¹ Naa migukit si Isus tu nga sakupen sambingay, bianen mektituluˈ dinilan puˈ subay tatap ilan menenabi, ndiˈ ilan lumukas dun. ² Kaliˈ pektaluˈ si Isus, “Naa dia salabuuk lunsud, duuni kuis dia. Ki kuis kini, kanaˈ mendek ditu Megbebayaˈ, ndiˈ dadema megbasa di samatawen. ³ Naa duun pagidig balulibun diag lunsud kia. Kig balulibun kini, tatap mangay ditu kuis, kaliˈ pegubug diniin, ‘Sugutay mau ditu mipenggulaulau tu kuntrau!’ ⁴ Naa sug bekna kitu, mpauk sia megabang su kuis ditug balulibun kia. Laak saˈ miniben, laungen dig dialem ginaanen, ‘Aa, pia ndiˈu mendek tu Megbebayaˈ mukaˈ ndiˈu dadema megbasa di samatawu, ⁵ kig balulibun kini, peksemukenu niin patiˈ. Tumuˈ pedaagen ku na laak, adun ndiˈu penlukasen diniin, tatap pelum mekpuliˈpuliˈ dini!’

⁶ “Naa saˈ maˈantu,” maaˈ laung pa nu Kaunutan tu nga sakupen, “pia melaatig betad nu kuis kiin, pegdelendem niu ki tinaluˈen tug libun. ⁷ Naa su Megbebayaˈ pelum, saˈ menamal menenabi diniin gebii gendaw su nga pimiliˈen sakupen, kanaˈ ba labi pa mekpepia dinilan? Melangan ba megabang dinilan? ⁸ Taluˈu diniu, pepiananen dayun, sembutenen pepianay. Laak dagid pia maˈantu, saˈ lumusadu puliˈ dinig lumbang, naan kini kig Bataˈ nu Kilawan, metaangan ku ba, sumalig tu Megbebayaˈi nga getaw?”

⁹ Mendadi, miksambingay pa gusay si Isus, pisugaten ditu sambingayen su nga getaw delendeman nilan dun, ilan laaki mekesuun, peksudiˈan nilan su kelaun samataw nilan. ¹⁰ Kaliˈ pektaluˈ si Isus, “Duuni Pariseo minangay ditug Balay Pengedapan tu Megbebayaˈ, adun menenabi dia. Mukaˈ duuni sala tawan mendawat buis, midia dadema puˈ menenabi. ¹¹ Naa ki Pariseo kia, kaliˈ pegindeg menenabi, laungen dig dialem ginaanen, ‘Uu Megbebayaˈ, mekpaladpaladu diniˈa, puˈ naan kini, kanaˈu maaˈ nug lain getaw, meglimbung, menggulaula melaat, megdusa, saˈitada maaˈ nu mendawat buis kinuˈ. ¹² Puˈ kada sala simana, meduaˈu mekpuasa. Adin su sukatu, begayu diniˈa su kesepuluˈ ilas dun.’ ¹³ Laak dagid su mendawat buis, pegindeg dia melayuˈlayuˈ, ndaˈ tanan pegangag tug langit, sabaˈ mipatiˈ mpiid. Pengekdukeneni gegdeben, laungen, ‘Uu Megbebayaˈ, lelaatay mau, mekesesalaˈu getaw!’ ¹⁴ Naa,” maaˈ laung ni Isus, “taluˈu tuˈu diniu, ki mendawat buis kia, saˈ minuliˈ tug balayen di gendaw kia, mekesuun na di pegitaˈen nu Megbebayaˈ. Su sala tawan, ndaˈ. Puˈ adin su petaasenenig lawasen, iini pebebaˈen. Adin dema su pebebaˈenenig lawasen, iini petaasen.”

¹⁵ Naa pia su nga maikaˈ gembataˈ, pinguit nu nga getaw ditu ni Isus, adun pendepenanen ilan. Laak dagid benaˈ minitaˈ nu nga sakup ni Isus, pimaag nilani getaw kia. ¹⁶ Mendadi si Isus, pibundasen dia niin su nga gembataˈ, laungen tu nga sakupen, “Ki nga gembataˈ kiin, petuyang niu ilan mangay dinaan, ndiˈ niu belibaday. Puˈ iin laaki mekesakup tu Keglekaunutan nu Megbebayaˈ, su megimbataˈ dig betaden. ¹⁷ Taman taluˈu diniu, ndaˈi getaw mekesakup tu Keglekaunutan nu Megbebayaˈ, subay su kesaligen, maˈniin nu kesalig nu gembataˈ kini.”

¹⁸ Mendadi duuni kaunutan nu getaw Judea suminaak dini Isus, “Sir, mekesuun ka. Naa taˈ alanduni gempiau penggulaulaan, adun mpedumau tu ketubuˈ ndaˈi tamanen?”

¹⁹ Suminaak puliˈ si Isus di getaw kia, “Baa, mauma dema paingalan mu dinaan, mekesuun? Ndaˈiduni mekesuun tantu, subay su laak Megbebayaˈ. ²⁰ Dagid, misuunan mu na ki nga palinta, maˈniin ‘Ndiˈa pegdusa, ndiˈa pekpatay, ndiˈa pegdaaw, ndiˈa penakesiˈ dig balus, pegbesaay mu su ginaˈ mu buˈ gamaˈ mu.’”

