¹ Maˈantu, duaˈ gebii pa mekpuun sug Lumpuk tug Liniusan, metaang dun sug Lumpuk di Pan ndaˈ Petulinay. Mendadi ki nga kaunutan nug belian nu getaw Judea mukaˈ ki nga mekpetuˈun di Misulat Palinta nu Megbebayaˈ, minengaw ilan suˈatan nilan di kedaap nilan dini Isus, puˈ adun pepatay nilan iin. Laak pigunguban nilan. ² Laung nilan, “Ndiˈ mesuˈat metaang dig Lumpuk, puˈ buus menlimuuk su nga getaw.”

³ Naa si Isus, sinegay ditu pelum Betania, inggat iin maan diag balay ni Simon, su getaw kiin minayan megladu mekesalebuˈ nuka. Benaˈ saanan ni Isus maan, duuni minateng libun peguit bataˈ bandi gemputiˈ, mipenuˈ pagemut piningalan dun ki pagemut kia, nardo, melagaˈ gupia. Mendadi pinungak dayun nug libun sug liig nug bataˈ bandinen bitangan pagemut, binunagen dayun di gulu ni Isus. ⁴ Dagid duunig duma getaw dia, milaati ginaa nilan dun, diadia pekteluˈenen dig dumanen, “Baa, mauma dema ki pagemut kiin, pikulaˈulaˈan laak? ⁵ Iin siai melengas, piksaluy sia, mabuˈ malin sia labi telu gatus denario, dayun begay tu nga pubri su galinen.” Mukaˈ pigbeluˈan nilan namal kig libun kini.

⁶ Dagid miktaluˈ si Isus, “Aba, maˈnia da! Mauma libulengen ma niuig libun kini? Ki pinggulaulanen dinaan, melengas. ⁷ Su pubri, lelayun niu mpungun megbenwa. Kaas pia taˈ endaway dun, saˈ mauyaˈan niu ebangan niu, naa mesuˈat da gusay. Naan dagid, kanaˈ nau maiben dumuma diniu dini. ⁸ Naa kig libun kini, adin su gikteb megaganen baalenen, binaalen dayun. Puˈ pigupiananen pedaanig lawasu di kelebeng sungu dinaan. ⁹ Mendadi taman taluˈu diniu, pia adin pegukit su Gempia Petenday dinig dibabaw lumbang, naa mpeduma dun dadema pegukit ki pinggulaula nig libun kini, puˈ adun ndiˈ iin melingawan.”

¹⁰ Mendadi kini si Judas Iscariote, sala tawan di nga sepuluˈ buˈ duaˈ peneligan ni Isus, linaawanen su nga kaunutan nug belian nu getaw Judea, adun tipuunen dinilan si Isus. ¹¹ Mendadi ki nga kaunutan kini, benaˈ midengeg nilani tinaluˈ kia ni Judas, aa naa, didialan nilan, pisadan nilan dayun si Judas, tindanan nilan iin selapiˈ. Kaas genat nitu, si Judas kini, piksuˈatsuˈaten dayuni sikawen tumipu dini Isus.

¹² Mendadi, minateng sug bekna gendaw nug Lumpuk di Pan ndaˈ Petulinay, metaang dun sug betad nu nga getaw Judea mektitiˈ nati karniru guliden nilan tu Megbebayaˈ, gindan nilan tug Liniusan. Mendadi, suminaak dini Isus su nga sakupen, “Sir, kig Lebungan ta tug Liniusan, adin mu ami pengayay, adun ulingelen nami?”

¹³ Sinuguˈ dayun ni Isusig duaˈ tawan sakupen, laungen dinilan, “Bundas amu ditu syudad. Saˈ mateng amu ditu, duun dayunig laki mesungkak niu, pekpisan bandi bitangan tubig. Iini tendugay niu, ¹⁴ adin sug balay seledanen, taluˈ niu dayun ditu gapuˈ balay, ‘Naa, pimuun nu Mekpetuˈun, laungen, Adin dapit su sugud pengaanan nami tug Lebungan nami tug Liniusan, yami nu nga sakupu?’ ¹⁵ Naa saˈ maˈnia,” laung ni Isus, “paitaˈen dayun diniu ki gembagel sugud dia dapit ditaas, misangkap na. Dia na niu pegulingelayig Lebungan ta.”

