¹ Tubus nituˈ ndaˈ maiben, kaliˈ tingag si Isus, minitaˈeni nga medatuˈ getaw, migbegay ilan gamut nilan tug Balay kia Pengedapan tu Megbebayaˈ. ² Duun pagidi minitaˈ ni Isus balulibun, pubri gupia, migbetang dadema gamuten, laak duaˈ laad sinsilyu. ³ Kaliˈ pektaluˈ si Isus, “Taman taluˈu diniu, ki pubri kini balulibun, gembagel pai ginamuten kiin, sabayaˈ su ginamut nu nga kelaun getaw dini. ⁴ Puˈ sug duma getaw, ginamuten su laak kapin nu gimunen. Dagid kig balulibun kini, pia pubri gupia, gilaˈen da gusay begay sug bataˈ misukaten.”

⁵ Naa pegyegaan nu ngag duma ni Isus kig Balay kia Pengedapan tu Megbebayaˈ, mesibaˈ laungi nga pengimbaalanen batu, sampay su nga pekayan dig Balay pimegay nu nga getaw. ⁶ Dagid miktaluˈ si Isus, “Naa, kig launanen kini maitaˈ pa niu nandaw, duuni gendaw mateng, pia salabuuk batu di kitentudanen, ndaˈiduni mesamaˈ dun, megelaˈ gupia penggebaˈay.”

⁷ Mendadi suminaak dini Isus su nga sakupen, “Naa saˈ mesuˈat, Sir, pesuun mu dinami, nanu ma mpenggulaula? Mukaˈ alanduni tuˈusan dun saˈ sungu na menuudi tinaluˈ mu kiin?”

⁸ Sumimbag si Isus, “Naa, peglengilam amu, adun ndiˈ amu melimbungan nu getaw. Puˈ melaun metuaˈ, engkenen nilani gelalu, laungen, ‘Naani Tinduˈ nu Megbebayaˈ Meglekaunutan!’ Mukaˈ teluˈen nilan pagid, ‘Meglekaunutan na tuˈu su Megbebayaˈ!’ Naa kiin, ndiˈ niu dema tuˈu pegdunutay. ⁹ Mukaˈ pagid saˈ duuni medengeg niui pegbunuˈ mukaˈ sasaw, ndiˈ amu mendek dun. Puˈ subay mauna mpenggulaula itu, laak kanaˈ paini kelengkeb nug benwa.”

¹⁰ Kaliˈ gusay pektaluˈ si Isus, “Su sala nasud, lumumpak daan dig lain nasud. Su sala peglegediˈan, lumumpak dig lain peglegediˈan. ¹¹ Mukaˈ duuni ngag linug metikteg, dakus mian pa pagidi meliget gutem mukaˈ nga pelabuˈ di tibuuk benwa. Melaun dademai mekendekendek penggulaula mukaˈ mekesalebuˈ tuˈus dig langit. ¹² Laak dagid dekag pa mpenggulaulaig launanen kini, daapen amu nu nga getaw, peglegetan amu dayun. Dengaten amu tu nga simbaan nu getaw Judea, dayun amu pirisuay. Dengaten damu dema di gedapan nu nga gadiˈ mukaˈ duma kaunutan, sabaˈ nu kesakup niu dinaan. ¹³ Mendadi su sembag niu dun, iini mbaal sikaw niu megukit di Gempia Petenday.

¹⁴ “Kaas buklus niui ginaa niu,” laung pa ni Isus, “di ndiˈ niu pegdelendemen pedaan ki sembag niu. ¹⁵ Saˈ pensaakan namu, naan nai megbegay diniu tinawan niu sumbag dun. Kaas ndaˈidun tanani kuntra niu mekepemilas tu teluˈen niu, ndiˈ damu dema nilan mpebalus. ¹⁶ Laak dagid pia pa su nga mekegulang niu, su nga pated niu, su ngag betaˈan niu mukaˈ su nga sambat niu, pegwakil amu nilan tu nga kuntra niu. Mukaˈ meksimawiˈ ilan di ngag duma diniu ki petain. ¹⁷ Bentaan amu nu kelaun getaw sabaˈ nu kesakup niu dinaan. ¹⁸ Laak dagid pia maˈantu, pia sebalu dig buuk niu, ndaˈiduni mekaˈidan.^{a 19} Mendadi saˈ mektigel amu, mpeduma amu tu ketubuˈ ndaˈi tamanen.”

