4
1 Mendadi, ki pinasad kia nu Megbebayaˈ mekatag di pelali, pinasaden pa dinita nandaw. Kagina maˈantu, subay mekpetubud ita, adun ndaˈidun diniui ndiˈ mekebian tu pelali kia ditug binayaˈ gebii buˈ gendaw. 2 Puˈ ita, midengeg ta su Gempia Petenday inukit dinita maaˈ dadema nu kedengeg nu nga ginepuˈay ta kanugdiin. Midengeg nilan su pitenday dinilan, laak ndaˈi pantagen, puˈ ndaˈ nilan seligay. 3 Ita pasiˈ, su nga mikpetuud dun, mikeseled ita ditu tandaˈ ita peleliay nu Megbebayaˈ, su kelali tinaluˈ nu Megbebayaˈ saˈ laungen,
“Melaat gupiai ginau dinilan, kaas mingaduguˈu
puˈ ndiˈ nailan mesuˈat suled tug benwa
tandaˈu ilan sia pedumaay dinaan melali.”
Naa mitaluˈen ia mekatag di kelalinen, puˈ daanen na mitubus sug baalenen su kegbuaten dig lumbang kanugdiin. Kaas mesuunan ta miandam nai kelalinen. 4 Puˈ ndaˈ ba mesulat di Misulat Taluˈen mekatag di kepitu endawen, “Su kepitu endawen, mitubus na nu Megbebayaˈ su kelaun baalenen, kaas mikelali na.” 5 Mendadi malap ta nai sala misulat mekatag di kelalinen kia, laungen, “Ndiˈ nailan mesuˈat suled tug benwa tandaˈu ilan sia pedumaay dinaan melali.” 6 Naa, sabaˈ nu kemilas nu ngag daansamaˈ mikedengeg tu Gempia Petenday, ndaˈ ilan mpeduma di kelalinen. Laak duun paig lain mekegduma dun, 7 puˈ pinasad nu Megbebayaˈig lain gendaw paingalanen dun “Nandaw.” Mesuunan ta ia puˈ genat tu timpu ni Moises santaˈ gatus taun na, pitaluˈen dini David su mialapu kamun, laungen,
“Saˈ medengeg niu nandawi tingeg nu Megbebayaˈ mektaluˈ,
ndiˈ niu buklusayig delendeman niu tu kemilas niu.”
8 Naa, iini suminukli dini Moises begudiin meguit tu getaw, si Josue. Saˈ iwit ilan sia ni Josue ditug benwa tandaˈ ilan peleliay nu Megbebayaˈ, tubus nitu ndaˈ siai metaluˈ nu Megbebayaˈ mekatag dig lain gendaw. 9 Kaas misuunan ta, ita nu nga sakup nu Megbebayaˈ, mekelali paita ditug binayaˈ gebii buˈ gendaw maaˈ danu kelalinen di kepitu endawen kanugdiin, su ketubusen muat tu gekleb langit buˈ lupaˈ. 10 Pia adini getaw mpeduma di kelali nu Megbebayaˈ, mesikpaˈ mengimbaal maaˈ danu kesikpaˈ nu Megbebayaˈ mengimbaal kanugdiin. 11 Penemalan ta dayun pektalentenay su Gempia Petenday mekatag dini Isus, adun mekeseled ita ditu tandaˈ ita peleliay nu Megbebayaˈ, adun ndaˈidun dinitai ndiˈ mpeduma di kelalinen sabaˈ nu kemilasen, kemilas maaˈ danilan kanugdiin.
12 Naa, ki taluˈ nu Megbebayaˈ pegyegaan ta kini, tetubuˈ maaˈ danu ketubuˈ nu Megbebayaˈ, ginuungan dadema. Mauteng pa di sundang duaˈig babaˈen, puˈ mauteng pia dia gelet ginaa mukaˈ delendeman, diag lelenguˈan mukaˈ gutek tulan. Metau megunapunap dun su mauyaˈan getaw, sampay dig delendeman getaw. 13 Su Megbebayaˈ, ndaˈiduni meleglud diniin, ndaˈidun, puˈ lumbus mibuasan diniin, medayagig launanen maˈniin lebas na. Subay iini sembagen ta mekatag di gulaula ta.
Si Isus su Tampusan Metaas Belian
14 Kaas, subay pektalentenan tai kekpetuud ta mekatag dini Isus, puˈ iin su Tampusan Metaas Belian ta, sug Bataˈ nu Megbebayaˈ minuliˈ na ditug langit, tu gedapan nu Megbebayaˈ. 15 Puˈ si Isus, misuunanen gupia kig betad ta nga getaw. Melemu ita mesayep mukaˈ megdupang. Mibiananen su ginis kengindan maaˈ danita, laak ndaˈ mainsan pekesalaˈ. 16 Kaas, subay ndiˈ ita mpiid mekpesempel tu Megbebayaˈ, saˈitada menenabi, pia mikesalaˈ ita, puˈ mbianan ta dayun sug lelaaten mukaˈ su tulungen, pia taˈ endaway duni mauyaˈan ta.