¹ Naa benaˈ putiˈ delagay na, ki nga kaunutan nug belian mukaˈ su ngag duma kaunutan nu getaw Judea dakus su mekpetuˈun di Misulat Palinta nu Megbebayaˈ, saˈitada ki tibuuk Pikumpungan nu Metaas Gukum, miksabutsabut ilan saˈ endutaˈen nilan dun si Isus. Benaˈ mitubus ilan meksabutsabut, pibalud nilan si Isus, dayun nilan egakay ditu gubirnadur, si Pilato. Benaˈ ditu nailan gedapan ni Pilato, pigwakil nilan dayun diniin. ² Mendadi, suminaak si Pilato dini Isus, “Naa, metuud ba, yaˈa su gadiˈ nu getaw Judea?”

Kaliˈ sembag si Isus, “Yaˈa mai miktaluˈ dun.”

³ Melaun dayun inaleg nu nga kaunutan nug belian dini Isus. ⁴ Kaliˈ pelum saakay ni Pilato si Isus, “Ndaˈi sembag mu di melaun dangat nilan kini diniˈa?”

⁵ Laak dagid ndaˈ gusay peksembag si Isus. Mipatiˈ mesebuˈay dun si Pilato.

⁶ Naa tauntaun, metaang dig Lumpuk kiin nu getaw Judea gindan tug Liniusan, duunig betad nu gubirnadur, si Pilato, beluyeneni sala tawan pinikutan, adini ubugen diniin nu nga getaw Judea. ⁷ Naa su taun kia, mitaang dema duuni nga getaw pinikutan, mingatu ilan di gubirnu dakus minunuˈ ilan samataw nilan mitaang di sasaw. Sala tawan dinilan, ngalanen si Barabas. ⁸ Naa mendadi, kagina minadap dini Pilato su nga melaun getaw, inubug nilan dayun diniin, baalenen na puliˈ su tigaman nilan pegbetadenen metaang dig Lumpuk tug Liniusan. ⁹ Sinaak dayun ni Pilato tu nga getaw, “Mendadi, taˈ ma, mauyaˈan niu beluyen ku diniu ki gadiˈ nu getaw Judea?” ¹⁰ Iini tinaluˈ dun ni Pilato maˈnia, puˈ misimaˈen, kaas pa dinangat diniin nu nga kaunutan nug belian si Isus, puˈ misigi mailan diniin.

¹¹ Laak dagid ki nga kaunutan nug belian, sinamuk nilan su ginaa nu melaun getaw, adun ubugen nilan dini Pilato, iinig beluyenen dinilan si Barabas kia, sabayaˈ ni Isus. ¹² Mendadi, sinaak puliˈ ni Pilato di nga melaun getaw, “Saˈ maˈantu, taˈ mai penggulaulaan ku di getaw kiin gilal niu gadiˈ nu nga getaw Judea?”

¹³ Mimeksay su nga getaw, “Lensangen di kurus!”

¹⁴ Sinaak na pelum ni Pilato, “Mauma, alandun bai salaˈen?”

Laak migdegadega ilan memeksay, laung nilan, “Ki getaw kiin, lensangen ba di kurus!”

¹⁵ Naa si Pilato, anguten dun mamuˈamuˈi ginaa nu melaun getaw kia. Saˈ maˈantu, biluyen tuˈu dinilan si Barabas. Kini si Isus, pibadas ni Pilato, dayunen pegwakil tu nga sundalu, puˈ adun lensangen nilan di kurus.

¹⁶ Naa saˈ maˈantu, inagak nu nga sundalu si Isus ditug lenuˈan nug balay nu gubirnadur, si Pilato. Pinungun nilan dayun su kelaunan sundalu. ¹⁷ Benaˈ mipungun ilan, piselukan nilan dayun si Isus melambung suub gempula, tautau suub gadiˈ. Mukaˈ miglingkin ilan dugi, tautau tundek gadiˈ dadema, dayun nilan peselup di gulu ni Isus. ¹⁸ Tautau didialan nilan iin, laung nilan, “Naa, mpianan ka, Sir, Gadiˈa daw nu nga getaw Judea!” ¹⁹ Pimentul nilan tigbaw su gulu ni Isus, mukaˈ pindulaˈan pa nilan padun si Isus, dayun minginlulud ilan di gedapanen. ²⁰ Mendadi, benaˈ mitubus nilan peksudiˈay, piluas nilan diniin su gempula suub, piseluk nilan puliˈ diniin sug daniin suub. Dayun nilan egakay si Isus ditu tandaˈ lensangan nilan dun di kurus.

²¹ Naa saanan nu nga sundalu megagak dini Isus adun lensangen nilan ditu kurus, duuni mipegitaˈ nilan getaw sungu na mesebang dia Jerusalem, ngalanen si Simon. (Si Simon kini, getaw Cirene, gamaˈ ni Alejandro mukaˈ ni Rufo.) Iini tigel nu nga sundalu mekpisan tu kurus ni Isus. ²² Naa saˈ maˈantu, iwit dayun nu nga sundalu si Isus gumawas dia syudad, midepet ilan dia dapit dun piningalan dun “Tulan Gulu.” Saˈ dig danilan pikebitan, Golgota. ²³ Benaˈ minateng ilan dia, duuni piˈinum nilan dini Isus penginumen limugan bulung, paingalan dun mira. Laak dagid mipauk minum dun si Isus.

²⁴ Dayun nilan lensangay tu kurus si Isus. Benaˈ milansang tu kurus si Isus, piktali dayun nu nga sundalu su nga penepetenen, bian nilan mekilas dun.

