3
Si Isus, Metaas pa dini Moises
1 Naa mendadi, yamu kepetedan ku, nga samasakupu dini Kristu ginggat nu Megbebayaˈ megbenwa tug langit ditug binayaˈ gebii buˈ gendaw, pegdelendem niu deliˈ si Isus. Si Isus kini, iin su peneligan nu Megbebayaˈ mukaˈ Tampusan Metaas Belian mekatag di kekpetuud ta. 2 Puˈ maaˈ dani Moises begudiin, mikpetuud gupia tu Megbebayaˈ, su tuminduˈ dun. Mikpetuud si Moises kiin saananen meguit tug balay nu Megbebayaˈ, saˈitada su nga sakupen. 3 Pinenggiˈ duuni getaw megbaal balay. Gembagel paig dengeg nu megbaal dun sabayaˈ nug balay. Maˈantu dadema si Isus. Mbantang metaas pa su kegbasa diniin di kegbasa dini Moises. 4 Metuud saˈ duunig balay, mesuunan ta duun dademai migbaal dun, laak su Megbebayaˈi minaal tug launan bitang. 5 Si Moises kiin, meseligan gupia sesuguˈen diag balay nu Megbebayaˈ, saˈitada su nga getaw ginulipiten. Kanugdiin inukiten pedaan su teluˈen pa nu Megbebayaˈ ditug binayaˈ gebii buˈ gendaw. 6 Si Kristu, meseligan dadema gupia, laak kanaˈ sesuguˈen, puˈ Bataˈ nu Megbebayaˈ, kaunutan dig balayen. Naa itaig balayen kiin, saˈ menamal ita sumalig diniin mukaˈ menamal dademaig leliag ta ditu pedetengen ta.
Peglengilaman ta su Kemilas adun Mekelali ita
7 Kaas, subay pektalentenan ta ki taluˈ nug Balakat nu Megbebayaˈ kini, puˈ ndaˈ ba mesulat di Misulat Taluˈen,
“Saˈ medengeg niu nandawi tingeg nu Megbebayaˈ mektaluˈ,
8 ndiˈ niu buklusayig delendeman niu maaˈ danug betad nu nga ginepuˈay niu, su kemilas nilan tu Megbebayaˈ kanugdiin.
Puˈ pingindanan nilan su Megbebayaˈ su saanan nilan ditug limawaˈ.”
9 Puˈ tinaluˈ nu Megbebayaˈ, “Pingindananu nu nga ginepuˈay niu
mukaˈ kig lelaatu, piksimaˈ nilan,
bisan minitaˈ nilan su pinggulaulau sampay paat puluˈ taun.
10 Kaas melaat gupiai ginau dinilan di gendaw kiin.
Tinaluˈu puˈ lelayun mpenulayig delendeman nilan,
sug betadu, ndaˈ nilan dunutay.
11 Melaati ginau dinilan kaas mingaduguˈu,
‘Ndiˈ nailan mesuˈat suled tug benwa
tandaˈu ilan sia pedumaay dinaan melali.’”
12 Naa, yamu kepetedan ku, peglengilam amu, adun ndaˈidun diniu melaatig delendemanen mukaˈ memilas, kaas suay dayun ditu Megbebayaˈ ndaˈi gumulen. 13 Laak, sinegay gendawan ta pa, puˈ duun pai sikawan ta megdunut dun, subay mektinikukay amu gendawgendaw, adun ndaˈidun diniui melimbungan nug betad mekesalaˈ, dayun maulayun duni melaat betaden. 14 Puˈ ita, saˈ penemalan ta pektalentenay sug bekna kesalig ta dini Kristu sampay matengi gumul ta, sigi ita meksalabuuk diniin.
15 Iin daani mitaluˈ di Misulat Taluˈen,
“Saˈ medengeg niu nandawi tingeg nu Megbebayaˈ mektaluˈ,
ndiˈ niu buklusayig delendeman niu maaˈ danug betad nu nga ginepuˈay niu,
su kemilas nilan tu Megbebayaˈ kanugdiin.”
16 Taˈ mai mikedengeg tu tingeg nu Megbebayaˈ mukaˈ mingatu diniin? Su nga getaw mimegawaˈ ditug benwa Ehipto ginulipit ni Moises kanugdiin. 17 Taˈ demai melaati ginaa dun su Megbebayaˈ tu seled paat puluˈ taun? Iin da pagid su nga sapuˈ ni Israel. Mikesalaˈ ilan, kaas migelaˈ ilan matay, saanan nilan ditu pa limawaˈ. 18 Saˈ mingaduguˈ dadema su Megbebayaˈ puˈ ndiˈ nailan mekeseled tug benwa tandaˈen ilan sia peleliay, taˈ mai tiluˈanen? Ilan dadema, su nga mimilas diniin. 19 Mendadi, misuunan ta dayun ini, ndaˈ ilan pekeseled tug benwa kiin sabaˈ nu kemilas nilan, puˈ ndaˈ nilan seligay su Megbebayaˈ.