2 Kii nēē kaakusiirtō :pērēētuus choo lēē lo, kuumut :Yēēsu Pēētērō, Chēēmis ākōō Chowaana kupa ākōy tul aka nyoo tōrōōr wōloo kimālēēkitēē chiich. Kumii tulwoonoonēē, kuwala :Yēēsu kilēpēyiit nkōō taayuung'waang'. 3 Kuwāliisyō :sirōōchiich kureelachiniituuy kilē tyal. Kiiting'ēy rēēlin nyoo kimēēmuukēy :chiich nkōō kōōrēē kuurēēliit sira kilēē nyoonēē. 4 Kuuro :kiineetanichoochēē sōmōk *Eliicha kimii ākōō *Muusa kung'āloolchinii Yēēsu. 5 Kumwoochi :Pēētērō Yēēsu kilē, “Kiptaayaan, karaam āmu kimii yi, kanyeech keeteeka sōpōōtwēēn choo lēē sōmōk, nyoong'uung' ākoong'o, kipō *Muusa aka, kipō *Eliicha aka.” 6 Kiimēēnkēt :Pēētērō kiyoo kiimwoorēy, āmu kiiwāriisyō :akwaaneek nyēpō kwōng'uut.

7 Nyoo matyaan, kuulaampuus :pooltō akwaaneek, akichōōnō kuut pooltoonoonēē kilē, “Wēēriinyuun :nyi nyoo āchāmēy, ātēērchii kiyoo mwoorēy.” 8 Nēē lē :kiineetanichoochēē keemarartee, kimaakuurō chiich aka tōkōl, Yēēsu ākityōōn nyoo kiimii ākōō akwaaneek.

9 Kii nēē mii kurēkuunēē tulwēē, kukaaman :Yēēsu kiineetanichoochēē kilē, momwoochi chiich aka tōkōl kiyoo keero :akwaaneek ākōy kung'eetee *:Wēēroo Chiich meerat. 10 Kikaaman keey :kiineetanichoochēē maamwaarta ng'aleechoochēē, akuteepee keey kilē, “Ng'uutuuy nee :ng'ālyoontooni pō ng'eeteetaa meerat?”

11 Kuteepa :kiineetanichiich Yēēsu kilē, “Āmu nee sikumwoorēy :koonēēt chēpō ng'ātuut kilē wārākēē *:Eliicha kupōk?” 12 Kuwālchi :Yēēsu kilē, “Ntōrōōruuy *:Eliicha kilēē nyoonēē kupōk sikusat tukun tōkōl. Āmu nee /sikeesir nkōō siruut chēpō Iriin kilē nyōōruuy *:Wēēroo Chiich nyāriluut chaa chaang' /ākēētāyēy?” 13 Āmwoorwook nyuun kilē kiikuchō *Eliicha, akii-irchi :pichoochēē inyeentee kir aka tōkōl kilēē wōli kiimārtooy akwaaneek kilēē wōloo kiikusirta akipō inyeentee.

14 Paani kāwō :Yēēsu ākōō kiineetanichiich wōli kiimii kiineetanik chuuchō walak, kuuro ku kēērumchi keey :piich chaa chaang' yi kimii :akwaaneek, akiimii mpō :koonēēt chēpō ng'ātuut kukwiintoochinii keey ākōō kiineetanichoochēē. 15 Paani keero :piich Yēēsu, kupāypāyiituuy akutorooyta kipa kuutaakwees inyeentee. 16 Kuteep :Yēēsu kilē, “Ākwiintoochinii nee?” 17 Kumwa :chiich aka nkōō kwēēnuu pichoochēē kiikiirum keey kilē, “Koonēētiin, kaamutuun laakweenyuun, āmārēy isoopkoon. Ting'ēy *toomirmiir nyaa ra nyoo irēy inyeentee kimang'alaal. 18 Nēē ng'ēēti :toomirmiiryoonoonēē, kuwiirchinii ng'wēny, aku-irēy kuchōōnēē :puchaan kuut. Nyārēy keeleechiich akuyaam :pōōrtō tōkōl. Kāāmwoochi kiineetanikuuk ku-oon toomirmiiryooni ra, kimaakuumuuk.” 19 Kumwa :Yēēsu kilē, “Muutyō akwaan choo mooting'ēy kaarana. Ātēpēē nkōō akwaan ākōy āyu? Āmurtoochinook ākōy āyu? Amutwaan wēēroonēē.” 20 /Kēēmuti Yēēsu wēēroonēē. Paani keero :toomirmiiryoonoonēē Yēēsu, kuutimtiim wēēroonēē akuwiirchi ng'wēny akumiimil akichōōnēē :puchaan kuut. 21 Kuteepee :Yēēsu apootaa wēēroonēē kilē, “Kung'eetee āyu yoo kii lēē nyēēnyi :wēēri?” Kuwālchi kilē, “Kung'eetee ku laakwa. 22 Kiikuutyam :toomirmiiryoonoonēē nkōō pērēētuus chaa chaang' kumārēy kuukēētēy, kuwiirchinii ma ntā ku pēr. Iriireeneech, akiisārwēēch nēē imuukēy.” 23 Kumwoochi :Yēēsu kilē, “Āmu nee siimwaara kilē ‘Nēē imuukēy’? Muukēē :kir aka tōkōl nkōō chiich nyoo rānēy Iriin.” 24 Kuriir :apootaa wēēroonēē kilē, “Ārānēy Iriin, ākoosoomiin itoorētoon aran kitya.” 25 Paani keerō :Yēēsu piich kāmwēru kuurumchi keey yoonēē, kilēēchi toomirmiiryoonoonēē ra, “Toomirmiiryooni koroot amāng'āloolēy, āmwooruun kilē chōōnēē wēēri āmēē-ōōchi keey kuureer.” 26 Kuunchō :toomirmiiryoonoonēē akuutimtiim wēēroonēē akuchō saang'. Kuuritō keey wēēroonēē kilēē yoo kama. Kumwa :piich chaa chaang' kilē, “Acha! Kaakima :wēērii.” 27 Kunam :Yēēsu ēēruu wēēroonēē akuutoorēt kung'eet. Kuuryoong' :wēēroonēē. 28 Kii nēē chuut :Yēēsu kō ākōō kiineetanichiich, kuteep :kiineetanik Yēēsu kilē, “Āmu nee tamaakuumuuk kee-oon toomirmiiryoonoonēē ra?” 29 Kuwālchi :Yēēsu kilē, “Mēēmuukēē /kee-oon toomirmiir nyoo lēē nyoonēē, nēē /makusa [/akeerukuut keey].”^a

