¹ Naa mendadi ki Pikumpungan kia nu Metaas Gukum nu getaw Judea, migdengan ilan megbuat, dayun nilan egakay si Isus ditu gubirnadur, si Pilato. Benaˈ ditu ilan gedapan ni Pilato, ² binukaˈ nilan dayun sug dangat nilan dini Isus, kaliˈ ilan pektaluˈ, “Ki getaw kini, mitaangan nami pesuainen sug delendeman nug bansa nami di gubirnu. Pektituluˈanen su nga getaw, ndiˈ nailan megbegay buis daw ditu tampusan gadiˈ si Cesar, mukaˈ engkenenen pa pagid puˈ iin su Tinduˈ nu Megbebayaˈ Meglekaunutan, saˈitada gadiˈ daw iin.”

³ Mendadi, suminaak si Pilato dini Isus, “Naa, metuud ba, yaˈa su gadiˈ nu getaw Judea?”

Kaliˈ sembag si Isus, “Yaˈa mai miktaluˈ dun.”

⁴ Kaliˈ pektaluˈ si Pilato tu nga kaunutan nug belian dakus tu melaun getaw, “Ki getaw kini, ndaˈiduni misimaˈu kepemilasen tug balaˈud.”

⁵ Minamal laak dumangat dini Isus su nga getaw Judea, laung nilan, “Dagid peksemukenen su ginaa nu nga getaw, sabaˈ lineepen sug liwagan benwa Judea mekpetuˈun. Mikpuun ditu Galilea, laak nemun, midepet na gupia dini Jerusalem.”

⁶ Benaˈ midengeg ni Pilato su tinaluˈ kia nu nga getaw Judea, sinaaken dinilan, “Naa si Isus kini, masiˈ getaw Galilea?” ⁷ Benaˈ misuunanen puˈ si Isus, sakup tuˈu nug benwa pegbiaˈan ni Herodes, pibundasen dayun si Isus pegdeksaˈ ditu niin. Puˈ si Herodes, mitaang dadema dia Jerusalem di gendaw kia.

⁸ Naa benaˈ mipebundas si Isus ditu ni Herodes, liliag gupia si Herodes, puˈ kitu nai kaibenen, mauyaˈanen maitaˈen si Isus, sabaˈ nug dengeganen. Mauyaˈanen dadema maitaˈen siai mekesalebuˈ penggulaulaanen. ⁹ Naa saˈ maˈantu, melaun sinaak ni Herodes dini Isus, laak dagid iin, ndaˈ sembag. ¹⁰ Naa ki nga kaunutan nug belian mukaˈ ki nga mekpetuˈun di Misulat Palinta nu Megbebayaˈ kia, mimegindeg ilan dia, pinemalan nilan patiˈ pengelegay si Isus. ¹¹ Dayun si Herodes kampuˈ nu nga sundalunen, migininisan dayuni keksudiˈ nilan dini Isus. Sala keksudiˈ nilan diniin, piselukan nilan tautau suub gadiˈ. Dayun piwit nilan puliˈ iin ditu ni Pilato. ¹² Mendadi, kiin nai keseksud ni Herodes mukaˈ ni Pilato, asa miniben ilan duaˈ ndaˈ pektubus.

¹³ Mendadi si Pilato, pinsabinen ki nga kaunutan nug belian nu getaw Judea dakus su ngag duma meselagetaw nilan, sampay su nga melaun getaw. ¹⁴ Benaˈ mipungun ilan dia gedapanen, kaliˈ pektaluˈ dinilan si Pilato, “Naa mendadi ki getaw kini, dinangat niu dini naan, laung niu pesuainen sug delendeman nu nga getaw di gubirnu. Laak sinaakan ku di gedapan niu, dagid mekatag di kelaun dangat niu diniin, ndaˈidun mai misimaˈu salaˈen dun. ¹⁵ Mukaˈ padun,” maaˈ laung pa ni Pilato, “maˈantu dademaig delendeman ni Herodes, kumalenged pigwakilen puliˈ dinita. Naa, ndaˈidun daani salaˈ nu getaw kini lagaˈ na ginaanen. ¹⁶ Kaas danaan, pebadasu laak, dayun beluyay.”

[ ¹⁷ Laak iini tinaluˈ dun ni Pilatoi maˈnia, puˈ tauntaun, metaang dig Lumpuk tug Liniusan, duunig betad ni Pilato, subay beluyenen tu nga getaw Judeai sala tawan dinilan pinikutan.]

