”

⁸ Kaliˈ sembag si Isus, “Paa, kaas ma biwang ditu palinta nu Megbebayaˈ sinulat ni Moises, mbeleng niu su nga sawa niu, puˈ sabaˈ nu ketegas nu gulu niu. Laak dagid genat tu kebuat nu Megbebayaˈ di gekleb langit buˈ lupaˈ, kanaˈ maˈnia. ⁹ Kaas naan kini, iini taluˈu diniu, adin sug laki belengenen su sawanen, asa ndaˈ peglelingay sug libun, dayun menginsawa na puliˈ dig lain libun sug laki, naa kiin, mikesalaˈ dusa.”

¹⁰ Kaliˈ dayun pektaluˈ su nga sakup ni Isus, “Apelai Sir, naa saˈ maˈniai palinta mekatag di senlangan, iini gempia, ndiˈ menginsawai getaw.”

¹¹ Kaliˈ sembag si Isus, “Aa naa, ki teluˈen mu kia, ndiˈ megaga dunutay nu kelaun getaw, subay su laak tenduˈen nu Megbebayaˈ adun mekedunut dun. ¹² Puˈ duunig laki ndiˈ mekenginsawa, sabaˈ gasalen. Duun pelumi ndiˈ dadema mekenginsawa, puˈ tebiaˈ, iningemuan nu samatawen. Mukaˈ pa padun, duun pelumi ndiˈ menginsawa, puˈ adun teleduunen su gabangen tu Keglekaunutan nu Megbebayaˈ. Kaas adin su mekegaga tu teluˈen kini, naa gempia pedunutanen.”

¹³ Naa duuni getaw mimeguit bataˈ nilan ditu ni Isus adun pendepenanen ilan mukaˈ penenebianen. Laak dagid su nga sakup ni Isus, pimaag nilani nga getaw kia. ¹⁴ Kaliˈ pektaluˈ si Isus, “Ki nga gembataˈ kiin, petuyang niu ilan mangay dinaan, ndiˈ niu belibaday. Puˈ iin laaki mekesakup tu Keglekaunutan nu Megbebayaˈ, su megimbataˈ dig betaden.”

¹⁵ Saˈ maˈnia, dipenan dayun ni Isus su nga gembataˈ kia. Mitubusen depenay, mipanaw si Isus.

¹⁶ Mendadi duuni getaw kuminitaˈ dini Isus, sinaaken diniin, “Sir, taˈ alanduni gempia penggulaulaan ku, adun mpedumau tu ketubuˈ ndaˈi tamanen?”

¹⁷ Suminaak puliˈ si Isus di getaw kia, “Baa, mauma dema saakan mau mekatag di gempia penggulaulaan? Sala Tawan da laaki mekesuun tantu. Dagid saˈ mauyaˈan mu mpedumaa tu ketubuˈ ndaˈi tamanen, iini pektalentenay mu su nga palinta.”

¹⁸ Sinaak ni getaw kia, “Naa, taˈ ma palintaay dun?”

Kaliˈ sembag si Isus, “Maˈniin ndiˈa pekpatay, ndiˈa pegdusa, ndiˈa pegdaaw, ndiˈa penakesiˈ dig balus, ¹⁹ pegbesaay mu su ginaˈ mu buˈ gamaˈ mu, petail mu sug duma mu. Su kepetail mu diniin, pelepeng mu di kepetail mu dig lawas mu.”

²⁰ Kaliˈ sembagig begu getaw kia, “Naa Sir, ki kelaun palinta kia, dinunutan ku. Naa saˈ maˈantu, alandun pai kulang dinaan?”

²¹ “Mendadi,” laung ni Isus, “saˈ mauyaˈan mu mekesuun ka tantu, naa panawa na, peksaluy mu ki kelaun gimu mu, dayun pemegay mu tu nga pubri getaw su galinen. Duun dayuni gaˈus mu ditu gekbus langit. Dayun puliˈa dini naan, pegdunuta dinaan.”

²² Dagid kaliˈ medengeg nug begu getaw ki tinaluˈ kia ni Isus, migawaˈ dia ni Isus, milegenan patiˈ, puˈ medatuˈ gupia getaw iin.

²³ Mendadi su kepalus nug begu getaw kia, kaliˈ pektaluˈ si Isus tu nga sakupen, “Taman taluˈu diniu, ki medatuˈ getaw, melegen tuˈu ki kesakupen tu Keglekaunutan nu Megbebayaˈ. ²⁴ Puliˈan ku teluˈay diniu, melemu pa su kebian nu petubuˈen kamelyu dig luang taiˈ, sabayaˈ nu kesakup nu medatuˈ getaw tu Keglekaunutan nu Megbebayaˈ.”

²⁵ Naa benaˈ midengeg nu nga sakup ni Isus su tinaluˈen kia, mipatiˈ ilan mesebuˈay dun. Laung nilan, “Saˈ maˈantu, Sir, duun bai megawen?”

²⁶ Pingenlengan ni Isus su nga sakupen, kaliˈ pektaluˈ, “Ndiˈ daan megaga nu kilawan. Dagid su Megbebayaˈ, ndaˈiduni ndiˈen megaga.”

²⁷ Suminambut dayun mektaluˈ si Pedro, laungen, “Sir, yami kini, bileng na nami gupia ki kelaunanen, adun megdunut ami diniˈa. Naa saˈ maˈantu, alanduni sugda dinami?”

²⁸ Laung ni Isus, “Taman taluˈu diniu, saˈ mateng su Kebuat Puliˈ tu gekleb langit buˈ lupaˈ, naan kini, kig Bataˈ nu Kilawan, mingkud nau tuˈu meglekaunutan, medayag na su kelengas nu pegbayaˈu. Naa saˈ mingkud nau meglekaunutan, yamu nu nga sepuluˈ buˈ duaˈ tawan sakupu, mingkud damu dema mengukum tu nga sepuluˈ buˈ duaˈ bansa nu getaw Israel. ²⁹ Mukaˈ adini getaw belengenen sug balayen, saˈ su nga pateden libun laki, ginaˈen saˈ gamaˈen, ngag bataˈen sampay sug lupaˈen, sabaˈ nu kesakupen dinaan, naa sugdaan megatus piluˈ, mukaˈ mpeduma pa pagid tu ketubuˈ ndaˈi tamanen. ³⁰ Laak dagid melaun getawi mauna nemun, iini mbinayaˈ saˈ matengi gendaw kiin ditug binayaˈ gebii buˈ gendaw. Melaun dadema getaw mbinayaˈ nemun, iin na sungkini mbaluy muna saˈ matengi gendaw kiin.”