Su Sulat tu nga
HEBREO
1
Su Pitaluˈ nu Megbebayaˈ dig Bataˈen
1 Naa kini, begudiin iinig betad nu Megbebayaˈ, tatapen teluˈay su nga getaw. Pigininisen ukitay su nga ginepuˈay ta pibian di nga pimuunanen. 2 Laak nemun, su tampusan gendaw kini, iini tinduˈen mekpetenday dinita, sug Bataˈen. Kig Bataˈen kini, pibaal diniin nu Megbebayaˈ su gekleb langit buˈ lupaˈ. Iin dademai tinduˈ nu Megbebayaˈ mekalap dig launanen. 3 Iini ketinggas nu kelengas nu pegbayaˈ nu Megbebayaˈ. Su gasal nu Megbebayaˈ, iin dademai gasal nug Bataˈen. Sug Bataˈeni megawid di gekleb langit buˈ lupaˈ mekatag di ginuungan taluˈen. Mitubusen ugasay su nga salaˈ, miditug langit, migingkud di dapit lintu nu Megbebayaˈ, su Tampusan Metaas, puˈ pipeglekaunutan nu Megbebayaˈ.
Kig Bataˈ nu Megbebayaˈ, Metaas pa di nga Getaw Langit
4 Maˈantu kig Bataˈ nu Megbebayaˈ, mibaluy metaas pa di nga sesuguˈen nu Megbebayaˈ getaw langit, maaˈ nu ketaas nu gelalen. Puˈ metaas pai gelal bigay diniin di gelal nu nga sesuguˈen nu Megbebayaˈ getaw langit. 5 Puˈ ndaˈ ba mesulat di Misulat Taluˈ nu Megbebayaˈ,
“Yaˈa sug Bataˈu.
Nandaw mibaluy nau gamaˈ mu.”
Naa ndaˈiduni getaw langit tiluˈan nu Megbebayaˈ maˈnia. Miktaluˈ dadema su Megbebayaˈ,
“Mbaalu gamaˈen.
Mbaal dain dema Bataˈu.”
Laak kanaˈ dadema mekatag di getaw langit. 6 Su kesuguˈ pa pagid nu Megbebayaˈ ditu penganay Bataˈen medinig lumbang, miktaluˈ su Megbebayaˈ,
“Subay pektemuyen nu tibaˈan sesuguˈen ku.”
7 Laak mekatag di nga getaw langit, laungen,
“Su nga getaw langit, binaalu maaˈ nu genus.
Binaalu dailan dema maaˈ nug ligaˈ gapuy.”
8 Laak dagid mekatag dig Bataˈen, laungen,
“Uu Megbebayaˈ, ndaˈi taman nu Keglekaunutan mu.
Meglepeng tantui keguit mu tu nga sakup mu.
9 Mauyaˈan mu gupia su kekesuun, mukaˈ mpauka di melaat,
kaas su Megbebayaˈ, su pektemuyen mu, tinduˈa niin meglekaunutan,
mukaˈ pitaasa pa niin di ngag duma mu.
Kaas dema leliagen ka gusay.”
10 Laung padun nu Megbebayaˈ,
“Yaˈa Kaunutan, kanugdiin binaal mu sug lumbang,
mukaˈ genat di kemet mu su gekleb langit buˈ lupaˈ.
11 Bisan kig langit buˈ lupaˈ kini, malep. Laak yaˈa, ndaˈi gumul mu.
Ilan, medanul ilan maaˈ nu penepeten.
12 Maaˈ nu suub, penlepiˈen mu ilan,
puˈ mailisan maaˈ nu penepeten.
Laak dagid yaˈa, ndiˈa mpalin pia maikaˈ.
Ndaˈi gumul mu.”
13 Laungen pa dun,
“Gingkuda dini gupidu, dapit lintu,
puˈ pegbesaan ku yaˈa sampay di gendaw pelebaun ku yaˈa
daagen mu su nga kuntra mu.”
Kanaˈ nu getaw langiti tiluˈanen dun.
14 Naa saˈ maˈantui tinaluˈ nu Megbebayaˈ tug Bataˈen, taˈ mai gelal nu nga getaw langit? Asa ginis dailan nu nga ndiˈ maitaˈ, launan nilan, laak mektamuy dailan dema tu Megbebayaˈ mukaˈ sinuguˈen ilan megabang di getaw pegleguunenen di salaˈ.