¹ Naa, ki kesalig kini, alandun iin? Iin su maˈniniˈ. Saˈ mesuunan ta gupia puˈ malap ta su pedetengen ta, iini paingalan ta dun kesalig. Saˈ kanaˈ megduaˈduaˈi pedetengen ta di ndiˈ ta pa maitaˈ, iin dademai paingalan ta dun kesalig. ² Su nga getaw sakup nu Megbebayaˈ kanugdiin, tilimaˈ ilan nu Megbebayaˈ mikpuun tu kesalig nilan. ³ Mikpuun dadema di kesalig ta, misuunan ta puˈ biwat nu Megbebayaˈ su gekleb langit buˈ lupaˈ pibian di tinaluˈen, kaas misuunan ta su kanaˈ ta maitaˈ, iini pigenatan nu maitaˈ.

⁴ Naa pegdelendem niu deliˈ su nga mikauna getaw. Beknanen si Abel, bataˈ ni Adan. Iin, mikpuun tu kesaligen, pingilaken tu Megbebayaˈ sug betang gempia pa di pingilak nu gulangbataˈen si Cain. Tilimaˈ nu Megbebayaˈ si Abel iini mekesuun mikpuun tu kesaligen, puˈ midawat dadema nu Megbebayaˈ su pingilaken. Minatay, laak pia miniben na, duun pai tinakesiˈ dinita ni Abel mekatag di kesaligen. ⁵ Si Enoc dadema. Pilentu nu Megbebayaˈ ditug langit mikpuun di kesaligen, kaas ndaˈ patay. Ndaˈ mbaangay nu ngag dumanen sug bangkayen, puˈ pilentu tug langit su tegilawan lawasen. Su ndaˈ pa pelentuay, liliag dun su Megbebayaˈ, puˈ kiai misulat di Misulat Taluˈ nu Megbebayaˈ. ⁶ Metuud ia, ndaˈiduni leliagen dun su Megbebayaˈ saˈ ndiˈ sumalig diniin. Adini getaw mauyaˈanen mekpesempel tu Megbebayaˈ, subay petuudenen puˈ duuni Megbebayaˈ, mukaˈ petuudenen dadema puˈ sugdaan nu Megbebayaˈ su nga mekpaingabang diniin.

⁷ Si Noe pelum. Saˈ midengegen su tinaluˈ nu Megbebayaˈ mekatag di mpenggulaula ditug binayaˈ gebii buˈ gendaw, asa ndaˈen pa maitaˈ, mikpetuud dun mikpuun tu kesaligen. Binaalen dayuni sekayan butuk. Iinig bian nu kegawen dinilan nu nga gapenen tug bagyu lampap. Maˈantu mipaitaˈen su kesaligen, kaas pimilang nu Megbebayaˈ mekesuun. Iin pai ginukuman nu ngag duma kilawan dinig lumbang, migelaˈ mbinasa.

⁸ Si Abraham pelum. Iin, saˈ inggat nu Megbebayaˈ puˈ megawaˈ diag daan benwanen adun muliˈ dig benwa pinasad nu Megbebayaˈ begayen dun, mikpetuud mikpuun tu kesaligen. Migawaˈ tuˈu pia ndaˈen pa mesuunay su pegengayanen. ⁹ Benaˈ minateng ditug benwa pinasad nu Megbebayaˈ begayen dun, migbebenwa dayun dia mikpuun tu kesaligen. Migbebenwa da dia maˈniin miguliug, puˈ kanaˈ dangen dia. Pigbenwananenig bebelayan luna. Maˈnia dademai pigbenwanan nug bataˈen si Isaac sampay su gapuˈen si Jacob. Su pinasad nu Megbebayaˈ dini Abraham, iin dadema gusayi pinasaden dini Isaac buˈ ni Jacob. ¹⁰ Su saanan nilan dia, pedetengen pa ni Abraham ki gembagel lunsud, pigdelendem na nu Megbebayaˈ mukaˈ baalenen pain, kig lunsud gempageni gentudan dun, saˈitada ndiˈ megebaˈ.

