¹ Naa pekpetuˈun gusay si Isus di nga getaw ditug Balay Pengedapan tu Megbebayaˈ, pegukitenen su Gempia Petenday. Mendadi duuni gendaw, ki nga kaunutan nug belian nu getaw Judea mukaˈ su nga mekpetuˈun di Misulat Palinta nu Megbebayaˈ kampuˈ nu ngag duma kaunutan nu getaw Judea, minadap ilan dini Isus. ² Sinaak nilan diniin, “Naa, taluˈ mu dinami, ki pinggulaula mu kini, taˈ bai pegbayaˈ mu menggulaula dun? Taˈ taway dun bai migbegay diniˈa pegbayaˈ penggulaulaan mu?”

³ Laung pelum ni Isus dinilan, “Naa, saakan ku amu deliˈ sektaang. Taluˈ niu deliˈ dinaan, ⁴ si Juan kiin, adin genat su pegbayaˈen memunag tubig tu nga getaw? Genat tu Megbebayaˈ, saˈ genat ba laak di kilawan?”

⁵ Naa saˈ maˈnia, migyagayaga dayuni nga kaunutan kia, laung nilan, “Naa, taˈ ma? Saˈ pinenggiˈ sembagen ta, ‘Su pegbayaˈ ni Juan, genat tu Megbebayaˈ,’ naa sumumpat dayun si Isus kini, ‘Saˈ maˈantu, mauma dema ndaˈ niu petuuday si Juan?’ ⁶ Saˈ sembagen ta pasiˈ, ‘Genat laak di kilawan,’ naa mbuus betuun ita nu kelaun getaw, puˈ mituudan ilan dun puˈ pimuunan nu Megbebayaˈ si Juan.” ⁷ Kaas iin laaki mesembag nilan dini Isus, “Ndaˈ nami mesuunay, saˈ adin genat su pegbayaˈ ni Juan.”

⁸ Laung dayun ni Isus dinilan, “Naa saˈ maˈantu, ndiˈu dadema pesuun diniu saˈ taˈi pigenatan nu pegbayaˈu penggulaulaan kui maˈnini kini.”

⁹ Mendadi, migukit si Isus sambingay tu nga getaw, laungen, “Duuni getaw migimula pegimulanan gubas. Benaˈ mitubusen pemulanay, pisaˈupen di nga getaw, dayun mipanaw dig lain benwa, miniben ditu. ¹⁰ Mendadi benaˈ sumingkuˈ na su pegimulanan, suminuguˈ su gapuˈen tu sala tawan sesuguˈenen meditu nga saˈup, puˈ adun elapenen sug daniin gilas tu nilan. Laak dagid kaliˈ dateng su sinuguˈ, aba, binadas nu nga saˈup dayun piuliˈ nilan, ndaˈiduni miwiten pia maikaˈ. ¹¹ Naa su gapuˈ nu pegimulanan, suminuguˈ na pelum sala tawan sesuguˈen. Benaˈ minateng ditu su sinuguˈ, binadas dadema nu nga saˈup, mukaˈ piksudiˈan nilan pa pagid, dayun nilan utiday dia, ndaˈ dademai miwiten. ¹² Naa su gapuˈ nu pegimulanan, suminuguˈ pa pelum ketelu tawan sesuguˈenen. Iin, dinaneg dadema nu nga saˈup, inutidan nilan pa pagid dia. ¹³ Naa saˈ maˈantu, laung nu gapuˈ nu pegimulanan dig dialem delendemanen, ‘Naa, taˈ maig baalen ku? Aa naa, tumuˈ iin nai pengain ku ditu, kig bataˈu na kini, ki petailen ku gupia. Mabuˈ pegbesaan nilan iin.’ ¹⁴ Laak dagid saˈ midayag nu nga saˈup sug bataˈen kia, miksabutsabut ilan dayun, laung nilan, ‘Aa naa, kiin na tuˈu sug bataˈ nu gapuˈ nu pegimulanan kini. Tumuˈ petain tain, adun danita na su petenged sia diniin.’ ¹⁵ Mendadi benaˈ minateng dia nilan kig bataˈ kini nu gapuˈ nu pegimulanan, pinatay nilan tuˈu.

