¹ Naa migawaˈ si Isus dig benwa kia, minuliˈ ditug daan lunsuden. Migdunut dadema diniin su nga sakupen. ² Benaˈ su Gendaw Pelali na, mikpetuˈun si Isus dia simbaan nu getaw Judea. Mendadi su melaun getaw dia simbaan, saˈ midengeg nilan su pituˈun ni Isus, misebuˈan ilan dun, kaliˈ ilan peksinaakay, laung nilan, “Paa, ki getaw kini, adinen ma pigenati kelaunanen kini? Taˈ sinuunan duni tinulung diniin? Pikendunen ma duni nga mekesalebuˈ pingulaulanen kiin? ³ Puˈ kanaˈ bain su panday laak kiin dig balay, ginaˈen si Maria, pateden si nga Santiago, si Jose, si Judas mukaˈ si Simon? Kanaˈ ba dini da pegbenwa su nga pateden libun?” Maˈantu, pimilas nilan si Isus.

⁴ Mendadi, miktaluˈ dinilan si Isus, “Ki pimuunan nu Megbebayaˈ, pegbesaan pia adin pangay. Laak dagid diag daan benwanen, diag daniin betaˈan, ndiˈ daan pegbesaan.”

⁵ Saˈ maˈantu, ndaˈiduni mekesalebuˈ mipenggulaula ni Isus dia Nazaret, duun laaki nga santaˈ tawan getaw pegladu pindepenanen, pineguliˈanen. ⁶ Misebuˈan gupia si Isus puˈ ndaˈ pekpetuud diniin su nga getaw dia.

Mendadi, mipanaw si Isus, lineepen su ngag lunsud diag lumibut benwa, piktuˈunanen su nga getaw.

⁷ Naa ki sepuluˈ buˈ duaˈ tawan peneligan ni Isus, sinabinen ilan. Mendadi benaˈ misabinen ilan, sinuguˈ ilan dayun ni Isus mpanaw pigdeduaˈ tawan. Bigayanen ilan pegbayaˈ mengutid di menenulay. ⁸ Miktituluˈ dinilan si Isus, laungen, “Saˈ mpanaw amu, ndaˈiduni sengkapan uiten niu, pia balun niu pan, gambag, atawaka selapiˈ. Laak mesuˈat meguit amu sekud, ⁹ mesuˈat amu menepatus, dagid salabuuk laaki suub niu.” ¹⁰ Laung pagid ni Isus dinilan, “Adin sug bekna balay mekpepenaik diniu, ditu laak amu tuun, sampay mekebundas amu dig lain lunsud. ¹¹ Adin sug lunsud ndiˈ menembaˈ diniu dakus ndiˈ mekineeg diniu, pegawaˈ amu dayun dia, mukaˈ ekpug niu sug lepup lupaˈ di geksud niu, adun metakesiˈanig lunsud kia!”

¹² Mendadi maˈnia, mipanaw tuˈu su nga sepuluˈ buˈ duaˈ peneligan ni Isus. Miktituluˈ ilan dayun, iini tinituluˈ nilan tu nga getaw, subay meksikesuun ilan. ¹³ Melaun menulay inutidan nilan di nga getaw, mukaˈ melaun dademai nga pegladu pineguliˈan nilan, binunagan nilan lana su pegladu.

¹⁴ Naa si Adiˈ Herodes, midengegen su pinggulaula ni Isus, kagina misigwag na dig benwa sug dengegan ni Isus. Sug duma getaw, pekteluˈen nilan, “Kiin si Isus, iin si Juan su Memunag Tubig, masiˈ mitubuˈ puliˈ! Kaas ma duuni ginuungen menggulaula mekesalebuˈ.”

¹⁵ Dagid sug duma mektaluˈ, laung nilan, “Kiin si Isus, iin si Elias dengantu.”

Mukaˈ duun pa pagidi mektaluˈ, laung nilan, “Si Isus kiin, iini sala tawan pelum pimuunan nu Megbebayaˈ, maaˈ nu nga pimuunan nu Megbebayaˈ dengantu.”

¹⁶ Laak dagid kini si Herodes, benaˈ midengegen su pinggulaula ni Isus, laungen, “Uy, kiin pasiˈ si Juan, su Memunag Tubig! Masiˈ si Juan, ki piputukan ku gulu kitu, mitubuˈ puliˈ!” ¹⁷ Kaas maˈniai tinaluˈ ni Herodes, puˈ begudiin su ndaˈ pa patay si Juan, suminuguˈ si Herodes puˈ daapen si Juan, pibaluden dakus pipirisunen. Puˈ iini puunanen, begudiin duuni sala tawan libun ngalanen si Herodias, inagaw ni Herodes, asa sawa nu pated ni Herodes si Felipe. ¹⁸ Kaas si Juan, tatap miktaluˈ dini Herodes, “Binandu ma ditu Misulat Palinta nu Megbebayaˈ, ndiˈ mesuˈat egaun mu su sawa nu pated mu, iini penginsuaan mu.”

