¹ Naan si Pablo mukaˈ sug dumau si Timoteo, nga sesuguˈen ni Kristu Isus, suminulat ami diniu ngag launan suminalabuuk na dini Kristu Isus diag lunsud Filipos, ki nga piglegetawan nu Megbebayaˈ. Puitan nami amu sulat sampay su nga meguit tu pikumpungan niu mukaˈ su nga megabang dinilan. ² Penenebiin ku begayan amu nu Gamaˈ ta Megbebayaˈ mukaˈ nu Kaunutan si Isukristu tulung mukaˈ pianan ginaa.

³ Naa yamu, saˈ medelendemu amu, mekpaladpaladu lelayun tu Megbebayaˈ su pektemuyen ku. ⁴ Mukaˈ saˈ penenebian ku amu, launan niu, leliagenu gupia ⁵ sabaˈ nu gabang niu dinaan megukit di Gempia Petenday, genat tug bekna kegukitu sampay nandaw. ⁶ Mituudanu dun puˈ pediunen nu Megbebayaˈ su gempia baalenen pikpuunanen na di ginaa niu. Pediunenen sampay di gendaw tubusenen saˈ metuaˈ na puliˈ si Kristu Isus. ⁷ Kagina petailen ku amu gusay, gempia maˈniinig delendeman ku diniu. Iini petailen ku amu dun, limbangu amu di pibaal dinaan nu Megbebayaˈ puun tu tulungen saanan ku mipikutan dini, saˈ su ndaˈ pau pikutay, su kesembagu pa di nga kuminuntra ditu Gempia Petenday mukaˈ su kepepenggangetu tu Gempia Petenday dig delendeman nu nga getaw. ⁸ Sinambayu su Megbebayaˈ puˈ teluˈen ku su metuud, mibugaˈu gupia diniu gelaˈ, miksekat di petailan diniu ni Kristu Isus.

⁹ Penenebiin ku megisegi kepetail niu gusay, adun megiseg dadema su sinuunan niu mekatag di metuud mukaˈ su telisebutay niu di gempia gulaula, ¹⁰ adun metau amu memiliˈ tu tampusan melengas. Ndaˈ dayuni melamug diniu melaat mukaˈ ndiˈ amu medangat di gendaw metuaˈ na puliˈ si Kristu, ¹¹ puˈ mengganget dig delendeman niu su gininisan kelengas puun dini Isukristu, adun megdedengeg su Megbebayaˈ mukaˈ mpegbesaan.

¹² Naa mendadi, iini mauyaˈan ku mesuunan niu, uu Mingumpated, kig launan mipenggulaulau, iin pasiˈi mipenggulaulau dun, adun mesigwag gusay su Gempia Petenday. ¹³ Kaas misuunan nug launan sundalu megingat dig balay kini nu gadiˈ puˈ mipikutanu sabaˈ sesuguˈen mau ni Kristu. Misuunan dadema nug launan duma getaw dini. ¹⁴ Pidag pa tanan, su melaun samasakup ta dini, migisegi kesalig nilan ditu Kaunutan sabaˈ nu kepikut dinaan, kaas gendawgendaw mengulikseg pailan megukit tu Gempia Petenday di ndaˈi gendek nilan.

¹⁵ Laak, duun daani megukit mekatag dini Kristu puun di kengimbegu nilan dinaan mukaˈ kelisualay nilan. Laak dagid, duunig duma megukit dun pasiˈ puun tu gempia ginaa nilan. ¹⁶ Ki nga mekesuun kia, megukit ilan tu Gempia Petenday mekatag dini Kristu miksekat di petailan nilan dinaan, puˈ misuunan nilan mitenduˈu nu Megbebayaˈ adun mekesembagu di nga megbelibad sia di Gempia Petenday. ¹⁷ Ki nga miuna mitaluˈu kiin, su nga mingimbegu dinaan, melaati ginukit nilan dun, puˈ sug delendeman nilan megukit mekatag dini Kristu, puun laak di kekpelabawlabaw nilan. Laung nilan dun, dumugang pai kekpeleget dinaan dini pirisuan sabaˈ nu kegukit nilan.

¹⁸ Naa pia da. Petuyangen na saˈ megduaˈduaˈig delendeman nilan megukit dun, saˈ kektinantu. Basta laak pegukiten su Gempia Petenday mekatag dini Kristu, leliagenu dun. Mukaˈ leliagenu gusay, ¹⁹ puˈ misuunan ku mekeliu pau di pirisuan kini puun di kenenabi niu mukaˈ di gabang nug Balakat nu Megbebayaˈ sinuguˈ ni Isukristu. ²⁰ Laak taginau dun mukaˈ pekpelaban ku dadema, pekpelasen ku lelayun su pibaal dinaan nu Megbebayaˈ. Saˈ pektetubuˈ pau, saˈ matengi gumulu, pia taˈ alanduni mpenggulaula nug lawasu, ndiˈu mendek, adun mpegbesaan ku dun gusay si Kristu mukaˈ penalan ku iin, labi na nemun. ²¹ Puˈ iini metubuˈu dun, pegbesaan ku si Kristu puun di kektetubuˈu, mukaˈ saˈ matayu sungkin, gembagel pai gatagen. ²² Laak saˈ metubuˈ pau dinig dibabaw benwa kini, mekenggulaulau gusay melengas. Kaas ndiˈu metau memiliˈ saˈ adini gempiau mbianan. ²³ Melegeni kegdelendemu dun. Taginau dun matayu sia, adun megdumau dini Kristu, puˈ gempia pa dun. ²⁴ Laak dagid subay metubuˈ pau gusay, adun ebangan ku amu. ²⁵ Naa, gempantek ia, kaas misuunan ku metubuˈ pau mukaˈ ebangan ku amu gusay, adun megisegi kesalig niu mukaˈ leliag niu, launan niu. ²⁶ Mendadi, benaˈ mpuliˈu ditu niu, leliagen namu dun, puun tu keksalabuuk niu dini Kristu Isus.

²⁷ Naa mendadi, subay pegbetaden niu su mbantang tu Gempia Petenday mekatag dini Kristu, adun saˈ mekedituunu niu, saˈ mekinitaˈay ita saˈ ndiˈ, medengegu puˈ mitindegan niu su kekpetuud niu. Puˈ meksalabuuk amu di ginaa mukaˈ dig delendeman, meksinugutay amu gusay petindeg niu su kekpetuud ta di Gempia Petenday. ²⁸ Mukaˈ ndiˈ niu egduday su nga kuminuntra diniu, adun mpaitaˈ dinilan puˈ pelebuˈan pailan nu ginukuman nug Megbebayaˈ, laak yamu, guunen amu gusay nug Megbebayaˈ. ²⁹ Puˈ bigay na diniu mektamuy amu dini Kristu. Kanaˈ laak bigay diniu sumalig amu diniin, segaga bigay diniu dadema melegenan amu sekat tu gabang niu diniin puun tu kesalig niu diniin. ³⁰ Ki kektigel niu di nga kuminuntra diniu, mesama di kektigelu. Ki ketegel niu megukit tu Gempia Petenday, mesama dadema dig danaan, ki minitaˈ niu begudiin mukaˈ midengeg niu dadema nemun.