¹ Tubus itu si Isus, pibadas ni Pilato tu nga sundalu. ² Miglingkin ilan dugi, tautau tundek gadiˈ, dayun nilan peselup di gulunen. Mukaˈ pikselukan nilan melambung suub gempula, tautau suub gadiˈ. ³ Minadap ilan dayun diniin, laung nilan, “Naa mpianan ka, Sir, Gadiˈa daw nu nga getaw Judea!” Pinemalan nilan padun depiˈay si Isus.

⁴ Mendadi si Pilato, lumiu na pelum dia gedapan nu melaun getaw kia, kaliˈ pektaluˈ dinilan, “Naa bentayay pa daan niu, pediniin ku puliˈ iin di gedapan niu, adun mesuunan niu puˈ ndaˈidun ma daani misimaˈu salaˈen.” ⁵ Lumiu dayun si Isus dia gedapan nu nga getaw, piselupan pa tundek dugi kia mukaˈ piselukan pa nu melambung suub gempula. Laung ni Pilato tu nga getaw, “Naa, bentayay pa daan niu! Kini na su getaw!”

⁶ Mendadi ki nga kaunutan nug belian kini mukaˈ nga megingat tu Pengedapan tu Megbebayaˈ, saˈ minitaˈ nilan si Isus, mimeksay ilan, laung nilan, “Lensangen di kurus! Lensangen di kurus!”

Laung ni Pilato dinilan, “Naa, alap niu, yamu nai lansang dun di kurus. Naan, ndaˈidun daan tuˈui misimaˈu salaˈen.”

⁷ Kaliˈ pelum sembag su nga melaun getaw, “Duunig balaˈud nami subay matayi getaw kiin, puˈ inangkenen iin sug Bataˈ nu Megbebayaˈ.”

⁸ Sikna midengeg ni Pilato su tinaluˈ nilan, migiseg laaki gendeken. ⁹ Sumiled puliˈ diag balayen, sinaaken puliˈ dini Isus, “Naa taˈ mai tantu pigenatan mu?”

Laak dagid ndaˈ sembag si Isus. ¹⁰ Laung ni Pilato diniin, “Masiˈ ndiˈ mau sembagen? Ndaˈ mu ba mesuunay puˈ duuni pegbayaˈu lekaten ka atawaka lensangen ka di kurus?”

¹¹ Simbag ni Isus, “Ndaˈidun siai pegbayaˈ mu dinaan, saˈ kanaˈ laak bigay diniˈa nu Megbebayaˈ. Kaas su getaw migwakil dinaan diniˈa, iini gembagel paduni salaˈen.”

¹² Benaˈ midengeg ni Pilato, anguten dun gupia beluyenen si Isus. Dagid mimeksay puliˈ su nga getaw Judea, laung nilan, “Saˈ beluyen mu ki getaw kiin, kanaˈa sugut nu tampusan gadiˈ si Cesar! Adin su mekpeˈadiˈadiˈ, mingatu iin dini Cesar!”

¹³ Sikna midengeg ni Pilato, iwiten puliˈ diag liu si Isus. Migingkud dayun si Pilato ditu gingkudan pengukuman bitang dia tandaˈ piningalan dun “Platapurma Batu.” (Piningalan dun di Hinebreo su platapurma kia, “Gabata.”) ¹⁴ Naa su gendaw kia, Birnis, su pengandam dig Lumpuk tug Liniusan. Benaˈ sungu mektui gendaw, laung ni Pilato tu nga getaw Judea, “Bentayay pa daan niu, kini na ki gadiˈ niu!”

¹⁵ Laak dagid mimeksay ilan, laung nilan, “Petain! Petain! Lensangen di kurus!”

“Lensangen ku ba su gadiˈ niu?” sinaak ni Pilato.

Simbag nu nga kaunutan nug belian, “Ndaˈi gadiˈ nami subay si Cesar.”

¹⁶ Dayun pegwakil ni Pilato si Isus dinilan, puˈ adun lensangen nilan di kurus.

Mendadi, inagak si Isus nu nga sundalu ¹⁷ lumiu ilan dia syudad, si Isusi mekpisan di kurusen. Saˈ maˈnia, midepet ilan dia dapit nu syudad piningalan dun “Tulan Gulu.” (Di Hinebreo, piningalan dun “Golgota.”) ¹⁸ Dia nilan dayun lensangay tu kurus si Isus. Piduma nilan dadema lensangayig duaˈ tawan, miktimpang di kurus ni Isus su kurus nilan, dia titengaˈ si Isus. ¹⁹ Mikpesulat dayun si Pilato tuˈus pidekepen tu kurus, iini sinulat dun, “Kini si Isus, getaw Nazaret, su Gadiˈ nu nga getaw Judea.” ²⁰ Melaun getaw Judea mikebasa dun, puˈ mesempel tu syudad sug linsangan dini Isus. Mukaˈ ki tuˈus kia, misulat di Hinebreo mukaˈ dig Linatin sampay di Ginerecia.^{a 21} Naa ki nga kaunutan nug belian nu getaw Judea, kaliˈ ilan pektaluˈ dini Pilato, “Ndiˈ mu sia pesulat ‘Kini su Gadiˈ nu nga getaw Judea.’ Melengas sia iini pesulat mu, ‘Laung nu getaw kini, naan, laung, su Gadiˈ nu nga getaw Judea.’”

