3 Ku toomō kupa :kāāyooytooyiichoochēē, kilēēchi :Yēēsu, “Ameenamaata :chiich kir aka tōkōl paani āmii āpēētii. Moo-āp :chiich mpō kaarya, saapaa kātōōn, āmiisyō, rōōpiyō ntā ku sira aka. 4 Nēē kutaakaak nkōō kō aka tōkōl, ātēpi kaayoonēē ākōy apeeree kōōroonoonēē. 5 Ku nēē mataakaak :piich chēpō kōōroonoonēē, āpēēchinii keey, aparta tēērit nkōō kēēlyēēkwook sikung'uutu kilē tākuting'ēy pichoochēē ng'ōōkikwaak.”

6 Paani keewaang' :Yēēsu kuuyoomiisēy kiineetanichiich, kupēēchi keey kipa kimanaateera kēēstoon choo kiimii saang'uu kōōroonoonēē ku-āmtootēy lōkōōy choo kāroomēēn akuusoopootēy piich choo mnyoonchootēēn.

7 Kii nēē teer :Pāytooyiin *Ērōōtē ng'al choo kiimii ku-irēy :Yēēsu, ku-am :ng'aleechoochēē mēt, āmu kiimwoorēy :piich walak kilē /kiikeeng'eeta Chowaana meerat. 8 Kimwoorēy :walak kilē *Eliicha :nyoonēē, kimwoorēy :walak kilē, ākoong'o nyēpō *ōōrkooy chēpō kēny nyoo kang'eeta meerat.

9 Paani kateer *:Ērōōtē kilēē nyoonēē, kumwa kilē, “Nku kyaamwaartaa /keetilta mētpō Chowaana. Ku ng'oo :chiichi mii ku-irēy ng'aleechu tōkōl?” Kuwas *:Ērōōtē kilē kuuro Yēēsu.

10 Paani kawaraka :kāāyooytooyichoochēē, kumwoochi Yēēsu kiyoo kiipa ku-ir. Kuwō :Yēēsu nkōō akwaaneek kutāchi keey kōōroo Peetsaayta akupa kutēpi wōloo kimālēēkitēē :chiich aka tōkōl. 11 Kii nēē sōwu :piich wōloo kāwo :Yēēsu, kutuup. Paani ka-it :pichoochēē yoo kiimii :Yēēsu, /keetaak. Kuuneet :Yēēsu pichoochēē wōloo lēē Pāyuunātoo Iriin akuusoop choo kiimārēy /kēēsoop.

12 Ku paanta kutuuriit kōōrēē, kupēēchi Yēēsu :kiineetanichiich taman nkōō ārēēny akilēēchi, “Mwoochii pichu kupa kēēstoonichu lēēkitēē yēēnyi kipa kuwasaata kiyoo āmēy nkōō wōloo ruusōōt lang'atuuni āmu kimii suur kwēēn.” 13 Kuwālchi nyuun :Yēēsu kilē, “Ātēē kir nyoo āmēy.” Kilē :kiineetanik, “Kiting'ēy makatiin muut nkōō kaaraak ārēēny kipaat, tōkōl keepa kee-al āmiisyō nyoo yāmēy pichu tēēnō chu.” 14 Kii chaang' :pichoochēē choo kii-itēy murēn ēlup muut. Kuwālchi :Yēēsu kiineetanichiich kilē, “Āmwoochii :pichu kutēpi ng'wēny nkōō konom konom.” 15 Ku-ir :kiineetanik piich kutēpi ng'wēny tōkōl kilēē nyoonēē. 16 Kunam :Yēēsu makatiinachoochēē muut ākōō kaaraakik ārēēny, kuuro parak akumwoochi Iriin kōōnkēy, kupuutil makatiinak ākōō kaaraakik akuutē kiineetanichiich kuchārchinootō piich. 17 Kyoomiisyō :tōkōl kuti piryoonchō. /Keerum kiituukaan kunyir kitaseen taman nkōō ārēēny.

18 Kiimii :pērēētuu aka nyoo kiisa :Yēēsu ākōō kiineetanichiich. Kuteep :Yēēsu kiineetanichiich kilē, “Mwoorēy :piich kilē aneen ng'oo?” 19 Kuwālchi :kineetanik kilē, “Mwoorēy :piich walak kilē inyēēn Koopootiisāniin Chowaana, kumwoorēy :walak kilē *Eliicha. Kumwoorēy :walak kilē inyēēn ākoong'o nyēpō *ōōrkooyiipō Iriin nyoo kang'eeta meerat.” 20 Kuureer kuteepa :Yēēsu kiineetanichoochēē kilē, “Aa akwaan, āmwoorēy kilē aneen ng'oo?” Kuwālchi :Pēētērō kilē, “Inyēēn *Meesaaya nyoo kēēyookwēēch :Iriin.” 21 Paani kāmwooru :Pēētērō kilēē nyoonēē, kikir :Yēēsu kiineetanichoochēē mamwaarta kilē *Meesaaya inyeentee.