“Naa saˈ maˈnia,” sinaak ni Isus, “alandun ma dayuni penggulaulaan nu gapuˈ nu pegimulanan gubas? ¹⁶ Iin nai mangay ditu pegimulananen, adun pemunuˈenen ki nga saˈup kia. Dayun lain getaw na pelumi pesaˈupen tu pegimulananen kia.”

Su ngag duma ni Isus, benaˈ midengeg nilan, laung nilan, “Baa, penensili ndiˈ da maˈantui mpenggulaula!”

¹⁷ Dagid pigenlengan ilan ni Isus, sinaakanen ilan, “Dagid saˈ pinenggiˈ ndiˈ mpenggulaula, kendutaˈ mai kenuud nu sinulat ditu Misulat Taluˈ nu Megbebayaˈ, maˈniniˈ?

¹⁹ Naa ki nga mekpetuˈun di Misulat Palinta nu Megbebayaˈ mukaˈ su nga kaunutan nug belian nu getaw Judea, benaˈ midengeg nilani tinaluˈ kia ni Isus, misimaˈ nilan puˈ ilani pisugaten ditu nga saˈup tu sambingayen kia. Kaas pidaap nilan sia ganam si Isus, laak ndaˈ nilan megaga daapay, puˈ mindek ilan tu nga getaw. ²⁰ Minengaw pa laak ilan sikaw nilan. Mendadi, duuni sinuguˈ nilan tautau sumaak dini Isus, adun sia metaban nilan di teluˈenen, adun mbaal sia dangat nilan dini Isus, puˈ pegwakil nilan sia iin tu pegbayaˈ nu Gubirnadur. ²¹ Mendadi minadap dini Isus su sinuguˈ, tautau suminaak ilan, “Naa Sir, suunan nami puˈ pektuˈun mu su metuud. Ndaˈi pegisuun mu tu tindeg nu getaw, kaas ndiˈa mpesuay di metuud, pektuˈun mu gusay su tantu mauyaˈan nu Megbebayaˈ pegbetaden nu getaw. ²² Naa saˈ maˈantu, biwang ba ditu Misulat Palinta nu Megbebayaˈ, megbuis ita ditu tampusan gadiˈ nu getaw Roma si Cesar, saˈ ndaˈ?”

²³ Dagid misuunan ni Isus puˈ iini puun nu kesaak nilan diniin kia, su tautau kekesuun nilan. Kaas laungen dinilan, ²⁴ “Paitaˈ niu deliˈ dinaan selaad selapiˈ. Naa, taˈ taway dun baig lingaw kini? Taˈ ngalanen bai sinulat dadema dini kini?”

Laung nilan, “Dani Cesar.”

²⁵ Kaliˈ pektaluˈ si Isus, “Naa saˈ maˈantu, kig dani Cesar, bayad da niu diniin. Dayun sug danu Megbebayaˈ, begay da niu dema ditu Megbebayaˈ.”

²⁶ Maˈantu, ndaˈ nilan mesuˈat melaamayi taluˈ ni Isus di gedapan nu nga getaw. Misebuˈan ilan ditu simbagen, mipelepeeˈ laak su getaw sinuguˈ sumaak diniin.

²⁷ Naa duun pelumi nga Saduseo mituaˈ ditu ni Isus. Naa ki nga Saduseo, ilan kinii sala pikumpungan ndiˈ ilan metuudan dun puˈ su nga minatay, metubuˈ daw puliˈ. ²⁸ Mendadi, kaliˈ ilan pembaalbaal sumaak dini Isus, “Naa Sir, duuni palinta dinita pisulat nu Megbebayaˈ dini Moises, ‘Saˈ daw matayig laki mikenginsawa na, laak ndaˈidunig bataˈen, naa subay sukliin nu pated nu minatay. Iini menginsawa tug balulibun, adun duunig bataˈ nilan, lepeng bataˈ nu minatay kitu.’ ²⁹ Mendadi, duuni pitu tawan mekpated. Minginsawa su gulangbataˈ, dayun minatay, ndaˈidun paig bataˈen. ³⁰ Dayun su keduaˈ pateden pelum, pinginsawanen sug balulibun dayun minatay, ³¹ dakus su ketelu pateden dadema. Iin nai migbatag, gikteb nu pitu tawan kia, lumbus minatay, ndaˈidun da gusayig bataˈen. ³² Dayun sug libun, minatay dadema. ³³ Naa paladpalad saˈ duun siai metubuˈ daw puliˈ genat matay, naa kig libun kia, adin ma dayuni sawanen ditu pitu tawan kia, kagina migelaˈ ma mayan mpenginsawa nu mekpated kia?”

