¹ Naa migawaˈ si Isus dig benwa kia, minangay tu prubinsya Judea, dakus duminipag tu Tubig Jordan. Melaun getaw pelum mikpungun suminungkak diniin. Pituˈunanen dadema ilan, maaˈ da gusay nug daan betaden.

² Mendadi, duuni nga Pariseo kuminitaˈ dini Isus, pengimanan nilan sia iin. Suminaak dini Isus su nga Pariseo, “Naa, biwang ba dinita ditu Misulat Palinta nu Megbebayaˈ, belengen nug laki su sawanen?”

³ Suminuliˈ dayun si Isus sumaak dinilan, laungen, “Naa, alandun mai palinta nu Megbebayaˈ sinulat diniu ni Moises?”

⁴ Kaliˈ ilan sembag, “Biwang ni Moises puˈ sug laki, mekpebaal pa keligenan tuˈus dun, dayun megbeleng tu sawanen.”

⁵ Dagid miktaluˈ si Isus dinilan, “Paa, kaas ma biwang dun ditu palinta nu Megbebayaˈ sinulat ni Moises diniu, puˈ sabaˈ nu ketegas nu gulu niu. ⁶ Laak dagid genat tu pikpuunan nug launan, su kebuat nu Megbebayaˈ di gekleb langit buˈ lupaˈ, kanaˈ maˈnia. Puˈ iini misulat ditu Taluˈ nu Megbebayaˈ, ‘Biwat nu Megbebayaˈ su getaw laki mukaˈ libun.’ ⁷ Mukaˈ misulat pa pagid, ‘Mendadi kagina maˈantu, sug laki, suay ditu ginaˈen buˈ gamaˈen, sumalabuuk na tu sawanen. ⁸ Kaas su kamun duaˈ lawas pailan, meksala lawas nailan.’ Naa saˈ maˈantui pisulat nu Megbebayaˈ, maˈananen, sug laki mukaˈ su sawanen, kanaˈ nailan duaˈ lawas, puˈ sala lawas nailan. ⁹ Naa kagina maˈantu, su piksalabuuk nu Megbebayaˈ, subay ndiˈ nu kilawan pepegbelengen.”

¹⁰ Naa benaˈ ditu ilan balay, sinaakan pelum si Isus nu nga sakupen mekatag di kegbeleng nu senlangan. ¹¹ Kaliˈ sembag si Isus, “Adin sug laki, belengenen su sawanen dayun menginsawa na puliˈ dig lain libun, naa kiin, mikesalaˈ dusa. ¹² Mesama da sug libun, saˈ belengenen su sawanen, dayun penginsuaan puliˈ lain laki, naa kiin, mikesalaˈ dadema dusa sug libun.”

¹³ Naa duuni nga getaw mimeguit bataˈen ditu ni Isus, adun pendepenanen ilan. Laak dagid su nga sakup ni Isus, pimaag nilani nga getaw kia. ¹⁴ Mendadi, kaliˈ mesuunay ni Isus, milaati ginaanen tu nga sakupen. Kaliˈ pektaluˈ dinilan, “Ki nga gembataˈ kiin, petuyang niu ilan mangay dinaan, ndiˈ niu belibaday. Puˈ iin laaki mekesakup tu Keglekaunutan nu Megbebayaˈ, su megimbataˈ dig betaden. ¹⁵ Taman taluˈu diniu, ndaˈi getaw mekesakup tu Keglekaunutan nu Megbebayaˈ, subay su kesaligen, maˈniin nu kesalig nu gembataˈ kini.” ¹⁶ Saˈ maˈnia, suminipit si Isus tu nga gembataˈ kia, dipenanen ilan dayun mukaˈ pinenebianen ilan.

¹⁷ Benaˈ sumikat na pelum mpanaw si Isus, duuni getaw gumibek mekpesempel diniin dayun menginlulud di gedapanen, kaliˈ saak diniin, “Sir, mekesuun ka. Naa taˈ alanduni gempiau penggulaulaan, adun mpedumau tu ketubuˈ ndaˈi tamanen?”

¹⁸ Suminaak puliˈ si Isus di getaw kia, “Baa, mauma dema paingalan mu dinaan, mekesuun? Ndaˈiduni mekesuun tantu, subay su laak Megbebayaˈ. ¹⁹ Dagid, misuunan mu na ki nga palinta, maˈniin ‘Ndiˈa pekpatay, ndiˈa pegdusa, ndiˈa pegdaaw, ndiˈa penakesiˈ dig balus, ndiˈa peglimbung, pegbesaay mu su ginaˈ mu buˈ gamaˈ mu.’”

²⁰ Kaliˈ sembagi getaw kia, “Naa Sir, ki kelaun palinta kia, dinunutan ku, genat pa di kaikaˈayu.”

