2
Gempia Penunggilingan nu nga Sakupen su Kekpebabaˈ ni Kristu
1 Naa, gempageni kesalig niu puun tu keksalabuuk niu dini Kristu, miamuˈamuˈ amu miksekat di kepetailen diniu, miksalabuuk diniu sug Balakat nu Megbebayaˈ sampay meglinelaatay amu. 2 Kaas penengiin ku diniu, puun dadema di kekpinetailay niu, peksalabuuk amu gupia dig delendeman niu, di kepetail niu sampay di ginaa niu mukaˈ mauyaˈan niu, adun leliagenu dun gupia. 3 Subay ndaˈi baalen niu meksekat di kesingit. Subay ndaˈ dademai penggulaulaan niu meksekat di mauyaˈan nu getaw mangyaˈ. Iin sungkini mpia niu pegdelendemen, puun tu kekpebabaˈ niu, pemilangen niuig duma niu mekesuun pa diniu. 4 Ndiˈ niu pa pagid tagikulen laak su kepia diniu, segaga tagikul niu su kepia di ngag duma niu. 5 Subay penunggilingan niu su ginaa ni Kristu Isus mukaˈ sug delendemanen maˈniniˈ,
6 Si Kristu, piai gasalen, gasal nug Megbebayaˈ,
ndaˈen pemilangay gembagel pantageni kesamanen tu Megbebayaˈ.
7 Sinangkaliˈ pa tanan, puun tug daniin delendeman, bilengen su ketaasen,
puˈ midawaten su gasal sesuguˈen,
puˈ migigetaw maaˈ da nug betad getaw.
Palasen gupia, palas kilawan.
8 Mikpebabaˈ di ginaanen, mukaˈ su pigbetaden,
mikpetuud gupia ditu mauyaˈan nu Gamaˈen,
pia deksuˈanen ia, minatay ditu kurus.
9 Kaas pitaas na nug Megbebayaˈ, pilentu ditu gekbus langit,
mukaˈ bigay diniini gelal metaas pa dig launan gelal
di gekleb langit buˈ lupaˈ.
10 Iini bigay dun diniin, puˈ adun saˈ medengegi ngalan ni Kristu,
megbasa gelaˈ diniin kig launan bitang ditug langit mukaˈ dinig dibabaw lumbang sampay ditug bayaˈ.
11 Tibaˈan nilan dayun meglegintuud puˈ si Isukristui Kaunutan,
puˈ adun megdedengeg gupia su Gamaˈ ta Megbebayaˈ.
Tuiag su Sakup Mbaal Tilaw di Tibuukan Lumbang
12 Mendadi, yamu nga petailen ku, su saanan ku dia niu, mikpetuud amu gupia. Kaas, selian ku melayuˈ na pelum diniu, pekpetuud amu gusay, adun mpengganget niu su keksalabuuk nu pikumpungan niu di kegbasa niu tu Megbebayaˈ. 13 Puˈ su Megbebayaˈi megabang diniu lelayun, begayan amu niin delendeman niu mukaˈ gaga niu menggulaula amu mauyaˈanen.
14 Kaas adin sug baalen niu, baal niu di ndaˈi sualan niu, mukaˈ betang niu di pianan ginaa, 15 adun ndiˈ amu medangat, puˈ nga tantu bataˈ namu nu Megbebayaˈ, di ndaˈi melamug diniu melaat. Kiin, pia meksala amu megbenwa di nga getaw nemun, su nga medupang mukaˈ mipenulay. Subay tuiag amu maaˈ nu ngag bitun tuiag dig dalan nu medupang mukaˈ mipenulay, 16 puˈ pegukiten niu dinilan sug bian nilan mpeduma di ketubuˈ ndaˈi tamanen. Kaas kiai leliagenu dun di gendaw metuaˈ na puliˈ si Kristu, puˈ mpaitaˈ dayun kanaˈ mbulugan laak sug baalen ku mukaˈ su tegelu.
17 Naa, ki kesalig niu tu Megbebayaˈ, gitungan dunig betang ginilak niu diniin. Saˈ mauyaˈanen dugang duni kepatayu, saˈitada saˈ matayu sabaˈ nu gabangu diniu, leliagen dau dun. Mukaˈ pedumau diniu leliagay dun. 18 Maˈantu damu dema, subay peduma amu dinaan leliagay dun.
Mekatag dini Timoteo mukaˈ ni Epafrodito
19 Naa, si Timoteo kini, pedetengen ku buangen nu Kaunutan si Isus ndiˈ na maiben mesuguˈu iin meditu niu, adun saˈ muliˈ na pelum dini, mpiai ginau puun tu maukiten mekatag diniu. 20 Puˈ ndaˈig lain getaw suminalabuuk dig delendeman ku maˈniin ni Timoteo, puˈ gembagel di ginaanen su kepia diniu. 21 Sug lain getaw pasiˈ, daal dai pektalentenan nilan, su laak kepia dinilan, kanaˈ nu mauyaˈan ni Isukristu. 22 Laak si Timoteo, misuunan niu puˈ duuni gatagen. Puˈ maitaˈ di gempia gabangen dinaan megukit tu Gempia Petenday, maaˈ danu gembataˈ megduma di gamaˈen. 23 Mendadi pedetengen ku, saˈ mesuunan ku su mpenggulaulau, saˈ beluyenu saˈ ndiˈ, suguˈen ku iin meditu niu ganam. 24 Pedetengen ku dadema ditu Kaunutan ta puˈ ndiˈ na maiben, naan, mekeditu dau dema niu.
25 Naa si Epafrodito pelum, mimated dinita, ki pigwekilan niu sinuguˈ niu lumimbang dinaan, laung ku subay sinuguˈu iin muliˈ ditu niu. Puˈ migabang dinaan dig baalen ku sampay suminugut dinaan di kesembagu di nga kuminuntra tu metuud. 26 Iini sinuguˈu dun, mibugaˈ gupia diniu, launan niu. Mukaˈ, benaˈ misuunanen midengeg niu puˈ migladu iin, milibuleng dadema. 27 Migladu lai daan meliget, sampay miksekab da dun sia. Laak lilaatan iin nug Megbebayaˈ, sampay naan, lilaatan dau dema nu Megbebayaˈ, kaas ndaˈ pegdugangi kelegenayu. 28 Kaas angutu dun, pauliˈen ku iin ditu niu, adun leliagen amu dun saˈ maitaˈ na niu, dayun mawaˈ dademai kelibulengu diniu. 29 Kaas, dedialay niu iin, puˈ samasakup niu ditu Kaunutan. Adin su getaw maaˈ diniin, pegbesaay niu. 30 Puˈ mikagawinaa sabaˈ nu pibaal dinami ni Kristu, biwang ni Epafrodito matay sia, adun gumantiˈ diniu megabang dinaan.