¹ Maˈantu, sungu na mekpuun sug lumpuk nu nga getaw Judea, sug Lumpuk di Pan ndaˈ Petulinay, sala ngalanen sug Lumpuk tug Liniusan. ² Mendadi ki nga kaunutan nug belian nu getaw Judea mukaˈ ki nga mekpetuˈun di Misulat Palinta nu Megbebayaˈ, minengaw ilan suˈatan nilan di kepatay nilan dini Isus, puˈ mendek ilan, mbuus mesasaw su nga getaw.

³ Mendadi kini si Judas Iscariote, sala tawan di nga sepuluˈ buˈ duaˈ peneligan ni Isus, pingepuˈan ni Satanas. ⁴ Benaˈ pingepuˈan si Judas, linaawanen ki nga kaunutan nug belian kia mukaˈ ki nga kaunutan nu pegingat tu Pengedapan tu Megbebayaˈ, adun pegyegaan nilan ki melengas bianan ni Judas, tipuunen dinilan si Isus. ⁵ Mendadi, benaˈ mikitaˈ ilan, aa naa, didialan nu nga kaunutan si Judas. Pisadan nilan dayun si Judas, tindanan nilan iin selapiˈ. ⁶ Sinanguˈ dema ni Judas su sabut nilan. Kaas genat itu, si Judas kini, piksuˈatsuˈaten dayuni sikawen tumipu dini Isus, laak ndiˈ mekpailagilag tu melaun getaw.

⁷ Mendadi, minateng su gendaw nug Lumpuk di Pan ndaˈ Petulinay, metaang dun sug betad nu nga getaw Judea mektitiˈ nati karniru, guliden nilan tu Megbebayaˈ gindan nilan tug Liniusan. ⁸ Mendadi sinuguˈ ni Isus si Pedro buˈ si Juan, laungen dinilan, “Panaw amu, pegulingel niu kig Lebungan ta tug Liniusan.”

⁹ Kaliˈ ilan saak, “Adin mu ami paulingelay?”

¹⁰ Kaliˈ sembag si Isus, “Naa maˈniniˈ. Saˈ mateng amu ditu syudad, duun dayunig laki mesungkak niu, pekpisan bandi bitangan tubig. Iini tendugay niu, dunutay niu tug balay seledanen. ¹¹ Naa saˈ metulan amu, taluˈ niu dayun ditu gapuˈ balay, ‘Naa pimuun nu Mekpetuˈun, laungen, Adin dapit su sugud pengaanan nami tug Lebungan tug Liniusan, yami nu nga sakupu?’ ¹² Naa saˈ maˈnia,” laung ni Isus, “paitaˈen dayun diniu ki gembagel sugud dia dapit ditaas, misangkap na. Dia na niu pegulingelayig Lebungan ta.”

¹³ Mipanaw dayun si Pedro buˈ si Juan, mukaˈ midetengan nilan tuˈu, maaˈ dadema nu tinaluˈ ni Isus. Pigulingel nilan dayun dia sug Lebungan nilan tug Liniusan.

¹⁴ Naa benaˈ mitektak na sug Lebungan tug Liniusan, migingkud maan si Isus, ilan nu nga peneliganen. ¹⁵ Mendadi kaliˈ pektaluˈ si Isus dia nga peneliganen, “Aa naa, kini na su pedetengen ku gupia, meksalu ita maan dig Lebungan tug Liniusan kini, dekag pau mekebian dig lesayan ku! ¹⁶ Puˈ taluˈu tuˈu diniu, ndiˈ nau puliˈ maan dun, sampay da dun di gendaw mekpalas na ki tantu Lumpuk tug Liniusan, saˈ meglekaunutan na tuˈu su Megbebayaˈ.”

¹⁷ Naa saˈ maˈantu, minalap si Isus sala tasa penginumen. Benaˈ mikpaladpalad tu Megbebayaˈ, kaliˈ pektaluˈ dia nga sakupen, “Tabuk niu ini, pekilasilas niu inumay. ¹⁸ Mendadi taluˈu tuˈu diniu, genat nandaw, ndiˈ nau puliˈ minum di penginumen kini, sampay da dun mateng su gendaw meglekaunutan na tuˈu su Megbebayaˈ.”