¹⁶ Mipanaw dayun sug duaˈ tawan sakup ni Isus. Benaˈ minateng ilan tu syudad, midetengan nilan tuˈu, maaˈ dadema nu tinaluˈ ni Isus. Pigulingel nilan dayun dia sug Lebungan nilan tug Liniusan.

¹⁷ Naa benaˈ misindep nai gendaw, miditu si Isus, ilan nu nga sepuluˈ buˈ duaˈ tawan sakupen. ¹⁸ Mendadi, benaˈ pekaan nailan, kaliˈ pektaluˈ si Isus dinilan, “Taman taluˈu diniu, ki sala tawan diniu suminalu gupia dinaan maan kini, mektipu dinaan.”

¹⁹ Milibuleng dayun su nga sakup ni Isus. Miglimbuslimbus ilan sumaak diniin, “Asa Sir, kanaˈ da sia naani pekteluˈen mu kiin?”

²⁰ Sumimbag si Isus, “Sala tawan lai diniu, yamu nga sepuluˈ buˈ duaˈ tawan kini suminalu gupia dinaan. ²¹ Puˈ naan kini, kig Bataˈ nu Kilawan, mbinasau tuˈu, maaˈ dadema nu misulat pedaan ditu Taluˈ nu Megbebayaˈ. Laak dagid pia maˈantu, ki getaw mektipu dinaan, kig Bataˈ nu Kilawan, mekelelaatlelaat gupia! Tumuˈ pa ndaˈ na sia pegigetawi getaw kiin!”

²² Mendadi benaˈ maan ilan, minalap si Isus pan, mikpaladpalad dayun tu Megbebayaˈ. Pimetanen dayun su pan, dayunen pentulunay dia nga peneliganen. Kaliˈ pektaluˈ, “Naa, alap amu dun ini. Kini sug lawasu.”

²³ Minalap pelum si Isus sala tasa penginumen. Benaˈ mikpaladpalad na puliˈ tu Megbebayaˈ, dayunen tulunay dia nga sakupen ki tasa kini. Mininum ilan dun dayun, launan nilan. ²⁴ Kaliˈ pagid pektaluˈ si Isus, “Kini sug duguˈu, ki mekigis na, adun gugas tu salaˈ nu melaun getaw. Kig duguˈuig bian nug begu pasad nu Megbebayaˈ tu getaw. ²⁵ Mendadi, taman taluˈu diniu, genat nandaw, ndiˈ nau puliˈ minum di penginumen kini, sampay da dun mateng su gendaw meglekaunutan na tuˈu su Megbebayaˈ. Dekagu pa inumay kig begu ginis penginumen ditu Keglekaunutanen.”

²⁶ Naa benaˈ mitubus si nga Isus maan Lebungan nilan, migbebat ilan kegenal tu Megbebayaˈ, dayun ilan mengguaˈ dia, tumiwad ilan tug Bentud nu nga Gayu Olibo.

²⁷ Mendadi, kaliˈ pektaluˈ si Isus tu nga peneliganen, “Yamu kini, megelaˈ amu tuliud dinaan. Puˈ iini misulat ditu Taluˈ nu Megbebayaˈ, ‘Miktaluˈ su Megbebayaˈ, petain ku ki megingat tu karniru, dayun megelaˈ mesigwag su nga karniru.’” ²⁸ Maaˈ laung pa ni Isus, “Dagid benaˈ genatu petubuˈay puliˈ, megunau diniu ditu Galilea.”

²⁹ Kaliˈ sumpat si Pedro, “Aba Sir, pia teliudan ka nu nga kelaun dumau, naan kini, ndiˈ nau gusay tuliud diniˈa!”

