¹ Mendadi, migukit si Isus sambingay tu nga Pariseo kia. Laungen, “Duuni getaw migimula pegimulanan gubas. Benaˈ mitubusen pemulanay, binaliten dayuni pegimulananen, migengkul seludan tu nga tubig nu gubas saˈ intesenen, mukaˈ migbaal pa pagid metaas pegelungan dun. Saˈ mitubus, pisaˈupen di nga getawi pegimulananen kia, dayun mipanaw dig lain benwa. ² Mendadi benaˈ sumingkuˈ na su pegimulanan, suminuguˈ su gapuˈen di sala tawan sesuguˈenen meditu nga saˈup, puˈ adun elapenen sug daniin gilas tu nilan. ³ Laak dagid kaliˈ dateng ditu su sinuguˈ, aba, ginapus nu nga saˈup, binadas nilan pa pagid dayun piuliˈ, ndaˈiduni miwiten pia maikaˈ. ⁴ Naa su gapuˈ nu pegimulanan, suminuguˈ pa pelum sala tawan sesuguˈenen. Benaˈ minateng ditu su sinuguˈ, bintul nu nga saˈup di gulu, piksudiˈan nilan pa pagid. ⁵ Naa su gapuˈ nu pegimulanan, suminuguˈ pa pelum di ketelu tawan sesuguˈenen. Benaˈ minateng ditu nga saˈup, binunuˈ nilan. Naa melaun pai sinuguˈ, iin nai migbatag ia. Sug duma sinuguˈ, binadas nilan, mukaˈ sug duma, binunuˈ nilan. ⁶ Mendadi benaˈ miniben, mibilin laaki sala tawan, ki na bataˈ nu gapuˈ pegimulanan kia, ki petailenen gupia. Tigaˈwan, iin na sungkini sinuguˈen mangay tu nga saˈup. Puˈ maaˈ laung pa nu gapuˈ nu pegimulanan dialem delendemanen, ‘Tumuˈ saˈ kig bataˈu na kini, pegbesaan nilan iin.’ ⁷ Laak dagid saˈ midayag nu nga saˈup sug bataˈen kia, miksabutsabut ilan dayun, laung nilan, ‘Aa naa, kiin na tuˈu sug bataˈ nu gapuˈ nu pegimulanan kini. Tala, tumuˈ petain tain, adun danita na su petenged sia diniin!’ ⁸ Mendadi benaˈ minateng dia nilan kig bataˈ kini nu gapuˈ nu pegimulanan, inukpaˈan nilan, pinatay nilan tuˈu. Sug bangkayen dayun, piniglak nilan tug liu nu pegimulanan.

⁹ “Naa saˈ maˈnia,” sinaak ni Isus, “alandun ma dayuni penggulaulaan nu gapuˈ nu pegimulanan gubas? Iin nai mangay ditu pegimulananen, adun pemunuˈenen ki nga saˈup kia. Dayun lain getaw na pelumi pesaˈupen tu pegimulananen kia. ¹⁰ Puˈ ndaˈ ba niu mbasa su sinulat ditu Misulat Taluˈ nu Megbebayaˈ, maˈniniˈ?

¹² Naa ki nga kaunutan nu getaw Judea, benaˈ midengeg nilani tinaluˈ kia ni Isus, pedaap nilan sia iin, puˈ misimaˈ nilan puˈ ilani pisugaten ditu nga saˈup tu sambingayen kia. Kaas pidaap nilan sia si Isus, laak ndaˈ nilan megaga daapay, puˈ mindek ilan tu melaun getaw. Kaas bilengan nilan si Isus, migawaˈ ilan dia.

¹³ Naa duuni nga Pariseo mukaˈ nga sakup ni Herodes, sinuguˈ ilan nu kaunutan nilan mangay ditu ni Isus lumantugiˈ diniin, adun sia metaban nilan si Isus di teluˈenen. ¹⁴ Mendadi minadap dini Isus su sinuguˈ, tautau suminaak ilan, “Naa Sir, misuunan nami puˈ pektuˈun mu su metuud. Ndaiˈ pegisuun mu tu tindeg nu getaw, kaas ndiˈa mpesuay di metuud, pektuˈun mu gusay su tantu mauyaˈan nu Megbebayaˈ pegbetaden nu getaw. Naa saˈ maˈantu, biwang ba ditu Misulat Palinta nu Megbebayaˈ, megbuis ita ditu tampusan gadiˈ si Cesar, saˈ ndaˈ? Megbuis bami dun, saˈ ndiˈ?”

¹⁵ Laak dagid misuunan ni Isus puˈ iini puun nu kesaak nilan diniin kia, su tautau kekesuun nilan. Kaas laungen dinilan, “Baa, mauma pengimanan ma niau? Alap amu selaad selapiˈ, paitaˈ niu deliˈ dinaan.”