¹⁸ Dagid su kelaunan getaw, benaˈ midengeg nilan puˈ beluyen sia si Isus, migdengan ilan memeksay. “Petain iin!” laung nilan. “Beluyen dinami si Barabas!” ¹⁹ (Naa si Barabas kiin, iini sala tawan pinikutan mekatag di sasaw di syudad kia, mukaˈ migbunuˈ samatawen.)

²⁰ Naa saˈ maˈantu, mikpulingkas pa puliˈ madap di melaun getaw si Pilato. Puˈ mauyaˈanen sia, iini beluyenen dinilan si Isus. ²¹ Laak mimeksay su nga getaw, laung nilan, “Lensangen di kurus! Lensangen ba di kurus!”

²² Ketelu deksuˈ na ni Pilato saak dinilan, “Mauma, alandun bai salaˈen? Ndaˈidun daani misimaˈu salaˈen lagaˈ na ginaanen! Paladpalad pebadasu laak, dayun beluyay.”

²³ Laak migdegadega memeksay su nga getaw, lensangen daw di kurus si Isus. Tigaˈwan, duminaagig beksay nilan. ²⁴ Sinanguˈ ni Pilato ki pinengi kia nu melaun getaw, inukumanen si Isus. ²⁵ Su sala tawan kia pinengi nilan beluyen, ki pinirisu kia sabaˈ mingatu tu gubirnu mukaˈ migbunuˈ, biluy tuˈu ni Pilato. Kini si Isus, pigwakil ni Pilato tu petayanen, sinanguˈen sug delendeman nu melaun getaw.

²⁶ Naa saˈ maˈantu, inagak si Isus ditu tandaˈ petayan diniin. Naa su nga migagak diniin, duuni mipegitaˈ nilan getaw sungu na mesebang dia Jerusalem, ngalanen si Simon, getaw Cirene. Iini linabet nu nga pegagak dini Isus, pipisan nilan dayun diniin ki kurus ni Isus, pilendug nilan diag binayaˈ ni Isus.

²⁷ Naa melaun gupia getaw migdedunut dini Isus, kampuˈ nu ngag libun pekpengaduy, milegenan ilan patiˈ ditu mbianan ni Isus. ²⁸ Laak liningay ni Isus su ngag libun, kaliˈ pektaluˈ dinilan, “Naa yamu ngag libun, getaw Jerusalem, ndiˈ niau pengeduyay! Iin sungkini pengeduyay niu, kig lawas niu gupia, mukaˈ su ngag bataˈ niu. ²⁹ Puˈ duun tuˈui gendaw mateng, teluˈen nu getaw, ‘Tumuˈ pa su nga ndiˈ mapet bataˈen! Tumuˈ pa su ndaˈ mainsan mekepeduduˈ gembataˈ!’” ³⁰ Laung pa ni Isus, “Metaluˈ pagid nu nga getaw tu ngag binentudan, ‘Yamu bentud amu, tumuˈ tubakay niu ami!’ Dakus tu nga maikaˈ bentud, ‘Yamu ngag bataˈ bentud, tebunay niu ami!’” ³¹ Diksuˈ ni Isus su tinaluˈen, “Puˈ saˈ maˈniniˈi kekpeleget dinaan kini, gitunganen mailaw tagun mau, naa yamu kiin, alandun saani mpenggulaula niu, gitunganen migangu tagun amu?”

³² Naa duun dademaig duaˈ tawan mimilas tug balaˈud nu gubirnu, piduma dini Isus egakay ditu pepatay dinilan. ³³ Naa saˈ maˈantu, guminawas ilan dia syudad, midepet ilan dia dapit piningalan dun “Tulan Gulu.”

Dayun nilan lensangay tu kurus si Isus. Piduma dadema lensangay kig duaˈ tawan kia mimilas tug balaˈud, miktimpang di kurus ni Isus su kurus nilan. ³⁴ Kaliˈ pektaluˈ si Isus, “Uu Amaˈu, pedasun mu ilan! Puˈ ndaˈ nilan mesabut su kelebuˈan nu pinggulaula nilan kini.”

Naa benaˈ milansang na tu kurus si Isus, piktali dayun nu sundalu su nga penepetenen, bian nilan mekilas dun. ³⁵ Minelindeg dia su nga getaw, pegbantay ilan tu mipenggulaula. Su pelum kaunutan nu getaw Judea, pingimusaungan nilan si Isus, laung nilan, “Paa, megaganen daw megaweni ngag lain getaw, naa melengas guunenenig lawasen, saˈ sia metuud, kini tuˈu su pimiliˈ nu Megbebayaˈ, ki Tinduˈen Meglekaunutan!”

