¹ Naa mikpuun na pelum si Isus mekpetuˈun tu nga getaw ditu geksid Linaw Galilea. Laak sabaˈ melaun gupia getaw mikpungun ditu niin, subay duminangan si Isus di sekayan diag linaw. Benaˈ mikaingkud na dia sekayan, piktuˈunanen dayun su nga getaw pemegindeg dia geksid linaw. ² Melaun tinituluˈ ni Isus dinilan pibian di sambingay. Kaliˈ pektaluˈ si Isus,

³ “Pekineeg amu gupia! Duuni getaw minangay tug binaalanen adun megimula. ⁴ Laak benaˈ saananen meksigwag, duunig beniˈ mitenaˈ ditug dalan, kaas pingektuk nu nga manukmanuk. ⁵ Naa duun dademai mitenaˈ ditug betuan, menipisig lupaˈ dun. Mintubuˈ ganam sug beniˈ, laak dagid kagina menipisig lupaˈ dun, ⁶ benaˈ mipedesan, milawes. Mukaˈ kagina gembabawi gangeten, minatay da pelum. ⁷ Naa duun pa pagidig beniˈ mitenaˈ dig dugian. Kaliˈ pentubuˈ su ngag dugi mukaˈ tuminulin, milebeng dun su pimula. Kaas ndaˈidunig bunganen. ⁸ Laak tumuˈ kig duma beniˈ, mitenaˈ tuˈu di pialupaˈ, kaas mekelengasi tubuˈen mukaˈ tuminulin dayun, dakus mikegbunga gupia. Benaˈ sumingkuˈ, duuni piktelu puluˈ, duuni pigenem puluˈ, duun pagidi pingmegatus.”

⁹ Diksuˈ dayun ni Isus su taluˈen, “Adin sug duuni telinganen, mekineeg dema tuˈu!”

¹⁰ Naa benaˈ ilanilan na laak, mikpesempel dini Isus su sepuluˈ buˈ duaˈ tawan peneliganen, dakus su ngag duma mektuˈun tatapen petendugay. Mendadi, migubug su nga sakupen dini Isus pegulugenen dinilan ki nga sinambingayen. ¹¹ Kaliˈ sembag si Isus dinilan, “Aa naa yamu, buasan na diniu su gandang pigbuni mekatag di kesakup tu Keglekaunutan nu Megbebayaˈ. Laak dagid su ngag lain getaw, pebianen laak di sambingay su kegukit dun dinilan, ¹² adun menuud su misulat ditu Taluˈ nu Megbebayaˈ, laungen,

¹³ Kaliˈ pektaluˈ si Isus tu nga sakupen, “Masiˈ ki sambingay kiin, ndaˈ ba niu mesabut? Saˈ maˈnia, taˈ ma demai kesabut niu dun su ngag duma sambingay? ¹⁴ Mendadi, kig beniˈ kiin, iin su Gempia Petenday genat tu Megbebayaˈ. ¹⁵ Naa sug beniˈ mitenaˈ diag dalan, damikian dun su nga getaw, lemen laak nilan medengeg su Gempia Petenday kia, mateng dayun si Satanas, uaˈenen pelum tug delendeman nilan su Gempia Petenday. ¹⁶ Naa su pelum beniˈ mitenaˈ diag betuan, iin su nga getaw lemen laak medengeg nilan su Gempia Petenday, telimaˈen nilan dayun mukaˈ penleliagen ilan dun. ¹⁷ Laak ndaˈ pengganget dig delendeman nilan, kaas kanaˈ maiben su kekpetuud nilan. Saˈ matengi kelegenay nilan, saˈitada saˈ peglegetan ilan sabaˈ nu kekpetuud nilan di Gempia Petenday, teliudan nilan dayun su kekpetuud nilan. ¹⁸ Naa sug beniˈ mitenaˈ dema dig dugian, iin su getaw tumuˈ mikedengeg tu Gempia Petenday, ¹⁹ laak dagid megelaˈi ginaa nilan tu kelibuleng nilan tu kegleketubuˈ nilan nemun mukaˈ su gayak nilan tu gaˈus, sampay tu gininisan delendeman kinilawan, kaas maulakanen su Gempia Petenday. Benaˈ kig beniˈ kia, ndiˈ na megbunga. ²⁰ Mendadi kig beniˈ mitenaˈ dia pialupaˈ, iin tumuˈ su nga getaw mekedengeg tu Gempia Petenday dayun mektelimaˈ ilan dun, kaas megbunga ilan. Sug duma, megbunga piktelu puluˈ. Sug duma, pigenem puluˈ. Sug duma, pingmegatus.”