¹⁹ Mendadi kagina maˈantu, kini si Herodias, duunig laatan ginaanen dini Juan. Pepatayen sia, laak ndiˈ mesuˈat, puˈ su sawanen si Herodes, ²⁰ mendek dini Juan. Puˈ misuunan ni Herodes mekesuun getaw si Juan, mukaˈ pimiliˈ nu Megbebayaˈ. Kaas pegingaten laak ni Herodes si Juan adun ndiˈ mekaˈidan. Puˈ saˈ kineegan ni Herodes su pegwali ni Juan, melibuleng dun gupia, laak pia maˈantu, pekineeganen da gusay, puˈ leliagen dun.

²¹ Mendadi duuni gendaw, kini si Herodias, duun nai sikawen mekpatay dini Juan. Puˈ si Herodes, miglumpuk mitaang di gendawanen, inggaten su nga kelaun begelal, su nga kaunutan nu sundalu, mukaˈ su nga meselagetaw dia prubinsya Galilea. ²² Mendadi, benaˈ miglumpuk nailan, duunig bataˈ ni Herodias delaga, sumiled dia puˈ suminayaw. Liliag dun dayun si Herodes, sampay su ngag bisitanen. Kaliˈ pektaluˈ su gadiˈ diag delaga, “Naa Enuˈ, mesuˈat duuni penengiin mu dinaan. Pia taˈ alanduni penengiin mu dinaan, begayu diniˈa.” ²³ Suminapa pa pagid diag delaga kia, laungen, “Pesaden ku diniˈa, pia taˈ alanduni penengiin mu, pia seginengaˈ di peglegediˈan ku kini, begayu diniˈa.”

²⁴ Lumiu dayun sug delaga, sinaaken ditu ginaˈen, “Taˈ mai penengiin ku?”

“Ki gulu ni Juan, su Memunag Tubig,” simbag nu ginaˈen.

²⁵ Lemen laak midengeg nug delaga, migdedaliˈ dayun mpuliˈ tu gupid nu gadiˈ, pinenginen diniin, “Naa, iini mauyaˈan ku begay mu dinaan, ki gulu ni Juan, su Memunag Tubig, betangen nandaw dig dekulan!”

²⁶ Naa apelai, milegenan patiˈi gadiˈ kini. Dagid ndiˈ mesuˈat megbelibad, sabaˈ nu kesapanen kia di gedapan nug launan bisitanen. ²⁷ Suminuguˈ dayun di sundalunen, uitenen ditu niin ki gulu ni Juan. Mendadi, mipanawi sundalu kia, pinutukanen tuˈu gulu si Juan diag dialem pirisuan. ²⁸ Iwiten dia gadiˈ ki gulu ni Juan, bitang tuˈu dig dekulan, tinulunen diag delaga, dayun pigwakilen dia ginaˈen. ²⁹ Naa benaˈ midengeg nu nga sakup ni Juan ki mipenggulaula kia, inangay nilan sug bangkay ni Juan, dayun nilan lebengay.

³⁰ Naa ki nga peneligan ni Isus, su nga sinuguˈen mangay megukit, mipuliˈ nailan ditu ni Isus. Benaˈ minateng ilan, inukit nilan dayun diniin su kelaunan pinggulaula nilan sampay su nga pituˈun nilan. ³¹ Laak melaun gupia getaw mikpungun dia ni Isus, miglimbuslimbus ilan media, kaas ndaˈ naig lakay ni nga Isus, pia laak kaˈaan nilan. Saˈ maˈnia, kaliˈ pektaluˈ si Isus tu nga peneliganen, “Naa, megawaˈ ita deliˈ dini, ditu ita meliawliaw, ita na laak, adun mekengulali amu ndiˈ maiben.” ³² Naa saˈ maˈnia, sumikat ilan tuˈu, suminakay ilan tu sekayan nilan, ilanilan da laak, adun mekpain ilan sia di meliawliaw benwa.

³³ Laak dagid melaun gupia getaw mikaitaˈ di kesekat nilan, minilala nilan si nga Isus. Saˈ maˈantu, minggebek ilan sumungkak dini nga Isus, genat ilan di ngag lumibut lunsud. Ditu ilan minian lupaˈan, kaas miuna pailan dateng ditu tandaˈ kedengguˈan ni nga Isus. ³⁴ Naa saˈ maˈnia, benaˈ mikelusad si Isus tu sekayan, minitaˈen ki melaun gupia getaw. Milelaat dinilan si Isus, puˈ dialem ginaanen, maaˈ ilan karniru ndaˈiduni megingat dun. Dayun pikpuunanen ilan petuˈunay, melauni pituˈunen dinilan.

³⁵ Naa benaˈ sungu na mesindepi gendaw, mikpesempel dini Isus su nga sakupen, kaliˈ ilan pektaluˈ diniin, “Sir, sungu na mesindepi gendaw, mukaˈ kig benwa kini, meliaw pa pelum. ³⁶ Kaas melengas suguˈen mu, Sir, su nga getaw, mangay ilan tu ngag lunsud mukaˈ tu mektabuˈ benwa, puˈ adun mekesaluy ilan lebungan nilan.”