²¹ Pingenlengan dayun ni Isusi getaw kia, gembagelig lelaaten diniin. Laak kaliˈ pektaluˈ diniin si Isus, “Naa, duun pa gusayi kulang diniˈa. Panawa na, peksaluy mu ki kelaun gimu mu, dayun pemegay mu tu nga pubri getaw su galinen. Duun dayuni gaˈus mu ditu gekbus langit. Dayun puliˈa dini naan, pegdunuta dinaan.” ²² Dagid kaliˈ medengeg nu getaw ki tinaluˈ kia ni Isus, migdemeng. Migawaˈ dia ni Isus, milegenan patiˈ, puˈ medatuˈ gupia getaw iin.

²³ Mendadi, su kepalus nu getaw kia, pingenlengan ni Isus su nga sakupen, kaliˈ pektaluˈ dinilan, “Ki medatuˈ getaw, melegen tuˈu ki kesakupen tu Keglekaunutan nu Megbebayaˈ!”

²⁴ Benaˈ midengeg nu nga sakupen, misebuˈan ilan dun gupia. Kaliˈ gusay pektaluˈ si Isus, “Yamu nga gembataˈu, taluˈu diniu, ki kesakup tu Keglekaunutan nu Megbebayaˈ, melegen daan tuˈu! ²⁵ Melemu pa su kebian nu petubuˈen kamelyu dig luang taiˈ, sabayaˈ nu kesakup nu medatuˈ getaw tu Keglekaunutan nu Megbebayaˈ!”

²⁶ Naa benaˈ midengeg nu nga sakup ni Isus su tinaluˈen kia, migiseg patiˈi kesebuˈay nilan dun. Kaliˈ ilan peksinaakay, “Saˈ maˈantu, duun bai megawen?”

²⁷ Pingenlengan puliˈ ni Isus su nga sakupen, kaliˈ pektaluˈ dinilan, “Ndiˈ daan megaga nu kilawan. Dagid su Megbebayaˈ, megaganen, puˈ ndaˈiduni ndiˈen megaga.”

²⁸ Laak dagid si Pedro, kaliˈ pektaluˈ, “Sir, yami kini, bileng na nami gupia ki kelaunanen, adun megdunut ami diniˈa.”

²⁹ “Waˈa,” laung ni Isus. “Mukaˈ taman taluˈu diniu, adini getaw belengenen sug balayen, saˈ su nga pateden libun laki, ginaˈen saˈ gamaˈen, ngag bataˈen, sampay sug lupaˈen, sabaˈ nu kesakupen dinaan mukaˈ sabaˈ kegukiten di Gempia Petenday, ³⁰ naa nemun, sugdaan dun melaun. Sugdaan dun megatus piluˈ ngag balay, pateden libun laki, ginaˈen, ngag bataˈen sampay lupaˈen. Laak dunut dun, malapen pa pagid ki kekpeleget diniin. Dayun di gendaw kiin ditug binayaˈ gebii buˈ gendaw, mpeduma pa pagid tu ketubuˈ ndaˈi tamanen. ³¹ Laak dagid melaun getawi mauna nemun, iini mbinayaˈ saˈ matengi gendaw kiin ditug binayaˈ gebii buˈ gendaw. Melaun dadema getaw mbinayaˈ nemun, iin na sungkini mbaluy muna saˈ matengi gendaw kiin.”

³² Naa benaˈ diin nailan dalan pektuad ilan tu Jerusalem, inunanan ni Isus su nga sakupen. Kagina sungu ilan medepet di Jerusalem, mipatiˈ melibuleng su nga sakupen, dakus mindek dadema su nga getaw tuminakin dinilan. Mendadi, sinabi ni Isus su sepuluˈ buˈ duaˈ tawan peneliganen. Benaˈ mikpesempel ilan diniin, pigukiten puliˈ dinilan ki mpenggulaulanen sungu. ³³ Kaliˈ pektaluˈ si Isus, “Naa, pektalentenay niu gupia ini. Kini, tuad naita tuˈu di Jerusalem. Mendadi, saˈ mateng ita dia, naan kini, kig Bataˈ nu Kilawan, pegwakilu tu nga kaunutan nug belian nu getaw Judea mukaˈ tu nga mekpetuˈun di Misulat Palinta nu Megbebayaˈ. Ukumanu dayun nilan lagaˈ na ginau, mukaˈ pegwakilu nilan tu pegbayaˈ nga kanaˈ getaw Judea. ³⁴ Pengimusaunganu nilan, pendulaˈanu nilan, mukaˈ bedasenu nilan. Dayunu petayay. Laak dagid di ketelu endawen genat di kepatayu, metubuˈu puliˈ.”

