¹ Mendadi, saanan ni nga Isus megawaˈ dia Pengedapan tu Megbebayaˈ, laung nu sala tawan sakupen, “Sir, bentayay mu pa daan, melengas gupiai nga ginumbelayan kini! Mesibaˈi ngag batu pengimbaalanen!”

² Sumimbag si Isus, “Waˈa daan, maitaˈ pa niu nandaw ki mekelengas gupia ginumbelayan kini. Dagid duuni gendaw mateng, pia salabuuk batu di kitentudanen, ndaˈiduni mesamaˈ dun, megelaˈ gupia penggebaˈay.”

³ Naa pegingkud si Isus tug dibabaw nug Bentud Olibo, tug dipag miˈentag nug Balay Pengedapan tu Megbebayaˈ. Mendadi si Pedro, si Santiago, si Juan mukaˈ si Andres, minadap ilan dini Isus, ilanilan da, ⁴ suminaak ilan diniin, “Naa saˈ mesuˈat, Sir, pesuun mu dinami, nanu ma mpenggulaula? Mukaˈ alanduni tuˈusan dun saˈ sungu na menuudig launan tinaluˈ mu kiin?”

⁵ Sumimbag si Isus, “Naa, peglengilam amu, adun ndiˈ amu melimbungan nu getaw. ⁶ Puˈ melaun metuaˈ, engkenen nilani gelalu, laung nilan, ‘Naani Tinduˈ nu Megbebayaˈ Meglekaunutan!’ Benaˈ melaun getaw melimbungan nilan. ⁷ Mukaˈ pagid, saˈ duuni medengeg niu pegbunuˈ dia mesempel sampay tu melayuˈ, ndiˈ amu melibuleng dun. Puˈ subay mpenggulaula itu, laak kanaˈ paini kelengkeb nug benwa. ⁸ Puˈ su sala nasud, lumumpak daan dig lain nasud. Su sala peglegediˈan, lumumpak dig lain peglegediˈan. Mukaˈ duuni ngag linug di tibuuk benwa, dakus mian pa pagidi meliget gutem. Dagid ki nga gempenggulaula kia, maˈniin laak penenggiˈan saˈ mekpuun pa megbatik tian sug libun.

⁹ “Dagid peglengilam amu daan. Puˈ dengaten amu di gedapan nu kuis dakus pemesaitan amu nu getaw Judea tug dialem nga simbaan nilan, dakus dengaten amu di gedapan nu nga gadiˈ mukaˈ duma kaunutan, sabaˈ nu kesakup niu dinaan. Mendadi su sembag niu dun, iini mbaal sikaw niu megukit di Gempia Petenday. ¹⁰ Mukaˈ ki Gempia Petenday kini, subay pegukit pa ditu kelaun bansa, dekag pa melengkebig benwa. ¹¹ Kaas saˈ daapen namu dakus dengaten amu tu gedapan nu kuis, ndiˈ amu melibuleng dun pedaan, saˈ taˈ alandun mai sembag niu. Segaga saˈ penenaakan namu, taluˈ niu laak ki petaluˈ pa diniu. Puˈ ki sembag niu, kanaˈ laak daniu taluˈ, puˈ pedelendem da diniu nug Balakat nu Megbebayaˈ.”

¹² Laung ni Isus, “Duuni getaw megwakil di nga pated nilan petain, mukaˈ maˈniin dademai penggulaulaan nu nga getaw dig bataˈen. Sampay su nga gembataˈ, kuntraanen dadema su ginaˈen mukaˈ gamaˈen, sampay meksimawiˈ dinilan ki petain. ¹³ Bentaan amu nu kelaun getaw sabaˈ nu kesakup niu dinaan. Dagid adin su getaw mektigel sampay mengikteb, iini megawen.”

¹⁴ Kaliˈ gusay pektaluˈ si Isus, “Naa ki giningelanan Mekelemuˈ mukaˈ Mekpelaat, maitaˈ pa niu, paindegen diag Balay Pengedapan tu Megbebayaˈ, dia tandaˈ kanaˈ bantang paindegan dun.” (Naa ki sinulat kini, subay sebuten gupia nu megbasa dun!) Maaˈ laung padun ni Isus, “Mendadi saˈ metandaˈ na dia ki Mekelemuˈ mukaˈ Mekpelaat kia, naa su nga getaw dini Judea, subay meglaguy tu ngag binentudan. ¹⁵ Adin su getaw metaang dia gatep nug balayen, ndiˈ pia melangan suled pa diag dialem puˈ malap di pimetangen. ¹⁶ Samanen su getaw saˈ metaang ditug binaalanen, ndiˈ dadema mpia melangan muliˈ puˈ engainen laak sia su melambak suuben. ¹⁷ Naa sug libun saˈ metaang dig bedesanen ki gendaw kiin, mesama su pegduduˈan pa, aa, mekelelaatlelaat ilan gupia! ¹⁸ Mukaˈ iini penenebiin niu, ndiˈ dadema metaang di timpu metegdaw! ¹⁹ Puˈ ki kelegenay di gendaw kiin, ndaˈidun naig lain kelegenay mekelepeng dun, genat ditu pikpuunan, su kebuat nu Megbebayaˈ di gekleb langit buˈ lupaˈ sampay nandaw, mukaˈ sampay ditug binayaˈ gebii buˈ gendaw. ²⁰ Kaas saˈ ndiˈ nu Kaunutan Megbebayaˈ engkanan su kaiben nu kelegenay kia, ndaˈidun na siai mesamaˈ getaw tetubuˈ, megelaˈ ilan sia mesapul. Dagid engkanan pa tuˈu nu Megbebayaˈ su kaibenen, sabaˈ nu nga tinduˈen sakupen.

