5
1 Naa, su nga metaas belian, ndiˈ ba metuud, diadia mpemiliˈ di nga samatawen, mukaˈ metenduˈ megabang dinilan? Iin su gabang dinilan nu metaas belian, pektemuyenen su Megbebayaˈ, puˈ memegbegay ditu Megbebayaˈ mukaˈ mengilak diniin betang. Mengilak sabaˈ nu salaˈ nu nga getaw. 2 Kagina kilawan, metau mesayep, kaas metau dadema mengmayaˈmayaˈ mektigel di nga sakupen mikesayep ndaˈ metukaway. 3 Kagina mikesayep dadema, subay mengilak sabaˈ nu salaˈen, kanaˈ laak sabaˈ nu salaˈ nu nga sakupen. 4 Sinangkaliˈ pa tanan, ndiˈ mesuˈat iini tunduˈ dig lawasen metaas belian pegbesaan nu getaw, puˈ tenduˈen nu Megbebayaˈ mbaal metaas belian. Maˈniai kegenggat nu Megbebayaˈ dini Aaron mbaal metaas belian kanugdiin. 5 Maˈantu dadema si Kristu, ndaˈen tenduˈayig lawasen mbaal metaas belian pegbesaan gupia. Iini tuminduˈ dun su Megbebayaˈ, su miktaluˈ diniin,
“Yaˈa sug Bataˈu,
nandaw mibaluy nau Gamaˈ mu.”
6 Miktaluˈ pa pagid su Megbebayaˈ di sala sinulat di Misulat Taluˈen,
“Yaˈa sug belian di ndaˈi gikteben,
maaˈ nu kegbelian ni Melquisedec.”
7 Naa si Isus, su kegbenwanen dinig lumbang, minekeg iin mengaduy saananen menenabi mukaˈ mikpaingabang gupia ditu Megbebayaˈ, puˈ adun megawen sia nu Megbebayaˈ di kepatayen. Kagina gembageli kegbasanen tu Gamaˈen mukaˈ mikpetuud gupia diniin, tilimaˈ nu Megbebayaˈ su kenenabinen. 8 Laak dagid pia iin sug Bataˈ nu Megbebayaˈ, milegenan. Maˈantu miglegintau mekpetuud puun tu kelegenayen. 9 Benaˈ mingganget su kekpetuuden, puˈ gilaˈen penggulaulaay su pibaal diniin, mibaluy gumpungan di kegawen ndaˈi gikteben dig launan getaw mekpetuud diniin. 10 Gilal nu Megbebayaˈ dayun metaas belian maaˈ danu kegbelian ni Melquisedec.
Subay Megisegi Sinuunan ta di Kekpetuud
11 Naa, melaun pa siai pegwaliu diniu mekatag dini Melquisedec mukaˈ ni Isus, laak melegen ulugen diniu, puˈ maˈniin metegas gupiai gulu niu, ndiˈ pa niu mesabut. 12 Yamu, pia miniben namu sumakup dini Isus, kaas mekekpetuˈun namu sia, subay duun pai mekpetuˈun diniu puliˈ. Pekpetuˈunen diniu su melemu mesabut tituluˈan di Misulat Taluˈ nu Megbebayaˈ. Maˈniin subay peduduˈen pamu maaˈ nu maikaˈ gembataˈ sabayaˈ di maan amu tantu gaan. 13 Adin su petuˈunan pa di melemu mesabut, ndaˈ pai tinawanen di medalem tituluˈan mekatag di gempia mukaˈ di melaat. 14 Su maaˈ da tantu gaan, saˈitada su medalem tituluˈan, iini petuˈunan dun su nga migineken na, su duminunut gusay tu tinituluˈ dinilan, kaas metau na memiliˈ di gempia mukaˈ melaat.