¹ Kaliˈ pektaluˈ si Isus tu nga sakupen, “Naa, minget ndiˈ mesuˈat puˈ ndaˈiduni kegdaang di getaw. Laak pia maˈantu, mekelelaatlelaat su getaw mekegdaang di samatawen! ² Ki mekegdaang dun, saˈ pinenggiˈ palintangan galingan dayun lebuˈay tug laud, tumuˈ megaan daitu, sabayaˈ nu ginukuman nu Megbebayaˈ tu getaw mekegdaang di sala tawan gembataˈ kini.^{a 3} Kaas pekpetubud amu!

“Saladuaˈ diniu, saˈ duuni samasakup mu mekesalaˈ diniˈa, naa tituluˈay mu iin. Dayun saˈ megbiksuˈig duma mu kia, pedasun mu. ⁴ Pia pa mekesalaˈ diniˈa pitu deksuˈ sendaw, dayun pitu deksuˈ dadema mekpuliˈpuliˈ diniˈa mektaluˈ, ‘Migbiksuˈu dun,’ naa pia maˈantu, subay pedesunen mu gusayig duma mu kia.”

⁵ Naa kaliˈ pektaluˈ tu Kaunutan su nga peneliganen, “Sir, paiseg mu ki kesalig nami.”

⁶ Kaliˈ sembag su Kaunutan, “Ki kesalig niu, pia laak sia maˈniin bagel salabuuk lisu mustasa, naa megaga niu suguˈayi gembagel gayu kinuˈ, laung niu, ‘Mbakuta, mpemulaa dayun tug laud!’ Naa maˈantu da, mekpetuud dadema diniu ki gayu kia.”

⁷ Kaliˈ pektaluˈ si Isus, “Naa pinenggiˈ sala tawan diniu, duuni sesuguˈen mu megdaru atawaka megingat karniru. Naa saˈ muliˈ diag balay su sesuguˈen mu, teluˈen mu ba di sesuguˈen mu kia, ‘Bundasa dini, gingkuda maan’? ⁸ Ndiˈ mu ba teluˈen sungkin diniin, ‘Naa, baˈugay mau, pegilisa, ilakay mau dayun’? Mukaˈ teluˈen mu pagid diniin, ‘Naa saˈ metubusu maan mukaˈ minum, dekaga pa aan.’ ⁹ Dayun saˈ metubus nu sesuguˈen su sinuguˈan mu diniin, mekpaladpalada ba diniin? Mabuˈ ndiˈ. ¹⁰ Mendadi maˈantu dadema amu, saˈ mpenggulaula niuig launan sinuguˈ diniu, naa iin dayuni taluˈ niu, ‘Sesuguˈen laak ami, daal da laaki binaal nami su mbantang baalen nami.’”

¹¹ Naa selian ni nga Isus dig dalan pangay tu Jerusalem, mikebian ilan dig dulunan nu Samaria mukaˈ nu Galilea. ¹² Mendadi, benaˈ misebang ilan di maikaˈ lunsud, duuni suminungkak dini Isus sepuluˈ tawan migladu mekesalebuˈ nuka. Ki nga pegladu kini, pegindeg ilan di melayuˈlayuˈ, ¹³ kaliˈ ilan pektawag diniin, laung nilan, “Uu Sir Isus, lelaatay mu ami!”

¹⁴ Benaˈ minitaˈ ni Isus su sepuluˈ tawan, laungen dinilan, “Angay amu tug belian, pebantay niu dunig lawas niu.”

Lemen laak ilan mikepanaw, mitekaw mawaˈi mekesalebuˈ nuka nilan.

¹⁵ Naa sala tawan di sepuluˈ kia, benaˈ mibatiken puˈ miuliˈan na, mipuliˈ dia ni Isus, pekpenekeg megenal tu Megbebayaˈ. ¹⁶ Benaˈ midepet di gedapan ni Isus, miglaub mekpaladpalad diniin. Asa iin, getaw Samaria. ¹⁷ Benaˈ midengeg ni Isus su kekpaladpaladen, kaliˈ pektaluˈ, “Asa kanaˈ ba sepuluˈ tawani pineguliˈan? Saˈ maˈantu, adin ma su nga siam? ¹⁸ Daal da laak masiˈi mipuliˈ megenal tu Megbebayaˈi sala tawan kini kanaˈ getaw Judea?” ¹⁹ Laung dayun ni Isus tu getaw Samaria, “Naa, pegbuata, bundasa di gengayan mu. Miuliˈan ka puun di kesalig mu.”