³⁵ Mendadi si Santiago mukaˈ si Juan, su ngag bataˈ ni Sebedeo, minadap ilan dini Isus, kaliˈ ilan pektaluˈ, “Sir, duun siai tuyuˈ nami pebaal diniˈa.”

³⁶ Sinaak ni Isus dinilan, “Alandun mai penengiin niu baalen ku diniu?”

³⁷ Kaliˈ ilan sembag, “Naa Sir, saˈ mingkuda na tuˈu meglekaunutan, medayag na dema su kelengas nu pegbayaˈ mu, naa iin siai penengiin nami diniˈa, paingkuden mu dami dema ditu gupid mu. Su sala tawan dinami, diin dapit lintu mu, su sala tawan pelum, diin dapit bibang mu.”

³⁸ Kaliˈ sembag dinilan si Isus, “Baa, ndaˈ niu mesuunay ki inubug niu kiin. Taˈ itu, megaga ba niu minum di tasa mipenuˈ kelegenay, ki sunguu na inumay? Mukaˈ megaga ba niu bunagan amu tubig maˈniin nu kebunag sungu dinaan tubig?”

³⁹ Laung nilan, “Waˈa, Sir, megaga da nami.”

“Naa, metuud,” laung ni Isus. “Ki tasa ginuman ku, mekainum amu daan dun tuˈu. Ki tubig sungu bunag dinaan, mbunagan daan damu dun dema. ⁴⁰ Laak dagid pia maˈantu, ndaˈi pegbayaˈu memiliˈ tu getaw mingkud di gupidu, diin dapit lintuu mukaˈ di dapit bibangu. Puˈ iin da laaki mekesaing dinaan, adin su gandang mitenduˈ nu Megbebayaˈ.”

⁴¹ Naa su nga sepuluˈ tawan samasakup nilan dini Isus, benaˈ midengeg nilan ki inubug kia ni Santiago mukaˈ ni Juan puˈ ilan siai sumaing dini Isus saˈ meglekaunutan, lingetan ilan dun. ⁴² Mendadi, sinabi ni Isusi kelaun sakupen kia, kaliˈ pektaluˈ dinilan, “Naa su nga kanaˈ getaw Judea, misuunan niu puˈ gembegati kegbayaˈ dinilan nu nga pegengagen nilan. Mukaˈ su ngag begelal nilan, metegas demai keguit nilan tu nga sakup nilan. ⁴³ Dagid yamu, ndiˈ amu mpia mengmaˈantu. Sinangkaliˈ adin diniui mauyaˈanen sia metaasi tindegen, subay iin nai mbaal sesuguˈen niu. ⁴⁴ Kaas adini mauyaˈanen sia puˈ iini tampusan metaasi tindegen dig launan niu, subay iin nai mbaal maaˈ nu gulipen nug launan niu. ⁴⁵ Puˈ pia pa naan kini, kig Bataˈ nu Kilawan, kanaˈ iini luminusadu dun dinig lumbang, puˈ adun duuni megabang dinaan. Segaga iin sungkini ginangayu medini, puˈ adun ebangan ku su kilawan, sampay petainu, puˈ adun lekaten ku su melaun getaw.”

⁴⁶ Maˈantu, midepet tu Jerico si Isus, ilan nu nga sakupen. Benaˈ minundas ilan pelum genat ditu, melaun gupia getaw mimegdunut dinilan. Naa saˈ mipalus ilan dig lunsud kia, duunig buta pegingkud dia geksid dalan, menengi limus. Ngalanen si Bartimeo, gamaˈen si Timeo. ⁴⁷ Mendadi benaˈ midengeg nug buta puˈ megbian dia si Isus, ki getaw Nazaret kiin, migbeksay dayun, laungen, “Uu Isus, Sapuˈa ni David, lelaatay mau!”

⁴⁸ Kig buta kia, pigbeluˈan dayun nu melaun getaw, pimaag nilan sia. Laak palu pa mpemaag, ndiˈ, minamal mektawag, laungen puliˈ, “Uu Sir, Sapuˈa ni David, lelaatay mau dema tuˈu!”

⁴⁹ Tuminlen dayun si Isus. Laungen, “Sabi niu iin.”

Sinabi dayun sug buta, laung nu miksabi dun, “Gempia dai ginaa mu! Pegbuata, puˈ sinabia niin.”

⁵⁰ Bileng dayun nug buta su melambak suuben, suminambut dayun megbuat, mikpesempel dini Isus.

⁵¹ Sinaak ni Isus, “Taˈi penengiin mu dinaan?”

“Sir, liagan ku sia, mekengitaˈ nau.”

⁵² Miktaluˈ si Isus, “Naa, sigi, maˈnia na. Miuliˈan ka na, puun tu kesalig mu.”

Lemen laak mitaluˈ ni Isus, mikengitaˈ dayun tuˈu sug buta. Mukaˈ tumindug dini Isus tug dalan.