¹ Mendadi, minundas na tuˈu ditu Jerusalem si nga Isus. Benaˈ mesempel nailan dia, misebang ilan dig lunsud piningalan dun Betpahe, dia guksad nug Bentud nu nga Gayu Olibo, suminuguˈ si Isus dig duaˈ tawan sakupen. ² Laungen dinilan, “Bundas amu diag lunsud kia dia gunaan. Mendadi saˈ mateng amu ditu, duun dayuni maitaˈ niu petubuˈen asno iniketan, dakus duuni natinen. Naa kiin, ubaday niu, agak niu dayun dini naan. ³ Naa saˈ duuni sumaak diniu, taluˈ niu diniin, ‘Duunig baalan dun nu Kaunutan.’ Begayen dayun diniu.”

⁴ Kaas maˈniai mipenggulaula, puˈ adun menuud su sinulat dengantu nu pimuunan nu Megbebayaˈ ditu Misulat Taluˈen, laungen,

⁶ Naa saˈ maˈantu, mipanaw sug duaˈ tawan sakup ni Isus, pituud nilan su suguˈanen dinilan. ⁷ Inagak nilan ditu ni Isus sug asno, dakus su natinen. Mendadi benaˈ minateng ilan dia ni Isus, inigan nilan suub nilan sug lekud nu ngag asno. Suminakay dayun si Isus ditu nati. ⁸ Mukaˈ melaun getaw mimelat suub nilan dia karsada mbianan ni Isus, basa nilan diniin. Sug duma pelum, minalap panga gayu daunan, inikam nilan dadema dia karsada. ⁹ Mendadi su nga melaun getaw mpanaw di gunaan ni Isus, mesama di nga getaw peglendug dig binayaˈen, mimeksay ilan, laung nilan, “Pegbesaan ki Sapuˈ ni David kini! Melengas pepianan iin nu Megbebayaˈ, ki minateng na pigwekilan nu Kaunutan Megbebayaˈ! Pegbesaan dadema su Megbebayaˈ ditu gekbus langit!”

¹⁰ Naa benaˈ minateng na tuˈu di Jerusalem si Isus, misasawi ginaa nu kelaun getaw dia. Kaliˈ ilan peksinaakay, “Taˈi gasalen iin?”

¹¹ Simbag nu melaun getaw kia mimegdunut dini Isus, “Kini si Isus, pimuunan nu Megbebayaˈ, getaw Nazaret, sakup Galilea.”

¹² Naa minangay si Isus tu Pengedapan tu Megbebayaˈ. Mendadi benaˈ minateng dia, ki kelaun mendagang guliden mukaˈ su nga menaluy dia, pingutidanen. Pimbelikwangen pa pagid su ngag lemisaan nu nga membeles selapiˈ, sampay su nga gingkudan nu nga mendagang malepati, guliden tu Megbebayaˈ. ¹³ Miktaluˈ si Isus dinilan, “Misulat ditu Taluˈ nu Megbebayaˈ, ‘Ki Pengedapan dinaan, iini paingalan dun, balay penenebian.’ Dagid yamu kiin, binaal niu pegegludan ngag limbungan getaw ki Pengedapan kini!”

¹⁴ Mendadi saanan ni Isus dia Pengedapan, miditu niin su ngag buta dakus su nga pilung, pineguliˈanen ilan dayun. ¹⁵ Dagid ki nga kaunutan nug belian nu getaw Judea mukaˈ ki nga mekpetuˈun di Misulat Palinta nu Megbebayaˈ, minitaˈ nilan ki mekesalebuˈ pinggulaula kia ni Isus dakus nga gembataˈ memeksay, laung nilan, “Pegbesaan ki Sapuˈ ni David!” Sabaˈ minitaˈ nu nga kaunutan kini, milaat dayuni ginaa nilan dini Isus. ¹⁶ Sinaak nilan diniin, “Baa, midengeg mu da su pekteluˈen nu nga gembataˈ kiin?”

“Midengegu lai,” simbag ni Isus. “Mendadi, ndaˈ ba niu mbasa ki misulat ditu Taluˈ nu Megbebayaˈ kini? Iini misulat dun, ‘Uu Megbebayaˈ, piktuˈunan mu megenal diniˈa su nga gembataˈ, sampay su nga pegduduˈ pa.’”

¹⁷ Bilengan dayun ni Isus ki nga kaunutan kia, migawaˈ na puliˈ dia Jerusalem, mipuliˈ pa ditug lunsud Betania, minangay pa mengintulugan dia.