¹⁹ Minalap pelum si Isus pan. Benaˈ mikpaladpalad na puliˈ tu Megbebayaˈ, pimetanen dayun su pan, dayunen pentulunay dia nga peneliganen. Kaliˈ pektaluˈ, “Naa, kini sug lawasu, ki begayu gumantiˈ diniu. Kini, aan niu lelayun, puˈ adun medelendem niau.” ²⁰ Naa maˈnia dadema, benaˈ mitubus ilan maan, minalap pelum si Isus sala tasa penginumen, dunut tinaluˈen, “Ki penginumen kini, iin sug duguˈu, ki mekigis na, adun gugas tu salaˈ niu. Kig duguˈuig bian nug begu pasad nu Megbebayaˈ tu getaw.

²¹ “Dagid bentayay pa daan niu!” laung pa ni Isus. “Ki getaw mektipu dinaan, suminalu gupia dinaan maan kini! ²² Puˈ naan kini, kig Bataˈ nu Kilawan, mbinasau tuˈu, maaˈ dadema nu pigdelendem pedaan nu Megbebayaˈ. Laak dagid pia maˈantu, ki getaw mektipu dinaan, mekelelaatlelaat gupia!”

²³ Naa saˈ maˈantu, kaliˈ medengeg nu peneligan ni Isusi tinaluˈen kia, miksinaakay ilan dayun, saˈ adin saan getaw dinilani mekenggulaula di maˈnia kia.

²⁴ Naa su nga peneligan ni Isus, miksual ilan, saˈ taˈ taway dun dinilani tampusan metaasi tindegen. ²⁵ Dagid kaliˈ pektaluˈ si Isus dinilan, “Naa su nga kanaˈ getaw Judea, metegasi kegbayaˈ dinilan nu nga gadiˈ nilan. Mukaˈ su nga kaunutan nilan, engkenen nilan su gelal Pegengagen, laung, nu nga sakup nilan. ²⁶ Dagid yamu, ndiˈ amu mpia mengmaˈantu. Sinangkaliˈ adini tampusan metaasi tindegen diniu, subay iin nai mbaal maaˈ nu tampusan ngudan. Ki kaunutan diniu padun, subay mbaal maaˈ nu sesuguˈen. ²⁷ Puˈ maˈniniˈ. Adin ba su metaas, su pegingkud maan, saˈ su megilak diniin? Kanaˈ ba su pegingkud maan? Laak dagid pia naan, keni nau, maˈniin sesuguˈen niau.”

²⁸ Laung pa ni Isus tu nga peneliganen, “Naa yamui miksaliunung dinaan, pia di nga kengindan dinaan. ²⁹ Naa kagina mitenduˈu nu Gamaˈu meglekaunutan, naa yamu, tenduˈen ku amu pa pagid, meglekaunutan damu dema. ³⁰ Maˈantu, duuni gendaw meksalu ita maan buˈ minum ditu Keglekaunutan ku, mukaˈ padun mingkud damu dema mengukum tu nga sepuluˈ buˈ duaˈ bansa nu getaw Israel.”

³¹ Kaliˈ pektaluˈ si Isus dini Simon Pedro, “Simon, pekineega! Si Satanas, migubug tu Megbebayaˈ mekpalid diniu, maaˈ nu kepalid di trigo, adun mpaini melaaten di gempia. ³² Dagid pinenebian ku yaˈa, Pedro, adun ndiˈ mbeleng ki kekpetuud mu. Mendadi saˈ meksikesuun ka na puliˈ, pepagen mu dayun su kekpetuud nu nga mimated diniˈa kini.”

³³ Kaliˈ sembag si Pedro, “Aba, Sir, penensili mpirisua, sampay petain ka, minuyaˈ nau meksaliunung diniˈa!”

³⁴ Kaliˈ pektaluˈ si Isus, “Pedro, taluˈu diniˈa, dekag pasiˈ peguni su manuk gebii kini, metelu deksuˈa na memalaw puˈ kanaˈ mau mailala.”

³⁵ Kaliˈ pagid pektaluˈ si Isus, “Naa su sinuguˈu amu mpanaw kitu, ki ndaˈi giwit niu pitaka, gambag, dakus ndaˈi sepatus niu kitu, duun bai kulang niu?”

“Ndaˈidun,” laung nilan.