30 King'eet :Yēēsu ākōō kiineetanichiich nkōō yoonēē, akupuntēērēē Kalilaaya. Kiimāmārēy :Yēēsu kusōwu :chiich aka tōkōl wōloo kiimii :inyeentee, 31 āmu kimii kuunēētēy kiineetanichiich. Kimwoochi kilē, “/Kunāmēy *Wēēroo Chiich /ākēētē ēēruunēpō piich. Pārēy :pichoochēē *Wēēroo Chiich aku nēē mii pērēētuu nyēpō sōmōk, kung'eetee meerat.” 32 Moosōwu nyuun :kiineetanik kiyoo kiimwoorēy :Yēēsu, kuuwar kuteep.

33 Nēē mii pērēētuu aka, ku-it :Yēēsu ākōō kiineetanichiich Kaaparnaam. Nēē mii paani mii kō, kuteepee :Yēēsu kiineetanichiich kilē, “Kookwiintoochinii nee nkōō aree?” 34 Kumaakuwālchi kir :kiineetanik, āmu kiimii kukwiintoochinii keey nkōō aree kilē ng'oo nyoo ōōw nkōō akwaaneek. 35 Kutēpō :Yēēsu ng'wēny akukuur kiineetanichiich chu kii lēē taman nkōō ārēēny akumwoochi kilē, “Nyoo mārēy kilēku nyoo ōōw ku-āp keey ng'wēny akicham kilēku kipāyityoontoo piich tōkōl.” 36 Paani keewaang' kumwa kilēē nyoonēē, kunam :Yēēsu laakwa akukany kuuryoong'ēē taayuu kiineetanichiich. Kunamee laakwee ēēruunēchiich akilē, 37 “Chiich aka tōkōl nyoo tookēy laakwa nyoo lēē nyi āmu nyaanyuun, ku kataakan, ku nyoo kataakan, ku kataak Iriin nyoo kiiyookwoon.”

38 Paani keewaang' :Yēēsu kumwa kilēē nyoonēē, kumwoochi :Chowaana kilē, “Koonēētiin, kakuuroo chiich nyoo kā-ōōnēy *toomirmiirēy chaa raacheen nkōō kaarineeng'uung'. Keetayee, āmu moomii ākōō achaan.” 39 Kumwoochi :Yēēsu kilē, “Maatayee chiich nyoo lēē nyoonēē, āmu moomii :chiich nyoo irēy ng'al chēpō kwōng'uut nkōō kaarineenyuun akung'alaaleenaan nkōō oor nyaa ra. 40 Āmu chiich nyoo māsāsēēch, ku nyoonyoon. 41 Koomwoorwook kilē, chiich nyoo kākōōnook pēr choo ārēēy āmu akwaan chaachuuch, /kēētēnii mālāk.

42 Chiich aka tōkōl nyoo ka-ir chiich nyoo tākukuskus kaaraneenyiin kupēt, ku kaykay /kēērāti korpopar nyoo nyikiis kaat /ākēēwiirchi araaray. 43 Nēē irin :ēēruung'uung' ipēt, itilta, āmu kaykay inyōōru *sopoon nyēpō ākōy kumēēting'ēy ēēr kusiir iting'ēy ēēruunēk tōkōl, /ākēēwiirchiin ma nyēpō ākōy nyoo māmēērēy.^b 45 Nēē irin :kēēltong'uung' ipēt itilta, āmu kaykay inyōōru sopoon ichō kimwaal, kusiir iting'ēy kēēlyēēk tōkōl /ākēēwiirchiin ma nyēpō ākōy.^c 47 Nēē irin :koontong'uung' ipēt, ipālu, āmu kaykay iwō Kaa Iriin nkōō koong' ākoong'o kusiir iting'ēy koonyiik tōkōl /ākēēwiirchiin ma nyēpō ākōy, 48 wōloo māmēērsōōt kuutyey, amāmēērēy ma ākōy.^† 49 /Kuutiliilēē piichoochēē tōkōl ma. 50 Kāroomō :muunya, aku nēē poot ānyinyintanyiin, i-irtooy nee sikuureer kuchāmu? Kunyuun, akanya kimii :muuny^d or nyoong'woong', ākoomāng'iisyō nkōō kaalya ākwoonēēk nkōō ākwoonēēk.”