¹ Kaliˈ pektaluˈ si Isus, “Mendadi saˈ meglekaunutan na tuˈu su Megbebayaˈ, maˈniniˈig bianen. Petanggiˈu di getaw meliwagig lupaˈen, milapus mpanaw, puˈ menengaw tindananen mengimbaal dia pegimulananen gubas. ² Mendadi benaˈ mibaangan nu gapuˈ lupaˈi nga tindananen, mikpasad ilan, iini tindan dinilan ki sendaw, sala denario, iinig lagaˈen ki sendaw di timpu kitu. Naa saˈ maˈantu, sinuguˈen dayun ilan mangay mengimbaal dia pegimulananen kia. ³ Mendadi benaˈ miginengaˈ menaiki gendaw, mipanaw puliˈ su gapuˈ lupaˈ, minangay puliˈ tu tebuˈan. Duuni nga getaw minitaˈen pemegindeg laak dia, ndaˈig baalen nilan. ⁴ Tinaluˈen dinilan, ‘Naa yamu pagid, angay amu dema pengimbaal ditu pegimulanan ku. Dayun ki tindan diniu, peksemaan ku di kengimbaal niu.’ ⁵ Saˈ maˈnia, mipanaw ilan dema. Naa iin nai migbatag ia, saˈ miktui gendaw mukaˈ ginengaˈ menaugi gendaw, maˈantu da gusayi pinggulaula ni gapuˈ lupaˈ kia. ⁶ Benaˈ sungu na mesindepi gendaw, mipanaw na puliˈ ditu tebuˈan. Duun pa gusayi nga getaw pemegindeg dia. Sinaakanen ilan dayun, laungen, ‘Mauma iin sendaw amu gupia dini, ndaˈig baalen niu?’ ⁷ Kaliˈ ilan sembag, ‘Waˈa, puˈ ndaˈiduni tumindan dinami.’ Laung dayun nu gapuˈ lupaˈ, ‘Naa saˈ maˈantu, angay amu pengimbaal ditu pegimulanan ku.’”

⁸ Laung pa ni Isus, “Mendadi benaˈ misindep nai gendaw, miktaluˈ su gapuˈ lupaˈ ditu kapatasen, ‘Naa, sabi mu su nga tinindanan, tindanay mu ilan. Laak iini pauna mu tindanay, su mibinayaˈ mengimbaal. Dayun mu tindanay su ngag duma, sampay su miuna mengimbaal, iini binayaˈ mu tindanay.’ ⁹ Naa su nga getaw mikpuun mengimbaal saˈ sungu na mesindepi gendaw, iini tindan dinilan, piksala denario. ¹⁰ Mendadi su nga miuna mekpuun mengimbaal, saˈ ilan pelumi minangay mekpetindan, laung nilan dun melaun siaig danilan tindan. Dagid su da daan masiˈ, piksala denario da gusayi tindan dinilan. ¹¹ Kaliˈ nilan medawat su kwarta nilan, pigbensi nilan su gegalen nilan kia. ¹² Laung nilan, ‘Paa, ki nga tampusan binayaˈ kia, mingimbaal laak sauras da! Yami dagid, sendaw ami gupia miktigel mengimbaal, mesait pedes pa padun! Kaas mauma ki tindan dinilan, pisama mu da gusay di tindan dinami?’ ¹³ Dagid kaliˈ pektaluˈ su gapuˈ lupaˈ di sala tawan dinilan, ‘Aba, lai, ndaˈu yaˈa limbungay. Puˈ iini pegdelendem mu, sinanguˈ mu su tindan sendaw, sala denario. ¹⁴ Kaas alap mu ki tindan mu kini, uliˈa dayun. Puˈ iini mauyaˈan ku, peksemaan ku su tindan diniˈa mukaˈ su tindan tu mibinayaˈ mengimbaal. ¹⁵ Ki kwartau kia, kanaˈ ba naani megbayaˈ dun? Naa saˈ metawalu, mauma mingimbegua dun?’”

¹⁶ Diksuˈ ni Isus su taluˈen, “Kaas ki nga getaw mbinayaˈ nemun, iini mbaluy mauna di gendaw kiin ditug binayaˈ gebii buˈ gendaw. Ki nga getaw mauna nemun, iin na sungkini mbinayaˈ di gendaw kiin.”