22 Kuureer kumwoochi :Yēēsu kilē, “Ākōy kunyōōru *:Wēēroo Chiich nyāriluut chaa chaang', akutāyēy inyeentee :kāāntōōy, *tisiik choo ēēchēēn ākōō koonēēt chēpō ng'ātuut. /Kupārēy aku nēē mii pērēētuu nyēpō sōmōk /keeng'eetee meerat.”

23 Kitas taay :Yēēsu kumwoochi piich tōkōl choo kiimii yoonēē kilē, “Chiich aka tōkōl nyoo mārēy kutuup ng'aleechuuch, kutay kiyoo mārēy :moonyiin, akicham /keenyariil pērēētuu aka tōkōl akipō aneen,^a akuchō kutuupkaan. 24 Chiich aka tōkōl nyoo mārēy kusāru sopoontanyiin, kuupootēy, ku nyoo kēētētō sopoontanyiin akipō aneen, kusāruuy. 25 Kāroomin nee nyoo nyōōruuy :chiich nēē rumchi keey tukun tōkōl mu ng'wēny, akuupoot tukun tōkōl?”

26 Kitas taay :Yēēsu kumwoochi piich kilē, “Chiich aka tōkōl nyoo māmārēy kumwaartaareenaan keey akutay ng'aleechuuch, ātāyēy *Wēēroo Chiich, pērēētuuni āchōōnēy nkōō lēpkēēyēēnyuun, ākōō nyēpō Paapa ākōō nyēpō *malaykeen choo tiliilēēn. 27 Aku āmwoorwook man kilē mii :piich walak yi choo mamēērsōōt kitoomō kuuro Pāyuunātoo Iriin.”

28 Nēē mii paani karook :pērēētuus choo lēēkit sisiit kung'eetee kimwooru :Yēēsu ng'aleechoochēē, kuumut Pēētērō, ākōō Chowaana ākōō Chēēmis akupa ākōy tul parak kuwō kusa. 29 Paani mii :Yēēsu kusooyēy, kuwala :tokochtanyiin akuwāliisyō :mpō sirōōchiich kureelachiniituuy kilē tyal.

30 Paanoonēē kutooku piich ārēēny kung'āloolēy nkōō inyeentee choochēē ku *Muusa ākōō *Eliicha. 31 Kiikiilaampuus akwaaneek lēpooyinpō Iriin, akiing'āloolēē tōkōl wōloo kiiwō kumēērtooy :Yēēsu nkōō Chēērusālēēm sikuusilta mākuut chēpō Iriin.

32 Paani kiing'āloolēy :Yēēsu nkōō mpō *Muusa, ku kiikiikunam :rwoon Pēētērō ākōō kiineetanik chuuchō ārēēny kiimii tōkōl. Paani kāng'ēētyō :kiineetanichoochēē, kuurō Yēēsu ku keelaampuus :lēpooyin akiimii nkōō mpō *Muusa. 33 Kii nēē mii kupēēchinii keey mpō *:Muusa, kumwoochi :Pēētērō Yēēsu kilē, “Kiptaayaan, karaam āmu kimii yi, kanyeech keeteeka sōpōōtwēēn choo lēē sōmōk, nyoong'uung' ākoong'o, kipō *Muusa aka, kipō *Eliicha aka.” Kiimēēnkēt :Pēētērō kiyoo kiimwoorēy.

34 Kutākumii :Pēētērō kung'āloolēy, kuchō :pooltō akuulaampuus akwaaneek. Kiiwāriisyō :kiineetanichoochēē paani kiilaampuusēy :pooltoonoonēē. 35 Kuchōōnō :kuut poolta nyoo kiimwa kilē, “Wēēriinyuun :nyi nyoo lēwēnoot, ātēērchii kiyoo mwoorēy.”

36 Paani /kaakēēmwooru ng'aleechoochēē, kilēku Yēēsu ākityōōn nyoo kiing'ētu nkōō yoonēē. Kisiisyō :kiineetanik nyoo moomwoochi chiich pērēētuusyēchoochēē ng'alēēchoochēē kii-iriisyō pērēētuunoonēē.

37 Paani kayyeech kōōrēē, ku kaakurēkunō :Yēēsu ākōō kiineetanichiich tulwēē, kupka :piich chaa chaang' kunyōōru.

38 Kukuursyō :chiich nkōō kwēēnuu pichoochēē kilē, “Koonēētiin! Roo kee :wēēriinyuun nyi. Laakweenyuun nyi ākityōōn. Āsoomiin iriireenaan. 39 Nāmēy *:toomirmiir nyaa ra, aku paani kanam, kuunchō, akuwiirchi keey ng'wēny akuchōōnō puchaan kuut. Tāsēy taay kuunyāriilēy aku māmētooy. 40 Koosoom kiineetanikuuk kuu-oon toomirmiiryooni ra kuwēēro wēēri, kimaakuumuuk.”

41 Kumwa :Yēēsu kilē, “Muutyō akwaan choo mooting'ēy kaarana akyoochuunnyō. Ātēpēē nkōō akwaan ākoomurtoochook ākōy āyu? Mutuu wēēriing'uung' yi.”