¹⁸ Naa benaˈ miksala gendaw, milapus si Isus mpuliˈ dia Jerusalem. Saananen diag dalan, migutem si Isus. ¹⁹ Kaliˈ megutem, duuni minitaˈen dia geksid dalan sala puun gayu igera. Linaawan dayun ni Isusi gayu kia, laak kaliˈ pekpesempel dun, lumbus laak masiˈ daun kig igera kia. Miktaluˈ dayun si Isus tu gayu, laungen, “Genat nandaw, ndaˈidun na puliˈig bunga mu!” Lemen laak mitaluˈ ni Isus, milanes dayun su gayu igera.

²⁰ Naa mendadi su nga sakup ni Isus, benaˈ minitaˈ nilani gayu igera kia, mipatiˈ ilan mesebuˈay, laung nilan, “Apelai, mikendutaˈi gayu kini, mitekaw pelum melanes?”

²¹ Simbag ni Isus dinilan, “Taman taluˈu diniu, saˈ sumalig amu mukaˈ kanaˈ megduaˈduaˈi kesalig niu, naa mpenunggilingan dadema niu ki pinggulaulau dig igera kini. Pidag pa tanan, pia pa mektaluˈ amu dig bentud kinuˈ, ‘Mainata, peksilabuˈa tug dagat,’ naa kiin, menuud dema tuˈu. ²² Mendadi pia alanduni penenebiin niu, malap niu, saˈ sumalig amu.”

²³ Naa mipuliˈ si Isus tu Pengedapan tu Megbebayaˈ, sumiled dayun dia. Mendadi saˈ mikpetuˈun si Isus, ki nga kaunutan nug belian nu getaw Judea mukaˈ su ngag duma kaunutan nilan, minadap ilan diniin. Sinaak nilan diniin, “Paa, ki pinggulaula mu kini, taˈ bai pegbayaˈ mu menggulaula dun? Taˈ taway dun bai migbegay diniˈa pegbayaˈ penggulaulaan mu?”

²⁴ Laung pelum ni Isus dinilan, “Naa, saakan ku amu deliˈ sektaang. Dayun saˈ mesembag na niu, pesuun ku dadema diniu su pigenatan nu pegbayaˈu penggulaulaan kui maˈnini kini. ²⁵ Iini sembag niu dinaan, si Juan kiin, adin genat su pegbayaˈen memunag tubig tu nga getaw? Genat tu Megbebayaˈ, saˈ genat ba laak di kilawan?”

Naa saˈ maˈnia, migyagayaga dayuni nga kaunutan kia, laung nilan, “Naa, taˈ ma? Saˈ pinenggiˈ sembagen ta, ‘Su pegbayaˈ ni Juan, genat tu Megbebayaˈ,’ naa sumumpat dayun si Isus kini, ‘Saˈ maˈantu, mauma dema ndaˈ niu petuuday si Juan?’ ²⁶ Saˈ sembagen ta pasiˈ, ‘Genat laak di kilawan,’ mendek ita tu nga getaw, puˈ su kelaun getaw, mituudan ilan dun puˈ pimuunan nu Megbebayaˈ si Juan.” ²⁷ Kaas iin laaki mesembag nilan dini Isus, “Ndaˈ nami mesuunay.”

Laung dayun ni Isus dinilan, “Naa saˈ maˈantu, ndiˈu dadema pesuun diniu saˈ taˈi pigenatan nu pegbayaˈu penggulaulaan kui maˈnini kini.”

²⁸ Sinumpatan pa gusay ni Isus su taluˈen di nga kaunutan kia, laungen, “Alandun ma demaig delendeman niu dun kini? Duuni getaw, duaˈ tawanig bataˈen. Mendadi duuni gendaw, linaawan nu getaw kini sug bataˈen gulangbataˈ, laungen, ‘Naung, angaya nandaw mengimbaal ditu pegimulanan ta gubas.’ ²⁹ Dagid kig bataˈen kini, kaliˈ sembag, ‘Baa, mpauku.’ Laak benaˈ ndaˈ maiben, migilengig delendemanen, minangay da dayun mengimbaal ditu. ³⁰ Dayun su gamaˈen kia, linaawanen pelum kig bataˈen kia ngudan, maˈnia dademai sinuguˈen diniin. Naa ki ngudan kini, kaliˈ sembag, “Naa waˈa, Amaˈ.” Asa iin, ndaˈ da angay ditu mengimbaal. ³¹ Naa saˈ maˈnia, kig duaˈ tawan kia, adin ma su mikpetuud tu suguˈan nu gamaˈen?”

“Baa,” simbag nilan, “su da gulangbataˈ.”