¹¹ Naa si Abraham kini, mikpuun dadema tu kesaligen, mikebataˈ pa gusay, bisan megulang na gupia, mukaˈ ndaˈ mainsan mapet bataˈen su sawanen si Sara, puˈ guminulang dadema. Siliganen su Megbebayaˈ metau mekpenuud tu pinasaden diniin. ¹² Kaas su sala tawan laki, gitunganen dun maˈniin na minatay, puˈ megulang na gupia, iini mibaal pikpuunan nu melaun sapuˈen. Su kelaunanen, maaˈ nu kelaunan nug bitun ditug langit mukaˈ maaˈ nu gelis di geksid dagat, ndiˈ mbilang. ¹³ Si nga Abraham kini, mitembusan nilan su kesalig nilan sampay minatengi gumul nilan. Ndaˈ nilan malap su pinasad dinilan nu Megbebayaˈ, laak misuunan nilan puˈ ditug binayaˈ gebii buˈ gendaw, malap nilan tuˈu su pekpelaban nilan. Puˈ maˈniin pinembaˈ nilan su melayuˈ pa dinilan. Laung nilan puˈ kanaˈ ilan dangen dig lumbang kini, pigbebenwanan laak nilan. ¹⁴ Saˈ upama duuni nga getaw megukit maˈnia nandaw, gempantek puˈ pekpenengaun pa nilan ki tantu pegbenwanan nilan. ¹⁵ Saˈ pimilang sia ni nga Abraham sug benwa bilengan nilan sug danilan gupia benwa, mekepuliˈ dailan ditu, ¹⁶ sabayaˈ ditug benwa pinasad nu Megbebayaˈ begay dinilan. Laak iin tumuˈi pegenguten nilan kig benwa melengas pa dun dig danilan, saˈitada, sug ditu gekbus langit. Kaas iini kesuun ta dun, kanaˈ mpiid su Megbebayaˈ gelalen nilan kig Diwata pektemuyen nilan, puˈ indamanen ilan pegbenwanan nilan ditug langit.

¹⁷ Laak si Abraham, pia pisadan iin nu Megbebayaˈ puˈ meksilaun gupiai sapuˈen, pibaal diniin nu Megbebayaˈ guliden sug buntung bataˈen si Isaac, puˈ pingindananen. Benaˈ mipengindanan, bitangen sug bataˈen dia gentudan gilak mikpuun tu kesaligen, ¹⁸ pia tiluˈan daan nu Megbebayaˈ, puˈ laung nu Megbebayaˈ, “Su sapuˈ nug bataˈ mu si Isaac, iin laaki pemilangen sapuˈ mu.” ¹⁹ Puˈ midelendemen metau mekpetubuˈ puliˈ su Megbebayaˈ, bisan tu nga minatay na. Midawat dayun puliˈ ni Abraham sug bataˈen, saˈitada, maˈniin mitubuˈ puliˈ sug bataˈen.

²⁰ Si Isaac na pelum. Iin, mikpuun tu kesaligen, pinenebianen sug bataˈen si Jacob mukaˈ si Esau mekatag di gempenggulaula dinilan nu nga sapuˈ nilan dig lemaˈ denlag.

²¹ Si Jacob pelum. Saˈ pekpatay na, pinenebianen su nga gapuˈen bataˈ ni Jose, mikpuun tu kesaligen ditu Megbebayaˈ. Mialapen pengundeenanen su sekuden, dayun mektamuy tu Megbebayaˈ.

²² Si Jose dema. Saˈ sungu matengi gumulen, mikpuun tu kesaligen, miktaluˈ mekatag di kegawaˈ nu nga samabansanen getaw Israel ditug Ehipto, mukaˈ pingumbilinen dinilani tinituluˈen mekatag di tulanen puˈ adun uiten saˈ megawaˈ ilan dia.

²³ Si Moises pelum. Iin, mikpuun tu kesalig nu nga mekegulangen, saˈ migigetaw na, iglud nilan, sampay telu bulan.+\fr 11:23 \ft Si Moises, iglud nu mekegulangen, puˈ pilaktag nu gadiˈ ditug benwa Ehipto, subay petain su nga gembataˈ nu getaw Israel saˈ laki. Iini iglud dun nu mekegulangen puˈ minitaˈ nilan puˈ piabataˈ si Moises, mukaˈ ndaˈ ilan mendek sumagaˈ tu pilaktag nu gadiˈ kia. ²⁴ Dayun si Moises, bisan binataˈ nug bai diag benwa Ehipto, benaˈ migineken na, mipauk ingelanan bataˈ nug bai kia mikpuun tu kesaligen. ²⁵ Puˈ laungen tumuˈ pasiˈ meksaliunung di kelegenay nu nga samatawen getaw Israel, su nga piglegetawan nu Megbebayaˈ, sabayaˈ di keliagen tu salaˈ ndiˈ maiben. ²⁶ Pimilangeni kepiidanen sabaˈ nu pedetengenen di metenduˈ nu Megbebayaˈ meglekaunutan pa si Kristu, melengas pa di tibaˈan gimu nu gadiˈ diag benwa Ehipto. Puˈ piktalentenanen ki sugda pa diniin nu Megbebayaˈ ditug binayaˈ gebii buˈ gendaw. ²⁷ Mikpuun dadema tu kesaligen, bilengan ni Moises sug benwa Ehipto, puˈ ndaˈ mendek di gangit nu gadiˈ. Ndaˈ deduaˈay di kegawaˈen diag benwa kia, puˈ maˈniin minitaˈen migabay diniin su Megbebayaˈ ndiˈ maitaˈ. ²⁸ Mikpuun pa pagid tu kesaligen, pitindegenig Lumpuk ta gindan ditug Liniusan, puˈ sinuguˈen degaˈen duguˈ karniru su gulu gegdan nu ngag balay nu nga samatawen. Mingmaˈnia puˈ adun ndiˈ mpatayi nga penganay bataˈlaki nu getaw Israel. Puˈ duuni sesuguˈen nu Megbebayaˈ getaw langit mitenduˈ nu Megbebayaˈ mekpatay tug launan penganay bataˈlaki diag Ehipto, laak ndaˈ mpeduma su nga getaw Israel, puˈ ndiˈen na tuˈu meseledan su ngag balay dinagaˈ na.