²⁰ Laung pagid ni Isus, “Naa ki Jerusalem kini, maitaˈ pa niu pegbeletan sundalu. Saˈ maitaˈ na niu, mesuunan niu puˈ sungu na pelengay gapuyig lunsud. ²¹ Mendadi saˈ mpemaˈniin na, su nga getaw dini Judea, subay meglaguy tu ngag binentudan. Adin su getaw metaang dig dialem lunsud kini, subay guaˈ. Adin su getaw metaang dia mektabuˈ benwa, ndiˈ pia medinig lunsud. ²² Puˈ kiin na tuˈu ki Gendaw nu Ginukuman nu Megbebayaˈ, ki gendaw nu kenuud tuˈu nu kelaun sinulat ditu Taluˈ nu Megbebayaˈ. ²³ Naa sug libun, saˈ metaang dig bedesanen ki gendaw kiin, mukaˈ mesama su pegduduˈan pa, aa, mekelelaatlelaat ilan gupia! Puˈ mbianan meliget kelegenayig dibabaw lumbang kini. Kig bansa kini, melebuˈan nu ginukuman nu Megbebayaˈ. ²⁴ Duuni pembunuˈen, duun dademai pendaapen, dayun uitay mesigwag tu kelaun benwa. Ki Jerusalem kini, peglaatan nu nga kanaˈ getaw Judea, sampay da dun metektak su pegbayaˈ nug lain bansa dig lunsud kini.”

²⁵ Kaliˈ padun pektaluˈ si Isus, “Mukaˈ duun pai nga mekesalebuˈ tuˈus ditu mata gendaw, ditug bulan, mukaˈ ditu ngag bitun. Melegenan dun patiˈ su ngag bansa dig dibabaw lumbang, sabaˈ nu kesebuˈay nilan tug deguk nug dagat sampay tu medekdes kegbelulun nu nga nabek. ²⁶ Memegdaan su nga kilawan sabaˈ nu gendek nilan dakus su kededuaˈay nu ginaa nilan ditu nga sungu mpenggulaula di tibuuk lumbang. Puˈ su kelaun mibetang ditu gawanawan, mekegyugegyug. ²⁷ Naa mendadi saˈ menuud naig launanen, naan kini, kig Bataˈ nu Kilawan, medayag nau tuˈu, metuaˈu di gabun, medayag na su ginuungu mukaˈ maitaˈ di tiagu su kelengas nu metaas pegbayaˈu. ²⁸ Kaas saˈ maitaˈ na niu kini mekpuun na menuud, naa pegindeg amu, ndiˈ amu dega pegdungguˈ, dedialay niu ki kenlekat diniu, puˈ mesebang na tuˈu.”

²⁹ Naa miksambingay si Isus tu nga sakupen, laungen, “Naa pegdelendem niu ki gayu igera, dakus sug duma gayu. ³⁰ Saˈ maitaˈ niu su gayu megbegu daun, mesuunan niu puˈ sungu na memedesig benwa. ³¹ Naa maˈantu dadema, saˈ maitaˈ niui nga gempenggulaula kini, mesuunan da niu dema puˈ sungu na tuˈu meglekaunutan su Megbebayaˈ.”

³² Diksuˈ ni Isus su taluˈen, “Taman taluˈu diniu, ndiˈ tagad mematay su nga getaw tetubuˈ nemun, megelaˈ na menuudig launanen kini. ³³ Puˈ su gekleb langit buˈ lupaˈ, megelaˈ da mbeleng. Laak dagid ki pekteluˈen ku kini, ndaˈi kebelengen.”

³⁴ Kaliˈ gusay pektaluˈ si Isus, “Mendadi, pektalenten amu, adun ndiˈ megelaˈig delendeman niu di keglekebibu niu milebianan, mukaˈ di kegbebulek niu, sampay su kelibuleng niu di ketubuˈay niu. Puˈ mbuus metekawan amu di Gendaw kiin, gitunganen su metaban giman. ³⁵ Puˈ ki Gendaw kiin, metekaw gupiai kesebangen di tibaˈan getaw dig dibabaw lumbang. ³⁶ Kaas pegenduk amu lelayun, dunut penenabi amu, adun metigel niu ki kelaun mpenggulaula kitu, mukaˈ ndiˈ damu dema mpiid madap dinaan kini, kig Bataˈ nu Kilawan, di kelusadu puliˈ.”

³⁷ Maˈantu, gendawgendaw pekpetuˈun si Isus dia Pengedapan tu Megbebayaˈ. Laak saˈ lelabung, megawaˈ na puliˈ dia Jerusalem, mangay pa mengintulugan ditug Bentud nu nga Gayu Olibo. ³⁸ Su melaun getaw, gendawgendaw melapus mekpungun ditu Pengedapan, puˈ adun mekineeg dini Isus.