10
1 Naa, su Palinta pingumbilin di nga getaw Judea, lingu laak nu nga melengas metuaˈ pa pebian dini Kristu. Kaas ndiˈ mekpesikesuun di nga getaw mektamuy tu Megbebayaˈ. Ndiˈ mekpesikesuun dinilan sekat di ngag betang, bisan tauntaun tatap ilakay. 2 Puˈ saˈ upama miugasan sia di salaˈ su nga miuna mektamuy tu Megbebayaˈ, ndaˈ ilan sia mpiid di salaˈ nilan mukaˈ misikpaˈ ilan sia mekanu. 3 Laak, kagina menamal ilan mekanu tauntaun, tatap pailan tegyungay di nga salaˈ nilan. 4 Puˈ sug duguˈ nu turu baka mukaˈ kanding, ndiˈen mawaˈ su nga salaˈ ta.
5 Kaas, si Kristu, saˈ sungu medinig lumbang, miktaluˈ tu Megbebayaˈ,
“Ndaˈ mu mauyaˈay petubuˈeni mbaal guliden mukaˈ nga pemegay,
puˈ inandam mu naig lawasu mbaal gilak.
6 Su nga gilak, megelaˈ tutungay,
mukaˈ su nga pemegay megbeleng di salaˈ,
ndiˈa leliagen dun.”
7 Maaˈ laungen padun,
“Kaliˈu pektaluˈ, ‘Uu Megbebayaˈ, keni dau, mituaˈu adun penggulaulaan ku su mauyaˈan mu.
Kiai misulat mekatag dinaan ditu sinulatan di nga pinalinta mu.’”
8 Naa sug bekna tinaluˈen, laungen, “Su nga pekanu mukaˈ su nga pemegay sampay su nga gilak megelaˈ tutungay mukaˈ pemegay, adun megbeleng di salaˈ, ndiˈa leliagen dun, ndaˈ mu mauyaˈay.” Kaas tinaluˈen ia bisan mipalinta sug launan gilak di pinalinta dini Moises kanugdiin. 9 Sinumpaten padun, kaliˈ pektaluˈ, “Uu Megbebayaˈ, keni dau, mituaˈu adun penggulaulaan ku su mauyaˈan mu.” Kaas misuunan ta puˈ pingawaˈ na nu Megbebayaˈ sug daan pekenuan, adun suklinen dun si Kristu, su tantu guliden. 10 Mendadi saˈ maˈantu, kagina pinggulaula ni Kristu su mauyaˈan nu Megbebayaˈ, miugasan na su kelaunan ta di salaˈ ta. Mitelimaˈ ita tu Megbebayaˈ sekat dig lawas ni Kristu mibaal gilak mainsan. Ndiˈ na kambat puliˈan.
11 Naa, sug daan betad pektamuy, gendawgendaw mekanui ngag belian, diadia mekpuliˈpuliˈ mengilak. Laak pia maˈantu, ndiˈ gusay mawaˈ su nga salaˈ nu getaw mikpuun tu gilak kia. 12 Si Kristu pasiˈ, migilak mainsan salabuuk laak gilak, kig lawasen bayad tu salaˈ nu nga getaw di ndaˈi tamanen. Migingkud dayun ditu gupid nu Megbebayaˈ, dapit lintu, 13 tandaˈ megelat sampay pelebaun nu Megbebayaˈ, daagenen su nga kuntranen. 14 Saˈ maˈantu, pisikesuunen su nga mitelimaˈ tu Megbebayaˈ di ndaˈi gikteben pibian di salabuuk betang inilaken.
15 Miglegintuud dun sug Balakat nu Megbebayaˈ di Misulat Taluˈen, laungen,
16 “Naa iini pasadu pa dinilan,
saˈ mateng nai gendaw kiin ditug binayaˈ gebii buˈ gendaw, laung nu Kaunutan,
betangen ku su nga Palintau di ginaa nilan
mukaˈ pepenggangetu dig delendeman nilan.”
17 Maaˈ laungen padun, “Ndiˈu na pemilangeni nga salaˈ nilan mukaˈ ngag dupangan nilan.” 18 Kaas saˈ mpedasun ita di salaˈ ta, ndiˈ na kambat mengilak adun mbelengi salaˈ.