²⁵ Su kelansang dini Isus tu kurus, duun saani ginengaˈ menaik laak lemeni gendaw. ²⁶ Naa duuni tuˈus sinulatan sumbungan diniin, “Kini su Gadiˈ nu nga getaw Judea.” ²⁷ Mukaˈ pa pagid duunig duaˈ tawan tulisan piduma dini Isus lensangay di kurus, miktimpang di kurus ni Isus su kurus nilan. [ ²⁸ Ki mipenggulaula kini, minuud dun su sinulat ditu Taluˈ nu Megbebayaˈ, “Iin, pimilang duma nu nga melaat getaw.”]

²⁹ Naa su nga getaw minian dia, pingimusaungan nilan si Isus, miktakuˈtakuˈ ilan, dunut teluˈen nilan, “Aha, yaˈai miktaluˈ puˈ gebaˈen mu su Pengedapan tu Megbebayaˈ, dayun gikteb telu endaw, baalen mu puliˈ! ³⁰ Naa saˈ maˈnia, gawen mu nandawig lawas mu. Penauga di kurus kiin!”

³¹ Ki nga kaunutan nug belian mukaˈ su nga mekpetuˈun di Misulat Palinta nu Megbebayaˈ, maˈantu dadema, pingimusaungan da nilan dema si Isus, laung nilan tug duma nilan, “Paa, megaganen daw megaweni ngag lain getaw, laak ndiˈen pelum megaga guunayig lawasen! ³² Ipusan ta ki Tinduˈ daw nu Megbebayaˈ Meglekaunutan, ki Gadiˈ nu nga getaw Israel, ipusan ta saˈ menaug ma nandaw di kurus kiin, dekag paita pekpetuud diniin!”

Sampay sug duaˈ tawan tulisan dumanen linansang di nga kurus, pingimusaungan da nilan dema si Isus.

³³ Naa su kelansang dini Isus tu kurus, benaˈ miktui gendaw, tekaw dumilemi tibuuk benwa, sampay miginengaˈ menaugi gendaw. ³⁴ Mendadi, benaˈ miginengaˈ menaugi gendaw, minekeg megbeksay si Isus, laungen, “Eloi, Eloi, lama sabaktani?” Maˈananen, “Uu Megbebayaˈ pektemuyen ku, Megbebayaˈ pektemuyen ku, mauma bilengan mau tuˈu?”

³⁵ Midengeg nu ngag duma getaw pegindeg dia, kaliˈ ilan pektaluˈ, “Naa, kineegay pa daan niu, tuaganen si Elias dengantu!” ³⁶ Duun dayuni gumibek malap maaˈ palas napes, inulemen dayun di penginumen, tinangenen di tigbaw, pisangalen dayun dig babaˈ ni Isus adun meseksepen. Laung nu getaw kia, “Ala, pegbentayan ta pa deliˈ, kalukalu lumusad na buus si Elias, adun uaˈenen iin dia kurus!”

³⁷ Mendadi si Isus, benaˈ mitubus minum di penginumen kia, migbeksay dayun puliˈ mainsan, metenug. Dayun megetusi ginaanen.

³⁸ Naa mendadi, su kurtina bilet ditug dialem nu Pengedapan tu Megbebayaˈ, masiˈ mitekaw meginengaˈ megedit, genat diin dapit ditaas sampay ditu geksiden diin dapit silung.

³⁹ Naa dia misunguˈan nu kurus linsangan dini Isus, duuni kaunutan sundalu pegindeg dia. Benaˈ minitaˈen su kegetus ginaa ni Isus, mitaluˈen dayun, “Aa naa, masiˈ metuud tuˈu, ki getaw kini, iin sug Bataˈ nu Megbebayaˈ!”

⁴⁰ Duun pa pagidi ngag libun dia mesempel, megbantay dailan dadema. Telu tawan dinilan, si Maria Magdalena, mukaˈ si Maria su ginaˈ ni Santiago mukaˈ ni Jose, mukaˈ si Salome. ⁴¹ Ilan su tumindug dini Isus saananen ditu pa Galilea, puˈ miktagikul ilan diniin. Mukaˈ melaun dademaig duma nilan libun dia, su nga tuminakin diniin pangay ditu Jerusalem.

^42-43 Naa benaˈ sungu na mesindepi gendaw, duuni getaw minateng dia genat tug lunsud Arimatea, ngalanen si Jose. Iin kiin, sala tawan ditu Pikumpungan nu Metaas Gukum nu getaw Judea. Pegbesaan gupia nu samatawen si Jose, dakus mekpedateng tu Keglekaunutan nu Megbebayaˈ. Naa su gendaw kiin, Birnis, su pengandam di Gendaw Pelali nu getaw Judea (puˈ sala gendaw paitu). Mendadi si Jose, miksibeluˈ mangay madap dini Pilato, inubugen diniin, elapenen sug bangkay ni Isus. ⁴⁴ Dagid kaliˈ medengeg ni Pilato puˈ masiˈ si Isus, daan na minatay, mitekawan dun si Pilato. Sinabinen dayun su kaunutan sundalu, sinaakanen saˈ minatay na tuˈu si Isus. ⁴⁵ Benaˈ midengeg ni Pilato su ginukit nu kaunutan sundalu, bigayen dayun elapen ni Jose sug bangkay ni Isus. ⁴⁶ Naa saˈ maˈantu, minangay deliˈ si Jose sumaluy penepeten gemputiˈ, dayunen egwatay dia kurus sug bangkay ni Isus. Benaˈ miagwaten, pinutusen di penepeten kia, ditunen dayun libeng sangyab liwakan di telektap. Benaˈ milebengen, linuliden dayuni gembagel batu, tinakepen ditu gengaˈan nug lebeng. ⁴⁷ Naa si Maria Magdalena mukaˈ su sala Maria, ginaˈ ni Jose, migbantay ilan, kaas minitaˈ nilan sug libengan dini Isus.