²² Kaliˈ sembag si Pilato, “Ki pisulatu, ndiˈ pelinen.”

²³ Benaˈ milansang nilan na tu kurus si Isus, inalap nu nga sundalu su nga penepetenen. Pikilas nilan paat ilasan, piksailas dinilan. Inalap dadema nilan su melambung suuben. Kagina ndaˈi tinaiˈanen puˈ tinibuuki kabel dun, ²⁴ laung nilan, “Ndiˈ ta gediten, pekteliin ta, saˈ adin dun dinitai mekalap dun.” Kinii mipenggulaula adun menuud su sinulat dengantu ditu Misulat Taluˈ nu Megbebayaˈ, laung,

²⁵ Naa pegindeg dia mesempel nu kurus ni Isus su ginaˈen mukaˈ su pated nu ginaˈen libun, sampay si Maria sawa ni Cleofas, kepaaten si Maria Magdalena. ²⁶ Naa benaˈ minitaˈ ni Isus pegindeg dia su ginaˈen mukaˈ su sakupen kiin su petailenen gupia, laungen tu ginaˈen, “Libun, bentayay mu pa daan, kini naig bataˈ mu.”

²⁷ Mukaˈ laungen tu sakupen kia, “Bentayay mu pa daan, kini nai ginaˈ mu.” Kaas genat itu, piuliˈ na nu sakupen kia su ginaˈ ni Isus diag balayen.

²⁸ Tubus itu, misuunan ni Isus puˈ mitubus na su kelaun mpenggulaula. Mendadi adun megelaˈ gupia menuud su sinulat dengantu ditu Misulat Taluˈ nu Megbebayaˈ mekatag diniin, laungen, “Kuaunu.”

²⁹ Naa duunig yaˈung dia, mipenuˈ penginumen. Inulem dun dayuni maaˈ palas napes, tinangen di gayu sigbet, pisangal dayun tug babaˈ ni Isus. ³⁰ Mendadi si Isus, benaˈ mitubus megeksep di penginumen kia, miktaluˈ, “Naa, mitubus na!”

Migdungguˈ dayun, mukaˈ migetusi ginaanen.

³¹ Mendadi inubug nu nga kaunutan nu nga getaw Judea dini Pilato, beliˈen nilan su geksud nu ngag linansang kia adun matay ilan ganam, puˈ adun egwaten ilan dayun dia nga kurus. Puˈ su gendaw kia, Birnis, pengandam di Gendaw Pelali nilan, ndiˈ pia saˈ duunig bangkay mbilin di nga kurus di Gendaw Pelali kia, puˈ pegbesaan gupia gendaw. ³² Saˈ maˈnia, minangay su nga sundalu megbaliˈ di geksud nug bekna getaw linansang di gupid ni Isus, dayun sug dumanen. ³³ Laak benaˈ mikpesempel ilan dini Isus, minitaˈ nilan puˈ minatay na, kaas ndaˈ nilan iin beliˈay geksud. ³⁴ Laak dagid sala tawan sundalu, tinugdaˈanen telawan su gilid ni Isus. Mibugyag dayun di gilidenig duguˈ mukaˈ tubig. ³⁵ (Naa su mikaitaˈ dun gupia kini, iini migukit dun, adun metuudan amu dun. Ki takesiˈen kini, minget metuud, pinanteken puˈ metuud.) ³⁶ Maˈantui mipenggulaula, adun menuud su sinulat dengantu ditu Misulat Taluˈ nu Megbebayaˈ, laung, “Ndaˈig bekegen mbaliˈ, pia salabuuk.” ³⁷ Mukaˈ duun paduni sala sinulat dun, laung, “Pegenlengan nilan su tinugdaˈan nilan.”

³⁸ Mendadi tubus itu si Jose, getaw dig lunsud Arimatea, inubugen dini Pilato, elapenen sug bangkay ni Isus. (Si Jose, sakup ni Isus, laak melegludi kesakupen, puˈ mendek tu nga kaunutan nu getaw Judea.) Sinanguˈ dadema ni Pilato. Naa saˈ maˈnia, inangay dayun ni Jose egwatay dia kurus sug bangkay ni Isus. ³⁹ Naa si Nicodemo, su Pariseo kiin kuminitaˈ begudiin dini Isus gebii, migdunut dini Jose, peguit si Nicodemo lima puluˈ kilui piglamug pagemut piningalan dun mira mukaˈ aloe. ⁴⁰ Mendadi benaˈ miagwat nilan duaˈ sug bangkay ni Isus, pinutus nilan dayun di penepeten gemputiˈ pidumanan pagemut, puˈ iinig betad nu getaw Judea saˈ meglebeng ilan. ⁴¹ Naa duuni pegimulanan gayu dia mesempel tug linsangan dini Isus, duuni sangyab dia begu luakay, ki ndaˈ mainsan melebengay getaw. ⁴² Naa kagina mitaang di pengandam di Gendaw Pelali nu getaw Judea, linagut nilan lebengay sug bangkay ni Isus dia sangyab kia, puˈ mesempel da dia.