¹ Naa sug betad nug bekna sabut, duuni ngag bian tituluˈan pektamuy tu Megbebayaˈ. Duun dademaig lepintawen binaal nu nga getaw. ² Puˈ binaal nu nga getawig lepintaw luna, duaˈi suguden. Sug bekna suguden, duunig betangan nga suluˈ mukaˈ lemisaan betangan pan gilak tu Megbebayaˈ. Piningalan nilan dun su sugud kia Meˈelig Sugud. ³ Gilet tu nga sugudi gembagel kurtina. Su keduaˈ suguden, piningalan nilan dun Tampusan Meˈelig Sugud. ⁴ Duuni bitang nilan dia binaal bulawan pektutungan pelinan, mukaˈ kaban miputus bulawan. Su kaban kia, gindan tug bekna sabut nu Megbebayaˈ. Bitang ditug dialemen bandi bulawan bitangan pan pilusad genat tug langit piningalan nilan dun manna. Bitang dadema ditug dialemen su sekud ni Aaron mintubil kanugdiin, mukaˈ sug duaˈ laad batu sinulatan di sepuluˈ taang pinalinta nu Megbebayaˈ. ⁵ Bitang nilan diag dibabaw kaban kia su piningalan nilan dun gingkudan nug lelaat nu Megbebayaˈ, saˈitada su kepedasunen tu nga salaˈ. Duun pa pagidig duaˈ buuk ledawan diag dibabaw nu kaban palas sesuguˈen nu Megbebayaˈ getaw langit, gantiˈ ilan diniin. Duuni gekpak nilan mibelat diag dibabaw nu gingkudan nug lelaat nu Megbebayaˈ. Daal daia misulatu dun, puˈ ndiˈu na gupia maulug.

⁶ Saˈ maˈnia, benaˈ migelaˈ mesangkap sug lepintaw kia, betad nu ngag belian, gendawgendaw suled ilan ditug bekna suguden, adun mektamuy ilan. ⁷ Laak su Tampusan Meˈelig Sugud, iinig betaden, mekeseled dia su laak Tampusan Metaas Belian, mainsan da setaun. Mukaˈ su Tampusan Metaas Belian, saˈ suled, subay meguit duguˈ gilak tu Megbebayaˈ, adun mawaˈ su salaˈen mukaˈ su salaˈ nu nga samatawen ndaˈ nilan metukaway. ⁸ Naa, mipanteki tituluˈan nug Balakat nu Megbebayaˈ dig launan kektamuy kia, puˈ sinegay dia pai tibuuk lepintaw meseledan nu ngag belian, ndaˈ pa mpukaˈ di nga getaw sug bianan suled tu Tampusan Meˈelig Sugud. ⁹ Kiai mibaal penenggiˈan di timpu kini nandaw. Guluganen su nga pemegay tu Megbebayaˈ mukaˈ su petubuˈen pengilak diniin, ndiˈ mekekpesikesuun dig delendeman nu nga getaw mektamuy diniin. ¹⁰ Puˈ dinunutan laak nug betad kektamuy kia sug betad di kaˈaan, di kainum mukaˈ kegugas lawas, lumbus pinalinta nu Megbebayaˈ mekatag dig lawas. Kiai migbayaˈ di kektamuy sampay di gendaw suklian nu Megbebayaˈ tug begu bian mektamuy diniin.

¹¹ Nemun si Kristu, mituaˈ na. Iin na su Tampusan Metaas Belian mekatag di melengas begu bianan. Su Pengedapan tandaˈen pektemuyay su Megbebayaˈ, gempia pa dun tug daan lepintaw, puˈ kanaˈ binaal nu getaw, saˈitada kanaˈ duma nug biwat dinig lumbang. ¹² Maˈantu kumitas di melengas pa Pengedapan mukaˈ mikeseled tu sugud diag langit piningalan dun Tampusan Meˈelig Sugud. Mukaˈ kanaˈ duguˈ nu kanding mukaˈ turu bakai giwiten ditug dialem, puˈ daniin ma duguˈi giwiten ditu, ginilak tu Megbebayaˈ. Su keseleden, mainsan, ndaˈ na mpuliˈay. Maˈnia piksuˈatsuˈaten ita lekatay di ginukuman sia dinita, kaas ndaˈi taman nu kegawen dinita. ¹³ Naa kanugdiin, saˈ duuni getaw milemuˈan miksekat tu kepesempelen dig bangkay, subay pesikan duguˈ nu kanding mukaˈ turu baka lamug di gabu nu tinutung nati baka. Saˈ maˈantu, mpesikan na duguˈ, mawaˈ na su kelemuˈayen, adun metelimaˈ na puliˈ nu Megbebayaˈ. ¹⁴ Kinanaˈ megaga nug duguˈ mukaˈ gabu kia ugasay su milemuˈan, labi pa megaga nu kepatay ni Kristu ugasayig delendeman ta, su ndaˈ maugasay miksekat tu kektamuy ta ndaˈi pantagen. Si Kristu, inilakenig lawasen tu Megbebayaˈ pibian di Balakaten ndaˈi gumulen. Mbantang mengilak, puˈ ndaˈi kulangen mukaˈ ndaˈi melaaten dun. Kagina miugasanig delendeman ta, mekektamuy naita tu Megbebayaˈ ndaˈi gumulen. ¹⁵ Si Kristui miksabut tug begu pasad, adun malap nu nga ginggat nu Megbebayaˈ sumakup diniin su pusakaˈ pinasad dinilan, su pusakaˈ ndaˈi tamanen. Mesuˈat na malap ilan puˈ duuni minatay, adun lekaten su nga sakupen di melaat gulaula nilan su kegulipit pa dinilan nug daan sabut.

