8
Si Isusi Tampusan Metaas Belian ta
1 Naa, iini maˈanan nu pigyaga ta kini, duun nai Tampusan Metaas Belian ta, maˈniai kebetangen. Iin, nandaw pegingkud dia dapit lintu nu gingkudan nu Tampusan Megbebayaˈ ditu gekbus langit. 2 Mektamuy ditu tantu Pengedapan tu Megbebayaˈ, sug binaal nu Kaunutan, kanaˈ nu getaw. 3 Naa, adini tampusan metaas belian dinig lumbang, mitenduˈ memegay tu Megbebayaˈ mukaˈ mekanu dadema. Maˈantu si Isus, ki Tampusan Metaas Belian ta, subay duunig begayen. 4 Saˈ upama dini pa lumbang, kanaˈ da belian, puˈ duun paig belian dini memegay tu Megbebayaˈ munut tu pinalintanen ditu nga getaw Israel kanugdiin. 5 Kig baalen nu ngag belian kia, lingu laak, puˈ mpenunggilingan laak nilan su kektamuy ditu tantu Pengedapan tu Megbebayaˈ diag langit. Misuunan ta ia puˈ su sungu kepaindeg ni Moises tug lepintaw binaal luna, tinituluˈ nu Megbebayaˈ si Moises. Kaliˈ pektaluˈ su Megbebayaˈ, “Subay dunutan mu gusay sug lendasan pinitaˈu diniˈa ditug bentud.” 6 Su kektamuy mitenduˈ dini Isus, melengas pa dig danilan ngag belian kia. Maˈantu dademai nga sabut. Melengas pa dig daan sabut su pisabut ni Isus tu Megbebayaˈ ilan nu nga sakupen, puˈ miksekat tu pasad melengas pa di pinasad nu Megbebayaˈ dini nga Moises begudiin. 7 Saˈ upama mikpalas daig bekna sabut meglegawen dinita, ndiˈ na kambat suklian di keduaˈen. 8 Laak dagid laung nu Megbebayaˈ puˈ kulang su pigbetad nu getaw duminunut tug bekna sabut, kaliˈ pektaluˈ,
“Ditug binayaˈ gebii buˈ gendaw duuni gendaw mateng, laung nu Kaunutan,
meksabutu puliˈ di nga getaw Israel mukaˈ di nga getaw Juda, tug begu pasad gabang dinilan.+\fr 8:8 \ft Ki Juda kini mukaˈ su Judea, iin da tanan.
9 Mukaˈ kanaˈ maaˈ nug daan sabut, su sinabutu di nga ginepuˈay nilan
su gendaw inagaku ilan, adun uiten ku ilan megawaˈ ditug benwa Ehipto.
Ndaˈ nilan penemalay dunutay sug daan sabut kiin,
kaas pituyangu ilan.
10 Naa, iin nai pasadu di nga getaw Israel,
saˈ mateng nai gendaw kiin ditug binayaˈ gebii buˈ gendaw, laung nu Kaunutan,
betangen ku su nga pinalintau di ginaa nu piglegetawan ku,
mukaˈ pepenggengeten ku dig delendeman nilan.
Kaas mekpetuud ilan dinaan, puˈ naani Megbebayaˈ,
mukaˈ duaten ku ilan nga piglegetawan ku.
11 Danilan, diadia ndiˈen na kambat tituluˈen su nga samatawen, saˈ sug betaˈanen, mekatag dinaan.
Ndiˈen na kambat teluˈan sug dumanen,
‘Aa lai, sambat amu tu Kaunutan.’
Ndiˈen na kambat teluˈan maˈnia, puˈ sumambat dinaan su tibaˈan nilan,
su nga metaas sampay su nga gembabaˈ.
12 Lelaatan ku ilan ditu ngag dupangan nilan.
Ndiˈu na pegdelendemeni nga salaˈ nilan.”
13 Naa kumalenged duuni tinaluˈ nu Megbebayaˈ mekatag dig begu pasad, pimilangen sug bekna sabut, daan na. Mukaˈ adini mekpapas na, mesuunan ta, sungu na mbeleng gupia.