³⁷ Sumimbag si Isus, “Yamu mai pekpaan dinilan.”

“Apelai, Sir! simbag nu nga sakupen. Mabuˈ ndiˈ dadema mesuˈat suguˈen mu ami mangay sumaluy pan, bali duaˈ gatus denario siai selapiˈ, adun paˈaan dinilan?”

³⁸ Sinaak ni Isus, “Naa, sanu buuki pan niu kiin? Ipusay niu pa deliˈ diin.”

Kaliˈ nilan maipusay, “Duun laakig lima buuk pan nami, dayun duunig duaˈ buuk sedaˈ.”

³⁹ Mendadi, pimaingkuden su nga getaw diag lamalama, pikpinigpinigen ilan. ⁴⁰ Mikpanunpanun tuˈu megingkud su nga getaw, duuni pingmegatus sala penunan dun, mukaˈ duun dademai piglima puluˈ tawan. ⁴¹ Mendadi, inimud ni Isus kig lima buuk pan kia mukaˈ sug duaˈ buuk sedaˈ, dayun megangag tug langit mukaˈ mekpaladpalad tu Megbebayaˈ. Pikpetapetanen dayun su pan, piktukiden pegilasay tu nga sakupen, adun pengilaken nilan tu nga getaw. Sampay sug duaˈ buuk sedaˈ, pikilasen dadema ditu kelaun getaw. ⁴² Minaan dayun su kelaun getaw, mukaˈ migelaˈ ilan mbesug. ⁴³ Benaˈ mibesug nailan, kaliˈ pengikpesay nu nga sakup ni Isus su sawad nilan, sepuluˈ buˈ duaˈ dig belanan mipenuˈ pa nu samaˈ tu pan mukaˈ sedaˈ. ⁴⁴ Su getaw minaan ditu nga pan, lima ngibu tawan su laak lumbus laki.

⁴⁵ Naa benaˈ mitubus maan su nga kelaun getaw, pisakay ni Isus tu sekayan su nga sakupen, piunanen ilan dumipag pangay ditug Betsaida, tu sedipag linaw. Daniin, pauliˈenen pa su nga melaun getaw. ⁴⁶ Naa benaˈ migudas na dema ditu nga getaw, tumiwad dayun si Isus dig bentud, adun menenabi dia. ⁴⁷ Saˈ maˈantu, benaˈ miglegebii na, ditu na titengaˈ laud nug linaw su sekayan nu nga sakupen. Si Isus pelum, salanen da dia taasan. ⁴⁸ Kaliˈen pengundiagay su nga sakupen, ditu nailan titengaˈ laud nug linaw, mitegelan ilan gupia memelula, puˈ misensung nilan su genus. Mendadi, benaˈ sungu na daliˈ endaw, minangay si Isus ditu nilan, pekpanaw diag dibabaw tubig.

Naa mian laak sia si Isus di mesempel nu nga sakupen. ⁴⁹ Dagid midayag nilan si Isus, masiˈ pekpanaw diag dibabaw tubig. Migbeksay ilan dayun, puˈ laung nilan dun, multu. ⁵⁰ Sug launan nilan mikaitaˈ diniin, mindek ilan patiˈ.

Laung ni Isus, “Naa, gempia dai ginaa niu. Naan daini. Ndiˈ amu mendek.” ⁵¹ Suminakay dayun si Isus dia sekayan nilan. Misikpaˈ dayuni genus. Mipatiˈ gupia mesebuˈay dun su nga sakupen, ⁵² puˈ pia minitaˈ na nilan su mipenggulaula mekatag di pan kitu, ndaˈ gusay metekad nug delendeman nilan su gikteb nu ginuung ni Isus. Puˈ metegasi gulu nilan.

⁵³ Mendadi, minundas si nga Isus dumipag diag linaw. Dumingguˈ ilan tu Genesaret, iniketan nilan su sekayan nilan dia geksid. ⁵⁴ Benaˈ minlusad ilan genat ditu sekayan nilan, su nga getaw dia, minilala nilan dayun si Isus. ⁵⁵ Minggebek ilan dayun, lineep nilan sug benwa, kaas saˈ midengeg nu getaw puˈ minateng diag benwa kia si Isus, pinguit nilan dayun dia su nga pegladu, pibelilid di nga sampuyuan. ⁵⁶ Kaas pia adin pangay si Isus tu nga mikapuluˈ balay atawaka tu ngag lunsud, pia adin dia miktabuˈ benwa, su nga getaw, pinguit nilan su nga pegladu tu nga padiˈan, ditu na dayun pemegbelilid. Inubug nilan dini Isus, pia laak daw sia medeluˈ nu nga megladu su kuyamay suuben. Mukaˈ adin su taman getaw mikedeluˈ dun, migelaˈ ilan dayun mauliˈay.