¹ Naa midengguˈ si nga Isus tug dipag nug Linaw Galilea, ditug benwa paingalan dun Gerasa. ² Benaˈ mikelusad si Isus tu sekayan, duuni getaw suminungkak diniin, genat tu kelebengan. Ki getaw kini, silunuˈan menulay, ³ dia na pegbenwa nga sangyab kelebengan. Ndaˈiduni getaw mekegaga megbalud diniin, pia kadinai giket dun. ⁴ Puˈ tatap na sia beluday tali mukaˈ kadina, dagid getusenen laak su tali sampay su kadina. Mukaˈ ndaˈiduni mekegapus diniin, puˈ mesekeg gupia. ⁵ Gebii gendaw nai panawpanawen dia kelebengan sampay tu ngag binentudan, lamugen menamal megbeksay, mukaˈ lamugen dadema menguglit batu dig lawasen.

⁶ Mendadi, benaˈ minitaˈ nu silunuˈan kia si Isus, laak melayuˈlayuˈ pa, gumibek sumungkak dini Isus, minginlulud dayun di gedapanen. ⁷ Minekeg megbeksay, laungen, “Ii, yaˈa Isus, Bataˈa nu Tampusan Metaas Megbebayaˈ, taˈ maig labet mu dinaan? Kelelaat dema tuˈu diniˈa, pengaduguˈa di gedapan nu Megbebayaˈ, ndiˈ mau peglegetay!” ⁸ (Kaas mitaluˈ dun nu menulay, puˈ tinaluˈ ni Isus diniin, “Yaˈa menulaya, pegawaˈa di getaw kiin!”)

⁹ Mendadi, sinaakan ni Isus ki menulay kia, “Taˈ mai ngalan mu?”

Kaliˈ sembag, “Si Linaksaˈ, puˈ melaun ami!” ¹⁰ Pinemalanen dayun pegubugay dini Isus, ndiˈen dema tuˈu puaˈen dig benwa kia su menenulay.

¹¹ Naa duuni sala kauluan babuy dia mesempel, melaun gupia babuy, meglunang ilan dia gabig. ¹² Pinengi nu menenulay dini Isus, laung nilan, “Peditu mu ami ngag babuy kia, adun sulunuˈ ami dinilan.” ¹³ Mendadi, biwang ni Isus. Dayun memegawaˈ dia getaw kia su menenulay, sumilunuˈ ilan pelum ditu ngag babuy. Benaˈ su sala kauluan babuy, mabuˈ duunig duaˈ ngibuig launen, minggebek dumiksun ditug delipasan pangay diag linaw, migelaˈ ilan dayun melemes.

¹⁴ Mendadi su nga megingat tu ngag babuy, minggebek ilan ditug lunsud, pigukit nilan dayun dia ki mipenggulaula kia sampay ditug lumibut benwa. Benaˈ su getaw inukitan nilan dun, linaawan nilan su mipenggulaula kia. ¹⁵ Benaˈ midepet ilan ditu ni Isus, iini mitaangan nilan, su getaw silunuˈan kamun nu melaun menulay, pegingkud laak iin, mikseluk na suuben, miseksud na tuˈu su pianan ginaanen. Naa, mindek patiˈ su nga getaw. ¹⁶ Inukit dayun nu nga mikaitaˈ dun su mipenggulaula nu getaw kia silunuˈan menenulay, mukaˈ su mipenggulaula nu ngag babuy.

¹⁷ Benaˈ midengeg nu nga getaw, inubug nilan dini Isus, megawaˈ diag benwa nilan.

¹⁸ Naa benaˈ duminangan na si Isus ditu sekayan nilan, migubug tundug diniin ki getaw kia, su silunuˈan sia nu menenulay.

¹⁹ Dagid ndaˈ peliag si Isus. Kaliˈ pektaluˈ, “Uliˈa na tu ngag betaˈan mu, pegukit mu ditu nilan su gikteb nu pinggulaula nu Kaunutan diniˈa, sampay sug lelaaten diniˈa.”

²⁰ Naa saˈ maˈantu, mipanaw dayun su getaw kia, dayunen pegleleepay su Sepuluˈ Lunsudan, inukiten ditu su pinggulaula ni Isus diniin. Kaas su nga kelaun getaw mikedengeg dun, mipatiˈ ilan mesebuˈay.

²¹ Naa duminipag puliˈ si nga Isus ditug linaw. Benaˈ midengguˈ ilan ditug dipag, melaun na pelum getaw mikpungun dini Isus dia geksid linaw. ²² Mendadi, duuni minangay ditu ni Isus kaunutan di simbaan nu getaw Judea, ngalanen si Jairo. Benaˈ minitaˈ ni Jairo si Isus, miglaub di gedapanen, ²³ laungen dayun diniin, “Sir, sug bataˈu delaga, meliget megladu, pekagawinaa na. Kaas kelelaat dema tuˈu diniˈa, Sir, laaway mu, depenay mu, adun mauliˈan, metubuˈ da kig bataˈu kiin!”

