Siriintēē ākōō paani /kiikusirēy: Kiimwooru :kāāntōōy chēpō kaaniisa chēpō taay kilē kiisirēy :Mataayo ng'aleechu pō sopēē ākōō pāyiisyoo Yēēsu. /Kiikikuurēē Mataayo mu kaarinee aka Laawi akii kwāriintoo *kōōti. Muukēē kilē /kiikusir kiitapuuni kitoomō /keesir Maarkō, Luuka ākōō Chowaana. Ranaat kilē /kiikusira kiitapuu Mataayo taay kuutii Aramik ntā ku Epuraanik kēnyii nyēpō 40-50 king'eeta /kēēnam Yēēsu /akēēwālchi lētuun kuutii Kirik. /Kiikusirchinii kiitapuuni Yāwuutik. Pō koomānuut kumwoochi :Mataayo piichiich Yāwuutik kilē maatay :Yēēsu ng'ātuut chēpō *Muusa kilē māpō koomānuut ntā kilē māpō man.

Ng'uutuuy nyuun mpō :Mataayo kukaraam kilē kii reelacha koonēētuut chēpō Yēēsu. Kiing'ulēy koonēētuutēchu ākōō ātēpuut chēpō Yāwuutik wōloo nyuun /kiikung'oor tukuuchu mu Ārāruut nyēpō Kēny. Kiisulta :Yēēsu ng'al chaa chaang' choo /kiikusir akipō inyeentee mu Ārāruut nyēpō kēny. Kiituup :Yēēsu ng'ātuut chēpō *Muusa wōloo nyuun kitay ātēpuut chaa chaang' choo /kiikutāsi. Kiilōōwiit keey :Yēēsu akipō wōloo kii-āptooy *:Parisaay ākōō koonēēt chēpō ng'ātuut. Kii paypay :Mataayo akipō wōloo kii-āptooy keey *:Parisaay kilē kipō man. Kilēē kwāriintoo *kōōti ku kiinyaril mpō inyeentee mu muulētoo pichu.

Kiyoo mii kiitapuuni: Mwooruuy :kiitapuuni akipō sopēē nyēpō Yēēsu king'eetee /keenam ākōy /keepa /kēēkorkootēy mu kimurtooyoon, nēē ityō kung'ēētunēē meerat akuwō kipsēnkwēt. Mwooruuy akipō pāyuunātoo Iriin nyoo rēēl, nyoo /kiikung'oong'u kipunuunō Yēēsu. Kiing'ulēy :koonēētuut chēpō Yēēsu ākōō chēpō *Parisaay ākōō koonēēt chēpō ng'ātuut mu oortin chaa chaang' mu kiyoo maraat ku-ir :piich /takeecham mu taayuu Iriin. Kēētēēnō :Yēēsu koonēētiisyeenyiin ‘kipkeetiin choo /kātākēēryākēy’ choo māyāmēy keey /kēētō loo nyoo kiikuyoosiit (9:17). Kiisiirēy keey :koonēētuutēchiich ākōō ātēpuut chu kiikumii, aku nyuun /kiisiltooy ng'al chaa chaang' choo /kiikung'oor kēny. Ting'ēy :kiitapuuni lōkōōy chēpō Yēēsu choo lēē muut: 1) Akipō wōloo lēē :pāyuunātoo Iriin (5-7), 2) Akipō wōloo nārtooy :pāyunātēē (10), 3) Kārkēēyin akipō pāyuunātēē (13), 4) Ng'ātuut chēpō māng'oot ākōō pāyuunātoo kaa Iriin (18), ākōō 5) Akipō lēt nyēpō ng'wēny ākōō koopēliisyō nyoo nyōōruuy :pāyuunātēē (24–25). Woontēērēē :kiitapuu ng'ātuut nyoo ōōw kilē /keepa /kee-ir piich chēpō kōōrootin tōkōl kilēku tuupiipō Yēēsu.

Lōkōōyiichiich: Mārēy :Mataayo kung'uutu kilē Yēēsu nyi /kiikung'ōōr mu Ārāruut nyēpō Kēny kilē rōōptooy pāyuunāt nyoolēē nyēpō Tāwuti (lēēkit kēnyii nyēpō 1000 kutoomō /keenam Yēēsu). /Kākung'uutu nyuun Yēēsu kilēē sintaaryaa pāytooyiin Tāwuti ākōō *Apraam (1:1). Āpēnuutēchu lēē taman ākōō ang'wan chu mii kunyil sōmōk ākōō kooyēruutēchu /kākurāru, kimii kiyoo ryoontooy. Taman nkōō ang'wan kuuryoontooy pāytooyiin Tāwuti ku sōmōk kuuryoontooy kiyoo chōōnēē Iriin. Kiikōrōmiit nkōō Yāwuutik chaa chaang' kusōwu kilē Yēēsu ku kii mā pāytooyiin nyēpō ng'wēny kilēē pāytooyiin Tāwuti. Wōloo nyuun /kiinkēt choo ng'ērin kilē inyeentee ku kii chōōnēē wōloo mii :Iriin kilēē pāytooyiin nyēpō toomirmiir mu pāyuunāt nyēpō toomirmiir nyoo ōōwiituuy kisiir wōloo pkootitooy :piich.

Kāmwooru :Mataayo ng'ooruut choo lēēkit 70 choo pkoonēē Ārāruut nyēpō Kēny, āmu kiimārēy kung'uuti Yāwuutik kilē Yēēsu ku kii *Sāruuniin nyi kiiyoomiis :Iriin kuuyoochi akwaaneek. Wōloo nyuun mēērōōtēy :Mataayo Yēēsu kilēē *Sāruuniin ākōō Pāytooyiin nyēpō Yāwuutik kipaat (1:21), aku kiiro kilēē Sāruniin nyēpō ng'wēny tōkōl (4:13-16), Pāytooyiin nyēpō Toomirmiir aku Kiptaayaan nyēpō ng'wēny tōkōl (28:19).

Ng'ālyoontoo Kirik ‘Christos’ (*Kiriistō) ākōō nyēpō Epuraanik ‘Mashiach’ (*Meesaaya) ku nyoo iilaat, akuumuutēy tōkōl Pāytooyiin, nyoo kiing'oor *:ōōrkooy chēpō Iriin kilē chōōnēy. Siruutēchu pkoonēē Ārāruut nyēpō kēny kung'uutuuy kilē maachō :Yēēsu ng'wēny kipaat nyoo kii moomii chēpuut, kii chēpuut nyoonēē nyēpō Iriin kung'eetee kēny. Nēē pāyiisyēērēē Epuraan ‘wēērii’ ku ma kilēē laakwaa chiich kipaat. Āpuuy kārkēēyin nyēpō ātēp nyoo ting'ēy ‘wēērii’ ākōō ‘apoonyiin.’ Kichaan tōkōl laakōōpō Iriin āmu kii-ireech :Iriin, akeekarkeey ākōō inyeentee. Piich choo rānēy Yēēsu akilēku tuupiichiich /kēēkuurēē ‘laakōōpō Iriin’ mu araa toomirmiir.