¹⁷ Naa maˈantu, pektuad si nga Isus tu Jerusalem. Mendadi sinegay nilan mpanaw, sinabi ni Isus su sepuluˈ buˈ duaˈ tawan sakupen. Kaliˈ pektaluˈ si Isus dinilan, ¹⁸ “Naa, pektalentenay niu gupia ini. Kini, tuad naita tuˈu di Jerusalem. Mendadi saˈ mateng ita dia, naan kini, kig Bataˈ nu Kilawan, pegwakilu tu nga kaunutan nug belian nu getaw Judea mukaˈ tu nga mekpetuˈun di Misulat Palinta nu Megbebayaˈ. Ukumanu dayun nilan lagaˈ na ginau, ¹⁹ mukaˈ pegwakilu nilan tu nga kanaˈ getaw Judea, pengimusaunganu nilan mukaˈ bedasenu nilan. Dayunu lensangay di kurus. Laak dagid di ketelu endawen genat di kepatayu, petubuˈenu puliˈ.”

²⁰ Naa duunig libun, sawa ni Sebedeo, minadap dini Isus, ilan nug duaˈ tawan bataˈen si Santiago kiin mukaˈ si Juan. Minginlulud dayun di gedapan ni Isus sug libun, puˈ duuni ubugenen diniin.

²¹ Mendadi sinaak ni Isus tug libun, “Alandun mai penengiin mu baalen ku diniˈa?”

Kaliˈ sembag, “Naa Sir, saˈ mingkuda na tuˈu meglekaunutan, naa iin siai penengiin ku diniˈa, kig duaˈ tawan bataˈu kini, naa paingkuden mu ilan ditu gupid mu. Su sala tawan, diin dapit lintu mu, su sala tawan pelum, diin dapit bibang mu.”

²² Liningay dayun ni Isus kig duaˈ tawan mekpated, bataˈ nig libun kia, kaliˈ sembag dinilan, “Baa, ndaˈ niu mesuunay ki inubug niu kiin. Taˈ itu, megaga ba niu minum di tasa mipenuˈ kelegenay, ki sunguun ku na inumay?”

“Waˈa, Sir,” laung nilan, “megaga da nami.”

²³ Laung ni Isus, “Naa metuud, ki tasa ginuman ku, mekainum amu dun daan tuˈu. Laak dagid pia maˈantu, ndaˈi pegbayaˈu memiliˈ tu getaw mingkud di gupidu, diin dapit lintuu mukaˈ di dapit bibangu. Puˈ iin da laaki mekesaing dinaan, adin su gandang mitenduˈ nu Gamaˈu.”

²⁴ Naa su nga sepuluˈ tawan samasakup nilan dini Isus, benaˈ midengeg nilan ki inubug kia nu ginaˈ ni Santiago mukaˈ ni Juan puˈ ilan siai sumaing dini Isus saˈ meglekaunutan, lingetan ilan dun. ²⁵ Mendadi, sinabi ni Isusi kelaun sakupen kia, kaliˈ pektaluˈ dinilan, “Naa su nga kanaˈ getaw Judea, misuunan niu puˈ gembegati kegbayaˈ dinilan nu kaunutan nilan. Mukaˈ su ngag begelal nilan, metegas demai keguit nilan tu nga sakup nilan. ²⁶ Dagid yamu, ndiˈ amu mpia mengmaˈantu. Sinangkaliˈ adin diniui mauyaˈanen sia metaasi tindegen, subay iin nai mbaal sesuguˈen niu. ²⁷ Kaas adini mauyaˈanen sia puˈ iini tampusan metaasi tindegen dig launan niu, subay iin nai mbaal maaˈ nu gulipen niu. ²⁸ Puˈ pia pa naan kini, kig Bataˈ nu Kilawan, kanaˈ iini luminusadu dun dinig lumbang, puˈ adun duuni megabang dinaan. Segaga iin sungkini ginangayu medini, puˈ adun ebangan ku su kilawan, sampay petainu, puˈ adun lekaten ku su melaun getaw.”

²⁹ Naa saˈ minundas pelum si nga Isus genat dia Jerico, melaun gupia getaw mimegdunut dinilan. ³⁰ Naa saˈ mipalus ilan dig lunsud kia, duunig duaˈ tawan buta pegingkud dia geksid dalan. Mendadi benaˈ midengeg nug buta puˈ megbian dia si Isus, migbeksay ilan dayun, laung nilan, “Uu Sir, Sapuˈa ni David, lelaatay mu ami!”

³¹ Kig buta kia, pigbeluˈan dayun nu melaun getaw, pimaag nilan sia. Laak palu pa mpemaag, ndiˈ, minamal ilan mektawag, laung nilan, “Uu Sir, Sapuˈa ni David, lelaatay mu ami dema tuˈu!”

³² Tuminlen dayun si Isus, sinabinen su ngag buta kia. Sinaak ni Isus, “Taˈi penengiin niu dinaan?”

³³ “Sir, liagan nami sia, mekengitaˈ nami!”

³⁴ Milelaat si Isus dinilan, dipenanen dayun ki mata nilan. Lemen laak ilan dipenan ni Isus, mikengitaˈ na tuˈu sug duaˈ tawan buta. Mukaˈ tumindug ilan dini Isus tug dalan.