²⁹ Su nga getaw Israel pelum, mikpuun tu kesalig nilan, mikebian ilan ditu Gempula Dagat lepeng pekpanaw dailan tug lupaˈan. Su nga getaw Ehipto pasiˈ, saˈ pingeted nilan su nga getaw Israel, pikpulingkasan nilan bianay sug dagat, laak migelaˈ ilan melemes, puˈ pikimput puliˈ nu Megbebayaˈ sug dagat. ³⁰ Su kauliˈ dayun nu nga getaw Israel ditug benwa pinasad dinilan, linumpakan nilan su kutaˈ Jerico. Gendawgendaw mipanaw ilan, linibed nilan su kutaˈ sampay pitu gebii. Su kepitu endawen, midaag gelaˈ su ngag dendingen batu, mikpuun da gusay tu kesalig nu getaw Israel.

³¹ Duunig libun diag lunsud kia Jerico gandang meglaat pekesuunan, ngalanen si Rahab. Iin, mikpuun tu kesaligen tu Megbebayaˈ, ndaˈ mpeduma bunuˈay tu nga samatawen mimilas tu Megbebayaˈ, puˈ pinembaˈen sug duaˈ tawan getaw Israel su keditu nilan minilung tug benwanen.

³² Taˈ mai gempiau pa teluˈen? Daal daitu, puˈ saˈ sia ukiten ku, maiben ku gupia ukitay mekatag dini Gideon, si Barak, si Samson, si Jepte, si David, si Samuel sampay su nga pimuunan nu Megbebayaˈ kanugdiin. ³³ Mikpuun tu kesalig nilan, duun dinilani miglumpak di ngag lain nasud. Migelaˈ nilan dayun daagay su ngag lain nasud. Duunig duma piglepengen uitayi nga sakupen.

Mendadi duuni ngag duma, mialap nilan lain pinasad dinilan nu Megbebayaˈ. Sug duma, mitikem nilani ngag babaˈ nu ngag limaung, kaas ndaˈ ilan mebut. ³⁴ Mikpuun dadema tu kesalig nilan, duunig duma mikepaleng tu gembagel gapuy, kaas ndaˈ ilan mekaˈiday. Duunig duma ndaˈ bunuˈay besi. Ngag duma, milubay, laak mikpuun tu kesalig nilan, migletaban ilan puliˈ. Duunig duma mikedaag gupia di gubat, puˈ mipegebek nilan su nga sundalu nu nga kuminuntra dinilan. ³⁵ Duuni ngag libun milegenan gupia, laak mikpuun tu kesalig nilan, minitaˈ nilan pitubuˈ puliˈig betaˈan nilan minatay na. Ngag duma, kagina laung nilan tumuˈ pa matay sabayaˈ tuliud ilan tu Megbebayaˈ, mingimpauk ilan beluyen di kepetugaˈ dinilan. Puˈ petubuˈenen ilan puliˈ gempia pa ketubuˈ, su ndaˈi gikteben. ³⁶ Duunig duma pingumpiid gupia mukaˈ pimbadas. Ngag duma, binalud kadina mukaˈ pinikutan. ³⁷ Duuni nga binatu, duuni nga biklaˈ gabas, duuni binunuˈ besi. Duuni nga mipanawpanaw ndaˈ tantui gengayanen, mikseluk panit karniru mukaˈ kanding puˈ gempusuk, piglegetan mukaˈ pimesaitan. ³⁸ Ki nga getaw kia, kagina gembageli kesalig nilan tu Megbebayaˈ, kanaˈ mbantang mpeduma dinilan sug lain getaw dinig lumbang. Mipanawpanaw ilan di nga napuˈ limawaˈ, di ngag binentudan, mukaˈ pigbenwanan nilani ngag langeb sampay luak dig lupaˈ.

³⁹ Laak dagid ki tibaˈan nilan kia, bisan migdedengeg gupiai kesalig nilan tu Megbebayaˈ, ndaˈ nilan tagad malap su pinasad dinilan nu Megbebayaˈ. ⁴⁰ Iini ndaˈ nilan tagad malap dun, puˈ duun pai gempia pegdelendemen nu Megbebayaˈ mekatag dinita. Puˈ pigdelendemen ndiˈ megelaˈ menuud su pinasaden dinilan, subay mpeduma ita dun.