²¹ Kaliˈ pagid pektaluˈ si Isus, “Mendadi ki suluˈ, duun bai getaw meguit dun dig dialem balay, dayunen uklubay bandi, atawaka betangenen tu silung belilidan? Ndiˈen ba betangen tug dempaˈani suluˈ? ²² Kaas adin su giglud nandaw, iini iglud dun deliˈ, puˈ adun buasan da saˈ maiben. Adin su pigbuni nandaw, iini pigbuni dun deliˈ, puˈ adun pesuunen da saˈ maiben. ²³ Mendadi, adin sug duuni telinganen, mekineeg dema tuˈu!

²⁴ “Naa ki kelaunanen kini medengeg niu dini naan, talentenay niu gupia! Puˈ adin su tepengan niu dig begay niu, iin dademai tepengan nu medawat niu genat tu Megbebayaˈ, mukaˈ dugangan pa padun.^{a 25} Puˈ adin su getaw duunig daniin, begayan pa padun. Adin pasiˈ su getaw ndaˈidunig daniin, laak uiˈen diniin su maikaˈ sia daniin.”

²⁶ Kaliˈ gusay pektaluˈ si Isus, “Ki ketulin nu Keglekaunutan nu Megbebayaˈ, petanggiˈu dig beniˈ misigwag dig binaalan. ²⁷ Su getaw mimula dun, gebii gendaw mektulug metanud, laak petuyangenen pa sug beniˈ. Dagid tekaw memunsengit mukaˈ tumulin sug beniˈ, ndiˈ mesuunan nu getaw sug bian nu ketubuˈen. ²⁸ Puˈ sug lupaˈi metau mekpetubuˈ tu pimula dakus mekpebunga dun. Kaas bekna, mentaiˈ. Ndiˈ maiben, memensut. Dayun ndiˈ maiben, meteken pelum, ndaˈidun pa gusayi gabang dun nu getaw kia mimula dun. ²⁹ Dagid lemen laak mainug, malap garab su getaw, puˈ gempia na tuˈu geniin.”

³⁰ Kaliˈ pektaluˈ si Isus, “Mendadi ki Keglekaunutan nu Megbebayaˈ, alanduni tenggiˈan ta dun? Taˈ mai sambingay ta dun? ³¹ Kinii pesemaan ta dun, ki salabuuk lisu sangay nu mustasa su ngalanen. Naa ki mustasa kiin, iini tampusan maikaˈ lisu dig dibabaw lumbang. Laak genat pemulanay, ³² saˈ mentubuˈ mukaˈ tumulin, melebawanen su kelaun gininisan pimula, maˈniin na bagel gayu. Mekpanga meketaas, kaas su nga manukmanuk, megbaal ilan salag nilan dia piktebenan nu nga panganen, sabaˈ kebagelen.”

³³ Mendadi, minamal si Isus megukit di Gempia Petenday tu nga getaw pibian di nga sambingay, su gikteb laak nu mesabut nilan. ³⁴ Ndaˈiduni inukit ni Isus dinilan saˈ kanaˈ lumbus sambingay. Laak dagid benaˈ ilanilan da laak nu nga sakupen, gilaˈen da pengulugay dinilan su nga sambingayen.

³⁵ Naa benaˈ lelabung na, kaliˈ pektaluˈ si Isus tu nga sakupen, “Naa, dumipag ita dinig linaw.” ³⁶ Naa saˈ maˈantu, bilengan nilan dayun su nga melaun getaw, duminangan su nga sakupen tu sekayan gandang pegingkudan ni Isus. Iwit dayun nu nga sakupen dumipag si Isus. Mukaˈ duun dademai ngag duma sekayan duminipag. ³⁷ Mendadi, benaˈ ditu nailan titengaˈ laud nug linaw, tekaw miksalindapak, misipukan dayun tubig ki sekayan nilan kia, pekepenuˈ na tubig. ³⁸ Dagid si Isus, pektulug, migulunan, dia gulinan nu sekayan nilan. Tinanud dayun nu nga sakupen, laung nilan, “Ii, Sir, masiˈ petuyangen mu na, pia megbayaˈbayaˈ ita dun ini?”

³⁹ Migbuat si Isus, pimaagen dayun su genus, laungen, “Sikpaˈa.” Tiluˈanen pa pagid sug linaw, “Peksilengen ka.” Misikpaˈ ki salindapak, miksilengen gupia tuˈu sug linaw. ⁴⁰ Kaliˈ pektaluˈ si Isus dia nga sakupen, “Mauma mendek mamu? Masiˈ ndaˈidun pa gusay kesalig niu dinaan?”

⁴¹ Naa saˈ maˈnia, mipatiˈ ilan gupia mendek. Kaliˈ ilan peksinaakay, “Taˈ gasal dun saan ini, pia su genus mukaˈ nabek, mekpetuud diniin?”