42 Kumii kēēmutēy wēēroonēē, kunam :toomirmiiryoonoonēē kuwiirchi ng'wēny. Ku-oon :Yēēsu toomirmiiryoonoonēē ra, akuusoop wēēroonēē. Paani kāsop, kunam akuu-ōōchi apoonyiin.

43 Kikwōng' :piich tōkōl choo kiimii yoonēē, paani keero wōloo kiilēē :kaamuukaa Iriin.

Kitākukwōng'sōōt :piich tōkōl akipō tukun choo kii-irēy :Yēēsu, kumwoochi :Yēēsu kiineetanichiich kilē, 44 “Āyāpchi iit kir nyoo āmārēy āmwoorwook akaanamee mēt. /Pākēēnāmēy *Wēēroo Chiich /ākēētē ēēruunēpō piich.” 45 Moosōwu nyuun :kiineetanik kiyoo kiimwoorēy :Yēēsu. /Kiikuwung'a akwaaneek māsōwu, kuuwar kuteep ng'aleechoochēē.

46 Kitoowu :kiineetanik kumooyō kilē ng'oo nyoo ōōw nkōō akwaaneek. 47 Paani kāsōwu :Yēēsu kiyoo kiimii koopkootuutēkwaak, kunam laakwa nyoo kiimii yoonēē, kukany kuuryoong'ō yoo kiimii :inyeentee, 48 akumwoochi kiineetanichiich kilē, “Chiich aka tōkōl nyoo tookēy laakwa nyoo lēē nyi āmu nyaanyuun, ku kataakan. Ku chiich nyoo kataakan, ku kataak Iriin nyoo kiiyookwoon. Nyoo āpēy keey ng'wēny nkōō :akwaan, ku nyoonēē :nyi ōōw.”

49 Kimwoochi :Chowaana Yēēsu kilē, “Kiptaayaan, kakuuroo chiich nyoo kā-ōōnēy *toomirmiirēy chaa raacheen nkōō kaarineeng'uung'. Keetayee, āmu moomii nkōō achaan.” 50 Kuwālchi :Yēēsu kilē, “Maatayee chiich nyoo lēē nyoonēē, āmu chiich nyoo māsāsook ku nyoong'woong'.”

51 Kii nēē kaakuriichi Yēēsu :pērēētuusyēchiich choo /kipākēē-āpēē kuwō kipsēnkwēt, kurat moonyiin akutāchi keey nkōō kiineetanichiich Chēērusālēēm.

52 Kuuyooytō :Yēēsu piich walak kupa kēēstoon choo kiimii *Samariya kuuntoroorteera inyeentee sipākuchēpchi wōloo muung'ēē. 53 Paani ka-it :pichoochēē wōloonēē, kutay :piich chēpō kōōroonoonēē pō *Samariya kutaak Yēēsu, āmu kiimii kuwēētii Chēērusālēēm.

54 Paani kamwaarta :pichu /kākiiyooytooy kilē katay :piich chēpō kōōroonoonēē kutaak Yēēsu, kumwoochi :Chēēmis ākōō Chowaana Yēēsu kilē, “Kiptaayaan, Ki-irtooy nee pichu? Ara kimwoochi Iriin kuuchuunu ma kuchōōnō kipsēnkwēt kupeel akwaaneek?” 55 Kuwarak keey :Yēēsu akukar koong' kiineetanichoochēē ārēēny. 56 Kuwēēchi keey :Yēēsu ākōō kiineetanichiich kōōrēē aka.

57 Paani mii kuwēētii, :Yēēsu ākōō kiineetanichiich, kilēēchi :chiitō aka, “Ātuupiin ārii aka tōkōl yoo kēēwō!” 58 Kuwālchi :Yēēsu chiichoonēē kilē, “Ting'ēy rēēlwēy kēpēnoot choo māng'ēy, akuting'ēy :tāriit kooriikwaak, wōloo nyuun māting'ēy *:Wēēroo Chiich wōloo muung'ēē.”

59 Kumwoochi :Yēēsu chiitō aka kilē, “Tuupaan.” Kilēēchi :chiichoonēē Yēēsu, “Kiptaayaan, kanyaan āwootup apoonyuun kupōk saatuupin.” 60 Kuwālchi :Yēēsu chiichoonēē kilē, “Mētii piich choo mēērootēēn kutup choo mēērsōōt, ākiichōōn i-amtaata lōkōōy choo kāroomēēn chēpō Pāyuunātoo Iriin.”

61 Kuureer :chiitō aka kumwoochi Yēēsu kilē, “Ātuupiin Kiptaayaan, aku kanyaan nyuun kipōk āwooyoomiis piich nkōō kaaw.” 62 Kuwālchi :Yēēsu chiichoonēē kilē, “Chiich nyoo nāmēy mōkōōmpoo tich akuurōōtēy lēt kumānyoolchinii Pāyuunātoo Iriin.”