¹⁶ Tinulunan nilan dayun si Isus selapiˈ. Sinaak dayun ni Isus dinilan, “Naa, taˈ taway dun baig lingaw kini? Taˈ ngalanen bai misulat dadema dini kini?”

Laung nilan, “Dani Cesar.”

¹⁷ Kaliˈ pektaluˈ si Isus, “Naa saˈ maˈantu, kig dani Cesar, bayad da niu diniin. Dayun sug danu Megbebayaˈ, begay da niu dema ditu Megbebayaˈ.”

Kaliˈ medengeg nu nga sinuguˈ ki tinaluˈ kia ni Isus, misebuˈan ilan diniin.

¹⁸ Naa duun pelumi nga Saduseo mituaˈ ditu ni Isus. Naa ki nga Saduseo kini, ilani sala pikumpungan ndiˈ ilan mengintuudan dun puˈ su nga minatay, metubuˈ daw puliˈ. Mendadi, kaliˈ pembaalbaal sumaak dini Isus ki nga Saduseo, ¹⁹ “Naa Sir, duuni palinta dinita pisulat nu Megbebayaˈ dini Moises, ‘Saˈ daw matayig laki mikenginsawa na, laak ndaˈidunig bataˈen, naa subay sukliin nu pated nu minatay. Iini menginsawa tug balulibun, adun duunig bataˈ nilan, lepeng bataˈ nu minatay kitu. ²⁰ Mendadi, duuni pitu tawan mekpated. Minginsawa su gulangbataˈ dayun minatay, ndaˈidun paig bataˈen. ²¹ Dayun su keduaˈ pateden pelum, pinginsawanen sug balulibun dayun minatay, dakus su ketelu pateden. ²² Iin nai migbatag, gikteb nu pitu tawan kia, lumbus minatay, ndaˈidun da gusayig bataˈen. Dayun sug libun, minatay dadema. ²³ Naa paladpalad saˈ duun siai metubuˈ daw puliˈ genat matay, naa kig libun kia, adin ma dayuni sawanen ditu pitu tawan kia, kagina migelaˈ ma mayan mpenginsawa nu mekpated kia?”

²⁴ Laak dagid kaliˈ sembag si Isus, “Baa, gembagel gupiaig lapang niu! Puˈ ndaˈ niu mesabut su Misulat Taluˈ nu Megbebayaˈ, sampay ndaˈ niu dadema mesabut su gikteb nu ginuung nu Megbebayaˈ! ²⁵ Puˈ saˈ metubuˈ na puliˈ su nga minatay, ndiˈ nailan meksenlangan, segaga mesama ilan ditu nga sesuguˈen nu Megbebayaˈ getaw langit. ²⁶ Mukaˈ padun, petubuˈen daan puliˈ tuˈu su nga minatay, puˈ ndaˈ ba niu mbasa ki sinulat ni Moises dengantu, ditu sinulaten mekatag di sigbet kiin migligaˈ? Maaˈ laung nu Megbebayaˈ dini Moises, ‘Naani Megbebayaˈ pektemuyen ni Abraham, pektemuyen ni Isaac, mukaˈ ni Jacob.’” ²⁷ Kaliˈ gusay pektaluˈ si Isus, “Naa misuunan ta, iini mektamuy tu Megbebayaˈ su getaw tetubuˈ, kanaˈ nu nga minatay.”^b

Laung pa ni Isus tu nga Saduseo, “Kagina maˈantu, mipatiˈ amu daan melapang.”

²⁸ Naa duuni sala tawan dia mekpetuˈun di Misulat Palinta nu Megbebayaˈ. Benaˈ midengegen su keglantugiˈ nilan dini Isus, misabuten puˈ misugatan ni Isus su sembagen dia nga Saduseo mingindan diniin. Mendadi, minangay dia gupid ni Isus suminaak diniin, “Sir, ta palintaay duni tampusan metaas di nga kelaunanen kiin?”

²⁹ Kaliˈ sembag si Isus, “Inii tampusan metaas di kelaunan palinta, ‘Pekineeg amu gupia, yamu nu nga getaw Israel! Su Kaunutan ta Megbebayaˈ, salanen da, salabuuk laaki Kaunutan. ³⁰ Saladuaˈ diniu, petail mu tantu su Kaunutan mu Megbebayaˈ, saˈitada pegwakil mu diniin su tibuuk ginaa mu mukaˈ su tibuuk gimuud mu dakus su tibuuk delendeman mu sampay su gikteb sekeg mu.’ ³¹ Dayun kini pelum ki keduaˈ metaas palinta, ‘Petail mu dadema sug duma mu. Su kepetail mu diniin, pelepeng mu di kepetail mu dig lawas mu.’” Kaliˈ pagid pektaluˈ si Isus, “Naa kig duaˈ buuk palinta kini, ndaˈidun naig lain palinta metaas pa dun dini.”