³⁰ “Taman taluˈu diniˈa,” laung ni Isus, “dekag pasiˈ peguni su manuk duaˈ deksuˈ gebii kini, metelu deksuˈa na memalaw puˈ kanaˈ mau mailala.”

³¹ Dagid mimantek gupia si Pedro mektaluˈ, laungen, “Pia mekendutaˈ, saliunungan ku yaˈa, ndiˈu da lai pemelaun puˈ kanaˈu yaˈa mailala!”

Mukaˈ su kelaun sakup ni Isus, maˈnia dademai penteluˈen nilan.

³² Naa minundas si nga Isus tu pegimulanan gayu piningalan dun Getsemane. Benaˈ minateng ilan dia, kaliˈ pektaluˈ si Isus di nga sakupen, “Naa, pegingkud amu deliˈ dini, puˈ menenabi pau dia.” ³³ Dayun iwiten dumanen si Pedro, si Santiago, mukaˈ si Juan. Mendadi benaˈ melayuˈlayuˈ nailan diag duma nilan, diduaˈani ginaa ni Isus, milegenan dun gupia. ³⁴ Laungen dayun dia telu tawan dumanen, “Milegenanu ini, mibegatanu dun patiˈ, maˈniin na petayan ku ini. Kaas dini damu dun deliˈ, pegenduk amu.”

³⁵ Minundas kemaikaˈ dia gunaan si Isus, dayun miglaub dig lupaˈ menenabi. Iini pinenabinen saˈ sia mesuˈat, ndiˈ na mayan diniin ki kegbinasa diniin. ³⁶ Kaliˈ pektaluˈ, “Uu Amaˈu, ndaˈiduni ndiˈ mu megaga. Kaas ki tasa mipenuˈ nug lesayan ku sunguu na inumay, naa peliaw mu sia dinaan, adun ndiˈu na mainum. Laak dagid, Amaˈ, sug daniˈa mauyaˈan, iini penuuden, kanaˈ nug danaan.”

³⁷ Naa saˈ maˈnia, pinuliˈan ni Isus su telu tawan sakupen kia. Midetenganen, tinulug ilan. Sinabi dayun ni Isus si Pedro, laungen, “Uu Simon, taˈ itu, tinuluga? Masiˈ ndaˈ mu na megagai megenduka, pia laak sauras? ³⁸ Baa,” laung ni Isus, “peglengilam amu mukaˈ penenabi amu daan, adun ndiˈ amu mpenulay. Puˈ dig delendeman niu, gangut niu sia mekpetuud amu tu mauyaˈan nu Megbebayaˈ. Dagid su kekilawan niu, melubay, ndiˈ mekpetuud dun.”

³⁹ Mipanaw na puliˈ si Isus puˈ menenabi na pelum, maaˈ dadema nug bekna kenenabinen. ⁴⁰ Mendadi, kaliˈen puliˈay pelum su nga peneliganen, iin da gusayi mitaanganen, tinulug ilan pelum, puˈ ndiˈ nilan metigeli tulug nilan. Ndaˈidun naig daˈawa nilan.

⁴¹ Mendadi, benaˈ ketelu deksuˈ na ni Isus mpuliˈ dia sakupen kia, kaliˈ pektaluˈ dinilan, “Taˈ ma, tinulug pamu gusay, milali amu? Naa ma, pia da, sukal na! Mitektak na su sesaˈ! Mendadi naan kini, kig Bataˈ Kilawan, pegwakil nau tuˈu tu pegbayaˈ nu nga kanaˈ megbasa tu Megbebayaˈ. ⁴² Kaas pegbuat amu, mpanaw naita. Bentayay pa daan niu, kiin na tuˈu ki tumipu dinaan!”