²⁴ Migdunut dayun dini Jairo si Isus. Melaun gupia getaw tuminakin diniin, miˈisel nilan si Isus.

²⁵ Laak duuni sala tawan libun, sepuluˈ buˈ duaˈ taun na, tebiaˈ leduunen kig betad libun. ²⁶ Mitegelan na gupia di kebulung diniin, puˈ melaun nai memulung migbulung diniin. Migelaˈ nai selapiˈen dun, laak palu pa mawaˈ sug leduunen, ndiˈ, sinangkaliˈ migiseg. ²⁷ Mendadi kig libun kini, benaˈ midengegen su gukiten mekatag dini Isus, minguliksuk dia tebenan nu nga melaun getaw, mikpesempel dia teliudan ni Isus. ²⁸ Puˈ maaˈ laungen dig dialem delendemanen, “Pia medeluˈu laaki suuben kiin, mauliˈan nau dun.”

²⁹ Lemen laak mideluˈeni suub ni Isus, misikpaˈ dayun sug duguˈen, mukaˈ mibatiken, miuliˈan na tuˈu.

³⁰ Mendadi si Isus, mibetikanen puˈ duuni ginuungen gumiwaˈ. Miktekaw lumingay tu nga getaw, sinaaken dinilan, “Taˈ taway duni mikpuleg di suubu?”

³¹ Kaliˈ sembag su nga sakupen, “Sir, pegitaˈen mu da melaun gupia getaw minisel diniˈa, mauma saaken mu pa saˈ taˈ taway duni mikpuleg di suub mu?”

³² Laak dagid meglingaylingay gusay mengenleng si Isus di nga getaw di mektabuˈen, penengaunen saˈ taway duni minggulaula dun. ³³ Naa sug libun, benaˈ misuunanen su mipenggulaula diniin, mikpesempel dayun dini Isus, mipatiˈ mengedeg sabaˈ gendeken. Minginlulud dayun di gedapanen, inuntulen dayun teluˈay diniin su mipenggulaulanen. ³⁴ Kaliˈ pektaluˈ si Isus diniin, “Naa, Enaung, miuliˈan ka na, sabaˈ nu kesalig mu. Uliˈa na, gempia nai ginaa mu, puˈ miawaˈ naig leduun mu.”

³⁵ Naa selian ni Isus mektaluˈ, duuni minateng nga sinuguˈ genat ditug balay ni Jairo, ki kaunutan di simbaan kiin. Benaˈ minateng ilan dia ni Jairo, kaliˈ ilan pektaluˈ, “Naa Sir, sug bataˈ mu kiin, ndaˈ mu na mesaguti ginaanen. Kaas ndiˈ na kambat salibaˈeni Mekpetuˈun kiin.”

³⁶ Laak ndaˈ ni Isus pengebetayi tinaluˈ nilan kia. Kaliˈ pektaluˈ dini Jairo, “Naa, ndiˈa na melibuleng, saliga laak.” ³⁷ Mendadi, ndaˈ peliag si Isus saˈ duun paig lain getaw megdunut diniin, subay si Pedro laak mukaˈ sug duaˈ tawan mekpated, si Santiago buˈ si Juan. ³⁸ Mendadi, benaˈ minateng ilan ditug balay ni Jairo, minitaˈ ni Isus su melaun getaw misasaw, mukaˈ midengegeni mesekeg gaduy mukaˈ kenembit nilan. ³⁹ Sumiled dayun si Isus diag balay, kaliˈ pektaluˈ di nga getaw, “Mauma dema misasaw amu? Taˈi pengeduyan niu? Gembataˈ kiin, kanaˈ ma minatay. Pektulug da!”

⁴⁰ Piketuanan laak nu nga getaw si Isus.

Mendadi si Isus, piguaˈen dia su nga melaun getaw. Sumiled dayun dia sugud belilidan nu gembataˈ, pidunuten laak su ginaˈ nu gembataˈ mukaˈ su gamaˈen sampay su telu tawan sakupen kia. ⁴¹ Benaˈ mikeseled ilan, piguidan dayun ni Isus su gembataˈ di kemeten. “Talita kumi!” maaˈ laung ni Isus. Guluganen, “Enaung, taluˈu diniˈa, pegbuata!”

⁴² Suminambut megbuat su gembataˈ, mikpanawpanaw dayun. (Naa sepuluˈ buˈ duaˈ taun nai gidaden.) Naa saˈ maˈantu, su kelaun duma ni Isus, mipatiˈ ilan mesebuˈay. ⁴³ Dagid inungub ilan gupia ni Isus, pia laak daw sala tawan, ndaˈiduni pesuunan nilan di mipenggulaula kia. Laung ni Isus, “Naa, paanen niui gembataˈ kiin.”