¹⁶ Naa saˈ su pusakaˈ, betaden subay ndiˈ begayan su pinusekaˈan subay mpantek tuˈu puˈ minatay na su minusakaˈ dun. ¹⁷ Puˈ betaden, ndaˈi pantagen su sinulat sabut mekatag di pusakaˈ sinegay tetubuˈ pai minusakaˈ dun. Mekpalas laak saˈ matay na su minusakaˈ. ¹⁸ Maˈnia dademaig bekna sabut nu Megbebayaˈ. Ndaˈ pai pantagen di getaw subay duuni petubuˈen petain, adun baalen gilak sug duguˈen. ¹⁹ Su kepalinta ni Moises tug launan getaw Judea kanugdiin, maˈniai mipenggulaula. Puˈ si Moises kiin, migelaˈen pelektagay su nga getaw mekatag dig launan pinalinta nu Megbebayaˈ, dayun pimesikanen duguˈ su sinulatan di Palinta, saˈitada su Misulat Taluˈ nu Megbebayaˈ. Pemesikanen duguˈ nu nati baka mukaˈ kanding pedumanan tubig, iini pemesiken dun su gangaw nu gayu piningalan nilan dun hyssop mukaˈ gempula bembul nu karniru. Pimesikanen dadema su nga getaw. ²⁰ Kaliˈ taluˈ si Moises, “Kig duguˈ kinii tuˈus nu sabut binaal nu Megbebayaˈ, adun medawat amu niin. Subay dunutan niu gupia su sabut kiin.” ²¹ Maˈnia dadema pimesikanen duguˈ sug lepintaw binaal luna mukaˈ sug launan kesengkapan nu kektamuy nilan. ²² Metuud ia, tinituluˈ di nga pinalinta nu Megbebayaˈ ugasan duguˈ sug launanen. Saˈ su pimetang, adun mawaˈi kelemuˈayen, saˈ su getaw, adun mbiadan su salaˈen. Guluganen ia, ndaˈiduni getaw mpedasun di salaˈen, saˈ ndaˈig duguˈ mbunag, saˈitada, saˈ ndaˈi matay.

²³ Naa, subay miugasan duguˈ sug lepintaw kia mukaˈ su nga kesengkapanen dia, dagid lendasan laakig lumbus tu tantu Pengedapan tu Megbebayaˈ ditug langit. Ki Pengedapan kiin ditug langit, subay melengas pai gilak dun. ²⁴ Puˈ si Kristu, sumiled na gupia ditug langit, adun mekpaitaˈ nemun tu gedapan nu Megbebayaˈ megabang dinita. Kanaˈ pengedapan binaal nu getawi siledanen, puˈ sug binaal nu getaw, lendasan laak tu tantu Pengedapan ditug langit. ²⁵ Naa sug betad nu Tampusan Metaas Belian ditug lepintaw, tauntaun suled tu piningalan nilan dun Tampusan Meˈelig Sugud, adun uitenen dia sug duguˈ, kanaˈ daniin duguˈ. Laak si Kristu pasiˈ, ndaˈ pekpuliˈpuliˈ suled ditu Pengedapan ditug langit, adun ilakenenig lawasen. ²⁶ Puˈ saˈ mimaˈantu sia, genat tu kegbaal dig lumbang sampay nemun, subay mekpuliˈpuliˈ sia melegenay. Laak iini mipenggulaula, mituaˈ si Kristu nandaw saˈ sungu melengkebig benwa, adun puaˈenen su salaˈ ta pebian di kegilaken tug lawasen. Inilaken laak mainsan, daal daitu tantu. ²⁷ Iini pigdelendem nu Megbebayaˈ, subay launan getaw matay mainsan, ukumen dayun nu Megbebayaˈ. ²⁸ Maˈnia dadema minatay mainsan si Kristu mibaal gilak, adun uaˈenen su nga salaˈ nu melaun getaw. Di keduaˈ deksuˈen metuaˈ pa puliˈ dinig lumbang, laak kanaˈ sabaˈ nu salaˈ, puˈ guunenen na gupia su nga getaw mekpedateng diniin.