Kaliˈ dayun pektaluˈ si Isus di nga kaunutan nu getaw Judea kia, “Taman taluˈu diniu, su nga mendawat buis mukaˈ tebiaˈ, su ngag libun meglaat pekesuunan, mauna ilan diniu sumakup tu Keglekaunutan nu Megbebayaˈ. ³² Puˈ si Juan kiin Memunag Tubig, mituaˈ mekpenuluˈ diniu tug dalan tu tantu kekesuun, dagid ndaˈ niu iin petuuday. Asa su nga mendawat buis mukaˈ ngag libun meglaat pekesuunan, mikpetuud ilan dini Juan. Dagid yamu kiin, pia pa minitaˈ niu puˈ mikpetuud ilan diniin, naa ndaˈ amu gusay peksikesuun, ndaˈ niu petuuday si Juan.”

³³ Kaliˈ gusay pektaluˈ si Isus di nga getaw Judea kia, “Kineegay niu ki salabuuk sambingay. Duuni getaw meliwagig lupaˈen, migimula pegimulanan gubas. Benaˈ mitubusen pemulanay, binaliten dayuni pegimulananen, migengkul seludan tu nga tubig nu gubas saˈ intesenen, mukaˈ migbaal pa pagid metaas pegelungan dun. Saˈ mitubus, pisaˈupen di nga getawi pegimulananen kia, dayun mipanaw dig lain benwa.

³⁴ “Mendadi benaˈ sungu na sungkuˈ su pegimulanan, suminuguˈ su gapuˈen di nga sesuguˈenen meditu nga saˈup, puˈ adun elapen nilan sug daniin gilas. ³⁵ Laak dagid kaliˈ dateng ditu su nga sinuguˈ, aba, ginapus nu nga saˈup. Sala tawan sesuguˈen, binadas nilan. Sala tawan pelum, binunuˈ nilan. Sala tawan pa pagid, binatu nilan. ³⁶ Naa suminuguˈ na pelum su gapuˈ nu pegimulanan di nga sesuguˈenen, melaun pailan pelum. Benaˈ minateng ditu su nga sinuguˈ, maˈantu da gusayi pinggulaula dinilan nu nga saˈup. ³⁷ Mendadi tigaˈwan, iin na sungkini sinuguˈ nu gapuˈ nu pegimulanan mangay tu nga saˈup, ki na bataˈen. Puˈ maaˈ laungen pa dig dialem delendemanen, ‘Tumuˈ saˈ kig bataˈu na kini, pegbesaan nilan iin.’ ³⁸ Laak dagid saˈ midayag na nu nga saˈup sug bataˈen kia, miksabutsabut ilan dayun, laung nilan, ‘Aa naa, kiin na tuˈu sug bataˈ nu gapuˈ nu pegimulanan kini. Tala, tumuˈ petain tain, adun danita na su petenged sia diniin!’ ³⁹ Mendadi benaˈ minateng dia nilan kig bataˈ kini nu gapuˈ nu pegimulanan, inukpaˈan nilan, piniglak nilan tug liu nu pegimulanan, pinatay nilan tuˈu.

⁴⁰ “Naa saˈ maˈnia,” sinaak ni Isus, “saˈ mateng su gapuˈ nu pegimulanan gubas, alandun ma dayuni penggulaulaanen di nga saˈup kini?”

⁴¹ Kaliˈ ilan sembag, “Baa, pemunuˈenen ilan la tuˈu! Melaatig betad nilan, melaat dademai palas nu kepatay nilan. Dayun lain getaw na pelumi pesaˈupen tu pegimulananen kia, adin su meseligan megbegay diniin gilasen saˈ sungkuˈ na su pegimulanan.”

⁴² “Waˈa daan,” simbag ni Isus. “Puˈ ndaˈ ba niu mbasa su sinulat ditu Misulat Taluˈ nu Megbebayaˈ, maˈniniˈ?

⁴³ Pidayun gusay ni Isus su taluˈen di nga kaunutan nu getaw Judea kia, laungen, “Kaas taman taluˈu diniu, iini puunanen, uiˈen diniu su kesakup niu tu Keglekaunutan nu Megbebayaˈ, begay sungkin dig lain bansa nu getaw, ki megbegay diniin gempia sengkuˈ. [ ⁴⁴ Naa kig batu kini, adin getawi medapal dun, mbeliˈan patiˈ. Saˈ pasiˈ melabuˈ kig batu kini, adin su metenaˈanen, melasak tananig lawasen.]”

⁴⁵ Naa ki nga kaunutan nug belian nu getaw Judea mukaˈ su nga Pariseo, benaˈ midengeg nilan su nga sinambingay kia ni Isus, misimaˈ nilan puˈ ilani pisugaten dun. ⁴⁶ Kaas pidaap nilan sia si Isus, laak mindek ilan ditu nga getaw, puˈ su melaun getaw, mituudan ilan dun puˈ pimuunan nu Megbebayaˈ si Isus.