¹ Naa kini si Melquisedec, iin su gadiˈ nug lunsud Salem kanugdiin, mukaˈ belian dadema mektamuy tu Tampusan Metaas Megbebayaˈ. Naa, duuni ngag lain gadiˈ kanugdiin linumpakan nu ginepuˈay ta si Abraham. Benaˈ mikedaag na si Abraham mukaˈ minuliˈ na, sinungkak ni Melquisedec kini, puˈ pinenebianen masiˈ. ² Bigayan dayun ni Abraham gilas di sepuluˈ ilasan dig launan mialapen ditu gubat. Naa, ki ngalan ni Melquisedec, duaˈi maˈananen. Bekna, mekesuun gadiˈ, keduaˈen, gadiˈ di Salem, saˈitada gadiˈ di kelinaw. ³ Ndaˈi misulat mekatag di ginaˈen, saˈ su gamaˈen, saˈ su gesalanen. Ndaˈ dadema mesulati kegigetawen mukaˈ gumulen. Kaas gitunganen sug Bataˈ nu Megbebayaˈ, ndiˈ mengiktebi kegbelianen.

⁴ Naa, pegdelendem niu deliˈ su ketaas ni Melquisedec. Bekna, kumalenged iinig bigayan nu ginepuˈay ta si Abraham gilasen tu ginagawen tu gubat kia, metaas pa dun. ⁵ Sug betad nu getaw Israel, peningilen nu nga sapuˈ ni Levi su kesepuluˈen dia mitimud nu getaw Israel.^a Puˈ adini sapuˈ ni Levi belian, mipalintaan begayan nu nga samataw nilan, pia sapuˈ ilan dadema ni Abraham. ⁶ Keduaˈen si Melquisedec, kanaˈ sapuˈ ni Levi, laak dagid pia maˈantu, mialapen su gilasen tu ginagaw ni Abraham ditu gubat, mukaˈ pinenebianen si Abraham, sug daansamaˈ pisadan nu Megbebayaˈ. ⁷ Kanaˈ duaˈduaˈ ini, penenebiin nu metaas getaw su kepia di getaw gembabaˈ pa diniin. ⁸ Ketelunen su ngag belian sapuˈ ni Levi, midawat nilan su kesepuluˈ ilasanen, asa gasal nilan matay da. Si Melquisedec pasiˈ, midawaten dadema su kesepuluˈ ilasanen, laak misulat puˈ metubuˈ iin, saˈitada, ndaˈ mesulat puˈ minatay. ⁹ Si Levi kiin, su ginepuˈay nu ngag belian, mikedawat iin di kesepuluˈ ilasanen. Kinanaˈ bigay ni Abraham dini Melquisedec su kesepuluˈen, lepeng iini migbegay dun dadema. ¹⁰ Puˈ su kesungkak ni Melquisedec dini Abraham, ndaˈ pa pegigetaw si Levi, lepeng dia pa dialem lawas ni Abraham, su gapuˈ luluden.

¹¹ Naa, misuunan ta puˈ mipalintaan nu Megbebayaˈ su nga getaw Judea miksekat tu kegbelian ni nga Levi. Laak dagid saˈ mikpalas sia su kektamuy nu nga sapuˈ ni Levi, ndiˈ na kambat metuaˈig lain ginis belian, maaˈ nu kegbelian ni Melquisedec sabayaˈ di kegbelian nu sapuˈ ni Levi si Aaron. ¹² Kinanaˈ mesukliani kegbelian, subay suklian dademai palinta. ^13-14 Su Kaunutan ta si Isus, ki tinduˈ nu sinulatu kini, gempantek kanaˈ nu sapuˈ ni Levi, puˈ sapuˈ ni Juda. Ndaˈi sapuˈ ni Juda belian, puˈ ndaˈi misulat ni Moises di Palinta nu Megbebayaˈ mekatag di sapuˈ ni Juda belian.

¹⁵ Mendadi gempantek na, misukliani palinta mukaˈ su kegbelian puˈ duun nai mituaˈ, ki sala belian lepeng dini Melquisedec. ¹⁶ Ki sala kini, ndaˈ mbaal belian pebian di palinta mekatag di gesalanen. Mibaal belian sabaˈ nu ginuungen. Puˈ su ketubuˈen, ndaˈi tamanen. ¹⁷ Ndaˈ ba mesulat, “Yaˈa sug belian ndaˈi gikteben, lepeng tu kegbelian ni Melquisedec.” ¹⁸ Misabut ta dayun puˈ pingawaˈ sug daan pinalinta, puˈ ndaˈ pekpalas, ndaˈi pantagen. ¹⁹ Puˈ ndaˈiduni getaw menggangeti kekesuunen puun tu Palinta kia. Tumuˈ pai pedetengen ta bigay dinita ni Kristu, puˈ puun dia mekekpesempel naita tu Megbebayaˈ mekpaingabang ita diniin.

²⁰ Naa su ketenduˈ nu Megbebayaˈ dini Isus megbelian, mingaduguˈ dadema su Megbebayaˈ. Laak su ketenduˈ di sapuˈ ni Aaron megbelian, ndaˈi pingaduguˈen dun. ²¹ Mibaal belian si Isus mekatag di kengaduguˈ nu Megbebayaˈ, puˈ kaliˈ pektaluˈ,

²³ Naa sug daan belian, melaun, puˈ ndaˈ ilan pengganget di kegbelian nilan sabaˈ nu gumul. ²⁴ Laak si Isus kini, ndaˈi gumulen, kaas ndaˈidunig belian sumukli diniin. ²⁵ Kaas megaganen guunay lelayun su nga mekpesempel tu Megbebayaˈ pebian di keksalabuuk nilan diniin. Meglegawen dinilan, puˈ metubuˈ di ndaˈi tamanen, adun penenebianen ilan ditu Megbebayaˈ.

²⁶ Maˈantu, si Isus, iin su Tampusan Metaas Belian mbantang megabang dinita, puˈ ndaˈi salaˈen pia maikaˈ, mukaˈ kanaˈ medangat, mekesuun, pisuay di nga mikesalaˈ getaw sampay pitaas na ditu gekbus langit. ²⁷ Kanaˈ maaˈ nu ngag lain metaas belian, sapuˈ ni Levi, puˈ ndiˈ na kambat mekanu gendawgendaw. Ndiˈ na kambat mengilak adun mawaˈ siai salaˈen, dayun adun mawaˈi salaˈ nu nga ginsekupanen. Ndiˈ na kambat mekanu, puˈ mainsan da pengilak, su kebegayen matayig lawasen mekatag di salaˈ nug launan getaw. Ndiˈ na mpuliˈan. ²⁸ Mendadi su nga getaw mitenduˈ tampusan metaas belian pebian di pinalinta dini Moises kanugdiin, mikesayep dailan. Laak dagid benaˈ miniben na, kig Bataˈ kini nu Megbebayaˈ, mitenduˈ tampusan metaas belian pebian di kengaduguˈ nu Megbebayaˈ. Puˈ ki kekesuunen, mingganget di ndaˈi tamanen.