¹ Kagina maˈantu, sukal nai kenilung ta dig bekna tituluˈan mekatag dini Kristu. Subay pegisegen ta nai sinuunan ta mekatag diniin, adun mengganget gupiai kekpetuud ta. Ndiˈ ta na kambat puliˈan baalay sug bekna pinggulaula ta maˈniniˈ, su keteliud ta dig baalen ta adun metelimaˈ ita nu Megbebayaˈ laak ndaˈi pantagen, mukaˈ su kesalig ta dayun diniin. ² Maˈantu dadema su tinituluˈan mekatag di kekpebunag ta tubig, su kegdepen dig begu sakup, su kepetubuˈ puliˈ nu nga minatay mukaˈ su kaukum nu Megbebayaˈ ndaˈi gikteben. ³ Subay pekpuunan ta na penilungay su medalem tituluˈan. Menamal ita dayun menilung dun saˈ begay nu Megbebayaˈ. ⁴ Puˈ saˈ upama duuni getaw penensili metalin di kekpetuud ta, ndiˈ mesuˈat pegbiksuˈanen puliˈ. Su nga getaw daan na pidelagan nu Megbebayaˈ mekatag di metuud, mibianan na nilan su gempia begay nu Megbebayaˈ mukaˈ piktukid pa pagid dinilan sug bigay nug Balakaten. ⁵ Mibianan na nilan dadema su kepia nu tinaluˈ nu Megbebayaˈ mukaˈ su nga penggulaulaan nu ginuungen ditu pa binayaˈ gebii buˈ gendaw. ⁶ Naa saˈ teliudan nilan dayun su kekpetuud ta, ndiˈ na nilan mesuˈat pegbiksuˈay puliˈ. Puˈ maˈniin linsangan nilan puliˈ ditu kurus sug Bataˈ nu Megbebayaˈ mukaˈ pingumpiid nilan iin di gedapan nu nga getaw. ⁷ Puˈ pesemaan ku dig lupaˈ. Saˈ duunig lupaˈ tatap dupiˈay mukaˈ delepay tubig, kaas melauni pimula mentubuˈ dun sukal di nga getaw mengimbaal dun, naa kig lupaˈ kia, pepianan nu Megbebayaˈ. ⁸ Laak dagid saˈ sigbet mukaˈ dugii mentubuˈ dia, sug lupaˈ kia, ndaˈi pantagen, sungu pelebuˈay nu Megbebayaˈ. Deksuˈanen ia sensulan laak, puˈ ndaˈi pedetengen dun.

⁹ Naa, yamu nu nga petailen ku, bisan mitaluˈ nami maˈnia, mituudan ami dun puˈ yamu pasiˈ, melengas pa gupia su pigbetad niu. Pinggulaula niu su melengas mbantang di kegawen diniu. ¹⁰ Meglepengi kaukum nu Megbebayaˈ, kaas misuunan ta ndiˈen selingawan su pinggulaula niu mukaˈ su petailan niu diniin, su kegabang niu di nga samasakup niu mukaˈ su gabang pa niu dinilan. ¹¹ Iini mauyaˈan ku gupia, saladuaˈ diniu, gelaˈeneni ginaanen pentekenen dig delendemaneni pedetengenen tu kelusad puliˈ ni Isus, sampay menuud su pekpelaban niu. ¹² Kanaˈ iinig liagan ku, meksilelaˈ amu, segaga penunggilingan niu su nga malap tu nga pinasad nu Megbebayaˈ pebian di kesalig nilan diniin mukaˈ di kektigel nilan di kaibenen sampay medawat nilan.

¹³ Naa kanugdiin, su Megbebayaˈ, minasad dini Abraham. Kagina ndaˈiduni metaas pa di Megbebayaˈ petakesiˈen dun, mingaduguˈ puˈ penuudenen su pasaden dini Abraham. ¹⁴ Kaliˈ pektaluˈ dini Abraham, “Pasadu diniˈa, pepianan ku yaˈa gusay. Pasad dau dema diniˈa mekpulaka melaun.” ¹⁵ Kagina miktigel si Abraham ditu kegelaten, mialapen dayun su pinasad diniin nu Megbebayaˈ. ¹⁶ Naa, saˈ upama mengaduguˈi getaw, sembayanen su metaas pa diniin, adun pengmetuudaneni getaw pesadanen. Belebagan dayun nu kengaduguˈen sug launan sualan sia mekatag di pasaden. ¹⁷ Kaas saˈ mauyaˈan nu Megbebayaˈi maˈnia, pengmetuudanen su nga pisadanen kanugdiin, puˈ ndiˈ mpalini delendemanen, sinumpaten tu pinasaden su kengaduguˈen. ¹⁸ Mendadi, duunig duaˈ buuk meseligan ta ndiˈ mpalin, ki pinasaden mukaˈ ki pingaduguˈen. Ndiˈ mesuˈat megbalus su Megbebayaˈ. Kaas ita nga mikpesempel tu Megbebayaˈ mekpegawen diniin, miulikseg ita gupia mekpedateng ditu kepianen dinita ditug binayaˈ gebii buˈ gendaw. ¹⁹ Ki pedetengen ta kia, maaˈ nu gempagen pundu di ginaa ta, puˈ ndiˈ daagen mukaˈ ndiˈ mpenulay. Sabaˈ nu pedetengen ta kia, maˈniin mekebian ita di kurtina bilet dia Pengedapan tu Megbebayaˈ ditug langit, puˈ mekadap ita diniin ditu Tampusan Meˈelig Sugud pebian di kenenabi ta. ²⁰ Si Isus, miguna suled ditu Pengedapan kiin tu Megbebayaˈ, adun ebangan ita niin, puˈ mibaluy na tampusan metaas belian di ndaˈi tamanen, maaˈ danu kegbelian ni Melquisedec.