⁴³ Mendadi, ndaˈ pa medeksuˈ mektaluˈ si Isus, misebang si Judas, ki sala tawan kiin di sepuluˈ buˈ duaˈ peneligan ni Isus. Melaun getaw tumindug dini Judas kini, peguit ilan badung mukaˈ bentul, sinuguˈ ilan nu nga kaunutan nug belian mukaˈ su mekpetuˈun di Misulat Palinta nu Megbebayaˈ kampuˈ nug duma kaunutan nu getaw Judea. ⁴⁴ Naa si Judas, ki tumipu dini Isus, duuni tuˈus gandang bigayen di ngag dumanen kia, puˈ tinaluˈen pedaan dinilan, “Adin su getaw elekan ku, iinen na su penengaun niu. Daap niu dayun, uit niu, peksibaˈay niu gupia ingatay.”

⁴⁵ Mendadi kini si Judas, sikna minateng, tuminuun dayun madap dini Isus. Kaliˈ pektaluˈ, “Uu, Sir!” Dunut ilekanen si Isus. ⁴⁶ Dinaap dayun si Isus, dayun gepusay gupia. ⁴⁷ Naa sala tawan pegindeg dia mesempel, migbakut badungen, dayunen tigbasayi gulipen nu Tampusan Metaas Belian nu getaw Judea. Miseksipi sedibaluy telinganen.

⁴⁸ Miktaluˈ dayun si Isus dia nga melaun getaw kia, “Naa, tulisan bau, kambat amu meguit badung mukaˈ bentul saˈ daapen niau? ⁴⁹ Asa gendawgendaw, naanig duma niu dia Pengedapan tu Megbebayaˈ, mikpetuˈunu dia, laak ndaˈ niau daapay. Laak dagid kini, subay mpenggulaula daan, puˈ su sinulat dengantu ditu Misulat Taluˈ nu Megbebayaˈ, subay menuud.”

⁵⁰ Naa saˈ maˈnia, bilengan dayun si Isus nu nga sakupen, mimeglaguy ilan, launan nilan.

⁵¹ Laak duuni sala tawan begu getaw peglenduglendug dini Isus, mipeliumutan laak gumut, dinaap dadema sia nu ngag duma ni Judas. ⁵² Laak ndaˈ nilan melaam, puˈ kaliˈ nilan daapay, su laak gumuteni miselabet nilan. Mikelaguyi getaw kia, ndaˈidun nai penepetenen.

⁵³ Naa saˈ maˈantu, inagak si Isus ditug balay nu Tampusan Metaas Belian nu getaw Judea. Mikpungun ditu su kelaun kaunutan nug belian dakus su ngag duma kaunutan nu getaw Judea, sampay su nga mekpetuˈun di Misulat Palinta nu Megbebayaˈ. ⁵⁴ Naa si Pedro, miglendug dadema di melayuˈlayuˈ, gikteb diag lenuˈan nig balay kia. Luminamug dayun si Pedro dia nga megingat, pemegingkud ilan menalang dia gapuy.

⁵⁵ Mendadi ki nga kaunutan nug belian kia dakus ki tibuuk Pikumpungan nu Metaas Gukum nu getaw Judea, minengaw ilan sia takesiˈ mekatag dini Isus, puˈ adun maukuman iin petain. Laak dagid mibulugan laak su nga kaunutan kia menengaw gempia dangat nilan diniin. ⁵⁶ Puˈ pia melauni minakesiˈ tu pimbaal dini Isus, ndaˈ pektukmaˈi teluˈen nilan.

⁵⁷ Duun dayuni nga getaw migindeg, tuminakesiˈ ilan laak balus mekatag dini Isus. Laung nilan, ⁵⁸ “Duuni midengeg nami tinaluˈen, ‘Ki Pengedapan daw tu Megbebayaˈ, kig binaal nu kilawan,’ laungen, ‘gebaˈen ku. Dayun gikteb telu endaw, baalen ku puliˈ ki sukli dun, ki kanaˈ na pigbaal nu kilawan.’” ⁵⁹ Laak su nga tuminakesiˈ dig balus, ndaˈ dadema pektukmaˈi pekteluˈen nilan.