²¹ “Mendadi,” maaˈ laung pa ni Isus, “saˈ duuni mektaluˈ diniu, ‘Bentayay pa daan niu, kiin na su Tinduˈ nu Megbebayaˈ Meglekaunutan!’ atawaka duuni mektaluˈ, ‘Kia nain!’ naa ndiˈ amu pekpetuud dun. ²² Puˈ duun pai nga metuaˈ tautau iini Tinduˈ nu Megbebayaˈ Meglekaunutan, mukaˈ metuaˈ dademai nga tautau pimuunan nu Megbebayaˈ. Mekpaitaˈ ilan nga ginuung mukaˈ mekesalebuˈ tuˈus, puˈ adun megaga nilan sia peglimbungay pia pa su tinduˈ nu Megbebayaˈ sakupen. ²³ Kaas peglengilam amu! Puˈ daan ku na pisuun diniu kig launan mpenggulaula.”

²⁴ Pidayun gusay ni Isus su taluˈen, laungen, “Mendadi, saˈ mengikteb nai kelegenay kia, su gendaw, ndiˈ na tuiag, mukaˈ sug bulan, ndiˈ na dema meglamag. ²⁵ Su ngag bitun ditug langit, meglabuˈ, mukaˈ su kelaun mibetang ditu gawanawan, mekegyugegyug. ²⁶ Naa mendadi saˈ menuud naig launanen, naan kini, kig Bataˈ nu Kilawan, medayag nau tuˈu nu kilawan, metuaˈu di gabun, medayag na su metaas ginuungu, mukaˈ maitaˈ di tiagu su kelengas nu pegbayaˈu. ²⁷ Mendadi saˈ lumusadu, suguˈen ku dayun su nga sesuguˈen ku getaw langit, adun leepen nilan sug dibabaw lumbang, pungunen nilan su getaw pimiliˈ nu Megbebayaˈ sakupen, genat ditu pingikteban benwa ditu dapit silangan sampay ditu tampusan benwa dapit sindepan.”

²⁸ Kaliˈ gusay pektaluˈ si Isus, “Naa, alap niu tituluˈan ki gayu igera. Sug igera, saˈ mentubil su panganen dayun megbegu daun, mesuunan niu puˈ sungu na memedesig benwa. ²⁹ Naa maˈantu dadema, saˈ maitaˈ niui nga gempenggulaula kini, mesuunan niu dadema puˈ naan, sungu nau tuˈu mateng puliˈ, gitunganen, dia nau bisuangan nug balay. ³⁰ Taman taluˈu diniu, ndiˈ tagad mematay su nga getaw tetubuˈ nemun, megelaˈ pa menuudig launanen kini. ³¹ Puˈ su gekleb langit buˈ lupaˈ, megelaˈ da mbeleng. Laak dagid ki pekteluˈen ku kini, ndaˈi kebelengen.”

³² Kaliˈ gusay pektaluˈ si Isus, “Laak dagid ki gempenggulaula kiin, ndaˈiduni getaw mekesuun dun, saˈ taˈ endaway dun atawaka taˈ urasay dun. Pia pa su nga sesuguˈen nu Megbebayaˈ ditu gekbus langit sampay naan, kig Bataˈen, ndaˈi mekesuun dun, subay su laak Gamaˈu. ³³ Kaas pegenduk amu, saˈitada pektalenten amu, puˈ ndaˈ niu mesuunay saˈ nanu mpenggulaula. ³⁴ Puˈ kiin, penenggiˈan dun ki getaw mipanaw di melayuˈ. Saˈ sinegay ndiˈ pa mpanawi getaw kini, pegwekilanen su nga sesuguˈenen, tukidenen dinilani pebaalen dinilan, mukaˈ teluˈenen tu megingat dig bisuangan, megenduk gusay. ³⁵ Naa saˈ maˈantu, yamu dema, pegenduk amu lelayun, puˈ ndaˈ niu mesuunay saˈ nanu dateng ki gapuˈ balay kini, saˈ lelabung ma, saˈ titengaˈ gebii ba, atawaka daliˈ endaw, atawaka saˈ siselem na gupia. ³⁶ Saˈ mbuus metekawi kedatengen, ndiˈ pia medetenganen ki pektulug amu. ³⁷ Kaas ki tinaluˈu diniu kini, taluˈu dadema di nga tibaˈan getaw, peglengilam amu!”