²⁰ Naa duuni nga Pariseo, sinaak nilan dini Isus saˈ nanu meglekaunutan na tuˈu su Megbebayaˈ. Kaliˈ sembag si Isus, “Ki Keglekaunutan na tuˈu nu Megbebayaˈ, ndiˈ mbentayan nu getaw. ²¹ Ndiˈ metaluˈ nu getaw, ‘Bentayay pa daan niu, kiin na!’ atawaka ‘Kia nain!’ Puˈ taluˈu diniu, ki Keglekaunutan nu Megbebayaˈ, dini na niu tuˈu.”

²² Kaliˈ gusay pektaluˈ si Isus tu nga sakupen, “Duuni gendaw mateng, taginaa niu dun, mbianan niu su Keglekaunutan ku, naan kini kig Bataˈ nu Kilawan, pia sendaw laak sia. Laak bulug ndiˈ niu pa mbianan. ²³ Mukaˈ duun pai mektaluˈ diniu maˈniniˈ, ‘Bentayay pa daan niu, kiin na!’ atawaka duuni mektaluˈ, ‘Bentayay pa daan niu, kinuˈ na!’ Laak ndiˈ niu laaway. ²⁴ Puˈ maaˈ nu gilat, tekaw tiaganen sug langit genat tu dapit silangan mangay tu sindepan, maˈantu dau dema, naan kini kig Bataˈ nu Kilawan, saˈ mateng su gendaw di kelusadu puliˈ. ²⁵ Laak iinig bekna mpenggulaula, naan, kig Bataˈ nu Kilawan, mianu di meliget lasay, pemilasen pau pagid nu nga getaw nemun.

²⁶ “Puˈ ki kelusadu puliˈ, naan kini kig Bataˈ nu Kilawan, iini samanen, su mipenggulaula ditu timpu pa ni Noe. ²⁷ Di gendaw kitu, minaan su getaw, mininum ilan, migbelaˈi ilan, sampay da dun di gendaw nu keseled ni nga Noe tug butuk, dayun mikpuun sug Bagyu Lampap. Dayun mitekawan melemesi kelaun getaw kitu. ²⁸ Maˈantu da pagid su gendawan ni Lot. Ndaˈidunig lain delendeman nu getaw, minaan laak ilan, mininum, mindagang, migimula ilan, dakus migbaal balay. ²⁹ Laak dagid su gendaw nu kelaguy ni nga Lot tug lunsud Sodoma, iin na dayun su kepelabuˈ gapuy mukaˈ batu megligaˈ tug lunsud kitu genat tug langit. Mitekaw dayun megelaˈ matay su nga getaw dia. ³⁰ Mendadi, naan kini kig Bataˈ nu Kilawan, maˈantu dadema ki ketuaˈu puliˈ.”

³¹ Kaliˈ pektaluˈ si Isus, “Mendadi, saˈ matengi gendaw kiin, adin su getaw metaang dia gatep nug balayen, laak su pimetangen, dia da dialem balayen, ndiˈ pia melangan suled pa diag dialem puˈ malap di pimetangen. Samanen su getaw saˈ metaang ditug binaalanen, ndiˈ dadema mpia muliˈ. ³² Iini pegdelendem niu, su sawa ni Lot dengantu.^{b 33} Naa adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen, iin, malapen sungkin su ketubuˈ ndaˈi tamanen. ³⁴ Taluˈu tuˈu diniu, saˈ matengu gebii, metaang duunig duaˈ tawan megubay metulug, tekaw elapen su sala tawan, mbilin sug dumanen. ³⁵ Duun pa pagidig duaˈ tawan libun peglegaling. Tekaw mawaˈi sala tawan, elapen, bilinen su sala tawan. [ ³⁶ Duun pa pagidig duaˈ tawan laki pekpengimbaal dig lupaˈ, benaˈ su sala tawan, tekaw uaˈay, mbilin laak sug dumanen.]”

³⁷ Benaˈ midengeg nu nga sakup ni Isus, sinaak nilan diniin, “Sir, adin ma mpenggulaula?”

Kaliˈ sembag si Isus, “Adin sug duunig bangkay dun, ditu dayun mekpungun su nga menagit.”