Mekpesempel naita tu Megbebayaˈ
19 Naa yamu kepetedan ku, kagina maˈantu, danita, ndiˈ naita mendek mukaˈ ndiˈ naita mpiid suled ditu Pengedapan nu Megbebayaˈ piningalan dun su Tampusan Meˈelig Sugud. Mekeseled ita pebian di kenenabi ta, puˈ sabaˈ minatay si Isus. 20 Binaalan ita niin begu bianan lumapus di kurtina kia milet di titengaˈ nu Pengedapan kia. Ki keglapus ta di kurtina kia, sabaˈ nu kepatayen di kurus. 21 Kagina duuni Tampusan Metaas Belian ta megbayaˈ dig balay nu Megbebayaˈ, 22 naa subay mekpesempel ita tu Megbebayaˈ puun tu tugaling di ginaa mukaˈ di kesalig ndiˈ megduaˈduaˈ.+\fr 10:22 \ft Sug balay nu Megbebayaˈ, guluganen su nga getaw suminakup na diniin. Puˈ misuunan ta miugasani ginaa ta di melaat delendeman ta mukaˈ kepiidan ta miksekat di kepatay ni Isus. Su kekpebunag ta tubig, miugasan dademaig lawas ta tubig ndaˈig lamugen. 23 Subay penemalan ta pektalentenay su pedetengen ta, puˈ meseligan su Megbebayaˈ, kaas mesuunan ta menuud su pinasaden. 24 Pegdelendemen ta deliˈ saˈ endutaˈen duni kektinegyungay ta di kekpinetailay ta mukaˈ kenggulaula ta di melengas. 25 Mukaˈ, ndiˈ ta sikpaˈenig betad ta mekpungun pektemuyen su Megbebayaˈ. Puˈ duunig duma ta suminikpaˈ na. Sinangkaliˈ pa tanan mektinikukay ita, adun diadia mpemantekeni kesalig nug dumanen, puˈ mesuunan ta sungu matengi gendaw lumusad puliˈ su Kaunutan ta si Isus.
26 Naa, saˈ penensili menamal ita mekesalaˈ, asa mipesuun na dinita su metuud mekatag dini Isus, ndaˈidun naig lain betang mailak tu Megbebayaˈ adun mbelengi salaˈ ta. 27 Iin laaki pekpelaban ta su ginukuman nu Megbebayaˈ dinita mukaˈ su gembagel gapuy tandaˈ megelaˈ tutungay su nga kumuntra tu Megbebayaˈ. Pekpelaban ta daan lamug mendek ita patiˈ. 28 Puˈ ndiˈ ba metuud, iin sug betad nu pipalinta dini Moises, petain su memilas ditu Palinta kia di ndaˈig lelaat dun, saˈ duunig duaˈ tawan saˈ telu, meketakesiˈ puˈ mikesalaˈ. 29 Saˈ maˈantu, labi pa gembegati ginukuman di getaw tuliud di tulung sia diniin nug Bataˈ nu Megbebayaˈ. Puˈ pemilangenen ndaˈig lagaˈen sug duguˈ ni Isus, bayad di kepetelimaˈen diniin, mukaˈ gindan tug begu pasad nu Megbebayaˈ. Mpeksudiˈanen dadema sug Balakat nu Megbebayaˈ, su metau melelaat di nga mikesalaˈ. 30 Misuunan ta su Megbebayaˈi miktaluˈ, “Naani metau sumuliˈ tu nga getaw mekpelaat dig dumanen.” Miktaluˈ dadema, “Mengukum su Kaunutan di piglegetawanen.” 31 Saˈ mukum dinita su tantu Megbebayaˈ, mekendekendek gupia.
32 Naa yamu, pegdelendem niu deliˈ su mibianan niu saˈ mikpuun pamu mekpetuud dini Isus. Saˈ midelagan naig delendeman niu, pia melauni kelegenay niu, ndaˈ amu daagay. 33 Puˈ taang dun mipiidan amu gupia puˈ pilegetan amu, pimesaitan amu. Taang dun midelaˈig amu di ngag duma mipengumpiidan maˈnia, 34 puˈ milelaat amu gupia tu nga samasakup niu pinikutan, ibangan niu ilan. Miktigel damu dema di kawiˈ di pimetang niu di gempia ginaa, puˈ mituudan amu dun puˈ duun paig daniu melengas pa di ginawiˈ diniu mukaˈ kia, ndiˈ mawiˈ diniu. 35 Kaas, ndiˈ niu belengayi kesalig niu, puˈ saˈ sumalig amu tu Megbebayaˈ, gembagel gupiai sugda dun. 36 Subay mektigel amu di mbianan niu, adun mbaal niu su mauyaˈan nu Megbebayaˈ, malap niu dayun su pinasaden begay dinita. 37 Puˈ ndaˈ ba mesulat di Misulat Taluˈ nu Megbebayaˈ,
“Ndiˈ na maiben
mateng su getaw pedetengen niu.
Ndiˈ melangan.
38 Adini piglegetawan ku pemilangen ku mekesuun, malapen sug begu ketubuˈ sabaˈ nu kesaligen.
Laak saˈ duun dinilani tuliud dinaan,
ndiˈu leliagen dun.”
39 Laak ita pasiˈ, kanaˈ ita duma nu nga suay, kaas gelaˈen nu Megbebayaˈ belengay, puˈ duma ita nu nga sumalig diniin kaas megawen ita.