³⁴ Laak dagid kaliˈ sembag si Isus, “Baa, su kilawan pa nemun, libun laki, meksenlangan pa. ³⁵ Laak su getaw mipemilang bantang medepet ditu gekbus langit di gendaw kiin ditug binayaˈ gebii buˈ gendaw, ki mitubuˈ puliˈ genat matay, naa ilan, ndiˈ nailan meksenlangan. ³⁶ Ndiˈ nailan mesuˈat matay puliˈ, segaga mesama ilan ditu nga sesuguˈen nu Megbebayaˈ getaw langit. Maˈantu, bataˈ nailan tuˈu nu Megbebayaˈ, kagina ki gasal nilan, mipeduma nailan di ketubuˈ puliˈ nu nga minatay. ³⁷ Mukaˈ pa padun, petubuˈen daan puliˈ tuˈu su nga minatay, puˈ pia si Moises, tinakesiˈanen dadema puˈ metuud. Puˈ ditu sinulat ni Moises dengantu mekatag di sigbet kiin migligaˈ, iini piningalan dun ni Moises su Kaunutan ta, su Megbebayaˈ pektemuyen ni Abraham, pektemuyen ni Isaac, mukaˈ ni Jacob.” ³⁸ Kaliˈ gusay pektaluˈ si Isus, “Naa misuunan ta, iini mektamuy tu Megbebayaˈ su getaw tetubuˈ, kanaˈ nu nga minatay.^b Mekatag di Megbebayaˈ, ndaˈi minatay, lumbus tetubuˈi getaw.”

³⁹ Saˈ maˈantu, kaliˈ sembag dini Isusig duma mekpetuˈun di Misulat Palinta nu Megbebayaˈ, “Naa Sir, misugatan mui tinaluˈ mu kia!” ⁴⁰ Puˈ ndiˈ na nilan mesuang sumaak puliˈ diniin.

⁴¹ Mendadi, kaliˈ pelum saak si Isus tu nga Saduseo kia, “Mauma dema maˈniniˈi pekteluˈen nu getaw? Ki gasal nu Tinduˈ nu Megbebayaˈ Meglekaunutan, laung nilan sapuˈ laak daw ni David. ⁴² Naa, mauma dema maˈniaig laung nilan, asa si David, iin na gupiai suminulat dun, ditu sala pisulat nu Megbebayaˈ piningalan dun ngag Bebat, maˈniniˈ?^c

⁴⁵ Naa miktituluˈ si Isus tu nga sakupen di gedapan nu melaun getaw. ⁴⁶ Mendadi, kaliˈ pektaluˈ, “Peglengilam amu, adun ndiˈ amu megelinan nug betad nu nga mekpetuˈun di Misulat Palinta nu Megbebayaˈ, ki nga meliag mekpanawpanaw mekseluuk melambak suub, sampay mauyaˈan nilan pegbesaan ilan nu getaw tu nga tebuˈan. Mukaˈ saˈ ditu ilan keglekebibu, pemiliˈen nilan su pegingkudan nu pegbesaan getaw. Mesama dia simbaan, pemiliˈen nilan su tampusan metaas gingkudan. ⁴⁷ Mukaˈ padun, peglimbungan nilani ngag balulibun, mengagaw ilan tu pimetang nilan, asa petaasen nilan su kenenabi nilan, pekpaitaˈitaˈ laak nilan. Naa maˈnia, midugangan dema tuˈui kebegat nu ginukuman ditu nga mekpetuˈun di Palinta kiin!”