³⁶ “Dagid genat nandaw,” laung padun ni Isus, “adin diniuig duuni pitakanen, subay uitenen, sampay gambag. Mukaˈ adini ndaˈidunig badungen, subay peksaluyen su suuben, adun mekesaluy badung. ³⁷ Puˈ taluˈu diniu, subay menuud dinaan ki misulat ditu Taluˈ nu Megbebayaˈ, laung, ‘Iin, mipemilang melaat getaw.’” Diksuˈ ni Isus su tinaluˈen, “Adin su misulat pedaan mekatag dinaan, megelaˈ na tuˈu menuud.”

³⁸ Kaliˈ sembag su nga sakupen, “Naa, Sir, kiniig duaˈ buuk badung!”

Simbag ni Isus, “Sukal naini.”

³⁹ Gumiwaˈ dia si Isus, tumiwad dayun tug Bentud nu nga Gayu Olibo, maaˈ dadema nug betaden, migdunut dadema diniin su nga sakupen. ⁴⁰ Benaˈ minateng ilan diag bentud, kaliˈ pektaluˈ si Isus tu nga sakupen, “Penenabi amu, adun ndiˈ amu mpenulay.”

⁴¹ Naa sumiway deliˈ si Isus dia nga sakupen, minundas dia gunaan, maˈniin layuˈ nu mesampet piglak, dayun minginlulud menenabi. ⁴² Kaliˈ pektaluˈ, “Uu Amaˈ, saˈ sia mesuˈat diniˈa, ki tasa mipenuˈ nug lesayan ku sunguu na inumay, naa peliaw mu sia dinaan, adun ndiˈu na mainum. Laak dagid, Amaˈ, sug daniˈa mauyaˈan, iini penuuden, kanaˈ nug danaan.” ⁴³ Tubus itu, duuni mituaˈ dini Isus sesuguˈen nu Megbebayaˈ genat tu gekbus langit, dinuganganen su sekegen. ⁴⁴ Minamal gusay si Isus menenabi, sabaˈ mibegatan patiˈi ginaanen. Inulasan patiˈ, maˈniin duguˈi gulasen mitegduˈ diag lupaˈ.

⁴⁵ Naa saˈ maˈnia, benaˈ migbuat si Isus genat menenabi, pinuliˈanen su nga sakupen kia. Midetenganen, tinulug ilan, melubay ilan sabaˈ nu kelegenay nilan. ⁴⁶ Sinabinen ilan dayun, laungen, “Baa, mauma dema tinulug amu? Pegbuat amu, penenabi amu daan, adun ndiˈ amu mpenulay.”

⁴⁷ Naa ndaˈ pa medeksuˈ mektaluˈ si Isus, miksebangi melaun getaw. Iini pekpenuluˈ dinilan si Judas, ki sala tawan kiin di sepuluˈ buˈ duaˈ peneligan ni Isus. Mendadi, benaˈ minateng ilan dia, kini si Judas, tuminuun dayun madap dini Isus, dunut ilekanen. ⁴⁸ Laung ni Isus, “Naa, Judas, galek masiˈi tipu mu dig Bataˈ nu Kilawan?”

⁴⁹ Naa su ngag duma ni Isus, benaˈ misimaˈ nilan su sungu mpenggulaula, sinaak nilan, “Naa, Sir, bekuten na namiig badung nami?” ⁵⁰ Dayun sala tawan dinilan, tinigbaseni gulipen nu Tampusan Metaas Belian nu getaw Judea. Miseksipi sedibaluy telinganen, dapit lintunen.

⁵¹ Dagid laung ni Isus, “Baa, sukal na!” Dayunen depenayi telinganen, piuliˈaneni gulipen kia.

⁵² Naa ki nga getaw kini minangay dumaap dini Isus, ilani nga kaunutan nug belian, mukaˈ duun dademai nga kaunutan nu pegingat tu Pengedapan tu Megbebayaˈ, dakus ngag duma kaunutan nu getaw Judea. Miktaluˈ dayun si Isus dinilan, “Naa, tulisan bau, kambat amu meguit badung mukaˈ bentul saˈ daapen niau? ⁵³ Asa gendawgendaw, naanig duma niu dia Pengedapan, laak ndaˈ niau daapay. Dagid minateng daan tuˈui pegbayaˈ niu, ki pegbayaˈ nu medelem.”