³⁶ Su nga sundalu, piksudiˈan ilan pa pagid si Isus. Mikpesempel ilan diniin, dayun ilan peksangal penginumen dig babaˈen, ³⁷ kaliˈ ilan pektaluˈ, “Naa saˈ pinenggiˈ yaˈa su gadiˈ nu getaw Judea, naa gawen muig lawas mu!”

³⁸ Naa duuni tuˈus pidekep dia tandaˈ nug dimpulu ni Isus, iini sinulat dun, “Kini su Gadiˈ nu nga getaw Judea.”

³⁹ Naa sug duaˈ tawan duma ni Isus linansang di nga kurus, su mimilas tug balaˈud, mingimusaung dini Isus su sala tawan, laungen, “Haa, kanaˈ ba yaˈai Tinduˈ nu Megbebayaˈ Meglekaunutan? Saˈ maˈnia, mauma dema ndiˈa ma meksigawen, guunen mu dadema ami?”

⁴⁰ Laak su sala tawan pelum, pimaagenig dumanen kia, laungen diniin, “Ndiˈa masiˈ mendek tu Megbebayaˈ, asa inukuman ka na dema? ⁴¹ Laak ita kini, bantangen laaki maˈninii ginukuman dinita, puˈ sugda tu melaat gulaula ta. Kig duma ta kini, ndaˈ mai melaat gulaulanen.” ⁴² Kaliˈ pagid pektaluˈ dini Isus, “Uu Isus, saˈ meglekaunutan ka na tuˈu, ndiˈ mau da selingaway!”

⁴³ Kaliˈ sembag si Isus, “Naa, taluˈu tuˈu diniˈa, nandaw kini, meksalabuuk ita ditu Paraiso,” saˈitada tu gekbus langit.

⁴⁴ Naa su kelansang dini Isus tu kurus, mabuˈ miktui gendaw, tekaw dumilemi tibuuk benwa, ndaˈ tiagi gendaw sampay miginengaˈ menaugi gendaw. ⁴⁵ Su kurtina bilet ditug dialem nu Pengedapan tu Megbebayaˈ, mitekaw meginengaˈ megedit. ⁴⁶ Mendadi minekeg dayun megbeksay si Isus, laungen, “Naa, uu Amaˈu, pegwakilu diniˈai gimuudu!” Dayun megetusi ginaanen.

⁴⁷ Naa su kaunutan sundalu dia, benaˈ minitaˈen su mipenggulaula, inalen dayun su Megbebayaˈ, laungen, “Aa naa, masiˈ metuud tuˈu, ki getaw kini, ndaˈiduni salaˈen!”

⁴⁸ Su pelum melaun gupia getaw mipungun dia adun megbantay, benaˈ minitaˈ nilan su kelaun mipenggulaula, mimeguliˈ ilan, pengekduken nilani gegdeb nilan sabaˈ nu gembegat kelegenay nilan. ⁴⁹ Naa sug launan sambat ni Isus kampuˈ nu ngag libun tumindug diniin genat tu Galilea, pemegindeg ilan dia mesempelsempel, adun maitaˈ nilan su mipenggulaula.

^50-51 Naa duuni getaw genat tug lunsud Arimatea, sakup dadema Judea kia, ngalanen si Jose. Mekesuun getaw si Jose, melegdengig betaden, dakus mekpedateng tu Keglekaunutan nu Megbebayaˈ. Iini sala tawan dadema ditu Pikumpungan nu Metaas Gukum nu getaw Judea, laak ndaˈ sanguˈ ditu sabut kiin nu Pikumpungan mekatag dini Isus, sampay su pinggulaula nilan diniin. ⁵² Mendadi kini si Jose, minangay madap dini Pilato, inubugen diniin, elapenen sug bangkay ni Isus. ⁵³ Saˈ maˈantu, inangay dayun ni Jose egwatay dia kurus sug bangkay ni Isus. Benaˈ miagwaten, pinutusen di penepeten gemputiˈ, ditunen dayun libeng sangyab liwakan di telektap, ki ndaˈ mainsan melebengay getaw. ⁵⁴ Naa su gendaw kia, Birnis, su pengandam di Gendaw Pelali nu getaw Judea, puˈ sala gendaw paitu.

⁵⁵ Naa su ngag libun kiin tumindug dini Isus genat tu Galilea, lindug nilan si Jose, kaas minitaˈ nilan su sangyab, dakus minitaˈ nilan dadema su kebetang nug bangkay ni Isus dia. ⁵⁶ Benaˈ minuliˈ ilan, pigulingel nilani nga memut tagek dakus su gininisan pagemut penguklaus nilan sia ditug bangkay ni Isus.

Benaˈ su Gendaw Pelali nilan, milali pa su ngag libun, maaˈ nu pinalinta nu Megbebayaˈ.