2
Ki Kegawen, Ndiˈ Melebawan
1 Kaas, subay penemalan ta talentenay su metuud tinituluˈ dinita, adun ndiˈ mpalinig delendeman ta dun. 2 Puˈ mituudan ita dun puˈ minuud na su pitenday nu sesuguˈen nu Megbebayaˈ getaw langit tu nga ginepuˈay ta, saˈitada su Palinta nu Megbebayaˈ. Puˈ begudiin adini getaw minggulaula melaat, saˈ mimilas ditu Palinta, inukuman nu Megbebayaˈ mbantang tu kemilasen. 3 Kumalenged maˈantu, ndiˈ ita mekegliaw di ginukuman dinita nu Megbebayaˈ, saˈ petuyangen ta su tinituluˈen dinita mekatag di kegawen dinita. Ki kegawen kini, ndaˈig labaw pa dun. Miguna megukit dun su Kaunutan ta si Isus. Tinakesiˈan dinita dayun nu nga mikedengeg dun puˈ metuud. 4 Midengan dadema senguˈay nu Megbebayaˈ, puˈ pipenggulaulanen di nga mikedengeg dun kia nga migininisan mekesalebuˈ, tuˈus nu pegbayaˈen. Adini getaw mauyaˈan nu Megbebayaˈ begayan, piktukiden dadema begayay tinawan nug Balakat nu Megbebayaˈ.
Su Meglegawen
5 Naa subay pektalentenan ta dadema su tinituluˈen dinita, puˈ kanaˈ nu nga getaw langiti mitenduˈ nu Megbebayaˈ meglekaunutan dig begu lumbang baalenen pa ditug binayaˈ gebii buˈ gendaw. Segaga su kilawani tinduˈen meglekaunutan dig lumbang pekteluˈen ta kini. 6 Misuunan ta ia, puˈ duuni miktaluˈ di Misulat Taluˈen,
“Uu Megbebayaˈ, su kilawan, mekesalebuˈig lelaat mu diniin,
asa maikaˈ laakig lagaˈen.
Bisan maikaˈig lagaˈ nu getaw,
tinulung mu gupia.
7 Pibabaˈ mu iin di nga sesuguˈen mu getaw langit, laak ndaˈ maiben.
Pitaas mu iin puˈ bigayan mu melengas dengegan mukaˈ pipegbasa mu.
8 Pipegbayaˈ mu dadema diniin sug launan binaal mu.”
Naa kumalenged misulat dia puˈ pipegbayaˈ nu Megbebayaˈ tu getaw sug launan binaalen, gempantek puˈ ndaˈidunig binaalen ndaˈ mpeduma. Laak pia maˈantu, nemun ndaˈ pai getaw minitaˈ ta megbayaˈ tug launanen. 9 Iin laaki minitaˈ ta kini si Isus, su pibabaˈ nu Megbebayaˈ di nga getaw langit ndaˈ maiben, adun matay. Minitaˈ tain pitaas na nu Megbebayaˈ, puˈ bigayanen tampusan melengas dengegan mukaˈ pipegbasanen di nga getaw. Puˈ sabaˈ nu tulung nu Megbebayaˈ, minatay, guminantiˈ dig launan getaw. 10 Kagina binaal nu Megbebayaˈ sug launan bitang adun mpenalan iin, bentanganen begay nu Megbebayaˈ melegenan su Kaunutan ta, adun menggangeti kekesuunen. Mikegawen dayun di kelaun bataˈ nu Megbebayaˈ, adun mpeduma ilan dig dengeganen mukaˈ di kegbasa diniin ditug langit.
11 Naa si Isus, pitelimaˈen su nga getaw tu Megbebayaˈ. Iin mukaˈ su nga pitelimaˈen, salabuuk dai Gamaˈ nilan. Kaas ndiˈ mpiid mekpaingalan dinilan nga ngudanen. 12 Puˈ ndaˈ ba pektaluˈ di Misulat Taluˈ nu Megbebayaˈ,
“Uu Megbebayaˈ, ukitan ku su nga ngudan ku mekatag diniˈa.
Penalan ku yaˈa di pikumpungan nilan.”
13 Miktaluˈ dadema, “Suminaligu ditu Megbebayaˈ.” Duun pa pagidi misulat, kaliˈ pektaluˈ, “Keni dau, ilan nu nga gembataˈ bigay dinaan nu Megbebayaˈ.”
14 Kagina iini gasal nu nga piningalanen dun ngag bataˈ kilawan, kuminilawan dadema si Isus, adun matay. Minatay dayun, adun daagenen su Palin, su puun gupia nu kepatay. 15 Maˈantu, pibeluyen su nga getaw. Puˈ ita nu nga getaw, genat tu kaikaˈay ta sampay matengi gumul ta, maˈniin ita gulipen nu gendekan ta, puˈ mendek ita gupia matay. 16 Mendadi, mekatag di kepatayen, gempantek kanaˈ nu nga sesuguˈen nu Megbebayaˈ getaw langiti pegebanganen. Ndaˈ ba mesulat kanugdiin, “Pegebanganen su nga sapuˈ ni Abraham.” 17 Saˈ maˈantu, si Isus, subay miksibaluy getaw maˈniin nu nga ngudanen dig launan betaden, adun mbaal Tampusan Metaas Belian, melilelaaten mukaˈ meseligan mektamuy tu Megbebayaˈ, adun mpedasun su nga getaw tu nga salaˈ ta. 18 Puˈ kagina pingindanan si Isus maaˈ da nu kengindan dinita nga getaw mukaˈ milegenan dadema maaˈ da dinita, metau megabang dinita, saˈ pengindanan ita.