⁶⁰ Mendadi su Tampusan Metaas Belian, migindeg na ditu gedapan nu ngag launan getaw. Sinaakanen dayun si Isus, laungen, “Naa, ndaˈidun bai sembag mu di tinakesiˈ ni nga getaw kini mekatag diniˈa?”

⁶¹ Dagid ndaˈ sembag si Isus, pia sektaang taluˈ. Sinaakan puliˈ nu Tampusan Metaas Belian, “Yaˈa ba tuˈu su Tinduˈ nu Megbebayaˈ Meglekaunutan, kig Bataˈ nu Megdedengeg Megbebayaˈ?”

⁶² “Waˈa,” laung ni Isus, “naan ma. Mukaˈ duuni gendaw mateng, naan kini, kig Bataˈ Kilawan, maitaˈ niau, pegingkudu tuˈu ditu dapit lintu nu Tampusan Ginuungan! Dakus maitaˈ niau, lumusadu puliˈ dinig lumbang kini, metuaˈu di gabun dia gawanawan!”

⁶³ Naa, apelai. Ki Tampusan Metaas Belian kini, kaliˈen medengeg pilepeng ni Isus sug lawasen tu Megbebayaˈ, lingetan dini Isus sug Belian. Giditen su penepetenen, kaliˈ pektaluˈ, “Paa, ndiˈ ta na kambat dugangan su takesiˈ! ⁶⁴ Puˈ midengeg na niu ki keksudiˈen tu Megbebayaˈ. Mendadi, alanduni kitab niu dun?”

Piksalabuukan nilan ukumay selaˈan si Isus, bantang na petain.

⁶⁵ Naa saˈ maˈnia, su ngag duma, pindulaˈan nilan si Isus. Tinimpeng nilan pagidi matanen, dayun nilan denegay, kaliˈ ilan pektaluˈ diniin, “Naa, saˈ sia metuud puˈ suunan ka, atuk mu saˈ taˈ taway dun dinamii mimesait diniˈa?” Dayun su nga mimegingat dini Isus, binatak nilan tampalingay si Isus.

⁶⁶ Naa si Pedro, dia pa lenuˈan nu pengukuman. Mendadi, duuni sala tawan delaga minateng dia, sesuguˈen nu Tampusan Metaas Belian. ⁶⁷ Benaˈ minitaˈ nug delaga si Pedro menalang dia gapuy, tintengen gupia, kaliˈ pektaluˈ, “Uy, yaˈa kiin, dumaa pagid ni getaw Nazaret kiin, si Isus.”

⁶⁸ Dagid mimalaw si Pedro. “Baa,” laungen, “ki teluˈen mu kiin, ndiˈu lai mesabut.” Migawaˈ dayun dia si Pedro. Benaˈ dia na geksid nug lenuˈan si Pedro, duuni manuk miguni.

⁶⁹ Naa minitaˈ na puliˈ nu sesuguˈen kia si Pedro. Laung nu sesuguˈen dia nga getaw pemegindeg dia, “Ki getaw kini, duma ma nilan!” ⁷⁰ Laak dagid mimalaw na puliˈ si Pedro.

Naa benaˈ ndaˈ maiben, su getaw pemegindeg dia, miktaluˈ ilan pelum dini Pedro, “Naa yaˈa, minget dumaa lai nilan, puˈ getawa Galilea ma dema.”

⁷¹ Dagid mingaduguˈ tanan si Pedro, laungen, “Apelii lai! Ndiˈu dema tuˈu mailalai getaw pekteluˈen niu kiin!”

⁷² Iin demai keguni manuk, keduaˈen na meguni. Milabuˈ dayun dig delendeman ni Pedro su tinaluˈ kiin ni Isus, laungen, “Dekag pasiˈ meduaˈ peguni su manuk, metelu deksuˈa na memalaw puˈ kanaˈ mau mailala.” Lilugutan dayun mengaduy si Pedro.