²¹ Kaliˈ sembag su kaunutan, “Sir, ki kelaun palinta kia, dinunutan ku genat pa di kaikaˈayu.”

²² Laak benaˈ midengeg ni Isus, kaliˈ padun pektaluˈ, “Naa, duun pa gusayi kulang diniˈa. Peksaluy mu ki kelaun gimu mu, dayun pemegay mu tu nga pubri getaw su galinen. Duun dayuni gaˈus mu ditu gekbus langit. Dayun puliˈa dini naan, pegdunuta dinaan.” ²³ Dagid kaliˈ medengeg nu kaunutan ki tinaluˈ kia ni Isus, milegenan patiˈ, puˈ medatuˈ gupia getaw iin.

²⁴ Mendadi, benaˈ minitaˈ ni Isus, kaliˈ pektaluˈ, “Ki medatuˈ getaw, melegen tuˈu ki kesakupen tu Keglekaunutan nu Megbebayaˈ! ²⁵ Melemu pa su kebian nu petubuˈen kamelyu dig luang taiˈ, sabayaˈ nu kesakup nu medatuˈ getaw tu Keglekaunutan nu Megbebayaˈ.”

²⁶ “Aba,” laung nu nga mikedengeg tu tinaluˈ kia ni Isus, “saˈ maˈantu, duun bai megawen?”

²⁷ Kaliˈ sembag si Isus, “Su ndiˈ megaga nu kilawan, megaga gusay nu Megbebayaˈ.”

²⁸ Laak dagid si Pedro, kaliˈ pektaluˈ, “Sir, yami kini, pia sug balay nami, bileng na nami gupia, adun megdunut ami diniˈa!”

²⁹ “Waˈa,” laung ni Isus. “Mukaˈ taman taluˈu diniu, adini getaw belengenen sug balayen, saˈ su sawanen, nga pateden, mekegulangen sampay su ngag bataˈen, sabaˈ nu kesakupen tu Keglekaunutan nu Megbebayaˈ, ³⁰ naa nemun, sugdaan dun melaun. Dayun di gendaw kiin ditug binayaˈ gebii buˈ gendaw, mpeduma pa pagid tu ketubuˈ ndaˈi tamanen.”

³¹ Naa sinabi ni Isus su sepuluˈ buˈ duaˈ tawan peneliganen. Benaˈ ilanilan da laak, kaliˈ pektaluˈ si Isus, “Naa, pektalentenay niu gupia ini. Kini, tuad naita tuˈu di Jerusalem. Mendadi, saˈ mateng ita dia, naan kini, kig Bataˈ nu Kilawan, menuud tuˈu ki kelaun misulat dengantu nu nga pimuunan nu Megbebayaˈ mekatag dinaan. ³² Pegwakilu tu nga kanaˈ getaw Judea, dayun pengimusaunganu nilan, peksudiˈanu mukaˈ pendulaˈanu nilan, ³³ pembedasen pau nilan pagid. Dayunu petayay. Laak dagid di ketelu endawen genat di kepatayu, metubuˈu puliˈ.”

³⁴ Laak dagid su nga peneligan ni Isus, ndaˈi misabut nilan di kelaun tinaluˈen kia. Iglud pa deliˈ dinilan, kaas ndaˈ nilan mesuunay su tantu kelebuˈan nu tinaluˈen dinilan.

³⁵ Naa saˈ misebang si nga Isus dig lunsud Jerico, mitaangan nilan, duunig buta pegingkud dia geksid dalan, menengi limus. ³⁶ Mendadi benaˈ midengeg nug buta su gelang nu mimegbian kia getaw, sinaaken, “Alandun main?”

³⁷ Laung nu ngag dumanen, “Megbian na dini si Isus, ki getaw Nazaret kiin.”

³⁸ Migbeksay dayun sug buta, laungen, “Uu Isus, Sapuˈa ni David, lelaatay mau!”

³⁹ Kig buta kia, pigbeluˈan dayun nu nga getaw pekpanaw di gunaan ni Isus, pimaag nilan sia. Laak palu pa mpemaag, ndiˈ, minamal mektawag, laungen puliˈ, “Uu Sir, sapuˈa ni David, lelaatay mau dema tuˈu!”

⁴⁰ Tuminlen dayun si Isus. Piagaken kig buta kia di gupiden. Benaˈ mesempel diniin, ⁴¹ sinaak ni Isus, “Taˈi penengiin mu dinaan?”

“Sir, liagan ku sia, mekengitaˈ nau.”

⁴² Miktaluˈ si Isus, “Mekengitaˈa na! Miuliˈan ka na, puun di kesalig mu.”

⁴³ Lemen laak mitaluˈ ni Isus, mikengitaˈ dayun tuˈu sug buta. Mukaˈ tumindug dayun dini Isus, pegenalenen su Megbebayaˈ. Kampuˈ nu ngag lumaun getaw dia, saˈ minitaˈ nilan su mipenggulaula, inal nilan dadema su Megbebayaˈ.