⁵⁴ Dinaap dayun si Isus. Benaˈ midaap, inagak dayun ditug balay nu Tampusan Metaas Belian nu getaw Judea. Naa kini si Pedro, miglendug dadema di melayuˈlayuˈ. ⁵⁵ Benaˈ minateng ilan diag lenuˈan nug balay, duuni gapuy inuklak dia. Luminamug dayun si Pedro di nga getaw pemegingkud menalang dia gapuy. ⁵⁶ Mendadi, duuni sala tawan delaga dia, sesuguˈen diag balay kia. Benaˈ minitaˈ nug delaga si Pedro pegingkud dia, midelagan nu gapuy, ilelaanen gupia, kaliˈ pektaluˈ, “Uy, ki getaw kini, duma pagid ni Isus!”

⁵⁷ Dagid mimalaw si Pedro. “Baa, Enaung,” laungen, “ndiˈu mailala ki getaw kiin!”

⁵⁸ Tubus nituˈ ndaˈ maiben, duunig duma getaw mikaitaˈ dini Pedro. Kaliˈ pektaluˈ, “Aa, yaˈa, dumaa ma nilan dema!”

“Baa, kanaˈ lai!” laung ni Pedro.

⁵⁹ Naa benaˈ duun saani sauras, duun pelumi sala tawan miglegintuud mektaluˈ, “Naa, ki getaw kini, minget tendug lai tuˈu ni Isus, puˈ getaw Galilea ma dema!”

⁶⁰ Dagid sumimbag si Pedro, “Apelii lai, ki teluˈen mu kiin, ndiˈu lai mesabut!”

Mendadi, ndaˈ pa medeksuˈ mektaluˈ si Pedro, iin na demai keguni manuk. ⁶¹ Dekag su Kaunutan, luminingay dini Pedro, dayun pingenlenganen. Milabuˈ dayun dig delendeman ni Pedro su tinaluˈ kiin nu Kaunutan, laungen, “Dekag pasiˈ peguni su manuk gebii kini, metelu deksuˈa na memalaw puˈ kanaˈ mau mailala.” ⁶² Gumiwaˈ dayun dia si Pedro, lilugutan dayun mengaduy.

⁶³ Naa su nga pegingat dini Isus kia, pingimusaungan nilan iin mukaˈ dinaneg nilan. ⁶⁴ Tinimpeng nilan pagidi mata ni Isus, kaliˈ ilan pektaluˈ diniin, “Naa, saˈ sia metuud puˈ suunan ka, atuk mu saˈ taˈ taway dun dinamii mikpesait diniˈa!” ⁶⁵ Dayun melaun pa paduni kegimusaung nilan dini Isus.

⁶⁶ Mendadi benaˈ putiˈ delagay na, mikpungun ki nga kaunutan nu getaw Judea, kampuˈ nu nga kaunutan nug belian nilan mukaˈ su nga mekpetuˈun di Misulat Palinta nu Megbebayaˈ. Benaˈ mipungun ilan, inagak dayun si Isus ditu gedapan nu Pikumpungan nu Metaas Gukum nu getaw Judea. ⁶⁷ Mendadi benaˈ mideksaˈ dia Pikumpungan nu nga Gukum si Isus, migbaalbaal sumaak diniin su nga gukum, laung nilan, “Mendadi, pemantek mu na dinami, yaˈa ba tuˈu su Tinduˈ nu Megbebayaˈ Meglekaunutan?”

Kaliˈ sembag si Isus, “Saˈ taluˈu diniu, ndiˈ amu metuudan dun. ⁶⁸ Saˈ sumaaku diniu, ndiˈ niau sembagen. ⁶⁹ Laak dagid genat nandaw, naan kini, kig Bataˈ nu Kilawan, pegingkudu tuˈu ditu dapit lintu nu Megbebayaˈ, su Tampusan Ginuungan.”

⁷⁰ Migdengan dayun su nga gukum membaalbaal saak dini Isus, laung nilan, “Naa kumalenged maˈantu, taˈ itu, yaˈa ba tuˈu kig Bataˈ nu Megbebayaˈ?”

Sumimbag si Isus, “Naa, maˈnia da, yamui miktaluˈ dun.”

⁷¹ “Paa,” laung dayun nu nga gukum, “ndiˈ ta na kambat duganganig dangat diniin! Puˈ midengeg ta na kini dig babaˈen gupia!”