³² Benaˈ mideksuˈ mektaluˈ si Isus, suminumpati sala tawan kia mekpetuˈun di Misulat Palinta, “Aa naa, Sir, metuud lai daan! Metuud gupia ki tinaluˈ mu kiin, salabuuk laaki Kaunutan Megbebayaˈ, ndaˈig lain. ³³ Su Megbebayaˈ, subay petailen tantu nu getaw, saˈitada pegwakil nu getaw diniin su tibuuk ginaanen mukaˈ su tibuuk delendemanen, sampay su tibuuk sekegen, dakus subay petailen nu getaw sug dumanen, lepeng di kekpetailen dig lawasen. Tumuˈ pa petuuden nu getaw kig duaˈ buuk palinta kini, sabayaˈ mengilak tu Megbebayaˈ guliden mukaˈ sug lumaun betang pengilaken diniin.”

³⁴ Naa benaˈ mideksuˈ nu mekpetuˈun su tinaluˈen, misimaˈ ni Isus puˈ telisebuteni sembag nu getaw kia. Kaas tiluˈan dayun ni Isus iin, “Sungua na mekesakup tu Keglekaunutan nu Megbebayaˈ.”

Naa genat itu, ndaˈidun nai getaw mekakuˈ sumaak dini Isus.

³⁵ Mendadi, saanan pa ni Isus mekpetuˈun dia Pengedapan tu Megbebayaˈ, duuni sinaaken tu nga getaw, laungen, “Su nga mekpetuˈun di Misulat Palinta nu Megbebayaˈ, mauma dema maˈniniˈi pekteluˈen nilan? Ki gasal nu Tinduˈ nu Megbebayaˈ Meglekaunutan, laung nilan sapuˈ laak daw ni David. ³⁶ Naa, mauma dema maˈniaig laung nilan, asa si David, iin gupiai pisulat nug Balakat nu Megbebayaˈ maˈniniˈ?

³⁷ Suminaak pa puliˈ si Isus dinilan, “Kaas ki Tinduˈ nu Megbebayaˈ Meglekaunutan, gilal ni David Kaunutan. Mendadi kagina maˈantu, ki gasalen, sapuˈ ba laak ni David?”^c

Laak dagid su melaun getaw pelum, benaˈ midengeg nilan su piktuˈun ni Isus, liliag ilan mekineeg dun. ³⁸ Mendadi, selian ni Isus mekpetuˈun, duuni tinaluˈen maˈniniˈ. “Peglengilam amu, adun ndiˈ amu megelinan nug betad nu nga mekpetuˈun di Misulat Palinta nu Megbebayaˈ, ki nga meliag mekpanawpanaw mekseluk melambak suub, sampay mauyaˈan nilan pegbesaan ilan nu getaw tu nga tebuˈan. ³⁹ Mukaˈ saˈ ditu ilan keglekebibu, pemiliˈen nilan su pegingkudan nu pegbesaan getaw. Mesama dia simbaan, pemiliˈen nilan su tampusan metaas gingkudan. ⁴⁰ Mukaˈ padun, peglimbungan nilani ngag balulibun, mengagaw ilan tu pimetang nilan, asa petaasen nilan su kenenabi nilan, pekpaitaˈitaˈ laak nilan. Naa maˈnia, midugangan dema tuˈui kebegat nu ginukuman ditu nga mekpetuˈun di Palinta kiin!”

⁴¹ Naa pegingkud si Isus diag Balay Pengedapan tu Megbebayaˈ, dia mesempel nug betangan nu nga getaw gamut nilan. Pegbentayanen su nga getaw megbegay gamut nilan ditu Pengedapan. Saˈ miglegamut ilan, melaun mekedatuˈ getaw dia, melaun dademai ginamut nilan. ⁴² Mendadi, duun pelumig balulibun minateng, pubri gupia, migbetang dadema gamuten, laak duaˈ laad sinsilyu. ⁴³ Benaˈ minitaˈ ni Isus, sinabinen dayun su nga sakupen mekpesempel diniin. Kaliˈ pektaluˈ dinilan, “Taman taluˈu diniu, ki pubri kini balulibun, gembagel pai ginamuten kiin, sabayaˈ su ginamut nu nga kelaun getaw dini. ⁴⁴ Puˈ sug duma getaw, ginamuten su laak kapin nu gimunen. Dagid kig balulibun kini, pia pubri gupia, gilaˈen da gusay begay sug bataˈ misukaten.”